Krooniiki Gbɔnliliitiiku 9

Sabaa nimpubɔtiu māntì Saloomɔn pu

(1 Bib 10.1-13)

1 Sabaa nimpubɔtiu nìn gbìl̄ Saloomɔn nín nyáń diyindi puee. U nìn dɔ́miń Jeerusaleem kí pɔ́ɔǹ-u ipɔɔn kí màkan̄-u kí kpèè. U nì dinikitikpaandi di nìn dɔ́miń ki kpáaǹ igutaamu in tú talaalub nì sindaariya tikpil nì ataŋkpamɔntee. U bāań Saloomɔn ceeyee ní ki bālifì-u tibɔti tin kɔkɔ nìn pée kā u-pɔbilinee. 2 Saloomɔn nìn pée kíí-u tin kɔkɔ u nìn bālifì-uee ní. Tiba kaa nìn bí ki pɔ̄ɔ̄ ki tīī-u waa ŋúń ki kíí. 3 Sabaa tiŋki nimpubɔtiu nín ká Saloomɔn ciiŋyi nì kudii kun u máńee 4 nì tijin tin tɔ́kɔ́ u-teebiliu puee nì u-tɔntɔnliibi kɔŋkooŋyi nì u-tɔntɔnliibi bin tìì-u tijin u jīǹ nì nnyim u nyùee wampeeŋkaati nì saraabi bin u nìn ŋáań kunimbɔtidiinee ní an ŋá-u bitii waa ti nyí tin poon u bée. 5 Niinee ní u bí ubɔti yii: «Tin m gbìl̄ m-tiŋkin a-tuuŋŋi pu nì a-ciiŋyi puee lafun sá mbaamɔn ní. 6 Ama maa nìn fōō ki kíí, see m nín dɔ́miń m-ba ki ká nì m-nimbilee. Tin bi máafì-mee kaa bàn̄ tin m ká nee dijandi gba. A-ciiŋyi jítiǹ tin m gbìl̄ee pu kpataaa. 7 A-nib nì a-tɔntɔnliibi bin bí a-nimbiin baabadal ki pílifí a-ciiŋyi nyɔɔbuŋŋee bí mmɔnneeee! 8 Tí nyɔ̄ŋkì ti-Dindaan a-Nimbɔtiu un di lēē-si á kàl̄ Isirayeel tiŋki pu dibeelee! Kun puee u néeń Isirayeel kí nīn cáa cá jaanjaan ní, an pu ní u dū-si ki kāaǹ dibeel á yàntī tin bí deedeeyee nì ibaamɔn ń nīn bí.»

9 Míǹ boonee ní Sabaa tiŋki nimpubɔtiu tīī ubɔti Saloomɔn sindaariya tɔnnib bita nì dijandi nì talaalub tikpil nì ataŋkpamɔnti. Sabaa nimpubɔtiu nín nìn tīī ubɔti Saloomɔn talaalub puee, baa ti pée ká an talaalub bulifi kɔ́ Isirayeel tiŋkin ki ká.

10 Kí kūtì muee, Yiiram tɔntɔnliibi nì Saloomɔn yab nìn cáań sindaariya Oofiiri tiŋkin nì santaal dɔi tikpil tikpil nì ataŋkpamɔnti. 11 Ubɔti nìn dū idɔ gbanti ki ŋá jaantalkub ki tíkiǹ ti-Dindaan Diiku nì kubɔtinaakoou, ní ki nìn lēē ki kpítì tibati ki tīī u-laŋgaaliibi. Baa nìn pée ká míǹ Juuda tiŋkin dalba dalba.

12 Ubɔti Saloomɔn mun nìn tīī Sabaa nimpubɔtiu tin kɔkɔ u nìn là ki bālifèe. Tin u nìn tīī-uee nìn jítiǹ tin unimpubɔti nìn cáańee pu kpataaa. Míǹ boonee ní u nì u-tɔntɔnliibi nín gítí bi-tiŋkin.

Ubɔti Saloomɔn gaajati

13 Dibimbaantiil poonee, sindaariya un bi nìn cáań ki tīī ubɔti Saloomɔŋyee nìn nyáń tɔnnib mmuŋku ní, 14 ní kí nín kūtì bibantiliibi nì binyampoobi nín nìn cāabìń sindaariya un ki pà patantibee. Arabii bɔtiibi kɔkɔ nì Isirayeel tiŋkpaammu gɔminab nìn cāabìń sindaariya nì animbil ki tìì Saloomɔn.

