Bibɔtiibi Gbɔnliliitiiku 18

Eeseekiyaasi, Juuda bɔtiu

(2 Kroo 29.1-2)

1 Eela jipɔɔn Oosee nín jíń dibeel Isirayeel tiŋkin dibintataatiil poonee ní Akaasi jipɔɔn Eeseekiyaasi kpántì Juuda bɔtiu. 2 U nìn cáá abin mmuŋku nì aŋmoo ní ki kpántì ubɔti ní ki kāl̀ Jeerusaleem ki jíń dibeel abin mmuŋku nì awa. Bi nìn yíì u-na Abii, Seekariya bisal. 3 U nìn ŋá tin fáatì ti-Dindaanee kii u-naanja Daafiidi nín nìn ŋá puee ní deedee. 4 U nìn kúntì ŋgbantamu pu saraabi, ki gbáń ki wīī ataŋkpee ŋin bi kpítì ki dūu ŋá awaayee, ki gāatì ŋwindɔ ŋun bi nìn dūu cóoǹ ki tīī diwaal Aseerayee. U nìn tí gbáń ki wīī kukoonaŋu kun Mooyiisi nìn dū tasa kúti ki mɔ́ɔ́yee^a, di sá yii kí cáá sāā ŋyunti gbantee, Isirayeel yab nìn tùutī talaalub ki tìì kukoonaŋu gbanti ní. Bi nìn yíì-ku yii Neeyuusitan. 5 Eeseekiyaasi nìn dū u-mákal ki páaǹ ti-Dindaan, Isirayeel Nimbɔtiu pu. Juuda bɔtiibi bin nìn līntiǹ-uee nì bin dāa páaǹní u-boonee, bi-kansikin báà ubɔ kaa bàn̄-u. 6 U nìn dū u-ba ki yá ki nákáǹ ti-Dindaan, kaa fātì u-boon ki tīī-u. U nìn ŋúb́ marab bin kɔkɔ ní ti-Dindaan nìn tīī Mooyiisee. 7 An puee ti-Dindaan nìn bí u-cee, ní tin kɔkɔ u nìn ŋáańee bútí-u. Waa nìn kíí u-ba pu Asuur bɔtiu cee ní kaa nìn gíti bí u-taapu. 8 U nìn jáń ki pɔ́ɔkiǹ Fiiliistii yab ki jìn̄-bi ki cáa sāā Gaasaa tiŋki. U nìn jáń ki fōō ntimu mun bi máń agun ki túee nì ntimu mun pée cáá sintil difɔŋfɔkɔŋi ŋmaniŋmee.

Bi fātìi sòon̄ bi nín fōō Samaarii tiŋki puee

9 Eeseekiyaasi nín jíń dibeel dibinnanaatiil poonee nì Eela jipɔɔn Oosee nín jíń Isirayeel tiŋki pu dibeel abin aluli poonee, ní Asuur bɔtiu Salmanasaar dɔ́miń kí já nì Samaarii tiŋki ní ki māntìi tú-kì. 10 Abin ata boon, an dàkà yii Eeseekiyaasi beel binluluutiil poon nì Oosee beel biŋwawatiil poon ní Asuur yab jáń ki fōō Samaarii tiŋki. 11 Asuur bɔtiu nìn cúú Isirayeel yab kí cáa cūnnì kuyuŋu Asuur tiŋkin. U nìn dū-bi ki kāaǹ Alaa tiŋkpaaŋkin nì Abɔɔr tiŋkpaaŋki kin poon ní Goosan buŋŋu pùub̀ ki jītée, nì Meedii timmun. 12 Kun pu ní tíǹ gbanti kɔkɔ bāań-bee di sá yii baa nìn pílifì ti-Dindaan bi-Nimbɔtiu nyɔkɔ, ní kaa nìn síl̀ nì u-poondi deedee. Marab bin ní ti-Dindaan tɔntɔnliu Mooyiisi nìn dūu tīī-bee, baa nìn tɔ́-bi ní kaa nín ŋá bi nín bí yii bí ŋá puee.

Seenakeeriibi dɔ́miń kí já nì Juuda yab

(Kpèè Yees 36.1, kpèè 2 Kroo 32.1 mun)

13 Eeseekiyaasi nín jíń dibeel dibindi diba kpá saalku poonee ní Asuur bɔtiu Seenakeeriibi dɔ́miń ki jáń nì Juuda yab timmu mun bi máń agun ki túee ki fōō mu-kɔkɔ. 14 Niinee ní Juuda bɔtiu tú bí cùú tùkù Asuur bɔtiu Lakiisi tiŋkin yii: «M yīntì! Taa ti já nì mi. A yaa gíí-mi dipɔndi diŋyee, m kíí kí pà.»

