Krooniiki Gbɔmpeepeekaaku 27

Bijanjaliibi kitiŋi

1 Isirayeel yab bin bí ubɔti tundinee sɔ̀. Adican kpilib nì bijanjakpilib bin kpòotī binib kutuku kutukuee nì bin kpòotī binib dilaataal dilaataalee nì bikàliŋkpilib. Bíǹ di nìn kpèé ajanjakiti ŋin nìn bí ditundinee, di sá yii dijanjakitil kamaa nìn cáá dibindi poonee uŋmal ubɔ ní kí tɔ̄ ditundi. Dijanjakitil kamaa poonee, binib kutukub mmuŋku nì binaa di nìn bí. 2 Dijanjakitipeekaal din nìn yì ditundi uŋmapeepeekaa poonee kpiliu di sá Sabidiyeel jipɔɔn Yasoobaam. U-janjakitil poonee, binib kutukub mmuŋku nì binaa di nìn bí. 3 U nìn sá Peereesi maaliŋun ní ki nìn kpèé ajanjakiti kpilib bin cáá kí tɔ̄ ditundi uŋmapeepeekaa poonee. 4 Dikitil din nìn yì kí tɔ̄ ditundi uŋmaliliiti poonee kpiliu di sá uakooliija Doodayii. Miikilooti di nìn kpòotī dijanjakitil gbanti ní di nìn cáá binib kutuku mmuŋku nì binaa. 5 Dijanjakitil ditataatiil din nìn yì kí tɔ̄ ditundi uŋmatataati poonee kpiliu di nìn sá usaraaŋakpil Yooyadaa jipɔɔn Beenayawuu. U-janjakitil nìn cáá binib kutukub mmuŋku nì binaa ní. 6 Beenayawuu gbanti nìn kútì Bibaatandambi Mmuŋku nì Saalaa kitil pu ní ki nìn sá di-kpiliu. U-janjakitil poonee u-jipɔɔn Amiisafaadi nìn bí. 7 Dijanjakitil dinanaatiil din nìn yì kí tɔ̄ ditundi uŋmananaati poonee kpilib di nìn sá Joowaab naal Asayeel nì u-jipɔɔn Seefadiya. Bi-janjakitil nìn cáá binib kutukub mmuŋku nì binaa ní. 8 Dijanjakitil diŋmooŋmootiil din nìn yì kí tɔ̄ ditundi uŋmaŋmooŋmooti poonee kpiliu di nìn sá uiseerayiitija Sameekuuti. U-janjakitil nìn cáá binib kutukub mmuŋku nì binaa ní. 9 Dijanjakitil diluluutiil din nìn yì kí tɔ̄ ditundi uŋmaluluuti poonee kpiliu di sá uteekooyiija Yiira, Ikeesi jipɔɔn. U-janjakitil nìn cáá binib kutukub mmuŋku nì binaa ní. 10 Dijanjakitil diluluútiil din nìn yì kí tɔ̄ ditundi uŋmaluluúti poonee kpiliu di sá upeelooniija Eeleesi, Eefiraayiim naantiibi kansikin ubɔ. U-janjakitil nìn cáá binib kutukub mmuŋku nì binaa ní. 11 Dijanjakitil dininiitiil din nìn yì kí tɔ̄ ditundi uŋmaniniiti poonee kpiliu di sá ukusatiija Sibeekayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní. 12 Dijanjakitil diwawaatiil din nìn yì kí tɔ̄ ditundi uŋmawawati poonee kpiliu di nìn sá uanatootija Afiyeeseer, Beenjameen naakookun yɔu ubɔ. U-janjakitil nìn cáá binib kutukub mmuŋku nì binaa ní. 13 Dijanjakitil disaalaatiil din nìn yì kí tɔ̄ ditundi uŋmasaalaati poonee kpiliu di sá uneetoofatiija Maarayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní. 14 Dijanjakitil saalaa nì dipeepeekaal din nìn yì kí tɔ̄ ditundi uŋmal saalaa nì upeepeekaa poonee kpiliu di sá upiiratooniija Beenaya, Eefiraayiim naakookun yɔu ubɔ. U-janjakitil nìn cáá binib kutukub mmuŋku nì binaa ní. 15 Dijanjakitil saalaa nì dililiitiil din nìn yì kí tɔ̄ ditundi uŋmal saalaa nì uliliiti poonee kpiliu di nìn sá uneetoofatiija Eeldayii, Ootiniyeel maaliŋun ubɔ. U-janjakitil nìn cáá binib kutukub mmuŋku nì binaa ní.

Isirayeel yab naakɔti kpilib yiŋŋi

16 Isirayeel yab naakɔti kpilib yiŋŋi sɔ̀.

Rubeen naakookunee, Sikirii jipɔɔn Eeliyeeseer di sá ukpil.

