Bibɔtiibi Gbɔnliliitiiku 23

1 Ubɔti nìn tú bi yíiń Juuda nì Jeerusaleem tindaŋkpilib ní bi kóoǹ ki kpáfì u-cee.2 Boonee ní u nín jɔ́ḿ ti-Dindaan Diikun ki kpáaǹ Juuda yab kɔkɔ nì Jeerusaleem yab kɔkɔ, an dàkà yii bisaraaŋaliibi nì Unimbɔti bɔnaatiliibi nì samaa kɔkɔ kí yòon̄ ŋwaamu kí tin cáá sāā bikpaambi, ubɔ kaa nìn kíǹ. Niinee ní ubɔti kàan̄-bi tin kɔkɔ bi ŋmàn̄ an kā dipoondi gbɔŋku kun bi ká ti-Dindaan Diikunee.3 Ubɔti nìn yú ti-Dindaan Diiku kasarkau nyɔkɔpu ní ki pōoǹ kí nīn sí nì ti-Dindaan deedee, kí nīn ŋúb́ u-marab nì u-dàkatam nì u-bɔkpaaŋi nì u-pɔbil kɔkɔ nì u-naŋki kɔkɔ. U nìn gíti pōoǹ kí nīn tɔ́ tin kɔkɔ ŋmàn̄ ki kā dipoondi taŋkpapilintinee. Samaa kɔkɔ mun nìn kíí kí ŋá kii ubɔti nín nìn pōoǹ puee.

Joosiyaasi fātìi bɔ́ntì dinimbɔtinool

(2 Kroo 34.3-5)

4 Míǹ boonee ní ubɔti tīī usaraaŋakpil Ilikiyawuu nì bisaraaŋaliibi bin bí ki tútúǹ-uee nì bin cí ti-Dindaan Diiku punyɔkɔkee mara yii bí nyāntí tiwan tin kɔkɔ bi nìn máń ki cáa jáaḿ diwaal Baal nì diwaal Aseera nì iŋmalbi in bí kutaa puee mmɔŋki. Ní bi nyántì tiwanee Jeerusaleem tiŋki kpaanceetiŋu, Seedrɔn tantakalin ki wùn̄ ŋŋmi, ní ki yōoǹ ŋfantam ki cūnnì Beeteel. 5 Joosiyaasi nìn jìn̄ awaa saraaŋaliibi bin Juuda bɔtiibi nìn kāaǹ bí nīn ŋáań saraabi ŋgbantamu pu nì Juuda timmun nì Jeerusaleem kpaanceetiiyee. U nìn jìn̄ bin mun nìn tùutī talaalub ki tìì diwaal Baal nì ŋwìiń nì uŋmal nì iŋmalbi nì tin kɔkɔ pée ŋmíntí kutaa puee. 6 U nìn cóotì diwaal Aseera windɔŋu ŋun nìn bí ti-Dindaan Diikunee ki cáa cūnnì Seedrɔn tantakalin, Jeerusaleem tiŋki kpaanceetiŋu. Bi nìn wùn̄-ŋu ŋŋmi niin ní ki dū ŋu-fantam ki yāaǹ samaa ceekun. 7 U nìn gbáń ki wīī binib bin nìn bí ti-Dindaan Diikun ki ŋáań alaakpaatuunee diiŋŋi. Adiin gbantin ní binimpoobi nìn kàal̀ ki lù tiwampeeŋkaal tin bi pèentí ki jáaḿ diwaal Aseerayee.

8 Míǹ boonee ní u yāntì bisaraaŋaliibi bin kɔkɔ bí Juuda tiŋkinee dɔ́miń. U nìn bíil̀ ipaan in bí ŋgbantamu pu bisaraaŋaliibi nìn tùutī talaalub ki tìì awaayee ki yōoǹ Geeba tiŋki ki cáa sāā Beerseeba. U nìn yāntì bi gbáń ki wīī isaraafan in bi nìn máń ki síiǹ Jeerusaleem tiŋki punyɔmmu caŋinee, cilinjee nsaraafan ŋun nìn bí Joosuwa un nìn sá gɔminee punyɔkɔpuee. Nsaraafanee nìn bí a yaa dī kipunyɔkɔee ki kóò kitiŋinee ŋgan pú ní. 9 Baa nìn pú ŋgbantamu pu saraaŋaliibi gbanti nsan bí ŋá saraabi ti-Dindaan saraafaŋŋu ŋun bí Jeerusaleemee pu. Ama bi nìn ŋūǹ kí ŋmɔ́ kpɔnɔb bin baa ŋá ŋkpɔnɔnyɔkɔee kii bisaraaŋaliibi bin kíǹee nín ŋmóò puee.

