Krooniiki Gbɔmpeepeekaaku 5

Rubeen naantiibi

1 Jaakɔb biseebiki Rubeen jipɔmbi sèé. Rubeen di sá Jaakɔb jipɔŋkpiliu. Ama u nìn dōoǹ nì u-baa nimpoobi kansikin ubɔ. Míǹ boonee ní bi cúú tijipɔŋkpiti ki fōō u-cee ki dūu tīī Jooseefi jipɔmbi. Jooseefi mun nìn sá Isirayeel jipɔmbi kansikin ubɔ ní. Kí yòon̄ ŋyunti gbantee, baa nìn gíti dū Rubeen ki yíiń ujipɔŋkpil. 2 Juuda di nìn sá u-mambi nì u-naalib kansikin un pɔ̄ɔ̄, ní u-dicaŋkun yab ubɔ dāa kpántì Isirayeel bɔtiuee^a. Ama Jooseefi ní bi dū tikpiti ki tīī. 3 Jaakɔb jipɔŋkpiliu Rubeen jipɔmbi di sá Anɔki nì Palu nì Eesirɔn nì Kaarmii. 4 Jooweel naantiibi di sá Seemaya nì Jooweel nì Gɔɔgi nì Simeeyii, 5 nì Miika nì Raaya nì Baal, 6 nì Baal jipɔɔn Beera. Beera nìn sá Rubeen naakookun yab kpiliu ubɔ ní Asuur bɔtiu Tiigilaati-Piilneeseer nìn cúú ki cūnnì kuyuŋu^b. 7 Beera nabiyaamu ki nóó nì bi nín pēē pēē mmaal pu nì adican pu bi ŋmàn̄ bi-yiŋŋi ki bíl̀ee, upeekaa di sá Jeeyeel, ní ki páaǹ Seekariyawuu, 8 ní ki páaǹ Asaasi jipɔɔn Beela. Beela sá Seema naantiiu nì Jooweel naantitɔntɔkɔl ní.

Rubeen yab nìn kóò kitiŋ kin dɔ̄ kí yòon̄ Arooweer tiŋki ŋgiil pú kí cáá sāā Neeboo jool nì Baal-Meeyɔn tiŋki ŋgan púee ní. 9 Ŋwìiń nyalaŋki púee, bi nìn kóò kitiŋ kin dɔ̄ ki tin cáa sāā kuteeu kun yākatì bi nì Eefiraati mɔɔlee nín kífí púee ní, kun puee bi-waŋkuti nìn būtì Galaadi tiŋki pu tikpilku. 10 Ubɔti Saayuul yuntiŋuee, bi nìn jáń ki pɔ́ɔkiǹ Agaar maaliŋun yab ní ki fōō mpaan ki kāl̀ Galaadi tiŋki kin dɔ̄ ŋgan púee kɔkɔ.

Gaadi naantiibi

11 Gaadi naakookun yab nìn kóò Rubeen yab tiŋki ŋgan pú ní, Baasan tiŋki kí tin cáá sāā Salka tiŋki. 12 Baasan tiŋkin niinee, bi-kpiliu upeepeekaa di nìn sá Jooweel, uliliiti di sá Safan, ní ki páaǹ Jaanayi nì Safaati. 13 Ki nóó nì bi nín pēē pēē mmaal puee, bi-nabiyaamu mun kíǹee kpilib di sá Miikayeel nì Meesulam nì Seeba nì Jooraayi nì Jakan nì Siiya nì Eebeer. Bi nìn nyáń binib biluli ní. 14 Urii jipɔɔn Abiikayiil niboolii di sá bikpilib gbanti. Abiikayiil naanjab di sá Jaroowa nì Galaadi nì Miikayeel nì Jeesisaayi nì Jaadoo nì Buusi. 15 Abidiyeel jipɔɔn nì Guuni naantiiu Akii di nìn sá Gaadi naakookun yab gbanti kɔkɔ kpiliu. 16 Gaadi dicaŋkun yab nìn kóò Galaadi nì Baasan tiŋkpaammun ní. Bi nìn gíti kóò ntimu mun bí mu-taapuee nì Saarɔn naakpaapɔɔkun kí tin cáá sāā mu-kpaanyɔmmu.

17 Bi nìn kàan̄ binib gbanti kɔkɔ ki ŋmàn̄ bi-yiŋŋi ki ŋá dikàandi gbɔŋkun ŋyunti ŋun Jootam nìn sá Juuda bɔtiu ní Jeerooboowaam sá Isirayeel bɔtiuee ní.

