Bibɔtiibi Gbɔnliliitiiku 21

Manasee, Juuda bɔtiu

(Kpèè 2 Kroo 33.1-10,18-20)

1 Manasee nìn cáá abin saalaa nì ali ní ki kpántì ubɔti. U nìn kóò Jeerusaleem ní ki jíń dibeel abin aŋmoo kpá imuŋku ita. Bi nìn yíì u-na yii Eefisiba. 2 U nìn ŋá tin kaa kítì ti-Dindaan nimbiinee. U nìn dū u-ba ki líiǹ ntimbiil tuuŋŋi ŋin atimbun ŋin nib ti-Dindaan nìn jìn̄ ki cáań Isirayeel yab^a ki kāaǹee. 3 U nìn fātìi máń isaraafan in nìn bí ŋgbantamu pu u-baa Eeseekiyaasi nìn kúntèe. U nìn máń diwaal Baal nsaraafan, ní ki nyàab̄ ŋwindɔ ki cóoǹ kii Isirayeel^b bɔtiu Akaab nín nìn ŋá puee, ní ki nìn gbàantí ki jáaḿ iŋmalbi. 4 U nìn máń isaraafan iba mun ti-Dindaan Diikun, min kɔkɔ ti-Dindaan nìn lī yii: «Jeerusaleem niin ní m làá nīn lèekī m-ba ki dàkèe.» 5 U nìn gíti máń isaraafan ti-Dindaan Diiku ciŋŋi liitilin ki tīī iŋmalbi in bí kutaa puee. 6 U nìn dū u-jipɔɔn ki wùn̄ ŋŋmi ki ŋá saraa. U nìn būū tibɔɔl ki ŋáań kukpaŋkpantiiu tuuŋŋi ní ki bàlifī bitaŋkpiibi^c kí béé tin bí ki dòońee. U nìn ŋá tin kaa pée kítì ti-Dindaan nimbiinee ki gbítì u-ŋuul. 7 U nìn máń Aseera waal ki síiǹ ti-Dindaan Diikun. Ama ti-Dindaan nìn tùkū Daafiidi nì u-jipɔɔn Saloomɔn yii: «Kudii nee poon nì Jeerusaleem tiŋki kin m lēē Isirayeel naakɔti kɔkɔ kansikinee poon ní m làá nīn pée lèekī m-ba ki dàkà. 8 M-nibooliŋu yaa tɔ́ m-bɔkpaaŋi kɔkɔ nì m-marab bin kɔkɔ m-tɔntɔnliu Mooyiisi tīī-bee, m kpá kí yàntī bí nīn tú ki yìiǹ kí wàatī kitiŋ kin ní m tīī bi-naanjabee.» 9 Ama Juuda yab kaa nìn pílifì ti-Dindaan nyɔkɔ. Ubɔti Manasee nìn yāntì bi gáatì ki ŋá tin kaa kítèe ki jítiǹ atimbun ŋin nib ti-Dindaan nìn kūū ki céetì ki cáań Isirayeel yab ki kāaǹee.

10 Niinee ti-Dindaan dī u-tɔntɔnliibi bibɔnaatiliibi pu ki lī yii: 11 «Juuda bɔtiu Manasee ŋá ntimbiil tuuŋŋi nee kɔkɔ. U ŋá tin kaa kítèe ki jítiǹ Amɔɔr yab nín nìn ŋá puee. U dī u-waaŋi pu ki yāntì Juuda yab ŋá ikpiti. 12 An puee man ni-Dindaan, Isirayeel Nimbɔtiu nín sòon̄ puee sèé: <M làá cáań nnaabukpaan ŋubɔ kí tɔ̄ Juuda yab nì Jeerusaleem pu. Án làá dāá ŋá un yaa láa gbìl̄ nnaabu gbanti puee bitii. 13 M làá nàan̄ Jeerusaleem kii m nín nāaǹ Samaarii tiŋki nì Akaab dicaŋku puee ní. M làá ŋàtī bin kóò Jeerusaleemee kí fá kii bi nín cákaĺ disambil pu kí lábití-dì kí cíkińee ní. 14 M làá dāá fàtī m-boon kí tīī m-nibooliŋu nib bin làá dāá kíń kí nīn bí dimaŋfalinee. M làá dāá dū-bi kí ŋá bi-nannanliibi ŋaan ní bíǹ ń fūkul̀-bi kí yòon̄ tin kɔkɔ bi cááyee. 15 Kun pu m làá ŋá mimmee di sá yii m-nibooliŋu pée ŋáań tin kaa kítèe ní m-nimbiin. Kí yòon̄ ŋwiin ŋun ní m nyántìń bi-naanjab Eejipiti tiŋkin ki dāa sāā díǹ neeyee, bi pée bí ní ki gbítí m-ŋuul.>»

16 Manasee nìn kūū maanyiibab tikpil ki yāntì Jeerusaleem tiŋki kɔkɔ gbí fatiku, kí dūú kūtì ikpiti in u ŋá ki yāntì Juuda yab ŋá tin kaa kítì ti-Dindaan nimbiinee.

17 Manasee tuuŋŋi ŋin kíǹee nì tin kɔkɔ u ŋée nì ikpiti in ní u ŋée kɔkɔ ŋmàn̄ ki kā Juuda bɔtiibi tuuŋŋi gbɔŋkun. 18 Manasee kpíì ki cūtìi ŋàl̄ u-baabi ní bi síb́-u bukpaa bun bí u-cindinee. Bi nìn gíti yíì bukpaayee Usa kpaabu ní. U-jipɔɔn Amɔn di fōō u-yil ki kpántì ubɔti.

Amɔn, Juuda bɔtiu

(2 Kroo 33.21-25)

19 Amɔn nìn cáá abin mmuŋku nì ali ní ki kpántì ubɔti. U nìn kóò Jeerusaleem ní ki jíń dibeel abin ali. Bi nìn yíì u-na Meesuleemeeti. U-na nìn sá Yootiba tiŋkin ní ki sá Aruusi bisal. 20 U nìn ŋá tin kaa nìn kítì ti-Dindaan nimbiinee kii u-baa Manasee nín nìn ŋá puee. 21 U nìn pée dī u-baa tabɔbiliŋ ní deedee. U nìn jáaḿ awaa ŋin u-baa nìn jáaḿee ki gbàantí ŋi-nimbiin. 22 U nìn dū ti-Dindaan, u-naanjab Nimbɔtiu ki fá, kaa nìn pée dī u-saŋŋu báà fiii.

23 U-janjakpilib nìn bɔ́ntì u-pu ní ki kūū-u u-diikun. 24 Ama Juuda yab nìn kūū bin kɔkɔ nìn bɔ́ntì ubɔti Amɔn puee ní ki dū u-jipɔɔn Joosiyaasi ki kāaǹ dibeel u-yil pu.

25 Amɔn tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 26 Bi nìn síb́-u u-kaakulin, Usa kpaabun. U-jipɔɔn Joosiyaasi di nìn fōō u-yil ki kpántì ubɔti.