Bibɔtiibi Gbɔnliliitiiku 24

1 Ŋyunti ŋun Yooyakiim sá ubɔtee, ní Babiloon bɔtiu Neebukadineesaar dɔ́miń kí já nì Juuda^a yab. Yooyakiim nìn kíǹ ki bí Neebukadineesaar taapu ki cáa sāā abin ata, ama ní boonee, ki dāa yíkì kaa kíí u-ba pu. 2 Niinee ní ti-Dindaan dū Babiloon nì Siirii nì Moowaab nì Amɔn fukuliliibi ki tɔ́ u-pu. Bi nìn nāaǹ Juuda tiŋki ki nóó nì ti-Dindaan nín nìn dī u-tɔntɔnliibi bibɔnaatiliibi pu ki sòon̄ pu ki síiǹee. 3 Ti-Dindaan u-ba di nìn cáań nnaabu gbanti ki tɔ́ Juuda yab pu, kun puee u nìn là kí jà-bi kí wàatī u-ba. Tiŋman ubɔti Manasee nìn baasii ŋá ikpiti ní. 4 U nìn kūū maanyiibab tikpil ki yāntì fatiku gbí Jeerusaleem tiŋki, an puee ti-Dindaan kaa nìn kíí kí dūú pɔ̄^b.

5 Yooyakiim tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 6 Yooyakiim nìn kpíì ki cūtìi ŋàl̄ u-baabi ní u-jipɔɔn Yooyakiin fōō u-yil ki kpántì ubɔti.

7 Eejipiti bɔtiu kaa nìn gíti nyēē u-tiŋkin kí cù kujaau, di sá yii Babiloon bɔtiu nìn jáń ki fōō ntimu mun kɔkɔ nìn bí u-taapuee, kí yòon̄ Eejipiti bùmbiki kí cáá sāā Eefiraati mɔɔl.

Yooyakiin, Juuda bɔtiu. Bin bi péé péé ki cúú kuyuŋuee

(2 Kroo 36.9-10)

8 Yooyakiin nìn cáá abin saalku nì ata ní ki kpántì ubɔti. U nìn kóò Jeerusaleem ní ki jíń dibeel iŋmal ita. Bi nìn yíì u-na yii Neeyuseeta. U-na gbanti nìn sá Eelnatan bisal ní ki nyánní Jeerusaleem. 9 U nìn ŋá tin kaa kítì ti-Dindaan nimbiinee kii u-baa nín nìn pée ŋá puee ní deedeedee.

10 Ŋyunti gbantee, Babiloon bɔtiu Neebukadineesaar janjaliibi nìn dɔ́miń kí já nì Jeerusaleem yab ní ki māntìi tú-kì. 11 Babiloon bɔtiu Neebukadineesaar u-ba nìn dɔ́miń kí já nì kitiŋ kin ní u-janjaliibi nìn māntìi túee. 12 Niinee Juuda bɔtiu Yooyakiin nì u-na nì u-kpambaliŋ nì u-janjakpilib nì u-kàliŋkpilib nyáń ki túŋkì Babiloon bɔtiu. Neebukadineesaar nín jíń dibeel abin anii poonee ní u cúú-bi ki tɔ́ sarka^c.

13 Kii ti-Dindaan nín nìn pée sòon̄ pu ki síiǹee, Neebukadineesaar nìn kóoǹ tigaajawan tin kɔkɔ nìn bí ti-Dindaan Diikunee nì tin kɔkɔ bí dibeecindinee. U nìn gbáń ki wīī sindaariya wanti tin kɔkɔ ní Isirayeel bɔtiu Saloomɔn nìn mɔ́ɔ́ ki síiǹ ti-Dindaan Diikunee. 14 U nìn cúú Jeerusaleem yab kɔkɔ ki cáa cūnnì kuyuŋu. U nìn cúú bikpootiliibi kɔkɔ nì bijanjakpilib kɔkɔ, an dàkà yii binib kutukub saalaa. U nìn cúú ki kpáaǹ iŋal pu tɔntɔnliibi nì bicaabi kɔkɔ. Bin nìn pée kíǹ kitiŋinee di nìn sá biwɔfib. 15 U nìn cúú Yooyakiin nì u-na nì u-nimpoobi nì u-janjakpilib nì abɔtibil ki yōoǹ-bi Jeerusaleem ki cūnnì Babiloon kuyuŋu^d. 16 Babiloon bɔtiu nìn gíti cúú bigaajab kɔkɔ binib kutukub biluli nì iŋal pu tɔntɔnliibi nì bicaabi binib kutuku ki cūnnì Babiloon tiŋkin kuyuŋu. Binib gbanti kɔkɔ nìn sá bibaatandambi ní.

17 U nìn dū Yooyakiin baawaai Mataniya ki kāaǹ ubɔti u fōō u-yil, ní ki kpántì u-yindi. Bi nìn kíǹ ki yíì-u yii Seedeesiyasi^e ní.

Seedeesiyasi, Juuda bɔtiu

(Kpèè Yeer 39.1-3, 2 Kroo 36.11-12)

18 Seedeesiyasi nìn cáá abin mmuŋku nì diba ní ki kpántì ubɔti ní ki kāl̀ Jeerusaleem ki jíń dibeel abin saalaa nì diba. Bi yíì u-na yii Amutaal, uliibinaja Irimeeya bisal. 19 U nìn ŋá tin kaa kítì ti-Dindaan nimbiinee, kii Yooyakiin nín nìn ŋá puee ní deedeedee.

20 Ti-Dindaan nín nìn gíí diŋuul diŋyee puee di nìn yì-tì ní nnaabu gbanti jéetì Jeerusaleem nì Juuda yab pu, áli gba u dāa fātì u-boon ki tīī-bi.

Neebukadineesaar janjaliibi māntìi tú Jeerusaleem kí já nì kì

(Kpèè Yeer 39.1-7, 52.3-11)

Seedeesiyasi nìn yíkì kaa kíí u-ba pu Babiloon bɔtiu cee^f.