18 Rubeen nì Gaadi naakɔtin yab nì Manasee naakooku dijandi diba yab sá bibaatandambi kutukub imuŋku ili nì binaa nì binib alaataa aluli nì imuŋku ita. Bi nìn cíkitì ki ŋūǹ kí já kujaau, kí ŋúb́ digbampɔɔl nì kitàataajiki kí tɔ̄ butɔbu. 19 Bi nìn jáń nì Agrii yab nì Jeetuur nì Nafiisi^c nì Noodaab dicaŋŋi yab. 20 Kujaau gbanti poonee, bi nìn dū bi-mákal ki páaǹ Unimbɔti pu ní ki mēē-u yii ú tūtuǹ-bi. Unimbɔti nìn fōō bi-wimmeem ní ki tútuǹ-bi. Míǹ ní bi nìn jáń ki pɔ́ɔkiǹ Agrii yab nì bin nìn pá bi-boonee. 21 Bi nìn cúú Agrii yab cee igutaamu kutukub imuŋku ili nì saalaa nì ipii nì iŋoobu kutukub alaataa ali nì imuŋku ili nì saalaa nì mmamu kutukub bili. Bi nìn cúú binib kutukub dilaataal mun kuyuŋu 22 ní ki kūū binannanliibi tikpil. Di sá yii Unimbɔti di nìn līī bi-nyɔkɔpu ní bi jáń kujaau gbanti. Niinee ní bi gbíntì Agrii yab tiŋki gbantin ki kāl̀ ki dāa sāā ŋyunti ŋun bi dāa cúú Isirayeel yab ki cūnnì kuyuŋuee.

Manasee naantiibi bin kóòń Jɔɔdan buŋŋu ŋwìiń nyalaŋki púee

23 Manasee naakooku dijandi diba yab nìn dɔ́miń ki kāl̀ kitiŋ kin dɔ̄ kí yòon̄ Baasan tiŋki ŋgiil pú kí cáá sāā Baal-Eermɔn tiŋki nì Seeniir nì Eermɔn jool ŋgan púee ní. 24 Bi nín pēē pēē mmaal puee, bi-kpilib yiŋŋi di sá Eefeer nì Iseeyii nì Eeliyeel nì Asiriyeel nì Irimeeya nì Oodafiya nì Yaadiyeel. Bíǹ gbanti kɔkɔ nìn sá bibaatandambi nì bin nyáń diyindee ní.

25 Ama Rubeen nì Gaadi naakɔtin yab nì Manasee naakooku dijandi din bí Jɔɔdan buŋŋu ŋwìiń nyalaŋki púee yab nìn fātì bi-boon ki tīī bi-naanjab Nimbɔtiu ní ki nìn bí ki tòotī atimbun ŋin nib Unimbɔti nìn jìn̄ ki nyántì ki wāatì-bi kitiŋee waaŋi. 26 Niinee ní Isirayeel Nimbɔtiu sāal̀ Asuur bɔtiibi Puul nì Tiigilaati-Piilneeseer ní bíǹ dɔ́miń ki cúú-bi ki cūnnì Alaa nì Abɔɔr nì Ara timmun nì Goosan mɔɔl caŋin timmun kuyuŋu. Bi dáá gbíntìi bí niin ki dāa sāā díǹ^d.

Leefii naantiibi

27 Leefii jipɔmbi^e di sá Geersɔn nì Keeyaati nì Meerarii. 28 Keeyaati jipɔmbi di sá Amiiraam nì Isaar nì Eebrɔn nì Usiyeel. 29 Amiiraam jipɔmbi di sá Aarɔn nì Mooyiisi ní u-bisal sá Miiriyam. Aarɔn jipɔmbi di sá Nadaab nì Abiyuu nì Eeleeyasaar nì Itamaar. 30 Eeleeyasaar di màl̄ Piinaasi, ní Piinaasi màl̄ Abiisuwa, 31 ní Abiisuwa màl̄ Bukii, ní Bukii màl̄ Usi, 32 ní Usi màl̄ Seeraya, ní Seeraya màl̄ Meerayooti, 33 ní Meerayooti màl̄ Amariya, ní Amariya màl̄ Ayiituub, 34 ní Ayiituub màl̄ Saadooki, ní Sadooki màl̄ Ayiimaasi, 35 ní Ayiimaasi màl̄ Asariya, ní Asariya màl̄ Yoowanan, 36 ní Yoowanan màl̄ Asariya. Asariya gbanti di dāa kpántì usaraaŋakpil kunimbɔtidii kun Saloomɔn nìn máń Jeerusaleem tiŋkinee poon. 37 Asariya di màl̄ Amariya, ní Amariya màl̄ Ayiituub, 38 ní Ayiituub màl̄ Saadooki, ní Saadooki màl̄ Saluum, 39 ní Saluum màl̄ Ilikiya, ní Ilikiya màl̄ Asariya, 40 ní Asariya màl̄ Seeraya, ní Seeraya màl̄ Joosadaaki. 41 Neebukadineesaar nìn cúú Joosadaaki ki cūnnì kuyuŋu ŋyunti ŋun ní ti-Dindaan nìn yāntì bi cúú Juuda yab nì Jeerusaleem yab ki cūnnì kuyuŋuee.