Krooniiki Gbɔmpeepeekaaku 28

Daafiidi lēē Saloomɔn ú fōō u-yil kí mā kunimbɔtidii

1 Daafiidi nìn yíiń Isirayeel yab kpilib kɔkɔ ki kpáfì Jeerusaleem tiŋkin. U nìn yíiń tinaakɔti kpilib nì ajanjakiti kpilib bin bí u-tundinee, nì bijanjakpilib bin sá bijanjaliibi kutuku kutuku nì dilaataal dilaataal kpilibee. U nìn gíti kpáfì bikàlimbi bin kpèé ubɔti nì u-jipɔmbi gaajawanti nì bi-waŋkutee, nì bifaabi nì bibaatandambi nì binikpaambi kɔkɔ. 2 Ubɔti Daafiidi nìn yíkì ní ki bí-bi yii: «M-nibul yab, m-nabiyaamu, pīlifìmaan-mi! M nìn ká nlandɔkɔ yii m làá mā kudii kun poon ní ti-Dindaan poondi dakaau làá nīn yúee, laakin ti-Nimbɔtiu taaŋi làá nīn yūlifée. An puee m bɔ́ntì kí mā kudii gbanti. 3 Ama ní Unimbɔti bí-mi yii: <Sii di kaa làá mā-mi kudii kun poon binib làá nīn dòoń ki jáaḿ-mee. Di sá yii a jáń tijáti tikpil ki yāntì binib tikpil fatikuu nyáń.> 4 Nì míǹ kɔkɔee man ní ti-Dindaan Isirayeel Nimbɔtiu lēē m-baa dicaŋku kɔkɔ poon. U lēē man nì m-jipɔmbi nì m-naantiibi tí jī dibeel Isirayeel tiŋki pu kí nīn cá jaanjaan. Dooooyee m-naanja Juuda ní u nìn lēē ú nīn sá uyidaan. Míǹ boonee, Juuda naakookunee ní u lēē m-baa dicaŋku. An dāa kúntèe, man ní u lēē m-baa jipɔmbi kansikin ḿ nīn sá Isirayeel tiŋki kɔkɔ pu ubɔti. 5 Mbininjabiyaamu kupaau mun ti-Dindaan tīī-mee kansikinee, Saloomɔn ní u lēē yii ú kàl̄ úǹ ti-Dindaan beel Isirayeel pu tibɔtiil. 6 Ti-Dindaan tùkū-mi yii: <A-jipɔɔn Saloomɔn di làá mā m-Diiku nì ku-ciŋŋi. Tiŋman úǹ ní m lēē. U làá nīn sá-mi ujipɔnti ní man ń nīn sá-u ubaati. 7 U yaa gbíntìi nìkì ki tɔ́ m-marab nì m-bɔkpaaŋi kii díǹ neeyee, m làá yàntī u-beel ń báań inyaan kí nīn cáa cá jaanjaan.> 8 Kɔŋkɔnnee m-nabiyaamu, ti-Dindaan nibul Isirayeel kɔkɔ nimbiinee, nì ti-Nimbɔtiu un gbìl̀ tin ti bíi sòoǹee nimbiinee, ní lēē kí bīfì ti-Dindaan ti-Nimbɔtiu marab kɔkɔ kí nīn tɔ́-bi. Ni yaa ŋá mimmee, ni làá nīn pée gbíntìi yì kitimmɔntii kin pu ni kā nee, ní kí dāá dū-kì kí tīī ni-naantiibi án nīn sá bi-tindaŋwanti kí nīn cá jaanjaan. 9 Sii m-jipɔɔn Saloomɔn, nyàab̀ kí béé man a-baa Nimbɔtiu un m jáaḿee tiŋan, kí nīn jáaḿ-u nì dipɔbil diba nì a-naŋki kɔkɔ. Di sá yii ti-Dindaan kpèé ki wāĺ tin bí binib pɔbiliŋ poon poon kábuee ní ki nyí bi nín dàkafī puee kɔkɔ. A yaa nyàab̀-u, u làá yàntī á ká-u. Ama a yaa dū-u ki fá, u mun làá dū-si kí fá ní kí nīn cá jaanjaan. 10 Kɔŋkɔnnee sii a-ba wāĺ, sii ní ti-Dindaan lēē yii á mā-u kudii kun làá nīn sá u-circir kɔŋkooŋŋuee. An puee, ká dipɔbil kí kíĺ ditundi gbanti!»

