Ti-Dindaan ń nīn bí unil maŋfal wiiŋyi kɔkɔn
16
1 Unil màkà, ama ti-Dindaan di lèekī min u làá ŋée.2 Unil dàkafī yii tin u pée ŋáańee kɔkɔ ŋān̄ ní, ama ti-Dindaan di kpèé ki wāĺ unil pɔbilin.
3 Tin kɔkɔ a là kí ŋée, dūú ŋá ti-Dindaan ŋaan, ní kí ŋmā kí ŋá tin a bɔ́ntèe.
4 Ti-Dindaan nyí kun pu ní u náań tiwan kɔkɔee. U náań unikpiti mun ki cíitì ŋwiin ŋun u làá dáaĺ u-tafalee ní.
5 Ti-Dindaan ná bilambidambi, báà án ŋá pu, u làá dáaĺ bi-tafal.
6 Dineeŋkpaandi nì ibaamɔn pu ní unil kāntí ikpiti pɔ̄tam. Unil un fàŋkí ti-Dindaanee sáń ikpiti ní.
7 Unil bimbim yaa fáatiǹ ti-Dindaanee, u yàntī u nì u-nannanliibi gba ń mɔ̄ɔkì ní.
8 Unil ń dī tibulcin pu kí ká tigaajawan fiiiyee sɔ́ǹ ú dī isaŋkpiti pu kí ká tigaajati tikpil.
9 Unil pɔbil poon ní u bɔ́ntí nsan ŋun u làá còom̀ee, ama ti-Dindaan di lèekī ŋun u làá nóóyee.
Alaŋkpan ŋin sòoǹ bibɔtiibi puee
10 Unimbɔti bɔti di kā ubɔti nyɔkɔn ní u sòoǹ, an kaa cáá yii u sòon̄ ki yīntì ibɔsoon poon.
11 Ti-Dindaan cee ní saniyab bin bí deedeeyee nyēē, ataŋkpaŋmantikaa ŋin kā tilɔtinee kɔkɔ nyiŋfiŋu sá u-tundi ní.
12 Bibɔtiibi ná binib bin ŋáań ikpitee, di sá yii deedee di tìì dibeel mpɔn.
13 Bin sòoǹ ibaamɔnee bɔti di fáatì bibɔtiibi, bi néeń binib bin sòoǹ tibɔti deedeeyee ní.
14 Ubɔti ŋuul sá ŋkpituun ní, ama uciŋfiti ŋūǹ kí sɔ̀ŋkì-dì
15 Ubɔti nimbiin yaa ŋān̄ee, an sá dimaŋfal ní, u-ŋanti bí kii ukpaasiitaayee ní.
Unil nín máaǹ kí nīn bí min samaa kansikinee laŋkpaŋŋi
16 Unil ń nīn cáá iciin sɔ́ǹ ú nīn cáá sindaariya. Unil ń nīn cáá dinyil sɔ́ǹ ú nīn cáá animbil kúti.
17 Deedeedambi còom̄ nsan ŋun tèen̄ee poon ní ki gɔ́ntí tikpitil. Unil un nyí u nín còom̄ puee fìil̄ u-maŋfal ní.
18 Dilambil cáǹ unil dinàandin, ní dibadakal cáǹ unil dilitilin.
19 Unil ń sìntīǹ u-ba taapu kí nīn bí biwɔfib kansikinee sɔ́ǹ u nì bilambidambi ń nīn yàkatī tigaajawan.
20 Unil un yaa pílifí ti-Dindaan bɔtee, án làá bútí-u, un yaa máká ti-Dindaan puee bí mmɔnni.
21 Unil un sòoǹ tibɔti nì iciinee ní bi yíì unyil. Dinyɔɔbummɔɔndi din u sòoǹee di kútí dinyil.
22 Iciin sá kii nnyimbul ŋun tìì dimaŋfalee ní ki tīī un cáá-iee. Bigbaambi bi-ba gbaandi di dátí bi-tafal.
23 Unil un cáá iciinee dàkafī ní kí nín sòoǹ, ní u-nyil mɔ̀tīi kútí tin u sòoǹee pu mpɔn.
24 Dinyɔɔbummɔɔndi sá kii tisiilee ní, tì mɔ̄ kinyɔkɔn ní ki tìì ŋgbampɔn.
25 Unil ŋūǹ kí dàkafì yii nsan ŋun u nóóyee ŋān̄, ama án dāá kúntée, ŋu cáǹ-u ŋkúmin ní.
26 Ŋkùm di yàntī utɔntɔnli ń tɔ̄ ditundi, di sá yii u-pool di páb̀-u ú tɔ̄ ditundi.
27 Unil un kaa bí tibanee dàkafī kí ŋá tikpitil ní, tibɔti tin nyēē u-nyɔkɔnee sèetī kii ŋŋmee ní.
28 Biibiidaan jāantí binib, ní ubɔmbɔtukul yàkatī bibɔɔtiibi.
29 Unil un ŋáań tipɔmbɔtee ŋmàtíǹ u-juti ní ki cáǹ-u nsaŋkpitin.
30 Unil yaa dū u-nimbiliŋ ki ŋúb́ ki dākafì kí tɔ̄ atuŋkpiti, ní ki ŋmáaḿ u-nyunculiŋee, u pée ŋá tikpitil ki dóò dee.
31 Tiyikpipin sá tinyool beefuuliiki ní, bin nóó deedee saŋŋuee di kāntí-kì.
32 Unil un kaa gífí diŋuul malaayee jítiǹ ubaatandaan. Unil un ŋúb́ u-bee jítiǹ un di ŋūǹ kí já kí fōō kitimmɔŋee.
33 Bi ŋūǹ kí tɔ̄ kasi tiba pu, ama ti-Dindaan di lèekī tin u là án ŋée.