Bibɔtiibi Gbɔnliliitiiku 17

Oosee, Isirayeel bɔtiluŋkikaau

1 Juuda bɔtiu Akaasi nín jíń dibeel abin saalaa nì ali poonee ní Eela jipɔɔn Oosee kpántì Isirayeel bɔtiu. U nìn kóò Samaarii tiŋkin ní ki jíń dibeel abin awa. 2 U nìn ŋá tin kaa kítì ti-Dindaan nimbiinee, ama waa nín bàn̄ Isirayeel bɔtiibi bin nìn līntiǹ-uee ní. 3 Asuur bɔtiu Salmanasaar nìn dɔ́miń ki jáń nì Oosee, ní úǹ kíí ki sīntì u-ba ki tīī-u kí nīn bí u-taapu kí nīn pà lampoo ki tìì-u. 4 Ama an dāa kúntèe, ní Oosee yíkì kaa kíí u-ba pu. U nìn tú binib Eejipiti bɔtiu Soo cee ní ki yíì yii waa ti làá pà lampoo kí tīī Asuur bɔtiu. Ubɔti Salmanasaar dāa béè mimmee ní ki cúú Oosee ki pīiǹ kudii. 5 U ŋá míǹ ki dóòyee ní ki cáań u-janjaliibi Samaarii tiŋkin ki māntìi tú-kì. Ki yōoǹ abin ata, 6 an dàkà yii Oosee nín jíń dibeel abin awa poonee, ní Asuur bɔtiu jáń ki fōō Samaarii tiŋki ní ki cúú Isirayeel yab kí cáa cūnnì kuyuŋu Asuur tiŋkin. U nìn dū-bi ki kāaǹ Alaa tiŋkpaaŋkin nì Abɔɔr tiŋkpaaŋki kin poon ní Goosan buŋŋu pùub̀ee, nì Meedii timmun.

Kun pu ní Isirayeel tiŋki kpántì adigbuŋkati ŋmee

7 Kun pu ní agìń nee nìn bāań Isirayeel yabee di sá yii bi nìn yīntiǹ ti-Dindaan bi-Nimbɔtiu un nìn fīī-bi ki nyántì Eejipiti bɔtiu Faaroo ŋaan ki nyántìń-bi Eejipiti tiŋkinee. Di sá yii bi nìn kíǹ ki tòotī awaa, 8 ní ki nìn nóó atimbun ŋin nib ti-Dindaan nìn jìn̄ ki fōō bi-tiŋki ki dūu tīī Isirayeel yabee koobiliŋ, nì akoobil ŋin ní Isirayeel bɔtiibi nìn cáań ki kɔ́ǹ kitiŋinee. 9 Isirayeel yab nìn ŋáań ti-Dindaan bi-Nimbɔtiu tin ní baa máaǹ kí ŋée. Bi nìn máń awaa saraafaŋyi bi-timmu kɔkɔn nì sintil difɔkɔŋin nì bi-timmu mun bi máń agun ki túee poon. 10 Bi nìn cóoǹ awaa taŋkpeeŋi nì iwaadɔ ŋgbantamu kɔkɔ pu nì busubu bun kamaa pée cáá tifaapɔnee^a taapu. 11 Bi nìn ŋá saraabi awaa saraafaŋyi gbanti kɔkɔ pu kii atimbun ŋin nib ti-Dindaan nìn jìn̄ ní ki cáań bíǹ ki kāaǹee nín nìn ŋáań puee. Bi nìn ŋá atuŋkpiti ŋin gíti lákatèe ki gbítì ti-Dindaan ŋuul. 12 Bi nìn tōotì awaa, min kamaa ti-Dindaan nìn bí-bi yii bí taa ŋá mimmee.