10 Ubɔti nìn bíil̀ Toofeeti naapaal din nìn bí Inoom tantakalinee, án nín làá ŋá pu ubɔ ń taa ti dū u-jipɔɔn àá u-bisal kí wà ŋŋmi kí ŋá saraa kí tīī diwaal Mooleeki^a mpaan gbanti puee. 11 U nìn kúntì itaamu in ní Juuda bɔtiibi nìn dūu sú bi cáa jáaḿ ŋwìińee. Itaamu gbanti nìn bí ti-Dindaan Diiku punyɔkɔki caŋin ní, kaa dátiǹ ufaal Neetan-Meeleeki diiku, ní ki bí adiin ŋin bi máń ki kútì ti-Dindaan Diiku puee. Bi nìn wùn̄ ŋwìiń tɔrɔkub mun. 12 U nìn tí gbáń ki wīī isaraafan in Juuda bɔtiibi nìn máń ki síiǹ Akaasi diiŋŋi yilpuee. U nìn wīī isaraafan in Manasee nìn máń ki síiǹ ti-Dindaan Diiku ciŋŋi aliitil poonee. U nín gbáń ki wīī-i míǹ ki dóòyee ní ki yōoǹ ki cáa fá Seedrɔn tantakalin. 13 U nìn bíil̀ ŋgbantamu pu saraafaŋyi in ubɔti Saloomɔn nìn máń Ɔliifi jool ŋgiil pú, Jeerusaleem caŋinee. Bi nìn máń isaraafan gbanti ki tīī Siidɔn yab timbiiliwaal Asitaartee nì Moowaab yab timbiiliwaal Keemooki nì Amɔn yab timbiiliwaal Mooleeki ní. 14 Joosiyaasi nìn yāntì bi gbáń ki wīī awaa taŋkpeeŋi ŋin bi nìn dūu cóoǹee, ki yāntì bi gāatì iwindɔ in bi nìn cóoǹee ní ki yāntì bi dū anikpab ki bíl̀ laakin ataŋkpeeyee nì iwaadɔee nìn cɔ́ee.

Joosiyaasi mɔ̄tìi bɔ́ntì dinimbɔtinool Isirayeel tiŋkin

(Kpèè 2 Kroo 34.6-7)

15 Joosiyaasi nìn gbáń ki wīī Beeteel saraafaŋŋu nì mpaan ŋun pu bi nìn jáaḿ awaayee. Neebaati jipɔɔn Jeerooboowaam un nìn yāntì Isirayeel ŋá ikpitee di nìn máń-ŋu. U nìn tūū mpaanee pu ŋŋmi, ki gbáń ki wīī nsaraafan ní ki dū ŋwindɔ ŋun nìn bí niinee ki tūū ŋŋmi ŋu wùn̄ dúsi dusi ki kpántì ŋfantam.

16 Míǹ boonee, Joosiyaasi fātèe ki ká akaakul di bí niin dijool puee. Niinee ní u tú binib bi cūtìi yōoǹ akaakulee poon akpab ní u dū-ŋi ki páaǹ nsaraafan pu ki wùn̄ ŋŋmi ki bíil̀-ŋu ki nóó nì ti-Dindaan bɔnaatiliu nín nìn sòon̄ pu ki síiǹee. 17 Ní Joosiyaasi gíti bālifì yii: «Dikumpool dilal ní m wāĺ nee ní?» Ní kitiŋ gbantin nib kíí-u yii: «An sá Unimbɔti bɔnaatiliu un nyánní Juudayee kaakul, úǹ di nìn sòon̄ tin a dá láá ŋá nsaraafan nee puee ki síiǹ.» 18 Niinee Joosiyaasi tīī mara ki lī yii: «Ní yàntī dikaakul gbanti! Ubɔ ń taa gbēē ubɔnaatil gbanti kpabiŋ!» An nín dī pu bi yāntì u-kpabiŋee dee, ki kpáaǹ ubɔnaatil un nìn nyánní Samaarii^b tiŋkin ki dɔ́mińee.

19 Isirayeel bɔtiibi nìn máń ŋwaadibiyaamu Samaarii timmu kɔkɔn ki yāntì ti-Dindaan nìn gíí diŋuul. Joosiyaasi nìn gbáń ki wīī ŋwaadibiyaamu gbanti kɔkɔ kii u nín nìn ŋá pu Beeteel tiŋkinee. 20 U nìn dū ŋgbantamu pu waaŋi tandambi ki páaǹ isaraafan pu ki kūū ní ki dū anikpab ki páaǹ ŋi-pu ki tūū ŋŋmi. U ŋá míǹ ki dóòyee ní ki nín gítiń Jeerusaleem.

Juuda yab jíń Dilákatil jiŋaaliu

(Kpèè 2 Kroo 35.1,18-19)

21 Ubɔti Joosiyaasi nìn tīī samaa kɔkɔ mara nee yii: «Jīmaan Dilákatil jiŋaaliu kí tīī ti-Dindaan ni-Nimbɔtiu tinyool kii an nín ŋmàn̄ pu ki kā dipoondi gbɔŋku nee poon puee^c.» 22 Kí yòon̄ ŋyunti ŋun bibɔsoonliibi nìn dáá kpòotī Isirayeel tiŋkee nì Isirayeel yab nì Juuda yab bɔtiibi yuntiŋuee, baa ti jíń Dilákatil jiŋaaliu kii un bi jíń nee. 23 Joosiyaasi nín jíń dibeel abin saalku nì ata poonee ní bi jíń Dilákatil jiŋaaliu gbanti Jeerusaleem ki tīī ti-Dindaan tinyool.

