15
1 Unil yaa kíí u-juti dinyɔɔbummɔɔndee, án sɔ̀ŋkī u-ŋuul ní, ama u yaa kíí mpɔn nì mpɔnee, án gbítí u-ŋuul ní.2 Biciŋfitiibi yaa bíi sòon̄ee, an nyàatī unil ń bīfì ní, ama bigbaambi bíǹ yaa wāaǹ bi-nyɔkɔee, tigbaambɔti ŋma di nyēē.
3 Ti-Dindaan nimbiliŋ làaǹ an kɔkɔ, ki kpèé binikpitib nì binimɔntiibi kɔkɔ.
4 Dinyɔɔbundi din sɔ̀ŋkī dipɔbilee sá kii busubu bun tìì dimaŋfalee ní, dinyɔɔbuŋkpil yaa ŋmàl̄ tibɔtinee, an yòontí unil pɔbil ní.
5 Ugbaan kaa fātìi tɔ́ u-baa dàkatam, ama un là bí kpòotī-uee sá uciŋfiti ní.
6 Tigaajati tikpaandi di bí deedeedaan dumpu, ama ní unikpiti gaajawanti cāabìń-u nnaabu.
7 Biciŋfitiibi nyɔɔbuŋŋi tìì binib dinyil, ama an kaa sá míǹ bigbaambi cee.
8 Ti-Dindaan ná binikpitib saraabi, ama deedeedambi bíǹ wimmeem tìì-u mmɔn.
9 Ti-Dindaan ná binikpitib bimbim, ama ní ki néeń unil un nóó deedee saŋŋuee.
10 Un yaa fá nsammɔntee làá ká ditafadaaldi, unil un kaa là bí wòoǹ-uee làá kpú.
11 Ti-Dindaan nyí tin bí ki jītí ditaŋkpiil poon poon kábuee, ŋma nín yíiń tin ní unil dàkafī u-pɔbilinee.
12 Ulambidaan kaa là bí kpòotī-u, an pu ní waa cá biciŋfitiibi cee.
13 Dipɔɔpindi bútí nnimbiin ní, ama dipɔɔbiildi cāabìń diwuŋyɔtil ní.
14 Unil un cáá iciinee nyàab̀ dinyil ní, ama bigbaambi nyɔmmunee, tigbaambɔti di gbí.
15 Unandaan ceeyee, iwiin kɔkɔ pée pɔ̄ɔ̄ ki tīī-u ní, ama un pɔbil sɔ̀m̀ee ceeyee, ŋwiin kamaa sá-u jiŋaal ní.
16 An sɔ́ unil ń nīn cáá tigaajawan fiii kí nīn fàŋkí ti-Dindaan, ki jítiǹ ú nīn cáá tigaajati tikpil ki bí iyaliŋki poon.
17 An sɔ́ unil ń ŋmɔ́ tikaŋkaŋfaal tin bi tɔ́kɔǹ nì dineendee ki jítiǹ unaa un bí màlmalee nanti tin bi dū kináŋ ki ŋāāyee.
18 Unil un kaa pɔ̄ɔ̄ diŋuul digiilee sàal̄ kujaau ní, ama un kaa gífí diŋuul malaayee pèefī kujaau ní.
19 Uwutijoodaan saŋŋu sá kii ikuŋkumee ní, ama deedeedaan saŋŋu ŋúǹ pée tèen̄ ní.
20 Kibiki kin cáá iciinee yàntī ki-baa pɔbil pīiǹ ní, ama ugbaanee, úǹ kpèé u-na fám ní.
21 Unil un kaa cáá iciinee fàal̀ u-gbaandi pu ní, ama unil un cáá dinyilee nóó deedee saŋŋu ní.
22 Unil yaa kaa bàlifī isaŋkee, tin u bɔ́ntée kaa còom̄, ama bisaŋkiliibi yaa wīikée an còom̄ ní.
23 Unil yaa kíí tibɔti tì nín sá puee, an tìì mmɔn ní, dinyɔɔbundi yaa nyáń ŋyunti ŋun di máaǹ kí nyēe, di cáá mpɔn ní.
24 Unil un nyée nóó nsan ŋun jɔ́ḿ ki cá dimaŋfal laŋkee ní. Waa nōotí ŋun sìntī ditaŋkpiilin taapuee.
25 Ti-Dindaan nàantí bilambidambi diiŋŋi, ama u mɔ́tí ukpiipu tampaaŋŋu pu.
26 Ti-Dindaan ná ilandɔkɔkpiti, ama u fáatì anyɔɔbummɔnti.
27 Unil un néeń animbil tikpilee kɔ̄ntí u-dicaŋku agìńni ní. Ama un ná dinyɔɔŋeebil jimee cáá mmaŋfafɔkɔn ní.
28 Deedeedaan dàkafī kí wàatī ní kí nín kíí tibɔti, ama binikpitib bíǹ wùliŋkī tibɔfan ní.
29 Ti-Dindaan dátiǹ binikpitib, ama u pílifí deedeedambi wimmeem.
30 Nnimbiin ŋun bútèe tìì mmɔn, ní tibɔmɔntiil tìì mpɔn.
31 Unil un pílifí isaŋki in tìì dimaŋfalee cáá u-kɔŋkooŋŋu biciŋfitiibi kansikin.
32 Unil un kaa là bí kpòotī-uee ná u-ba ní, ama un fòol̄ iwoonee béetí iciin.
33 Á fàŋkì ti-Dindaanee, an bífí iciin ní. Kí wàatī á ká tinyoolee, see á sìntīǹ a-ba.