Bibɔtiibi Gbɔnliliitiiku 20

Eeseekiyaasi búŋkì ki ká dicáaǹdi

(Kpèè Yees 38.1-8, kpèè 2 Kroo 32.24 mun)

1 Ŋyunti gbantee Eeseekiyaasi nìn búŋkì ki làá kpú. Ní Unimbɔti bɔnaatiliu Yeesaya, Amɔtisi jipɔɔn cūtìi māntì u-pu ní ki bí-u yii: «Ti-Dindaan bí yii á bɔ́ntí a-dicaŋku, di sá yii a làá kpú ní, saa làá ŋmátí.» 2 Niinee ní Eeseekiyaasi fātì u-nimbiin ki túĺ digundi ní ki mēē ti-Dindaan yii: 3 «M-Dindaan, m gbāam̀-si ní. Téetí yii m nóó-si nì ibaamɔn nì dipɔbil diba ní ki ŋá tin fáatiǹ-see.» U mēē mimmee ní ki súń tikpil.

4 Yeesaya kaa nìn dá láá nyáń diciŋkpaandin ní ti-Dindaan sòon̄ nì u ki bí-u yii: 5 «Gítí kí tùkù m-nibooliŋu kpootiliu Eeseekiyaasi yii: <Ti-Dindaan, a-naanja Daafiidi Nimbɔtiu nín sòon̄ puee sɔ̀. M gbìl̄ a-wimmeem ki ká a-nyinnyim. Béé yii m làá cáaǹ-si. Nì iwiin ita dal, a làá ŋmā kí fàtīí kíĺ kí nīn cáà ti-Dindaan Diikun. 6 Áli gba m làá fɔ̀kɔn̄ a-maŋfal wiiŋyi abin saalku kí kūtì. M làá fīī sii nì kitiŋ nee kí nyāntí Asuur bɔtiu ŋaan. M-yindi pu nì m-tɔntɔnliu Daafiidi puee, m làá wúń kitiŋ nee pu.>»

7 Ní Yeesaya tīī mara nee yii: «Nàmaan fiigi biliŋ kí cáań!» Ní bi nàn̄ ki cáań ki nákáǹ ubɔti wunti laakin wùee pu ní u pɔ́ɔkì. 8 Niinee Eeseekiyaasi bí Yeesaya yii: «Ba daaŋku ní m làá dūú béé yii m làá ká dicáaǹdi ní iwiin ita dalee, m làá ŋmā kí fàtīí kíĺ kí nīn cáà ti-Dindaan Diikun?» 9 Ní Yeesaya kíí-u yii: «Ti-Dindaan làá tīī-si kudaaŋŋu kí dàkà-si yii u nín pōoǹ puee u làá ŋá míǹ. Ti-Dindaan làá yàntī mboon ŋun lítì Akaasi kɔliŋ puee ń fàtīí sútí kí jɔ̄m̀ akɔl saalaa pu. A là mboon ń cù nyɔkɔpu puɔɔɔ, boon pú ní?» 10 Ní Eeseekiyaasi kíí yii: «An sá sɔkɔmii ki tīī mboon ŋú cù nyɔkɔpu ki jítiǹ ŋú sútí boon.» 11 Niinee Unimbɔti bɔnaatiliu Yeesaya mēē ti-Dindaan ní úǹ yāntì mboon sútì ki jɔ́m̀ Akaasi kɔliŋ pu, akɔl saalaa ŋin pu ŋu bàà lítèe pu.

Babiloon bɔtiu Meeroodaki-Baladan tú binib Eeseekiyaasi cee

(Kpèè Yees 39)

12 Ŋyunti gbantee, Babiloon bɔtiu Baladan jipɔɔn Meeroodaki-Baladan nìn gbìl̄ yii Eeseekiyaasi búŋkì. Niinee ní u ŋmàn̄ kugbɔŋu ki nyàab̄ tiwampɔkaal ki tú bí cáá cùnnì kí tīī-u. 13 Bin bi túee nín bàn̄ee, ní an mɔ́ɔkiǹ Eeseekiyaasi ní u yōoǹ-bi ki kɔ́ǹ kudii kun poon ní u nìn kpáafí u-gaajawanti nì animbil nì sindaariya nì talaalub nì ikpafi in sɔ́fèe ki dàkā-bi. U nìn dàkā-bi laakin u nìn kpáafí u-janjawanti mun nì tijanjawan kɔkɔee. Tiba kaa nìn kíǹ Eeseekiyaasi cindin nì u-beelin waa dūu dàkā-bi.

14 Tíǹ boonee ní Unimbɔti bɔnaatiliu Yeesaya dɔ́miń ki ká ubɔti Eeseekiyaasi ní ki bālifì-u yii: «Binib nee tùkū-si yii ba, ní la ní bi nyánní?» Ní Eeseekiyaasi kíí yii: «Bi nyánní ndan ní. Doooo Babiloon tiŋkin ní bi nyánní.» 15 Ní Yeesaya gíti nìkī ki bālifì-u yii: «Ba ní bi ká a-beecindin?» Ní Eeseekiyaasi kíí yii: «Bi pée ká tin kɔkɔ pée bí m-beecindinee ní. Tiba kaa kíǹ m-nimbikpaafidiikun maa dūu dàkā-bi.» 16 Niinee ní Yeesaya bí Eeseekiyaasi yii: «Pīlifì tibɔti tin ti-Dindaan Mpɔŋkɔdaan sòon̄ee: 17 <Ŋwiin ŋubɔ bí ki dòoń, tin kɔkɔ bí a-dumpu nee nì tin kɔkɔ a-baabi kpáafì ki síiǹee, bi làá dāá kóoǹ kɔkɔ kí cùnnì Babiloon tiŋkin. Tiba kaa làá dāá kíń doo, ti-Dindaan di sòon̄ míǹ. 18 Bi làá dāá cúú a-jipɔmbi tikpil bin sisi a-ba màl̄ee, kí cùnnì Babiloon bɔtiu cee kí dū-bi kí ŋá bifaabi bí nīn tūǹ atuun ki tìì-u.>» 19 Ní Eeseekiyaasi kíí Yeesaya yii: «Tibɔmɔntiil ní ti-Dindaan tùkū-si a cáań ki nāatì-mi nee.» Di sá yii u nìn lī u-neen yii: «Ti làá nīn bí ŋgbansɔŋfi nì dibatɔlin m-maŋfal wiiŋyi kɔkɔ poon.»

20 Eeseekiyaasi tuuŋŋi ŋin kíǹee nì u-pɔ́ɔǹtam kɔkɔ nì tin kɔkɔ u ŋée nì u nín gbìn̄ dinyimbɔbil nì u nín cátì nnyinsan pu ki dáaĺ nnyim ki kɔ́ǹ kitiŋin puee ŋmàn̄ ki kā Juuda bɔtiibi tuuŋŋi gbɔŋkun. 21 Eeseekiyaasi kpíì ki cūtìi ŋàl̄ u-naanjab ní u-jipɔɔn Manasee fōō u-yil ki kpántì ubɔti.