Bibɔtiibi Gbɔnliliitiiku 22

Joosiyaasi, Juuda bɔtiu

(2 Kroo 34.1-2)

1 Joosiyaasi nìn cáá abin anii ní ki kpántì ubɔti. U nìn kóò Jeerusaleem^a ní ki jíń dibeel abin mmuŋku nì saalaa nì diba. Bi nìn yíì u-na yii Yeediida. U-na nìn sá Bootikaati tiŋkin ní ki sá Adaaya bisal. 2 U nìn ŋá tin fáatiǹ ti-Dindaanee. U nìn nóó u-naanja Daafiidi tabɔbiliŋ ní deedeedee, waa nìn kpēetì ki cūtì ŋgan púɔɔɔ, ŋgiil pú.

Usaraaŋakpil ká Marab Gbɔŋku

(2 Kroo 34. 8-18)

3 Ubɔti Joosiyaasi nín jíń dibeel abin saalku nì ata poonee ní u tú u-gbaŋŋmaliu Safan, Asaliya jipɔɔn, Meesulam naantiiu ti-Dindaan Diikun ní ki bí-u yii: 4 «Cùú ká usaraaŋakpil Ilikiya kí tùkù yii ú kàaǹ animbil ŋin kɔkɔ ní bi cáań ti-Dindaan Diikunee nì ŋin ní bipunyɔɔciitiliibi fōōyee^b. 5 Bí dū animbilee kí tīī bin kpèé ti-Dindaan Diiku ŋāŋkitam tuuŋŋee kpilib, ní bíǹ ń lēē kí pà bitɔntɔnliibi bin bí ki tūǹ ti-Dindaan Diiku ŋāŋkitam tuuŋŋee. 6 Bí lēē kí pà kapintab nì bidimaliibi nì bitɔntɔnliibi bin kíǹee, ní kí lēē kí dā idɔ nì ataŋkpee ŋin bi kpítèe kí dūú ŋāŋkì ti-Dindaan Diiku. 7 Bí taa bàlifì-bi yii bí gbá animbil ŋin bi dūu tīī-bee kɔntaau, di sá yii bi sá bibulcinnib ní.»

8 Ubɔti gbaŋŋmaliu Safan cáań ubɔti nyɔɔbundee ki bíl̀ usaraaŋakpil Ilikiyawuu nimbiin ní úǹ bí-u yii: «M ká Marab gbɔŋku ti-Dindaan Diikun!» Ilikiyawuu dū ti-Dindaan gbɔŋkuee ki tīī Safanee ní úǹ kàan̄. 9 U kàan̄ mimmee ní ki cūtìi ká ubɔti ki bí-u yii: «A-tɔntɔnliibi bisaraaŋaliibi yōoǹ animbil ŋin kā dakaa poon ki sí ti-Dindaan Diikunee ki dūu tīī bin kpèé ti-Dindaan Diiku ŋāŋkitam tuuŋŋee kpilib.» 10 Ní ubɔti gbaŋŋmaliu Safan gíti kútì ki lī yii: «Usaraaŋakpil Ilikiyawuu dū kugbɔŋu nee ki tīī-mi.»

Ní Safan kàan̄ kugbɔŋuee ki tīī ubɔti.

Joosiyaasi yāntì bi bālifì Unimbɔti bɔnaatiliu Uulida

(Kpèè 2 Kroo 34.19-28)

11 Bi nín kàan̄ tin kā Marab gbɔŋkun ubɔti gbìl̄ee ní u-pɔbil bíil̀ ní u cúú tiwan tin u pēēyee ki dáaĺ ki cátì. 12 Míǹ boonee ní u yíiń usaraaŋakpil Ilikiyawuu nì Safan jipɔɔn Ayiikaam nì Mikaya jipɔɔn Akibɔɔr nì ugbaŋŋmal Safan nì u-kàliŋkpiliu Asaya ní ki tīī-bi mara yii: 13 «Ní cùú bàlifì ti-Dindaan man nì Juuda yab kɔkɔ yil pu. Ní bàlifì-u tin di ŋmàn̄ ki kā kugbɔŋu nee poonee pu. Di sá yii ti-Dindaan gíí ti-pu diŋuul ŋkpitim pu. U gíí ti-pu diŋuul kun puee ti-naanjab kaa tɔ́ tin ŋmàn̄ ki kā kugbɔŋu nee pooneeyaaa, kaa ŋá kii tibɔtee nín bí yii bí ŋá puee.»

14 Niinee usaraaŋakpil Ilikiyawuu nì Ayiikaam nì Akibɔɔr nì Safan nì Asaya nín cá Unimbɔti bɔnaatiliu Uulida cee. U-cal di nìn sá Saluum, Tiikifa jipɔɔn, Araasi naantiiu. U nìn kóò Jeerusaleem tincaliiki kipɔŋ poon ní. Úǹ di nìn kpèé bisaraaŋaliibi wampeeŋkaati ti-Dindaan Diikun. Usaraaŋakpil nì u-naacimbi dū tin bée ki máafì-uee, 15 ní u bí-bi yii: «Ti-Dindaan, Isirayeel Nimbɔtiu nín sòon̄ puee sɔ̀. Ní cùú tùkù un túnní-ni m-ceeyee yii: 16 <M làá cáań nnaabu kí tɔ̄ Jeerusaleem tiŋki nì bin kɔkɔ kóò ki-nee pu, kii an nín ŋmàn̄ ki kā kugbɔŋu kun Juuda bɔtiu kàan̄ee poon puee, ti-Dindaan di lī míǹ. 17 Jeerusaleem yab dū-mi ki fá ní ki tūutì talaalub ki tīī awaa ŋin sá bíǹ bi-ba ŋalii pu tuuŋŋee ki gbítì m-ŋuul. An pu ní m gíí kitiŋ nee pu diŋuul ŋkpitim pu, ní m-ŋuulee kpá kí sɔ̀ŋkì!> 18 Ama ní tùkù Juuda bɔtiu un di túnní-ni ní dāan̄ kí bàlifì ti-Dindaanee yii: <Ti-Dindaan, Isirayeel Nimbɔtiu nín sòon̄ puee sɔ̀. A gbìl̄ tibɔti tin kā kugbɔŋu nee poonee, ní 19 tibɔtee gbēē-si. A nín gbìl̄ tin m sòon̄ yii án làá bàń Jeerusaleem nì ki-nib puee, a sīntiǹ a-ba taapu. Tilafuŋman, kitiŋ nee làá kpántí kii kuteeuee, ní kí kpántí kii kitiŋ kin bi tɔ́ mbusuee. A nín gbìl̄ mimmee ní a dáaĺ ki cátì tiwan tin a pēēyee ní ki súń m-nimbiin. An puee ma mun gbìl̄ a-wimmeem. Man ni-Dindaan di lī míǹ. 20 Míǹ puee m làá yàntī á kpú kí cùú ŋàl̄ a-baabi nì ŋgbansɔŋfi ní bí síb́-si a-kaakulin. Sii kaa làá ká nnaabu ŋun m làá cáań kí tɔ̄ Jeerusaleem tiŋki puee.>»

Joosiyaasi fātìi pōoǹ ti-Dindaan dipoondi

(Kpèè 2 Kroo 34.29-32)

Ubɔti tuuŋyee gítì ki dū Unimbɔti nín kíí puee ki tùkū-u.