Krooniiki Gbɔmpeepeekaaku 29

Binib tīī tiwan bí dūú mā kunimbɔtidii

1 Ubɔti Daafiidi bí samaa un kpáfì u-ceeyee kɔkɔ yii: «M-jipɔɔn Saloomɔn un ní ti-Dindaan lēēyee dáá sá kibiki kaa cáá dinyil báà tiba poon. Ama ditundi din dɔ̄ ki cí-uee kaa sá gbaŋgbam yal. Di sá yii an kaa sá dibeecindi ní u làá mā kí tīī unifoo, ama an sá ti-Dindaan Unimbɔti diiku ní u làá mā. 2 M dū m-pɔŋŋu kɔkɔ ki bɔ́ntì tiwan tin ní bi làá dūú mā m-Nimbɔtiu Diikuee ki síiǹ. M nyàab̄ sindaariya nì animbil kúti nì tasa kúti nì tikúmɔntiil nì idɔ bí dūú mɔ́ɔ́ tiwan tin kɔkɔ an máaǹee. M bɔ́ntì ataŋkpee ŋin bi yíì kɔɔrnaliinee nì ataŋkpee aba mun bí dūú nyɔ̀kɔntì kunimbɔtidii, ataŋkpabɔn bí ní ŋin nyim nyáń mi-ba mi-bee mun bí, an dàkà yii ataŋkpamɔnti kɔkɔ nì ŋi-bulifi nì ataŋkpee ŋin bi kpítí ki cáa māā adiinee. 3 Kí kūtèe, m nín néeń m-Nimbɔtiu Diikuee pu ní m dū mama m-ba sindaariyau nì m-nimbiliŋ ki tīī. M dūu kútì tin kɔkɔ m bɔ́ntì ki síiǹ bí dūú mā Circir Diiku gbantee pu. 4 M tīī sindaariyamɔnti un nyánní Oofiiri tiŋkinee tɔɔnib dilaataal, nì animbil kúti tɔɔnib alaataa ali nì imuŋku ili bí dūú dùntī kí nákań kunimbɔtidii guŋŋi pu. 5 Kɔŋkɔnnee ni-kansikin ŋma di kíí nì dipɔbil diba kí tīī ti-Dindaan sindaariya nì animbil kúti? Mimmee bitɔntɔnliibi làá dāá dūú mɔ́ɔ́ tiwan tin kɔkɔ máaǹ bí dū sindaariya nì animbil kúti kí mɔ́ɔ́yee.»

6 Niinee ní adican kpilib, nì Isirayeel naakɔti kpilib, nì bijanjakpilib bin kpòotī bijanjaliibi kutuku kutukuee, nì bin kpòotī bijanjaliibi dilaataal dilaataalee nì anikiti ŋin tūǹ ubɔti tuuŋŋee kpilib kɔkɔ kíí ki tīī tiwan nì dipɔbil diba. 7 Tin bi nìn tīī bí dūú mā ti-Dindaan Diikuee di sá sindaariya tɔɔnib dilaataal nì imuŋku ita nì saalaa, nì sindaariya jitɔmbi kutukub saalaa, nì animbil kúti tɔɔnib alaataa ata, nì tasa kúti an jítì kii tɔɔnib alaataa aluu pu nì tikúmɔntiil an jítì tɔɔnib kutukub bita pu. 8 Binib bin kɔkɔ nìn cáá ataŋkpamɔntee nìn dū-ŋi ki tīī Yeeyeel un sá Geersɔn maaliŋunee ú dūú ŋá Unimbɔti diiku gaajawanti poon. 9 Binib gbanti nìn dū bi-gaajawanti ki tīī ti-Dindaan nì dipɔbil diba ní ki nìn bí mmɔnni. An nìn mɔ́ɔkiǹ ubɔti Daafiidi mun tikpil.

Daafiidi wimmeem

10 Niinee ní Daafiidi jáam̀ ti-Dindaan samaa kɔkɔ nimbiin ki lī yii: «Bí nyɔ̄ŋkì sii ti-Dindaan, ti-naanja Jaakɔb Nimbɔtiu kí nīn cáa cá jaanjaan. 11 Sii ti-Dindaan di sá ukpaan ki yì mpɔn nì tinyool nì jilma nì dibeel^a! Tiŋman, sii ti-Dindaan di yì tin kɔkɔ bí yilpu nì taapuee. Sii di sá ubɔti, sii un tɔ́kɔ́ tin kɔkɔ cáá kufoouee puee. 12 Sii cee ní tigaajati nì tinyool nyēeń. Sii di cáá mpɔn tiwan kɔkɔ pu. Sii di cáá dikpabil nì mpɔn. Sii di cáá mpɔn kí yòon̄ unil yilpu ú báań inyaan. 13 An pu ní ti jáaḿ sii ti-Nimbɔtiu, ní ki nyɔ́ŋkí a-yinnyaandi. 14 Maa sá tibaaa, m-nibul yab mun kaa sá tiba. An kaa sá timbi ti-ba di cáá mpɔn kí tīī-si tiwan tin ti bíi tìì-si nee. Sii di tīī-ti an wanti kɔkɔ. Tin a tīī-tee ní timbi fàtīi gīintí ki tìì-si nee. 15 Timbi sá binicambi nì binikɔkaabi ní a-nimbiin, kii ti-naanjab kɔkɔ nín nìn bí puee. Ti-maŋfal wiiŋyi kitiŋ nee pu sá kii mboon nín jītí puee ní, dimákal kpá. 16 Ti-Dindaan ti-Nimbɔtiu, ti kóoǹ tiwan tikpil ki kpúkuǹ kí dūú mā kudii kí tīī a-circir yindi tinyool. Too, tikɔkɔ nyánní a-cee ní ki sá a-wanti. 17 M-Nimbɔtiu, m nyí yii a kóò unil pɔbilin kí nyɔ̀kɔfì kí kpèè, ní ki néeń tin bí deedeeyee. Mamee nì dipɔbil diba ní m dū m-gaajawanti ki ŋá-si nlammɔntiim saraau. Ní m gíti ká díǹ mun nì dipɔɔpindi yii a-nibul din kóoǹ ki kpáfì doo nee mun ŋá míǹ mbaantiim. 18 Ti-Dindaan, ti-naanjab Abraam nì Isaaki nì Jaakɔb Nimbɔtiu, yàntī a-nibul ń nīn cáá dipɔɔmɔntiil gbanti, ní bi-landɔkɔŋu kɔkɔ ń nīn pée bí sii baba pu kí nīn cáa cá jaanjaan. 19 Tīī m-jipɔɔn Saloomɔn tibulcin pɔbil ú nīn nóó a-marab nì a-dàkatam nì a-bɔkpaaŋi, kí nīn tɔ́-ŋi. Ú mā a-Circir Diiku kun pu m bɔ́ntì tikɔkɔ ki yóoǹee.»

