Bibɔtiibi Gbɔnliliitiiku 16

Akaasi, Juuda bɔtiu

(2 Kroo 28.1-27)

1 Reemaliyawuu jipɔɔn Peekaa nín jíń dibeel Isirayeel tiŋkin abin saalku nì ali poonee ní Yootam jipɔɔn Akaasi kpántì Juuda bɔtiu. 2 Akaasi nìn cáá abin mmuŋku ní ki kpántì ubɔti. U nìn kóò Jeerusaleem ní ki jíń dibeel abin saalku nì diba. Waa nìn ŋá tin fáatì ti-Dindaan u-Nimbɔtiuee kii u-naanja Daafiidi nín nìn ŋá puee. 3 Ama u nìn dī Isirayeel yab bɔtiibi saŋŋu ní, áli gba u nìn dū u-jipɔɔn ubɔ ki tōotì^a. Ntimbiil tuuŋŋi gbanti ní atimbun ŋin nib ti-Dindaan nìn jìn̄ ki fōō bi-tiŋki ki dūu tīī Isirayeel yabee nìn ŋáań. 4 U nìn ŋá saraabi ki tūutì talaalub awaa saraafaŋyi nì ŋgbantamu pu nì isufi in cáá tifaalee taapu.

5 Niinee Siirii bɔtiu Reesiin nì Reemaliyawuu jipɔɔn Peekaa, Isirayeel bɔtiu dɔ́miń kí já nì Akaasi^b ní ki māntìi tú Jeerusaleem tiŋki, ama baa nìn ŋúń ki jáń ki pɔ́ɔkiǹ-u. 6 Ŋyunti gbanti ní Siirii bɔtiu Reesiin fōō Eelaati tiŋki Juuda yab ŋaan ki gíiǹ ki tīī Eedoom yab ní bíǹ fātìi gítìń ki kíǹ ki kóò niin áli ki dāa sāā díǹ.

7 Akaasi nìn tú binib bí cù Asuur bɔtiu Tiigilaati-Piilneeseer cee kí tùkù-u yii: «M sá a-tɔntɔnliu nì a-jipɔɔn ní. Siirii nì Isirayeel bɔtiibi dɔ́miń kí já nì mi, dāan̄ kí fīī-mi kí nyāntí bi-ŋaan!» 8 Ní Akaasi yōoǹ animbil nì sindaariya un nìn bí ti-Dindaan Diikunee nì tigaajawan tin bí dibeecindinee ki tú bí cáá pɔ̄ Asuur bɔtiu. 9 Asuur bɔtiu nìn pílifiǹ-u ní ki cūtì u-ba ki jáń nì Damaasi yab ní ki fōō bi-tiŋki. U nìn kóoǹ binib bin kɔkɔ nìn bí kitiŋee poonee ki cáa cūnnì Kiiri tiŋkin ní ki kūū ubɔti Reesiin.

10 Ubɔti Akaasi nìn yíkìi cūtì Damaasi tiŋkin kí ká Asuur bɔtiu Tiigilaati-Piilneeseer. U bàn̄ee ní ki ká nsaraafan ŋubɔ niin, ní u lēē nsaraafanee nín bí puee kɔkɔ ki tú bi cáa cūnnì ki tīī usaraaŋal Uriya ú mā míǹ deedeedee. 11 Uriya nìn máń nsaraafanee ki nóó nì ubɔti Akaasi nín bí yii ú mā-ŋu puee. U nìn máń-ŋu ki dóò ki wāatì ní ubɔti nín nyánní Damaasi ki fātìi gítìń. 12 Ŋyunti ŋun ubɔti nyánní Damaasi ki fātìi gítìń ki ká nsaraafanee ní u sútìi pìl̄-ŋu, 13 ní úǹ u-ba ŋá nsaraafanee pu saraawɔkaa nì tijin saraau, ní ki fá ŋu-pu ndaam. U nìn gíti ŋá mpèé saraau nsaraafanee pu ní ki dū saraayee fatikuu ki yāaǹ ŋu-pu. 14 U nìn yāntì bi nìkī tasa kúti saraafaŋŋu ŋun bi nìn máń ki dūu sú ti-Dindaanee^c. Nsaraafan gbanti ŋúǹ nìn bí ti-Dindaan Diiku punyɔkɔki nyɔkɔpu, an dàkà yii nsaraafan mpɔɔn ŋun ubɔti yāntì bi máńee nì ti-Dindaan Diiku kansikin, ama ní u nìkī-ŋu ki cáa cūnnì ubɔti saraafaŋŋuee boon, ŋgiil pú. 15 Boonee ní ubɔti Akaasi tīī usaraaŋakpil Uriya mara nee yii: «Kí yòon̄ díǹ kí nīn cée, nsaraafan ŋkpaan nee pu ní a làá nīn kíǹ ki ŋáań saraawɔkaa un a ŋáań kutaafaau kamaayee nì tijimpin saraau un a ŋáań kujoou kamaayee, nì ubɔti saraawɔkaabi nì tijimpin saraabi, nì samaa kɔkɔ nín ŋáań tijimpin saraabi biŋyee nì ndaam min bi féeńee. Saraabi gbanti kɔkɔ fatikubee, á kpáatí kí pɔ̀l̄ nsaraafanee pu. An yaa kíǹ tasa kúti saraafaŋŋu ŋúǹ bɔtee, m làá dàkafì kí kpèè m nín làá ŋá-ŋu puee.»

16 Usaraaŋakpil Uriya nìn ŋá ubɔti nín tīī-u mara ú ŋá puee kɔkɔ. 17 Ubɔti nìn gíí ki lēē adɔpampan ŋin bi nìn dūu kpáá tasa^d kúti tɔrɔkub bin nìn sí ti-Dindaan Diikunee, ní ki cúú kusɔŋkpaaŋŋu kun nìn tɔ́kɔ́ tɔrɔkubee puee nì kusɔŋkpaaŋŋu dikuŋkundi kun nìn tɔ́kɔ́ inajaa saalaa nì ili puee ki tɔ́kɔtì tɔ́kɔtì ki dūu síiǹ kitiŋ ataŋkpee pu. 18 Kí fáatiǹ Asuur bɔtiuee, ubɔti nìn kpītì ŋwiŋŋuŋfikaa dikpaaŋku kun bi nìn máń ti-Dindaan Diikunee, nì nsan ŋun ubɔti nìn dìŋfī kí kɔ́ kunimbɔtidiinee.

19 Akaasi tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 20 Akaasi kpíì^e ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Eeseekiyaasi di fōō u-yil ki kpántì ubɔti.