Asuur bɔtiu nìn gíí Juuda bɔtiu Eeseekiyaasi dipɔndi animbil kúti kiiloobi kutukub biwa nì sindaariya kiiloobi alaataa awa. 15 Ní Eeseekiyaasi yōoǹ animbil ŋin kɔkɔ bí ti-Dindaan Diikunee nì ŋin kɔkɔ bí ubɔti nimbikpaafidiikunee ki tīī Asuur bɔtiu. 16 U nìn lēē gba sindaariya un u nìn dūu nyūntì ti-Dindaan Diiku punyɔmmu dɔi ilalikaa nì icooŋkaayee kɔkɔ ki dūu tīī Asuur bɔtiu.

Asuur yab māntìi tú Jeerusaleem kí já nì kì

(Kpèè Yees 36.2-22, 2 Kroo 32.9-16)

17 Asuur bɔtiu nìn bí Lakiisi tiŋkin ní ki dū u-janjakpiliu nì un sá bijanjaliibi kɔkɔ yidaaŋwuee nì un bi yaa cūtì kujaau u ŋúb̀ ubɔti janjawantee ki tú ubɔti Eeseekiyaasi cee, bi nì dijanjakitikpaandi diba nóó. Bi bàn̄ Jeerusaleem tiŋkinee ní ki jɔ́m̀ ki síl̀ kunyiŋfuŋu kun bi cátì nnyim dì ki kóò dinyimbɔbil din bí yilpu púee. Dinyimbɔbil gbanti nìn dɔ̄ didandi din cá biwaŋfintiliibi kpaabunee watil pú ní. 18 Bi síl̀ niinee ní ki téeń yii bi là kí sòoǹ nì ubɔti. Bin kpèé ubɔti cindee kpiliu Eeliyaakiim, Yiilkiyaawuu nì ubɔti gbaŋŋmaliu Seebina nì Asafi jipɔɔn Yoowa un kpáafí ubɔti gbɔntee di nìn nyáń ki túŋkì-bi nsanni. 19 Ní un nìn ŋúb̀ Asuur bɔtiu janjawanti kujaaunee bí-bi yii: «Ní tùkù Eeseekiyaasi yii: Ubɔtikpaan, Asuur bɔtiu nín sòon̄ puee sèé: <Ba pu ní a máká ní? 20 A dàkafī yii anyɔɔbun fám ŋūǹ kí fōō kujaau bɔ́ntitam nì dibaatandi paaŋŋu kí já kujaauaaa? Ŋma pu ní a baasii máká ní ki yíkì kaa kíí a-ba pu m-cee na? 21 Eejipiti pu ní a mákáaa? Saa nyí yii Eejipiti sá kii kukaluu kun gíìyee ní un yaa dū u-ŋal ki nyīī ku-puee, an gíí-uaaa? Too, míǹ ní Eejipiti bɔtiu Faaroo sá ki tīī un kamaa yaa dū u-mákal ki páaǹ u-puee! 22 An yaa yíì a làá lì yii: <Ti-Dindaan ti-Nimbɔtiu pu ní timbi máká!> Kin an kaa sá sii Eeseekiyaasi ubaantee di kúntì ŋgbantamu pu saraabi nì mu-saraafaŋyi ní ki bí Juuda nì Jeerusaleem yab yii nsaraafan ŋun bí Jeerusaleemee baba nimbiin ní bí nīn gbàantí ki jáaḿ ti-Dindaanaaa? 23 A yaa là sii nì m-kpiliu Asuur bɔtiu ń kpáká kí kpèè. A yaa ŋúń ki ká bitanjakaliibi, m làá tīī-si itaamu kutukub bili mun! 24 Á kpáàa ŋūǹ kí já kí pɔ̄ɔkiǹ m-kpiliu tɔntɔnliibi kansikin kiwaai gba! Kin ba pu ní a nín máká Eejipiti pu ú tīī-si janjatɔrɔkub nì itaamu na! 25 A dàkafī yii ti-Dindaan kaa là ní m dɔ́miń kí jáǹ kitiŋ nee kí nàan̄-kàaa? Ti-Dindaan u-ba di bí-mi^b yii: <Cùú já nì kitiŋ nee kí nàan̄-kì!>»