15 Ubɔti Saloomɔn nìn yāntì bi dū sindaariya ki mɔ́ɔ́ agbampɔɔ akpaan alaataa ali. Bi nìn dū sindaariya kiiloobi biluu ní ki mɔ́ɔ́ digbampɔɔl kamaa. 16 U nìn gíti dū sindaariya ki mɔ́ɔ́ agbampɔɔ ŋwaamu alaataa ata. Bi nìn dū sindaariya kiiloo ubɔ nì dijandi ní ki mɔ́ɔ́ digbampɔɔl kamaa. Ubɔti nìn dū agbampɔɔyee ki síiǹ kudii kun bi yíì yii <Leebanɔn Pɔɔkuee>^a poon ní.

17 Ubɔti nìn gíti kpítì dibeejal dikpaandi diba ní ki dū sindaariyamɔnti ki nyūntì ní ki dū kunti nyiŋŋi ki nákáǹ nákáǹ. 18 Dibeejalee nìn cáá akɔl ŋin pu bi tà ki jɔ́ḿ-dèe aluu, ní ki cáá laakin ataa tɔ̄kɔntée an sá sindaariya. Bi nìn kpítì gbikintib bili ki síiǹ laakin bi pāantí iŋalee. 19 Gbikintib nìn bí saalaa nì bili ní ki bí akɔl aluuyee nín kúntí puee. Baa nìn pée kpítì dibeejal diba míǹ dibeel diba poon ki ká.

20 Ubɔti Saloomɔn kɔŋkɔnnyɔkaabi kɔkɔ nìn sá sindaariya ŋma ní, ní asambil ŋin bí <Leebanɔn Pɔɔku> diikunee nìn sá sindaariyamɔnti ŋma. Baa nìn dù animbil kúti kí ŋá tiba, di sá yii Saloomɔn yuntiŋuee, animbil kúti kaa nìn cáá kunyampoou. 21 Di sá yii ubɔti nìn cáá meelab Taarsiisi tiŋkin. Yiiram meelaŋaaliliibi di nìn ŋàal̀-bi. Abin ata poon diba puee, meelab gbanti nìn cāabìń sindaariya nì animbil kúti nì kunti nyiŋŋi nì ilantan nì ikooŋaan.

22 Ubɔti Saloomɔn nìn jítiǹ kitiŋ pu bɔtiibi kɔkɔ tigaajati poon nì iciin poon. 23 Kitiŋ pu bɔtiibi kɔkɔ nìn nyàab̀ kí ká Saloomɔn kí ŋmā kí pīlifì iciin in Unimbɔti nìn tīī-uee. 24 Bi yaa nìn dòońee, báà ŋma nìn cāabìń animbil kúti wanti nì sindaariya wanti nì tiwampeeŋkaal nì tijanjawan nì talaalub nì itaamu nì imamboon ki pūǹ-u. Dibindi kamaayee, binib nìn pée ŋáań míǹ ní.

25 Saloomɔn nìn cáá itaamu nì janjatɔrɔkub naabakati kutukub binaa, ní ki cáá itaamu kutukub saalaa nì bili^b. Tijanjawan gbanti tiba nìn bí ntimu mun poon ní ajanjanaapaa bée, ní tiba mun bí u-cee Jeerusaleem. 26 Bibɔtiibi bin nìn bí kí yòon̄ Eefiraati mɔɔl kí cáá sāā Fiiliistii yab tiŋki nì Eejipiti tiŋki kpaanyɔkɔee kɔkɔ nìn bí Saloomɔn taapu ní^c. 27 Ubɔti nìn yāntì animbil gbí Jeerusaleem kii ataŋkpeeyee ní, ní seedir dɔi wīikí kii Seefeelaa tiŋki^d sufii in bi yíì siikoomɔɔree. 28 Saloomɔn taamui nìn nyēeń Eejipiti^e nì ntimu mun kɔkɔ kíǹee poon ní.

Saloomɔn kúm

(1 Bib 11.41-43)

29 Saloomɔn tuuŋŋi ŋin kíǹee, kí yòon̄ tin u péé ki ŋée nì tin u ŋá ki lúŋkèe, ŋmàn̄ ki kā Unimbɔti bɔnaatiliu Naatan gbɔŋkun nì Ayiiya, ubɔnaatil un nyánní Siiloo tiŋkinee gbɔŋkun nì Unimbɔti bɔnaatiliu Idoo leedakal gbɔŋkun. Kugbɔŋu gbanti sòoǹ Neebaati jipɔɔn Jeerooboowaam mun pu. 30 Saloomɔn nìn kāl̀ Jeerusaleem ki jíń Isirayeel tiŋki kɔkɔ pu dibeel abin imuŋku ili ní. 31 Saloomɔn kpíì ki cūtì ki ŋàl̄ u-naanjab ní bi síb́-u u-baa Daafiidi Tiŋkin. U-jipɔɔn Rooboowaam di fōō u-yil ki kpántì ubɔti.