Yoob 37

1 M yaa gbìl̄ mimmee ní m-pɔbil ń bīil̀

ní ki kíǹ ki máfí.

2 Pīlifìmaan ditaadundi din sá Unimbɔti neelee,

pīlifìmaan didundi din nyēē u-nyɔkɔnee.

3 U yàntī utaa ŋmóò ki pùntī kutagbɔŋu,

kí yòon̄ kitiŋ nyɔkɔ kiba kí cáá sāā kin kíǹee.

4 Míǹ boonee, bi gbìl̄ nneen ŋubɔ pu,

di sá yii Unimbɔti fáá dibintiŋkpaandi.

Ŋyunti gbantee ní Unimbɔti yāntì utaa ŋmɔ́

ní bi gbìl̄ u-neen pu.

5 Unimbɔti yaa sòoǹee, an bí kii ditaadundee ní

ní an cáá maamaaci á gbìl̄.

U tūǹ atuŋkpaan ŋin ní taa ŋūǹ kí gbìl̄ taapuee.

6 Unimbɔti tìì ntaayim mara mí lítí kitiŋ pu,

ní kí yàntī utaakpaan ń nì cùuu.

7 U yàntī unil tuuŋŋi kɔkɔ ń gbèen̄,

án nín làá ŋá pu unil un u náańee ń béé u-tuuŋŋee.

8 Ki kpáaǹ tiwaŋkuti sáń ki bāal̀

ní ki kíǹ ki dɔ̄ ti-naabakatin.

9 Kubuŋkpaaŋŋu nyēeń ŋgiil pú

ní tiwool ń nyānní ŋgan pú.

10 Unimbɔti yaa fōotèe, nnyim kìl̀ ní,

ní mi-yilpu ń pɔ̄ɔkì kaŋkaŋ kii tikútee.

11 Unimbɔti dù nsɔnsɔm kí ŋá atagbanni,

ní kí dū utaa nín ŋmóò puee kí gbéeǹ-ŋi

ní kí tɔ̄-ŋi ijaan kɔkɔ pu.

12 Míǹ ní u yàntī ŋi tú ki yìiǹ an kɔkɔ pu,

kí ŋá kí nóó nì u nín là puee

tin kɔkɔ u kpáafì-ŋi ŋí tɔ̄ kitiŋ nee puee.

13 An yaa sá kí dáaĺ unil tafalaaa, an yaa sá kí dàkà u-nitaaa,

ŋíǹ ní Unimbɔti tūǹ.

14 Yoob, kpòon̄ a-tafal kí pīlifì tíǹ gbanti kɔkɔ tiŋan.

Gbèen̄ kí kpèè Unimbɔti maamaacib!

15 A nyí Unimbɔti nín tìì atagban marab bin

ki yàntī utaa ŋmóò làka lakeeee?

16 A nyí an nín ŋá pu kutagbɔŋu dàn̄ yilpueeee?

Un nyí ki cíl̀ee di gbìl̀ an maamaaciu taapu.

17 Ŋyunti ŋun ŋgiil pú buŋku jītí an tùm̀ kpaŋkpamee,

tiwan tin a pēēyee fòol̄ ní kí píĺ a-pu sìii.

18 Sii di nìn tútúǹ Unimbɔti ní u kpátì kutagbɔŋu,

ki yāntì ku pɔ́ɔkì kaŋkaŋ kii digitil din bi dūntì tikúti ki nyūntèeee?

19 Yàntī tí béé tin ti máaǹ kí tùkù Unimbɔtee.

Ti bí dibɔmbɔndin kaa cáá tiba kí lì.

20 M yaa bíi sòoǹee, m máaǹ kí bàan̄-uaaa?

Bi làá tùkù-u yii ubɔ sòon̄aaa?

21 Dicilpuee, taa ti wāĺ tiŋan:

atagban dūu bīiǹ ŋwìiń pu.

Niinee ní kubuŋu ń yīkì ní kí ŋàtī kutagbɔŋu.

22 Ŋgan púee, ŋwalifi ŋubɔ nyánní ki jìl̀ kii sindaariyee,

ŋwalifi ŋun kaa cáá jutee māntìi tú Unimbɔti.

23 U sá Unimbɔti Mpɔŋkɔdaan ní,

taa ŋūǹ kí sútí kí pìl̄-u.

Mpɔn poonee, u sá ukpaan

ní deedee poonee, u tí sá ukpaan.

Waa wɔ́b̀ un di bí deedee tiŋman puee.

24 An pu ní binib máaǹ kí fàŋkì-u,

ama waa dū bin yíì bi-ba biciŋfitiibee ki yíiń tiba.