Krooniiki Gbɔnliliitiiku 10

JUUDA YAB BƆTIIBI MAAM

Siikeem kpafil

(Kpèè 1 Bib 12.1-15)

1 Rooboowaam nìn cūtì Siikeem^a, di sá yii niin ní Isirayeel yab kɔkɔ nìn kóoǹ ki kpáfì kí kàan̄-u dibeel. 2 Neebaati jipɔɔn Jeerooboowaam nìn dáá gbíntìi bíń Eejipiti tiŋkin, laakin u nìn sáǹ ubɔti Saloomɔn ki cūtìi kāl̀ee. U nín gbìl̄ Siikeem kooŋyi gbanti puee ní u yíkì Eejipiti tiŋkin ki dɔ́miń. 3 Bi nìn tú binib bi cūtìi yíiń-u. U bāańee ní u nì Isirayeel beel samaau kɔkɔ cūtì Rooboowaam cee ki bí-u yii: 4 «A-baa nìn túǹ-ti ditúndi din nyìm̀ee. Siiyee, ti là yii á bàtī-ti ditumpɔɔl din a-baa nìn yāntì ti túńee nì diwaŋgul din u nìn dūu nyīkiǹ ti-puee. A yaa ŋá míǹ ti kíí kí nīn sá a-tɔntɔnliibi.» 5 Ní u kíí-bi yii: «Nín̄ cámaan, iwiin ita dalee ní fàtīí gítiń.»

U lī mimmee ní samaa nín cá. 6 Niinee ní ubɔti Rooboowaam bālifì bitindaŋkpilib bin nìn bí u-baa Saloomɔn tundin ŋyunti ŋun u nìn dáá bí dimaŋfalinee yii: «Ni sáŋkí-mi ḿ kíí binib nee yii ba?» 7 Ní bikpilibee bí-u yii: «A yaa dàkā binib nee kulaŋŋaŋfitiiu ki ŋá bi nín là puee ní ki yaa kíí-bi kinyɔɔmɔɔyee, bi làá nīn sá a-tɔntɔnliibi kí nīn cá jaanjaan.»

8 Ama ní Rooboowaam kaa dū bikpilibee saŋkii ki túń ditundi, ní ki yíiń binipɔmbi u nì bin jíń tinaacimpɔn dicilpu bi bí u-tundinee. 9 U nìn bí bíǹ yii: «Nimbi fáà, ni sáŋkí-mi yii ba? Ḿ kíí binib bin bíi bàlifī-mi ḿ bàtī diwaŋgul din m-baa nìn dūu túǹ-bee nyiŋfiŋu pu yii ba?» 10 Ní binipɔmbi u nì bin kpáfìi jíń tinaacimpɔnee kíí-u yii: «Kpèè a nín làá kíí binib bin dɔ́miń ki bí-si yii: <A-baa nìn túǹ-ti diwaŋgul din nyìm̀ee, siiyee bàtī di-nyiŋfiŋu pu kí tīī-ti> puee sɔ̀: <M-ŋambikpakpalii gbìfiǹ m-baa ŋal^b. 11 M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.>»

12 Ŋwintataati dalee ní Jeerooboowaam nì samaa kɔkɔ dɔ́miń ki ká Rooboowaam kii úǹ u-ba nín nìn lī puee yii: «Fàtīí gítiḿmaan ŋwintataati dal kí ká-mi.» 13 Bikpilib nín nìn sáŋkì u-bɔti puee, waa dūu túń ditundi, ní ki sòon̄ nì samaa an pɔ̄ɔ̄. 14 Binipɔmbee nín sáŋkì-u puee, míǹ ní u dūu sòon̄ nì binibee. U nìn bí-bi yii: «M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.» 15 Ubɔti kaa nìn pílifiǹ binibee, kun puee ti-Dindaan nín nìn bɔ́ntì míǹ kí ŋmā kí ŋá kii u nín nìn dī u-bɔnaatiliu usiilooja Ayiiya pu ki pōoǹ Neebaati jipɔɔn Jeerooboowaam puee ní^c.

Isirayeel beel cúu yākatì

(Kpèè 1 Bib 12.16-25)

16 Isirayeel beelin yab nín ká yii ubɔti kaa bíi pílifíǹ-bee ní bi bí-u yii:

«Ti nì Daafiidi cáá tilati?

Ti nì Jeesee jipɔɔn kaa cáá mpèé ŋubɔɔ!

Isirayeel yab, tí nīn gítímaan ti-tantibin!

Kɔŋkɔnnee sii Daafiidi, nín̄ jīǹ a-dicaŋku pu dibeel^d!»

Bi lī mimmee ní báà ŋma nín gítí u-tantiun. 17 Ama Isirayeel yab bin nìn kóò Juuda tiŋkinee baba pu ní Rooboowaam nìn nìkī ki jíń dibeel. 18 Nì míǹ kɔkɔee, ubɔti Rooboowaam nìn dū Adooram^e un kpèé diwɔ́bil tuuŋŋee ki tú Isirayeel yab cee, ama ní bíǹ yáŋkì-u ataŋkpee ki kūū. Niinee ní ubɔti Rooboowaam ŋá malaa ki jɔ́m̀ u-tɔrɔkuu poon ki sáǹ ki nín cá Jeerusaleem. 19 Kí yòon̄ ŋwiin gbanti ní Isirayeel yab bin kóò ŋgan pú beelinee kíĺ ki jáà nì Daafiidi dicaŋku bɔtiibi. Kujaau gbanti bí ki dāa sāā díǹ.