Simeeyɔn naakookunee, Maaka jipɔɔn Seefatiyawuu di sá ukpil.

17 Leefii naakookunee, Keemuyeel jipɔɔn Asabiya di sá ukpil.

Aarɔn dicaŋkunee, Sadooki di sá ukpil.

18 Juuda naakookunee, Eeliiwuu un sá Daafiidi maanee di sá ukpil.

Isakaar naakookunee, Miikayeel jipɔɔn Oomirii di sá ukpil.

19 Sabulɔn naakookunee, Oobadiya jipɔɔn Isimaya di sá ukpil.

Neefitalii naakookunee, Asiriyeel jipɔɔn Yeereemooti di sá ukpil.

20 Eefiraayiim naakookunee, Asasiyawuu jipɔɔn Ooseeya di sá ukpil.

Manasee naakooku dijandi din bí Jɔɔdan buŋŋu ŋwìiń jeetilaŋki púee, Peedaya jipɔɔn Jooweel di sá ukpil.

21 Manasee naakooku dijandi din kóòń Galaadi tiŋkinee, Seekariyawuu jipɔɔn Idoo di sá ukpil.

Beenjameen naakookunee, Abineer jipɔɔn Yasiyeel di sá ukpil.

22 Daani naakookunee, Yeeroowaam jipɔɔn Asareeyeel di sá ukpil.

Isirayeel naakɔti kpilib dee.

23 Daafiidi kaa nìn yāntì bi kàan̄ binipɔmbi bin cáá abin mmuŋku kí nīn cáa sìntēe. Di sá yii ti-Dindaan nìn lī yii u làá yàntī Isirayeel yab ń bùtī kii iŋmalbijaa in bí kutaa puee ní^a. 24 Seeruya jipɔɔn Joowaab nìn kíĺ ki bíi kàaǹ Isirayeel yab, ama waa nìn púntì. Unimbɔti nìn gíí Isirayeel yab pu diŋuul dikàandi gbanti pu. An pu ní Isirayeel nibul kɔkɔ nyɔkɔm kaa ŋmàn̄ ki kā Daafiidi Tuuŋŋi gbɔŋkun^b.

Binib bin kpèé ubɔti gaajawantee

25 Adiyeel jipɔɔn Asimafeeti di nìn sá un kpèé ubɔti gaajawantee.

Oosiyasi jipɔɔn Yoowanan di nìn kpèé tikpaajin tin bi kpáafì ntiŋkpaamun nì ntimbilimun nì laakin sintil difɔkɔŋi bée.

26 Keeluub jipɔɔn Eesirii di nìn sá bikpaabi kpiliu Isirayeel tiŋki kɔkɔn.

27 Simeeyii un sá Raama tiŋkinee di nìn kpèé fiinyi sufii kpaaŋŋi kɔkɔ.

Sabidii un sá Seefam tiŋkinee di nìn kpèé ndamam min nyánní akpaan gbantin bi cāabìń ki kpáafée.

28 Baal-Anan un sá Beeti-Geedeer tiŋkinee di nìn kpèé ɔliifi sufii nì siikoomɔɔr sufii kpaaŋŋi ŋin bí Seefeelaayee.

Yoowasi di nìn kpèé ŋkpam min bi cāabìń ki kpáafée.

29 Siitirayi un sá Saarɔn tiŋkinee di nìn kpèé tinacaŋkpun tin bi kpàá Saarɔn naakpaapɔɔkunee.

Adilayi jipɔɔn Safaati di nìn kpèé tinacaŋkpun tin bi kpàá ditantakalinee.

30 Ɔbiil un sá Isimaayeel maaliŋunee di nìn kpèé igutaamu.

Yeediya un sá Meerɔnɔti tiŋkinee di nìn kpèé mmansalimu.

31 Yasiisi un sá Agaar maaliŋunee di nìn kpèé ipii nì iŋoobu.

Binib bin nìn kpèé ubɔti Daafiidi gaajawantee dee.

Binib bin pìlīǹ ubɔti Daafiidee

32 Daafiidi wee Joonatan nìn sá unyil ki ŋá sukul. Úǹ di nìn sá ubɔti saŋkiliu. Yeeyeel un baa nìn sá Akimoonii tiŋkee di nìn kpèé ubɔti jipɔmbi. 33 Ubɔti saŋkiliu ubɔ mun di sá Ayiitoofeel. Usayii un sá Arkii maaliŋunee di nìn sá ubɔti bɔɔ un u cáá u-poon bɔti ki tùkùee. 34 Ayiitoofeel kúm boonee, Beenayawuu jipɔɔn Yooyadaa nì Abiyataar di nìn fōō u-yil. Joowaab di nìn sá ubɔti janjakitil kpiliu.