Bibɔtiibi Gbɔnliliitiiku 6

Kicɔkɔ kin wáŋkì bi fātìi kée bɔti

1 Dalbee Unimbɔti bɔnaatiliibi kitil bí bi-kpiliu Eeliisee yii: «Kudii kun poon ti nì si kpáfí nee kaa wāā ki bàn̄-ti. 2 An puee á pɔ̄-ti nsan tí cù Jɔɔdan buŋgbandi kí gāań idɔ kí cáań kí mā ti-kpafidiiku.» Ní Eeliisee kíí-bi yii: «Nín̄ cámaan!» 3 Ní bibɔnaatiliibee kansikin ubɔ bí yii: «Ti gbàam̄-si ní ukpil, pée kíí kí céeǹ timbi a-tɔntɔnliibaa!» Ní Eeliisee kíí yii: «Too, m làá cù.» 4 U lī mimmee ní ki yíkì ki táá-bi. Bi bàn̄ Jɔɔdan buŋgbandee ní ki gāā isufi.

5 Ŋyunti ŋun bi bíi gà isufee ní bi-kansikin ubɔ cɔkɔbiim cúu báatì ki tɔ́ nnyimin, ní u fáá mbiil yii: «M-bɔlii na! M-dindaan, m mēeń-kì ní!» 6 Ní Eeliisee bālifì-u yii: «La pú ní ncɔkɔbiimee tɔ́ ní?» Ní kijapaayee dàkā-u laakin pú ní mi tɔ́ee. Niinee Eeliisee gāā didɔgindi ki dūu tɔ́ nnyimin laakin ncɔkɔbiimee tɔ́ee. Dicilpu niin ní ncɔkɔbiimee yíkì dēeǹ nnyim pu. 7 Ní Eeliisee bí-u yii: «Dèetīń-mì!» Ní kijapaayee dēetìń-mì.

Eeliisee cúú Siirii janjaliibi

8 Siirii bɔtiu nìn bí ki jáà nì Isirayeel yab. U nì u-janjakpilib yaa nìn kpáfì ki lī yii: «M-janjaliibi làá cùú gāā dijanjannaapaal dooyee», 9 ní Eeliisee ń tɔ̄ bí cùú tùkù Isirayeel bɔtiu yii: «Á nīn nyí kí taa dī mpaan nee pu, di sá yii Siirii yab janjaliibi bí niin», 10 ní Isirayeel bɔtiu ń lēē bijanjaliibi kí tɔ̄ bí cù kí nīn cɔ́ŋkí niin. An nìn ŋá míǹ ŋfunyɔm kupaau.

U nìn pée tùkù ubɔti tin bée ní úǹ bɔ́ntí u-ba. 11 An ŋá mimmee ní Siirii bɔtiu kaa ti nyí tin poon u bée, ní u yíiń u-janjakpilib ní ki bí-bi yii: «Ni-kansikin ubɔ bí Isirayeel bɔtiu jandi pú. Ní tùkùmaan-mi un ní an sée.» 12 Ní u-janjakpilib kansikin ubɔ bí yii: «Ti-baa ubɔti, ubɔ kaa bí ki nyēē a-boon! Ama an sá Unimbɔti bɔnaatiliu Eeliisee un bí Isirayeel tiŋkinee di ŋáań míǹ. Báà tin ní a yaa sòon̄ a-didooŋkaaku poonee, u ŋūǹ kí béé-tì kí dūú tùkù Isirayeel bɔtiu.» 13 Niinee Siirii bɔtiu bí yii: «Ní cùú nyàab̀ kí béémaan laakin u bée ḿ ŋma kí tɔ̄ binib bí cùú cúuń-u!»

Ní bi tùkū-u yii Eeliisee bí Dootan. 14 Niinee ubɔti dū dijanjakitikpaandi nì itaamu nì janjatɔrɔkub ki tú kunyeeuee bi cūtìi māntìi tú kitiŋ kin poon Eeliisee kóòyee. 15 Kutaa wúntì kutaafaau pɔ̀lpɔlee Eeliisee tɔntɔnliu péé ki yíkì ki nyáń kitiŋinee ki ká dijanjakitikpaandi nì itaamu nì janjatɔrɔkub māntìi tú kitiŋ. Ní u bí Eeliisee yii: «Ukpil, ti kpíì ní! Ti làá nín ŋá mana dee?» 16 Ní Eeliisee kíí-u yii: «Taa pée fàŋkì! Bin bí ti-ceeyee wīikíǹ bin bí bíǹ ceeyee.» 17 Eeliisee lī mimmee ní ki mēē yii: «Ti-Dindaan, ŋúbití u-nimbiliŋ ú wāl̀!» Ti-Dindaan cúú utɔntɔnlee nimbiliŋ ki ŋúbitèe ní u wál̀ itaamu nì janjatɔrɔkub bin sá ŋŋmee gbí dijool pu ki māntìi tú Eeliisee.