20 Boonee ní Daafiidi bí samaa yii: «Ní jāam̀maan ti-Dindaan ni-Nimbɔtiu!» Ní samaa kɔkɔ jáam̀ ti-Dindaan, bi-naanjab Nimbɔtiu. Bi nìn tātìi gbāaǹ bi-yigbeeŋi tūū kitiŋ Unimbɔti nì ubɔti nimbiin.

Bi nín kāaǹ Saloomɔn dibeel puee nì Daafiidi kúm bɔti

21 Ku wúntèe ní Isirayeel yab ŋá ti-Dindaan mpèé saraabi nì bisaraawɔkaabi. Bi nìn kūū inajaa kutuku, ipijaa kutuku nì apibil kutuku, ní ki kútì ndamam min nyɔkɔm an sá bí kūtèe ki dūu ŋá saraabi. Mpèé saraabi bin bi nìn ŋée nìn wīikí kí kpíiǹ Isirayeel yab bin kɔkɔ nìn bí niinee. 22 Ŋwiin gbantee, Isirayeel yab nìn jíń ki nyùn̄ ti-Dindaan nimbiin nì dipɔɔpindi nì ifaal. Ŋwiin gbanti ní bi kāaǹ Daafiidi jipɔɔn Saloomɔn ubɔti nliliitiim. Bi nìn bātì ŋkpam ki sītì u-yil pu ki kāaǹ-u tibɔtiil ú nīn bí ti-Dindaan tundin. Bi nìn bātì ŋkpam ki sītì Saadooki mun yil pu ú kpántí usaraaŋakpil. 23 Saloomɔn nìn kāl̀ ti-Dindaan beejal pu ki fōō u-baa Daafiidi yil ki kpántì ubɔti. An nìn bútì-u tikpil ní Isirayeel yab kɔkɔ nìn tɔ́-u tiŋan pu. 24 Bijanjakpilib kɔkɔ nì bibaatandambi kɔkɔ, ki kpáaǹ Daafiidi jipɔmbi bin kíǹee kɔkɔ nìn sīntì bi-ba taapu ki tīī Saloomɔn ki tɔ́-u^b. 25 Ti-Dindaan nìn yāntì Saloomɔn yindi yíkì yilpu tikpil Isirayeel yab kɔkɔ nimbiin. U nìn yāntì Saloomɔn ká jilma tiŋan tiŋan pu, ní u-nyooti nìn jítiǹ Isirayeel bibɔtiibi bin kɔkɔ līntiǹ-uee.

26 Isayi jipɔɔn Daafiidi nìn jíń dibeel Isirayeel kɔkɔ pu ní. 27 U nìn jíń dibeel Isirayeel tiŋki kɔkɔ pu abin imuŋku ili ní. U nìn kāl̀ dibeel Eebrɔn tiŋkin abin aluli ní ki kāl̀ dibeel Jeerusaleem tiŋkin abin mmuŋku nì saalaa nì ata. 28 U nìn púĺ tiŋan ní ki nín kpíì. U nìn cáá tigaajati tikpil, ki nìn nyáń diyindi mun. U nín kpíìyee, u-jipɔɔn Saloomɔn di fōō u-yil ki kpántì ubɔti.

29 Ubɔti Daafiidi tuuŋŋi, kí yòon̄ ŋi nín kíĺ puee kí tin sāā ŋi nín kúntì puee ŋmàn̄ ki kā Unimbɔti bɔnaatiliu Samiyeel^c tuuŋŋi gbɔŋkun, nì Unimbɔti bɔnaatiliu Naatan tuuŋŋi gbɔŋkun nì Unimbɔti bɔnaatiliu Gaadi tuuŋŋi gbɔŋkun. 30 Tigbɔn gbantin ní bi ŋmàn̄ tin jítì Daafiidi pu ŋyunti ŋun u sá ubɔtee nì u nín dàkā dibaatandi puee nì agìń ŋin u kée nì tin jítì Isirayeel tiŋki puee nì tin jítì abee ŋin kíǹee puee.