Daafiidi tùkū Saloomɔn kunimbɔtidii nín làá nīn bí puee

11 Daafiidi nìn tīī u-jipɔɔn Saloomɔn kugbɔŋu kun poon bi lēē kunimbɔtidii dikpaaŋku nì ku-dibiyaamu, nì adiin ŋin poon bi kpáafí tiwanee nì aditɔntɔkɔ nì poon pú diiŋŋi nì circir dakaau diiku. 12 Daafiidi gíti tīī Saloomɔn kugbɔŋu kun poon ní bi lēē tin kɔkɔ u dākafì kí mā kí kūtèe, an dàkà yii kunimbɔtidii ciŋŋi nì adiin ŋin māntìi tú-ŋee, nì adiin ŋin poon bi làá nīn kpáafí kunimbɔtidii gaajawanti nì tiwan tin bi dūu sú Unimbɔtee. 13 U nìn dū bisaraaŋaliibi nì Leefii yab kitiŋi yiŋŋi gbɔŋku ki tīī-u, ki kpáaǹ bi nín máaǹ kí nīn tūǹ atuun ŋin ti-Dindaan Diikunee. U nìn gíti dū kugbɔŋu kun poon bi ŋmàn̄ tiwan tin kɔkɔ bi làá nīn cáa tūǹ kunimbɔtidiin tuuŋŋee ki ŋée ki tīī-u. 14 U nìn dàkā-u sindaariya nyiŋfiŋu ŋun bi làá dūú mɔ́ɔ́ sindaariya wanti kamaayee, ní ki dàkā-u animbil kúti nyiŋfiŋu ŋun bi làá dūú mɔ́ɔ́ animbil kúti wanti kamaayee, ki nóó nì atuun ŋin bi làá nīn cáá tiwan gbanti ki tūǹee. 15 U nìn dàkā-u sindaariya fitilab nì bi-tɔkɔŋkaati nyiŋfiŋu, ki dàkā-u animbil kúti fitilab nì bi-tɔkɔŋkaati nyiŋfiŋu ki nóó nì atuun ŋin bi làá nīn cáá fitilab tɔ́kɔŋkaati kamaa ki tūǹee. 16 U nìn dàkā-u sindaariya teebilib bin pu bi làá nīn pāantí kpɔnɔb bin bi dūu ŋá Unimbɔti saraayee nyiŋfiŋu, ki dàkā-u animbil kúti teebilib nyiŋfiŋu, 17 nì njiimu mun bi cáa sàatī ki bàantí tinanee nyiŋfiŋu. U nìn dàkā-u fatiku sambiyaamu nì sindaariyamɔnti sambiyaamu nyiŋfiŋu, nì sindaariya sambiyaamu nì animbil kúti sambiyaamu nyiŋfiŋu. 18 U nìn dàkā-u sindaariyamɔnti saraafaŋŋu ŋun pu bi làá nīn tùutī talaalubee nyiŋfiŋu. Míǹ boonee ní Daafiidi dàkā-u min bi máaǹ kí mɔ́ɔ́ circir janjatɔrɔkuuee, nì keerubimbi bin bi dū sindaariya ki mɔ́ɔ́ bi kpátì bi-feeŋyi ki bīiǹ ti-Dindaan Poondi Dakaau puee nyiŋfiŋu.

19 Niinee ní Daafiidi bí yii: «Tin bí nee kɔkɔ ŋmàn̄ ki kā kugbɔŋu kun ti-Dindaan tīī-mee poon. Kugbɔŋu gbanti poon ní bi nín máaǹ kí tɔ̄ kunimbɔtidii tuuŋŋi kɔkɔ puee ŋmàn̄ ki kā.» 20 U lī mimmee ní ki kútì yii: «M-jipɔɔn, pɔ́ɔǹ a-ba kí ká dipɔbil. Kíĺ atuun gbanti kí taa fàŋkì báà tiba, ní a-wunti ń taa yɔ̀tī mun! Tiŋman, ti-Dindaan m-Nimbɔtiu làá nīn bí a-cee. Waa làá dū-si kí fá, ní ki kpá kí fàtī u-boon kí tīī-si kí cáá sāā ŋyunti ŋun a làá tɔ̄ úǹ Unimbɔti diiku mātam tuuŋŋi kí dóóyee. 21 Kpèè, bisaraaŋaliibi nì Leefii yab yākatì akiti akiti ki cí kí tɔ̄ kunimbɔtidiin tuuŋŋi. Kí kūtèe, binib bin cáá nlammɔntiimee nì bin cáá kí tɔ̄ atuun kɔkɔ nì ŋi-bulifee, nì Isirayeel kpilib nì samaa kɔkɔ bí a-cee kí ŋá a nín là puee.»