13 Ti-Dindaan nìn dī u-bɔnaatiliibi kɔkɔ pu nì bin wāĺee kɔkɔ pu ki kpáafì Isirayeel yab nì Juuda yab. U nìn bí-bi yii: «Fámaan ni-saŋkpitii kí nīn ŋúb́maan m-marab nì m-bɔkpaaŋi ŋin kā marab gbɔŋkun m nìn dūu tīī ni-naanjabee. M nìn dūu dī m-tɔntɔnliibi bibɔnaatiliibi pu ki yāntì ni béè marab gbanti.» 14 Ama Isirayeel yab kaa nìn pílifì tin bi nìn sòon̄ nì bee. Bi nìn pɔ́ɔkì bi-pɔbiliŋ kii bi-naanjab nín nìn ŋá pu kaa fōō ti-Dindaan bi-Nimbɔtiu ki kíí puee ní. 15 Unimbɔti nìn tīī-bi marab, ki nìn pōoǹ bi-naanjab dipoondi ní ki nìn tīī-bi isaŋki, ama bi nìn dū tíǹ gbanti kɔkɔ ki fá. Bi nìn dū bi-ba ki yá ki nákáǹ awaa ŋin kaa bí tibanee, ní bíǹ bi-ba mun kpántì binib bin kaa ti bí tibanee, ní ki fōō atimbun ŋin māntìi tú-bee bimbim, min kamaa ti-Dindaan nìn kpáafì-bi yii bí taa ŋá mimmee. 16 Bi nìn dū ti-Dindaan bi-Nimbɔtiu marab kɔkɔ ki fá. Bi nìn dū sindaariya ki mɔ́ɔ́ anabil ali kí nīn jáaḿ^b. Bi nìn nyàab̄ ŋwindɔ ki cóoǹ ki tīī diwaal Aseera. Bi nìn gbāaǹ ki jáam̀ iŋmalbi in bí kutaa puee ki tōotì diwaal Baal. 17 Bi nìn dū bi-jipɔmbi nì bi-bisalib ki tōotì awaa ki wùn̄ ŋŋmi, ki nìn búń tibɔɔl ní ki bālifì tin bí ki dòoń fool boonee pu. Bi nìn dū bi-ba ki líiǹ atuŋkpiti, ki ŋá tin kaa kítì ti-Dindaan nimbiinee ki gbítì u-ŋuul. 18 An pu ní ti-Dindaan nìn gíí Isirayeel yab pu diŋuul ŋkpitim pu ní kaa nìn gíti là u-nimbil ń wāl̀-bi. Juuda naakooku yab baba di nìn pée kíǹ ki bí.

19 Ama Juuda yab mun kaa nìn ŋúb́ ti-Dindaan bi-Nimbɔtiu marab. Bi nìn fōō Isirayeel yab bimbim ní. 20 An pu ní ti-Dindaan nìn dū Isirayeel yab kɔkɔ ki fá ní ki sīntiǹ-bi taapu. U nìn dū-bi ki ŋá anibul ŋin fúkuĺ binib wantee ŋaan. Kí kúntée, u dāa yāntì bi cúú-bi ki cūnnì kuyuŋu ní.

21 Ti-Dindaan nín nìn cúú Isirayeel tiŋki ki nyántì Daafiidi beelinee^c, Isirayeel yab nìn dū Neebaati jipɔɔn Jeerooboowaam ní ki kāaǹ ubɔti. Jeerooboowaam nìn yāntì Isirayeel yab fātì bi-boon ki tīī ti-Dindaan ní ki nìn cáá-bi ki kɔ́ǹ ikpitikpaan poon. 22 Kí yòon̄ ŋyunti gbanti kí nīn cée, Isirayeel yab nìn gbíntìi nìkì ki ŋáań ikpiti in kɔkɔ ní Jeerooboowaam nìn ŋée ní, baa nìn dū-i ki fá. 23 An di yāntì ti-Dindaan kaa nìn gíti là kí wāl̀-bi ní ki cáá-bi ki cūnnì kuyuŋu Asuur tiŋkin. Niin ní bi gbíntìi bí ki dāa sāā díǹ. Ti-Dindaan nín dī pu ki ŋá kii u nín nìn dī u-tɔntɔnliibi bibɔnaatiliibi pu ki sòon̄ ki síiǹee dee.

Samaarii yab nyeeŋu

24 Asuur bɔtiu nìn cáań Babiloon yab nì Kuuta yab nì Afa yab nì Amaati yab nì Seefarfayiim yab ki kāaǹ Samaarii timmun bi fōō Isirayeel yab paaŋŋu. Bíǹ nìn fōō Samaarii tiŋkpaaŋki ní ki kíǹ kóò ki-timmun. 25 Bi nín bāań Samaarii tiŋkin ŋkilkaaminee, baa nìn jáaḿ ti-Dindaan. An puee ti-Dindaan nìn dū gbikintib ki tɔ́ bi-pu ní bíǹ kūū bi-kansikin binib tikpil. 26 Niinee ní bi cūtìi ká Asuur bɔtiu ní ki bí-u yii: «Binib bin ní a cáań ki kāaǹ Samaarii timmunee kaa nyí bi nín máaǹ kí ŋá pu ní kí jāam̀ kitiŋ gbanti nimbɔtiuee. An puee unimbɔti gbanti dū gbikintib ki tɔ́ bi-pu ní bíǹ bíi kù-bi, di sá yii baa nyí bi nín máaǹ kí ŋá pu ní kí jāam̀ kitiŋ gbanti nimbɔtiuee.» 27 Niinee Asuur bɔtiu tīī mara nee yii: «Ní gíiǹní bisaraaŋaliibi bin ni cúú ki cūnnì kuyuŋuee kansikin ubɔ Samaarii tiŋkin. Ú cù kí nīn kíǹ ki kóò niin kí ŋmā kí dàkà-bi bi nín máaǹ kí ŋá pu ní kí nīn jáaḿ kitiŋ gbanti nimbɔtiuee.» 28 Míǹ ní an ŋá ní bisaraaŋaliibi bin bi nìn cúú Samaarii tiŋkin ki cūnnì kuyuŋuee kansikin ubɔ gítìń ki kíǹ ki kóò Beeteel. U nìn dàkà-bi bi nín máaǹ kí nīn ŋáań pu kí nīn jáaḿ ti-Dindaanee.

