TI-DINDAAN SÒON̄
38
1 Ti-Dindaan yíiń Yoob kubuŋkpaaŋŋu poon ní ki bālifì-u yii:2 Ŋma ní a sá ní ki sòoǹ kii ugbaanee,
ki bíiĺ tin m bɔ́ntì kí ŋée ní?
3 Gbìn̄ a-gbajau kí yūĺ kii uninjee!
M làá bàlifì-si tibɔti ní á kíí-mi.
Unimbɔti bālifì Yoob tiwannáaŋkaal pu
4 La ní a nìn bí ŋyunti ŋun ní m bíl̀ kitiŋ nyeeleeee?
A yaa nyí ibaamɔnee, á tùkù-mi.
5 A nyí un di lēē kitiŋ nín máaǹ kí nīn wāā pueeee?
A nyí un di tɔ́ ŋŋmii ki ŋmāntì-kèeee?
6 A nyí jaantalkub bin tíkí kitiŋee nín tɔ́kɔ́ kun pueeee?
Ŋma di máń ki tá kitiŋ nyeel
7 ŋyunti ŋun kutaafaau ŋmalbijaai gà ilan ki kìntī tɔb,
ní Unimbɔti tuuŋyi fàal̀ee?
8 Ŋyunti ŋun tiŋku nyim púń ki nyánní kitiŋinee,
ŋma di nìn dū punuubi ki pīiǹ mi-pu ní?
9 An sá man di dū atagban ki pēeǹ-u,
m dū dipɔ̀ńdi din nyìm̀ee ki fìn̄-u.
10 U nín wúliń pu ki dòońee, man di cúú-u
ní ki síiǹ-u laakin u làá gbèen̄ee
ní ki dū punuubi ki pīiǹ u-pu.
11 M tùkū-u yii:
«Á dāan̄ doo, á taa bà lapu,
a-nyiŋgbanti bilambidambee làá gbèen̄ doo nía!»
*
12 A-maŋfal wiiŋyi poonee, a pée ŋúń ki tīī
kutaa mara dibaba ja yii kú wúntáaa?
A ŋúń ki kāaǹ ntaafaabɔmbɔm ŋu-paaŋŋu,
13 ŋú cúú kitiŋ nyɔɔgbaŋŋi
kí cìŋkì binikpitib bin bí ki-puee ń lítáaa?
14 Ntaafaabɔmbɔmee, kitiŋ mántí ní wèeee,
a lì kii kuyɔkɔu kun pu bi dū kijalii ki nyīīyee,
ní an ŋá kii kitiŋ pu wanti pēē tiwampeeŋkaalee.
15 Ama binikpitib kaa ti cáá bi-walifiŋub,
ŋŋal ŋun bi bàà dúkitì kí fááyee cúu kɔ́fì.
*
16 A gíti láá cūtì dimɔɔl nyimbulnimbil laŋkaaa?
A cōom̀ dimɔɔl taapu ki yìin̄aaa?
17 Bi dàkā-si ŋkúm punyɔmmu a káaa?
A ká mpunyɔmu mun pìitī unil ń kɔ́ ŋkúm booŋŋuneeee?
18 A nyí kitiŋ waaŋŋu nín sá pueeee?
A yaa nyí tíǹ gbanti kɔkɔee, á tùkù-maa!
19 A nyí ŋwalifi nín kóò laakiŋyeeee?
La ní dibɔmbɔndi kóò ní?
20 A ŋūǹ kí céeǹ-bi kí cùnnì bi-dumpuyaaa?
A nyí nsan ŋun cáǹ bi-kɔŋkooŋyi laŋkeeee?
21 A máaǹ kí nīn nyí tiŋan,
di sá yii bi nìn màl̄-si ŋyunti gbanti
ní a-maŋfal pu wiiŋyi náaǹ tikpilku.
*
22 A ŋúń ki cūtì laakin bi kpáafí ntaayimeeee?
A gíti dáá ká ataanyiŋkumbil cakalaauaaa?
23 M bɔ́ntì-bi ki cíitì dinimbinaamandi yuntiŋu ní,
dikɔ̀ndi nì kujaau yuntiŋu ní m bɔ́ntì-bic.
24 A nyí laakin ŋwalifi nyáńeeee?
Ŋwìiń jeetilaŋki pú buŋku nyēeń la ní kí dāan̄ kitiŋ pu ní?
25 Ŋma di cátì nsan ki bíl̀ utaa ní?
Ŋma di cátì didandi ki tīī ditaadundi tagbandi ní?
26 Ŋma di yàntī utaa nì kitiŋ kin pu binib kaa kóò,
kuteeu kun pu ní báà ubɔ kpée?
27 Ŋma di yàntī utaa ń nì kitiŋkuliŋŋi ń cɔ́tí nnyim,
timool ń nyā kí wíiǹ ní?
28 Utaa cáá baaa?
Ŋma di màl̄ dimalindi ní?
29 Dinyintaŋkpal na sá ŋma ní?
Nnyim min nyáń yilpu ki kìl̄ee, ŋma di màl̄-mì?
30 Niinee ní nnyim ń dūú pɔ̄ɔkì kii ditaŋkpalee,
ní dimɔɔl yilpu ń dūú jìlifì kí pɔ̄ɔkì.
*
31 Kpèè iŋmalbi acuku.
A ŋūǹ kí bóob́ dicukul diba dicilpuɔɔɔ,
dicukul diba ní a ŋūǹ kí bútí ní?
32 A ŋūǹ kí yàntī iŋmalbijaa ń nyā ŋyunti ŋun an máaǹee,
àá kí kpòotī iŋmalbi in nyēē kutaa ŋgan pu púee?
33 A nyí marab bin di kpòotī kutaayeeee?
Sii di kpòotī-bi kitiŋ puɔɔɔ?
34 A ŋūǹ kí tīī atagban mara
utaa ń nì nnyim ń gbí kí léeń a-puɔɔɔ?
35 Utaa yaa ŋmɔ́ee, sii di tūǹní-uaaa?
U tùkù-si yii: «M sèéee»?
36 Ŋma di tīī kinɔmbiki kin bi yíì yii Ibiiseed iciin ní?
Ŋma di tīī ukooja dinyil ní?
37 Ŋma di ŋūǹ kí kàaǹ atagban
ní kí kpòon̄-ŋi nnyim min kā ŋi-poonee ń kpáatí kí fá ní?
38 Ŋyunti gbantee, kukpɔŋkpɔŋu ń dūú jìl̄ kí pɔ̄ɔkì
ní tikpati ń dūú dàb̄ tɔb.
Unimbɔti di sá tiwaŋkuti kpiliu
39 Sii di cútí ipeel ki tìì ugbikintinaataaa?
Sii di tìì agbikintipɔmbil tijin ŋi jīǹ
40 ŋyunti ŋun ŋi gbāā itaŋkpalɔkɔn
àá ŋi náká kimɔgbaayin kí cúú tibeeee?
41 Sii di bɔ́ntí tijin ki tìì digaliŋgaal
ŋyunti ŋun di-biyaamu bíi gbáà ibiil ki yíì Unimbɔti
ki yìiǹ an kɔkɔ pu ŋkùm làá kpɔ̀-mueeee?