Bibɔtiibi Gbɔnliliitiiku 14

Amasiyaawuu, Juuda bɔtiu

(2 Kroo 25.1-4,11-12,17-28, 26.1-2)

1 Joowakaasi jipɔɔn Joowaasi nín kāl̀ Isirayeel beelin pu tibɔtiil abin alee, ní Joowaasi jipɔɔn Amasiyaawuu kpántì Juuda tiŋki bɔtiu. 2 U nìn cáá abin mmuŋku nì aŋmoo ní ki kpántì ubɔti ní ki jíń dibeel abin mmuŋku nì awa Jeerusaleem tiŋkin. U-na nìn sá Jeerusaleem ní bi yíì-u yii Yoowadan. 3 Amasiyaawuu nìn ŋá tin fáatiǹ ti-Dindaanee, ama waa nìn nín bàn̄ u-naanja Daafiidi ní. U nìn pée ŋá kii u-baa Joowaasee ní. 4 Nì míǹ kɔkɔee waa nìn kúntì isaraafan in nìn bí ŋgbantamu puee. Samaa nìn gbíntìi cáà niin ki ŋáań saraabi ki tùutī talaalub.

5 Ŋyunti ŋun Amasiyaawuu beel kāl̀ tiŋan ki báaǹ inyaanee ní u kūū u-janjakpilib bin nìn kūū u-baa ubɔti Joosiyaasee. 6 Ama waa nìn kūū binikpɔliibi gbanti biyaamu, ki nóó nì án nín ŋmàn̄ Mooyiisi Marau gbɔŋkun puee. Ti-Dindaan nìn sòon̄ mara gbɔŋku gbanti poon yii: «Baa máaǹ kí kpɔ̀ bibaatiibi, bi-biyaamu kpitii pu, kaa tí máaǹ kí kpɔ̀ mbiyaamu, mu-baabi kpitii pu. Un ŋá ikpitee, úǹ ní bí kpɔ̀^a». 7 Úǹ di jáń ki pɔ́ɔkiǹ Eedoom yab janjaliibi binib kutukub saalaa Ŋyaam tantakalin. Kujaau gbanti poon ní u jáń ki fōō Seera tiŋki ki pú-kì diyindi yii Yookiteel. Bi gbíntìi yíì kitiŋ gbanti míǹ ki dāa sāā díǹ.

8 Niinee ní Amasiyaawuu lēē ituun ki tú Isirayeel bɔtiu Joowaasi, Joowakaasi jipɔɔn nì Jeewuu naantiiu cee bí tùkù-u yii: «Dāan̄, man nì si tí já!» 9 Ní Isirayeel bɔtiu Joowaasi tú bí cùú tùkù Juuda bɔtiu Amasiyaawuu yii: «Bukuŋkumbu subiki kiba di nìn bí Leebanɔn jool pu. Dalbee ní kì cūtìi ká Seedir subu ní ki bí-bu yii: <Dū a-bisal kí tīī m-jipɔɔn ú cáá!> Ama upeel ubɔ nyánní Leebanɔn joolee pu ní ki tāā ki mátì bukuŋkumbuee. 10 Tiŋman a jáń ki pɔ̄ɔkiǹ Eedoom yabee ní an yòontí-si. Nín̄ kā a-dumpu soooo kí nīn fàal̀ a-jajil gbanti pu. Ba pu ní a là kí kíĺ kujaau kun poon ní bi làá já kí pɔ̄ɔkiǹ sii nì Juuda janjaliibee?»

11 Ama Amasiyaawuu kaa nìn pílifiǹ-u. Niinee Isirayeel bɔtiu Joowaasi yíkìń kujaau pu ki bāań ki dūu sìkī nì Juuda bɔtiu Amasiyaawuu Beeti-Seemeesi tiŋkin, Juuda tiŋkpaaŋki kiban. 12 Isirayeel yab nìn jáń ki pɔ́ɔkiǹ Juuda yab ní bíǹ sáǹ ki nín kùǹ. 13 Isirayeel bɔtiu nìn cúú Juuda bɔtiu Amasiyaawuu, Joosiyaasi jipɔɔn, Akasiyasi naantiiu kuyuŋu Beeti-Seemeesi tiŋkin, ní ki dɔ́miń Jeerusaleem ki gbáń ki wīī digundi an wāā kii meetab alaataa ali kí yòon̄ Eefiraayiim punyɔkɔki kí cáá sāā Ŋfaŋfakam punyɔkɔki. 14 U nìn yōoǹ sindaariya nì animbil nì tiwan tin kɔkɔ nìn bí ti-Dindaan Diikun nì tigaajawan tin kɔkɔ nìn bí dibeecindinee. U nìn cúú binib biba mun ki kpáàa búntì Samaarii tiŋkin.