29 Nì míǹ kɔkɔee, binicambi bin bi nìn cáań ki kāaǹee kɔkɔ nìn kpítì bi-waaŋi ŋin bi jáaḿee ní. Bi nìn dū bi-waaŋi gbanti ki síiǹ ŋwaadibiyaamu mun Isirayeel yab bin nìn kóò Samaariiyee nìn máń ŋgbantamu puee ní. Kitiŋ kin kamaa poon ní binibee nìn kóòyee, bi nìn pée ŋá míǹ ní. 30 Bin nìn nyánní Babiloonee nìn kpítì diwaal Suukooti-Beenooti, ní bin nyánní Kuutee kpítì diwaal Neergaal, ní bin nyánní Amaatee kpítì diwaal Asima, 31 ní Afa yab kpítì awaa Niibaasi nì Taartaki. Seefarfayiim yab bíǹ nìn gbíntìi nìkì ki cáá bi-biyaamu ki tòotī bi-waaŋi Adirameeleeki nì Anameeleeki. 32 Bi nìn ŋáań mimmee ní ki jáaḿ ti-Dindaan mun. Bi nìn lēē bi-kansikin binib biba bí nīn sá bisaraaŋaliibi bi-waadibiyaamu poon kí nīn ŋáań saraabi ki tìì-bi. 33 Bi nìn jáaḿ ti-Dindaan, ní ki nìn tòotī bíǹ bi-ba waaŋi mun, ki nóó nì ntimu mun poon bi nyánnée nín ŋáań puee.

34 Áli nì díǹ, bi gbíntìi ŋúb́ bi-koobiliŋ gbanti ní. Baa fàŋkí ti-Dindaan. Baa ŋúb́ bíǹ bi-ba marab nì bi-koobiliŋaaa, kaa ti ŋúb́ ti-Dindaan marab bin u nìn tīī Jaakɔb naantiibee mun. Jaakɔb gbanti ní ti-Dindaan nìn gíti páaǹ diyindi yii Isirayeel^d. 35 Ti-Dindaan nìn pōoǹ Jaakɔb naantiibi dipoondi ní ki nìn tīī-bi mara nee yii: «Ní taa jāam̀ awaa, kí taa gbàan̄ ŋi-nimbiin, kí taa tòotī-ŋi ní kaa nín ŋá saraabi ki tīī-ŋi. 36 Man ni-Dindaan un di dū mpɔŋkpaan ki nyántìń-ni Eejipiti tiŋkinee baba ní ni máaǹ kí jāam̀. Man baba nimbiin ní ni máaǹ kí gbàan̄, ní man baba nì m-baba ní ni máaǹ kí ŋá saraabi kí tīī. 37 Ní nīn ŋúb́ marab nì akoobil nì abɔkpaa ŋin m yāntì bi ŋmàn̄ ki síiǹ-nee, ní kí pɔ́ɔǹ kí nīn ŋáań kii ŋi nín bí yii ní ŋá puee baabadal. Ní taa pée jāam̀ báà diwaal. 38 Ní taa súntí dipoondi din m pōoǹ-nee, ní m gíti bíi bùsī ki tùkù-ni yii ní taa jāam̀ báà diwaal. 39 Man ni-Dindaan ni-Nimbɔtiu baba ní ni máaǹ kí jāam̀, di sá yii man baba di ŋūǹ kí fīī-ni kí nyāntí ni-nannanliibi kɔkɔ ŋaan.»

40 Ama binib gbanti kaa nìn pílifì. Bi nìn gbíntìi ŋúb́ bi-yaajakoobiliŋ ní. 41 Míǹ puee bi nìn jáaḿ ti-Dindaan ní ki nìn gbíntìi tòotī bi-waaŋi. Bíǹ boonee bi-biyaamu nì bi-naantiibi nìkī ki ŋá míǹ mbaantiim ki dāa sāā díǹ.