Yoob 39

1 A nyí dibindi poon ŋyunti ŋun kijooŋɔjakai màal̀eeee?

A gíti dáá ká icaŋkpalim nín màal̀ pueeee?

2 I yaa cáá apooyee, an ŋáań iŋmal iŋa ní í nín màal̀ ní?

A nyí ŋyunti ŋun i màal̀eeee?

3 I gbàantí ní ki màal̀ i-biyaamu,

ní imatiŋween ń kúntí.

4 Mbiyaamu pée tɔ́ mu-ba ní kí wíiǹ kí ká mpɔn,

ní míǹ boonee mú yīkì mu-na cee kaa ti gítiń.

5 Ŋma di yāntì kumooun maŋki tɔ́ ki-ba ní?

Ŋma di léetì-kì ŋŋmii ki yāntì ki búntì ní?

6 M yāntì kì kóò kuteeu pu.

Laakin kì kóòyee sá kitiŋ kin cáá ŋyaamee ní.

7 Kíǹ bèel̄ kitiŋin wooku

ní kaa gbìl̀ dalba ukpil ubɔ tátí ki-pu.

8 Ajoon pu di sá ki-naakpaapɔɔku ní kì yìiǹ niin

ki nyàab̀ tin kamaa sɔ̀m̀ee kí ŋmɔ́.

9 Upɔɔnaa kíikí kí nīn sá a-tɔntɔnliuaaa?

U kíikí kí dòon̄ a-naabakakun kunyeeuaaa?

10 A ŋūǹ kí kpàl̄-u ú kpɔ̀ tikpaalaaa?

U kíikí kí páań a-boon ditantakalin kí dáaĺ akoooo?

11 U nín cáá mpɔn tikpil puee pu ní a làá nīn máká u-pu

kí yàntī ú tɔ̄ a-tundaaa?

12 A ŋūǹ kí nīn máká u-pu ú fàtīí gítiń

kí cáań a-jincakaati kí páań kukaatuŋu puɔɔɔ?

13 Taataa feeŋyi yaa gbáà tɔbee, an tìì nsiim min mɔ̄ee ní,

ama waa ŋūǹ kí ŋàaǹ kí bà naakpaapiin.

14 U tòó u-jiŋŋi kí bíĺ kitiŋ

ní kí dūú ŋá ntamin an kákatí.

15 U súntí yii kuwaŋkuluu kubɔ ŋūǹ kí còom̀ ŋi-pu,

yii upeel ubɔ ŋūǹ kí tāā-ŋi ŋí wīī.

16 U ŋáań u-biyaamu ntoom kii waa yì-muee,

an kaa ká-u yii u gīī mu-pu fám.

17 Kun di yì-tèe di sá yii maa tīī-u iciin,

maa yākatì dinyil ki kpáaǹ-u.

18 Ama u yaa yíkìi síl̀ kí sāǹee,

utaamu nì utanjakal sá u-cee agbiil ní.

19 Sii di tìì utaamu mpɔnaaa?

Sii di dū kugaŋŋu ki páaǹ u-sil puɔɔɔ?

20 Sii di yàntī u yùkufī kii unaakeeee?

U yaa fōotèe, an cáá tifaandi ní.

21 U cáá u-taaŋi ki fátí kitiŋ,

ní kí dū u-ba kí bíĺ dikɔ̀ndin nì mpɔn.

22 Waa dū kufaaŋŋu ki yíiń tiba, ní kaa fàŋkí tiba,

kitàataajiki kaa yàntī ú gítí u-boon.

23 Dibaatandi yaa ŋáań kuwoou u-pu u gbìl̄ee,

kikpaŋ nì kitàataajiki yaa ŋmóò làka lakee,

24 an kaa ti ŋáań-u malaa, u cútíí cóotí ní.

Bi yaa búń dikantándee, waa ti ŋūǹ kí cúú u-ba.

25 Bi yaa búń dikantándee ní ú fòotī.

Ndan ní u gbìl̀ kujaau nuŋu

nì bijanjakpilib kuŋkuuntii nì kujaau biilii pu.

26 Sii di tùkù ukaabu ú yīkì kí ŋàaǹ

kí kpátí u-feeŋyi kí túĺ ŋgiil púɔɔɔ?

27 Sii di tìì ukaalun mara ú yīkìí ŋàaǹ

àá ú ŋá u-diiku kí páań dijool yilpuɔɔɔ?

28 U kóò ataŋkpee kansikin, ní ki gèeǹ

ditaŋkpal din cɔ́m̀ ubɔ kaa ŋūǹ kí bèe pu.

29 Yilpu niin ní u cɔ́ŋkí ki kpèé kuwaŋkuluu kun u làá cúúyee,

u-nimbiliŋ ŋūǹ kí wāl̀-ku ndan.

30 U-biyaamu nyù fatiku ní.

Laakin diwaŋkpil yaa bée, niin ní u bí^a.