26 Niinee Yiilkiyaawuu jipɔɔn Eeliyaakiim nì Seebina nì Yoowa bí Asuur janjakpiliuee yii: «Ti gbāam̀-si ní, sòoǹ nì timbi a-tɔntɔnliibi Aram yab sooŋyi poon, di sá yii ti gbìl̀-i. Taa ti sòoǹ nì ti eebru sooŋyi poon, di sá yii binib tɔ́kɔ́ digundi pu ki pílifí.» 27 Ama ní Asuur janjakpiliuee kíí-bi yii: «A dàkafī yii sii nì a-bɔtiu baba cee ní m-kpiliu túnní-mi ḿ cáań tibɔti nee kí sòoǹaaa? Tibɔti gbanti sá ki tīī binib bin kɔkɔ bí digundi pu nee mun ní. An kaa làá ti yúntí, bi làá ŋmɔ́ bi-binti ní kí nyɔ̀ bi-nyeem kii ni muee.»

28 Míǹ boonee ní Asuur yab janjakpiliuee yíkìi síl̀, ní ki téeń mpɔn eebru sooŋyi poon yii: «Ní pīlifìmaan tibɔti tin ubɔtikpaan, Asuur bɔtiu cáá kí sòoǹee! 29 Ubɔti nín lī puee sèé: <Ní taa yàntī Eeseekiyaasi ń kīil̀-ni, di sá yii waa làá ŋmā kí fīī-ni! 30 Ní taa yàntī Eeseekiyaasi ń kīil̀-ni ní dū ni-mákal kí páań ti-Dindaan pu, u bí ki lì yii báà an ŋá pu, ti-Dindaan làá fīī-ni. Kitiŋ nee kpá kí kɔ́ Asuur bɔtiu ŋaan!> 31 Ní taa pīlifì Eeseekiyaasi, ama ní pīlifì tin Asuur bɔtiu bí ki sòoǹee, yii: <Píímaan-mi kubɔɔtiiu, ní sāǹ kí kɔ́maan-mi! Ni yaa ŋá míǹ, báà ŋma làá ŋmɔ́ u-fiinyi subu nì u-fiigi subu biliŋ ní ki nyɔ̀ u-lɔkɔu poon nyim, 32 kí nīn cí ŋyunti ŋun ní m làá dāan̄ kí yòon̄-ni kí cùnnì kitiŋ kin bí kii ni-yaka nee poonee. Kitiŋ gbanti poonee, bilee nì ndamam nì tikpaajin nì fiinyi biliŋ nì ɔliifi biliŋ nì ŋkpam nì tisiil bí ní. Mimmee ni làá nīn bí dimaŋfalin kaa làá kpú.> Míǹ puee ní taa pīlifìmaan Eeseekiyaasi, di sá yii nnyimɔn ní u bí ki mɔ́ntí-ni ki lì yii: <Ti-Dindaan làá fīī-ti!> 33 Atimbun ŋin kíǹee waaŋi ŋúń ki fīī ŋi-timmu ki nyántì Asuur bɔtiu ŋaanaaa? 34 Amaati nì Aripaadi yab waaŋi bí la? Seefarfayiim nì Eena nì Afa yab waaŋi bí la? Awaa gbanti ŋúń ki fīī Samaarii tiŋkaaa? 35 Ntimu gbanti kɔkɔ waaŋi dilal di ŋúń ki fīī di-tiŋki ki nyántì m-ŋaan? Kin án làá dī mana ní ti-Dindaan ń pìin̄-mi nsan ḿ taa fōō Jeerusaleem?»

36 Bin kɔkɔ nìn bí niinee, báà ubɔ kaa nìn wāaǹ kinyɔkɔ ní kaa nín gātì-u, di sá yii ubɔti nìn kpáafì-bi yii: «Ní taa pée kíí-u tiba!» 37 Míǹ boonee ní Yiilkiyaawuu jipɔɔn Eeliyaakiim nì ugbaŋŋmal Seebina nì Asafi jipɔɔn Yoowa un kpáafí ubɔti gbɔntee nín gítí ubɔti Eeseekiyaasi cee. Bi nìn dáaĺ ki cátì tiwan tin bi pēēyee, ní ki dū tibɔti tin ujanjakpilee sòon̄ee ki máafì-u.