15 Joowaasi tuuŋŋi ŋin kíǹee nì tin kɔkɔ u ŋée nì u-pɔ́ɔǹtam nì u nì Juuda bɔtiu nín jáń kujaau kuŋyee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 16 Joowaasi kpíì ki cūtìi ŋàl̄ u-baabi ní bi síb́-u Samaarii tiŋkin Isirayeel bɔtiibi kaakulin. U-jipɔɔn Jeerooboowaam di nìn fōō u-yil ki kpántì ubɔti.

17 Isirayeel bɔtiu Joowaasi, Joowakaasi jipɔɔn nín kpíì boonee, Juuda bɔtiu Amasiyaawuu, Joowaasi jipɔɔn gíti ŋá abin saalku ní ki nín kpíì. 18 Amasiyaawuu tuuŋŋi ŋin kíǹee ŋmàn̄ ki kā Juuda bɔtiibi tuuŋŋi gbɔŋkun.

19 Bi nìn bɔ́ntì kí kpɔ̀-u Jeerusaleem ní u sáǹ ki búntì Lakiisi. Ní bi tú binib jìn̄ u-boon ki tin kūuń-u niin. 20 Boonee ní bi dū-u ki ŋá tɔrɔku un itaamu kupaau dátée poon ki gíiǹní Jeerusaleem, ní bi dū-u ki síb́ u-baabi kaakulin Daafiidi Tiŋkin. 21 U-jipɔɔn Asariyasi^b nìn cáá abin saalku nì diba ní Juuda yab kɔkɔ dū-u ki kāaǹ dibeel u-baa yil pu. 22 U-baa Amasiyaawuu kpíì ki cūtìi ŋàl̄ u-naanjab boonee, ní u fātìi fōō Eelaati tiŋki ki tīī Juuda yab ní ki fātìi máń-kì.

Jeerooboowaam liliiti, Isirayeel bɔtiu

23 Juuda bɔtiu Amasiyaawuu, Joowaasi jipɔɔn nín jíń dibeel abin saalku poonee, ní Isirayeel bɔtiu Joowaasi jipɔɔn Jeerooboowaam kpántì Isirayeel bɔtiu. U nìn kóò Samaarii ní ki jíń dibeel abin imuŋku ili nì diba. 24 U nìn ŋá tin kaa kítì ti-Dindaan nimbiinee. U nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. 25 Úǹ di jáń ki fātìi fōō Isirayeel timmu kí yòon̄ Leeboo-Amaati kí cáá sāā Arabaa tiŋkuu, ki nóó nì ti-Dindaan, Isirayeel Nimbɔtiu nín nìn dī u-bɔnaatiliu Yoona, Amiitaayi jipɔɔn, ugaati-Eebeerja pu ki sòon̄ tiŋyee. 26 Di sá yii ti-Dindaan nìn lafun ká inimɔɔn in poon ní Isirayeel yab nìn bée. Bi nìn bíi jīǹ falaa tikpil. Uyumbuɔɔɔ, un tɔ́ u-beeyaaa, báà ubɔ nì ubɔ kaa nìn bí kí ŋmā kí jòoń-bi. 27 Ama ti-Dindaan kaa nìn lēē yii u làá pítí Isirayeel nibul kitiŋ pu. An pu ní u nìn dī Joowaasi jipɔɔn Jeerooboowaam pu ki fīī-bi.

28 Jeerooboowaam tuuŋŋi ŋin kíǹee nì tin kɔkɔ u ŋée nì u-pɔ́ɔǹtam nì u nín jáń tijáti puee nì u nín fātìi fōō Juuda timmu Damaasi nì Amaati ki tīī Isirayeel puee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 29 Jeerooboowaam kpíì ki cūtìi ŋàl̄ u-naanjab ní bi síb́-u Samaarii tiŋkin, Isirayeel bɔtiibi kaakulin. U-jipɔɔn Sakari di nìn fōō u-yil ki kpántì ubɔti.