14
1 Unimpuciŋfiti máń u-diiku, ama unimpugbaan dù úǹ u-ba ŋalii ní kí gbá kí wīī-ku.2 Unil un còom̄ deedee saŋkindee fàŋkí ti-Dindaan ní. Ama un dī isan in gɔ́ĺee kpèé-u fám dee.
3 Ugbaan nyɔɔbuŋŋi poon ní a kāntí u-badakal, ama biciŋfitiibi nyɔɔbuŋŋi di wúǹ bi-pu.
4 Unil un kaa cáá inaa í kpɔ̀-u tikpaalee, u-cakalaau yú ukulim ní, ama un cáá inaa pɔ̄ɔ̄yee cáá tijin tikpil ní.
5 Deedee seeradaaŋwu kaa mɔ́ntí, ama inyimɔn seeradaaŋwu mɔ́ntí ŋma ní.
6 Unil un dàkà u-bee nyàab̀ iciin ní kaa kāntí-i, ama an kaa pɔ̄ɔ̄ ulandɔkɔdaan úǹ ń ká dinyil.
7 Kàkatī a-ba kí wàatī ugbaan, di sá yii aa làá pée ká dinyil diba u-nyɔɔbuŋŋi poon.
8 Un nyí nì u-bee ciiŋyi di sá ú kpèè u-saŋkindi tiŋan, ama bigbaambi gbaandi di sá bí mɔ̄ntì bin kíǹee.
9 Bigbaambi kaa fātìi tɔ́ yii bí ŋāŋkì bi-yìntitam. Ama deedeedambi kansikin ní a kāntí Unimbɔti saasɔl.
10 Unil un bí kunimbaaunee baba di nyí u-nimbaaku. U yaa tí bí mmɔnee, u nì ubɔ kaa tí ŋūǹ kí yàkatī u-mɔŋŋu.
11 Binikpitib diiku làá dāá lítí kí nàan̄, ama ní deedeedambi tantiu ń nīn yú ki pɔ̄ɔ̄.
12 Unil ŋūǹ kí dàkafì yii nsan ŋun u nóóyee ŋān̄, ama án dāá kúntée, ŋu cáǹ-u ŋkúmin ní.
13 Unil ŋūǹ kí nīn lāā ama ní u-pɔbil poonee, u bí kunimbaaun, ní dipɔɔpindi ń dāá kúntí nì kunimbaau.
14 Unil un pɔbil gáatèe làá dāá fōō digáatil paati, ní deedeedaan mun ń dāá fōō u-deedeeu paati.
15 Kinaatuui di fòol̄ tin kɔkɔ bi tùkù-uee, ama unil un nyí nì u-bee kpèé u-saŋkindi tiŋan ní.
16 Uciŋfiti fàŋkí tikpitil ní ki gɔ́ntí-tì, ama ugbaan úǹ ŋáań tikɔkɔ malaa malaa, kun puee u máká u-ba pu.
17 Unil un gífí diŋuul malaayee ŋáań tigbaambɔti, ní biibiidaan dátí kináŋ ki tòó u-ba pu.
18 Nnaatuumu fakal di sá digbaandi, ama binib bin nyí nì bi-bee nyooti di sá dinyil.
19 Binikpitib làá gbàan̄ binimɔntiibi nimbiin, ní bikpitiŋaliibi ń dāá yūĺ deedeedambi punyɔkɔpu ki nyàab̀ dijòońdi.
20 Usoodaan kɔŋkɔnnaatɔb gba ná-u ní, ama bin néeń ugaajee wīikí tikpil ní.
21 Unil un kpèé u-juti fámee ŋá ikpiti, ama un sūǹ binandambi saayee bí mmɔnni.
22 Binib bin dàkafī ilandɔkɔkpitee wáŋkì dee, ama bin dàkafī nlandɔkɔmɔntee làá ká tiŋan nì ibaamɔn bi-saŋŋu pu.
23 Unil ń tɔ̄ ditundi nì difaŋgiilee cáá tipaal ní, ama kubɔcaau cāabìń disool ní.
24 Biciŋfitiibi paatii di sá tigaajati, ama ní bigbaambi bíǹ gbíntíǹ bi-gbaandi.
25 Useeradaan un sòoǹ ibaamɔnee fìil̄ binib ní, ama un mɔ́ntí inyimɔnee nàantí binib ní.
26 Unil un fàŋkí ti-Dindaanee cáá dimákakpaandi, kun puee u sá kibalilaŋ ki tīī u-biyaamu.
27 Unil ń fàŋkì ti-Dindaanee di sá dimaŋfal nyimbuliŋu. An di yàntī ú gɔ́ntí ŋkúm talinti.
28 Dinibul din wīikée bɔtiu cáá tinyool ní, ama kitiŋ kin nib yaa bíi bàtēe bɔtiu beel bíi kúntí dee.
29 Unil un kaa gífí diŋuul malaayee cáá dinyil tikpil, ama un kaa pɔ̄ɔ̄ diŋuul digiilee dàkà u-gbaandi ní.
30 Dipɔɔsɔŋkil di yì ŋgbampɔn, ama ní ipoompoon sá iween in ŋmóò ki bùkù akpabee.
31 Unil un wɔ́b̀ binandambee sìí bi-náanliu ní, ama un sūǹ usoodaan saayee tìì Unimbɔti ní tinyool.
32 Unikpiti tuŋkpitiŋ di yàntī ú lítí, ama deedeedaan cáá dimákal ki kpáaǹ u-kúmin.
33 Iciin bí unil un cáá dinyilee pɔbilin ní, ama ŋma di ŋūǹ kí ká iciin bigbaambi kansikin?
34 Ditimbundi din nóó deedee saŋŋuee yíkí yilpu ní, ama ní ikpiti íǹ kɔ̄ntí-dì icoo.
35 Ubɔti pàkà u-tɔntɔnliu un cáá dinyilee ní, ama u gífí diŋuul un kɔ̄ntí-u icooyee pu.