Bibɔtiibi Gbɔnliliitiiku 15

Asariyasi, Juuda bɔtiu

(2 Kroo 26.3-4,21-23)

1 Isirayeel bɔtiu Jeerooboowaam nín jíń dibeel abin mmuŋku nì aluli poonee ní Amasiyaawuu jipɔɔn Asariyasi kpántì Juuda bɔtiu. 2 U nìn cáá abin saalku nì diba ní ki kpántì ubɔti. U nìn kóò Jeerusaleem ní ki jíń dibeel abin imuŋku ili nì saalaa nì ali. U-na nìn sá Jeerusaleem ní bi yíì-u yii Yeekooliya. 3 U nìn ŋá tin fáatiǹ ti-Dindaanee, kii u-baa Amasiyaawuu nín nìn ŋá puee ní deedee. 4 Ama waa nìn kúntì isaraafan in nìn bí ŋgbantamu puee. Samaa nìn gbíntìi cáà niin ki ŋáań saraabi ki tùutī talaalub.

5 Ti-Dindaan nìn yāntì ubɔti búŋkì. U nìn kpántì unyaŋgbanti áli u-kúm dal. An puee u nìn kóò kudii kubɔn laaba ní u-jipɔɔn Yootam un nìn sá bin kpèé dibeecindi kpiliuee kpòotī kitiŋ.

6 Jooram tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 7 Asariyasi kpíì^a ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Yootam di fōō u-yil ki kpántì ubɔti.

Sakari, Isirayeel bɔtiu

8 Juuda bɔtiu Asariyasi nín jíń dibeel abin ali kpá imuŋku ili poonee ní Jeerooboowaam jipɔɔn Sakari kpántì Isirayeel bɔtiu. U nìn kóò Samaarii ní ki jíń dibeel iŋmal iluu. 9 U nìn ŋá tin kaa kítì ti-Dindaan nimbiinee kii u-naanjab nín nìn ŋá puee. Waa nìn kākatì u-ba ki wāatì ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. 10 Yabeesi jipɔɔn Saluum nìn bɔ́ntì u-pu ní ki kūū-u samaa nimbiin. U kpíìyee ní úǹ fōō u-yil ki kpántì ubɔti.

11 Sakari tuuŋŋi ŋin kíǹee ŋmàn̄ ki kā Isirayeel bɔtiibi tuuŋŋi gbɔŋkun.

12 Ti-Dindaan nín nìn tùkū Jeewuu puee dee yii: «A-jipɔmbi kí cáá sāā anaantitɔntɔkɔ anaa pu di làá kàl̄ Isirayeel beel pu.» Míǹ ní an lafun jítì.

Saluum, Isirayeel bɔtiu

13 Juuda bɔtiu Oosiyasi nín jíń dibeel abin dibindi kpá imuŋku ili poonee ní Yabeesi jipɔɔn Saluum kpántì Isirayeel bɔtiu. U nìn kóò Samaarii ní ki jíń dibeel uŋmal ubɔ ja. 14 Gaadi jipɔɔn Meenayeem nìn nyánní Tiirsa ki dɔ́miń Samaarii ní ki kūū Saluum ní ki fōō u-yil ki kpántì ubɔti.

15 Saluum tuuŋŋi ŋin kíǹee nì u nín bɔ́ntì pu ki kūū Sakaree ŋmàn̄ ki kā Isirayeel bɔtiibi tuuŋŋi gbɔŋkun.

16 Niinee ní Meenayeem cūtìi jáń nì Tapuuwa tiŋki ki kūū ki céetì ki-nib kɔkɔ, ní ki bīlim̀ kí yòon̄ kitiŋ kin dɔ̄ Tiirsee ki tin sāā Tapuuwa. Kun pu u nìn kūū-bee di sá yii baa nìn pīitì-u kitiŋee punyɔkɔki ú kɔ́. U nìn pūtì bipɔdambi kɔkɔ.

Meenayeem, Isirayeel bɔtiu

17 Juuda bɔtiu Asariyasi nín jíń dibeel dibindi diba kpá imuŋku ili poonee ní Gaadi jipɔɔn Meenayeem kpántì Isirayeel bɔtiu. U nìn kóò Samaarii ní ki jíń dibeel abin saalaa. 18 U nìn ŋá tin kaa kítì ti-Dindaan nimbiinee. U-maŋfal wiiŋyi kɔkɔ poonee, waa nìn kākatì ki wāatì Neebaati jipɔɔn Jeerooboowaam kpitii in u nìn ŋá ki yāntì Isirayeel yab kɔ́ ikpitinee.

19 Asuur bɔtiu Puul nìn kɔ́ Isirayeel tiŋkin kí já nì Meenayeem, ama ní u ŋá malaa ki nyàab̄ animbil tɔɔnib mmuŋku nì saalaa ki tīī-u ú tūtuǹ-u ú ká mpɔn kí mɔ̀tīí kàan̄ u-beel. 20 Kí ŋmā kí pà an nimbiliŋee, Meenayeem nìn síiǹ yii IsirEayeel tiŋki poon gaajab kɔkɔ ń pà lampoo. Unil kamaa nìn máaǹ kí tīī animbil jitɔmbi imuŋku ili nì saalaa ní. Asuur bɔtiu fōō an nimbiliŋee ní ki fātìi nín gítí u-tiŋkin.