Joosiyaasi maŋfal wiiŋyi nín kúntì puee

(Kpèè 2 Kroo 35.20-27, 36.1)

24 Joosiyaasi nìn ŋá kii an nín ŋmàn̄ pu ki kā kugbɔŋu kun ní usaraaŋakpil Ilikiyawuu nìn ká ti-Dindaan Diikunee. U nìn kúntì bin kàal̀ abɔɔjal puee, ki kúntì awaakpitikaa nì amakaa nì ntimbiil tuuŋŋi ŋin kɔkɔ bi nìn pée ŋáańee Juuda nì Jeerusaleem timmun.

25 Bibɔtiibi bin kɔkɔ nìn jíń dibeel ki wāatì ní Joosiyaasi nín bāańee, ubɔ kaa bàn̄-u. U nìn dū u-ba kɔkɔ ki tīī ti-Dindaan ki nóó-u nì u-pɔbil kɔkɔ nì u-naŋki kɔkɔ nì u-pɔŋŋu kɔkɔ kii Mooyiisi marau nín bí yii bí ŋá puee. Úǹ boonee, ubɔti ubɔ kaa ti nyáń ki bàn̄-u.

26 Nì míǹ kɔkɔee, ti-Dindaan ŋuukpaandi din u nìn gíí Juuda puee kaa nìn sɔ̄ŋkì, di sá yii Manasee nìn yīntiǹ-u ki gbítì u-ŋuul ŋkpitim pu. 27 An pu ní ti-Dindaan nìn lī yii: «M làá jà Juuda yab kí taa ti wāl̀-bi kii m nín ŋá Isirayeel yab puee. M làá dū Jeerusaleem tiŋki kin ní m lēēyee nì Kudii kun ní m nìn pōoǹ yii m làá nīn bí ku-ni kí nīn lèekī m-ba ki dàkèe kí fá.»

28 Joosiyaasi tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 29 Joosiyaasi nín nìn dáá bée ní Eejipiti bɔtiu Neekoo nín cá Eefiraati mɔɔl caŋin kí já nì Asuur bɔtiu. Ubɔti Joosiyaasi nìn kíntì-u nsanni kí já nì u, ama ní Faaroo kūū-u Meegiidoo tiŋkin. 30 U kpíì mimmee ní u-janjaliibi dū-u ki ŋá tɔrɔku ubɔn ki yōoǹní-u Meegiidoo ki cáań Jeerusaleem. Bi nìn dū-u ki síb́ u-kaakulin. Míǹ boonee ní Juuda yab yōoǹ u-jipɔɔn Joowakaasi ki kāaǹ tibɔtiil ú fōō u-baa yil.

Joowakaasi, Juuda bɔtiu

(2 Kroo 36.2-4)

31 Joowakaasi nìn cáá abin mmuŋku nì ata ní ki kpántì ubɔti. U nìn kóò Jeerusaleem ní ki jíń dibeel iŋmal ita. U-na nìn sá Liibina tiŋkin, Irimeeya bisal ní bi yíì-u yii Amutaal. 32 U nìn ŋá tin kaa kítì ti-Dindaan nimbiinee kii u-naanjabee. 33 Faaroo Neekoo nìn cúú-u ki bóob́-u ikusaka ní ki cáá-u ki cūnnì Riibila tiŋki kin bí Amati tiŋkpaaŋkinee ú taa ti nín̄ sá ubɔti Jeerusaleem. Neekoo nìn síiǹ Juuda yab yii bí pà lampoo animbil kúti kiiloobi kutukub bita nì sindaariya kiiloobi mmuŋku nì saalaa.

34 Míǹ boonee ní u lēē Joosiyaasi jipɔɔn Eeliyaakiim ki kāaǹ ubɔti ú fōō u-baa yil ní ki kpántì u-yindi bi kíǹ ki yíì-u yii Yooyakiim. U nìn yōoǹ Joowakaasi úǹ ki cūnnì Eejipiti tiŋkin ki tɔ́ sarka, niin ní u gbíntì ki dāa kpáàa kpíì^d. 35 Yooyakiim nìn tīī Faaroo Neekoo animbil nì sindaariya un u nìn bālifèe. Kí ŋmā kí pà an nimbiliŋee, u nìn kpèé báà ŋma ŋmam ní kí gíí udaan kunimbiŋmiiu kun an sá ú pèe.

Yooyakiim, Juuda bɔtiu

(2 Kroo 36.5-8)

36 Yooyakiim nìn cáá abin mmuŋku nì aŋmoo ní ki kpántì ubɔti. U nìn kóò Jeerusaleem ní ki jíń dibeel abin saalaa nì diba. U-na nìn sá Ruuma tiŋkin ní ki sá Peedaya bisal ní bi yíì-u yii Seebuda^e. 37 Yooyakiim nìn ŋá tin kaa kítì ti-Dindaan nimbiinee kii u-naanjabee ní.