21 Meenayeem tuuŋŋi ŋin kíǹee nì tin kɔkɔ u ŋée ŋmàn̄ ki kā Isirayeel bɔtiibi tuuŋŋi gbɔŋkun. 22 Meenayeem kpíì ki cūtìi ŋàl̄ u-baabi ní u-jipɔɔn Peekaya fōō u-yil ki kpántì ubɔti.

Peekaya, Isirayeel bɔtiu

23 Juuda bɔtiu Asariyasi nín jíń dibeel abin imuŋku ili nì saalaa poonee ní Meenayeem jipɔɔn Peekaya kpántì Isirayeel bɔtiu. U nìn kóò Samaarii ní ki jíń dibeel abin ali. 24 U nìn ŋá tin kaa kítì ti-Dindaan nimbiinee. Waa nìn kākatì u-ba ki wāatì Neebaati jipɔɔn Jeerooboowaam kpitii in u nìn ŋá ki yāntì Isirayeel yab kɔ́ ikpitinee. 25 Reemaliyawuu jipɔɔn Peekaa un sá un nìn ŋúb̀ ubɔti janjawanti kujaau poonee nìn bɔ́ntì ki kūū ubɔti Peekaya nì Argoob nì Ariyee Samaarii tiŋkin, ubɔti diiku kubɔn. Galaadi yab janjaliibi imuŋku ili nì saalaa nìn bí u-cee. U kūū Peekaya ki dóò mimmee ní ki fōō u-yil ki kpántì ubɔti.

26 Peekaya tuuŋŋi ŋin kíǹee nì tin kɔkɔ u ŋée ŋmàn̄ ki kā Isirayeel bɔtiibi tuuŋŋi gbɔŋkun.

Peekaa, Isirayeel bɔtiu

27 Juuda bɔtiu Asariyasi nín jíń dibeel abin imuŋku ili nì saalaa nì ali poonee ní Reemaliyawuu jipɔɔn Peekaa kpántì Isirayeel bɔtiu. U nìn kóò Samaarii ní ki jíń dibeel abin mmuŋku. 28 U nìn ŋá tin kaa kítì ti-Dindaan nimbiinee. Waa nìn kākatì u-ba ki wāatì Neebaati jipɔɔn Jeerooboowaam kpitii in u nìn ŋá ki yāntì Isirayeel yab kɔ́ ikpitinee.

29 Isirayeel bɔtiu Peekaa beel yuntiŋuee ní Asuur bɔtiu Tiigilaati-Piilneeseer dɔ́miń ki jáń ki fōō Yoon nì Abeel-Beeti-Maaka nì Yanoowa nì Keedeesi nì Asɔɔr nì Galaadi nì Galiilee timmu ki kpáaǹ Neefitalii yab timmu kɔkɔ. U nìn kóoǹ ntimu gbanti nib kɔkɔ ki cáa cūnnì Asuur tiŋkin. 30 Eela jipɔɔn Oosee nìn bɔ́ntì Reemaliyawuu jipɔɔn Peekaa pu ní ki kūū-u ní ki fōō u-yil ki kpántì ubɔti. Oosiyasi jipɔɔn Yootam nín jíń dibeel Juuda tiŋkin abin mmuŋku poonee ní tíǹ jítì.

31 Peekaa tuuŋŋi ŋin kíǹee nì tin kɔkɔ u ŋée ŋmàn̄ ki kā Isirayeel bɔtiibi tuuŋŋi gbɔŋkun.

Yootam, Juuda bɔtiu

(2 Kroo 27.1-3,7-9)

32 Reemaliyawuu jipɔɔn Peekaa nín jíń dibeel Isirayeel tiŋkin abin ali poonee ní Oosiyasi jipɔɔn Yootam kpántì Juuda bɔtiu. 33 U nìn cáá abin mmuŋku nì aŋmoo ní ki kpántì ubɔti ní ki nìn kóò Jeerusaleem ki jíń dibeel abin saalku nì diba. Bi nìn yíì u-na yii Yeerusaa, Sadooki bisal. 34 U nìn ŋá tin fáatiǹ ti-Dindaanee. U nìn pée ŋá kii u-baa Oosiyasi nín nìn ŋá puee ní deedee. 35 Ama waa nìn kúntì isaraafan in nìn bí ŋgbantamu puee. Samaa nìn gbíntìi cáà niin ki ŋáań saraabi ki tùutī talaalub.

Úǹ di nìn máń ti-Dindaan Diiku punyɔkɔki kin bí Yilpu púee.

36 Yootam tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun. 37 Yootam beel yuntiŋuee, ti-Dindaan nìn yāntì Siirii bɔtiu Reesiin nì Reemaliyawuu jipɔɔn Peekaa dòoń ki jáà nì Juuda yab^b. 38 Yootam kpíì ki cūtìi ŋàl̄ u-baabi ní bi síb́-u u-baabi kaakulin, u-naanja Daafiidi Tiŋkin. U-jipɔɔn Akaasi di nìn fōō u-yil ki kpántì ubɔti.