18 Siirii janjaliibee nìn bíi còom̄ ki cá Eeliisee cee ní úǹ mēē ti-Dindaan yii: «Yàntī bijanjaliibi nee kɔkɔ ń kpántí bijɔfub!» Ní ti-Dindaan lafun yāntì bi kpántì bijɔfub kii Eeliisee nín mēē puee. 19 Niinee Eeliisee bí-bi yii: «Ni yīntì nsan, kitiŋ kin poon ni cée kaa sɔ̀. Páaḿmaan m-boon ḿ cáá-ni kí cùnnì unil un ni nyàab̀ee cee.» Ama Eeliisee yōoǹ-bee ní ki cáá-bi ki cūnnì Samaarii tiŋkin. 20 Ŋyunti ŋun bi bàn̄ Samaariiyee ní Eeliisee mēē yii: «Ti-Dindaan ŋúbití binib nee nimbiliŋ bí wāl̀!» Ti-Dindaan ŋúbitì bi-nimbiliŋee ní bi ká yii bi bí Samaarii tiŋki poon táb.

21 Isirayeel bɔtiu nín ká-bee ní u bālifì Eeliisee yii: «M-baa, ḿ kpɔ̀-baaa?» 22 Ní Eeliisee kíí-u yii: «Taa kpɔ̀-bi! Mimmee a yaa cūtì kujaau ní ki cúuń binib bi kpántì a-yumbuuyee, a kù-bi níii? Tīī-bi tijin bí jī kí tīī-bi nnyim bí nyɔ̀ ní kí yàntī bí nīn gítí bi-kpiliu cee.» 23 Niinee Isirayeel bɔtiu ŋá-bi tican ní bi jíń ki nyùn̄. Bi jíń ki nyùn̄ míǹ ki dóòyee ní u yāntì bi nín gítí bi-kpiliu cee. Kí yòon̄ yaadal wiiŋŋuee, Siirii yab bin dòoń ki fúkuĺ binib Isirayeel tiŋkinee kaa ti pée dɔ́miń.

Ŋkùm nyáń Samaarii tiŋkin

24 Ŋyunti ŋubɔ boonee Siirii bɔtiu Been-Adaadi kóoǹ u-janjakitiŋ kɔkɔ ki kpáfì ní ki cūtìi māntìi tú Samaarii tiŋki kí já nì kì. 25 An ŋá mimmee ní ŋkùm dūu nyáń Samaarii tiŋkin. Bin nìn māntìi tú kitiŋee nìn cí-kì tiŋan, an puee bi nìn kíǹ ki dāā kimaŋ yil animbil kúti jitɔmbi imuŋku inaa ní ki dāā atùun disambijandi animbil kúti jitɔmbi biŋmoo.

26 Dalbee Isirayeel bɔtiu tɔ́kɔ́ digundi din bi máń ki māntìi tú kitiŋee pu ki jītí ní unimpu ubɔ téeń ki yíiń-u ní ki bí yii: «Ti-baa ubɔti, dāá fīī-mi!» 27 Ama ní ubɔti kíí-u yii: «Ti-Dindaan yaa kaa fīī-si, man làá ŋá mana ní kí fīī-si! Tijin kaa ti báaa, ndamam mun kaa ti bí.» 28 Ubɔti gíti nìkī ki bí-u yii: «Ba ní a là ní?» Ní unimpuee kíí-u yii: «A ká unimpu nee yaa! Yaadalee u dɔ́miń ki ká-mi ní ki bí-mi yii: <Yàntī tí ŋmɔ́ a-biki díǹ, foolee tí fu ŋmɔ́ man yaka.> 29 Niinee ní ti cúú m-biki ki kūū ki tɔ́kɔǹ ní ti ŋmɔ́^a. Kutaa wúntèe ní m bí-u yii: <Cáań a-biki tí ŋmɔ́>, ama ní úǹ yōoǹ u-biki kí cáa bál̀.»

30 Ubɔti nín gbìl̄ unimpuee nín sòon̄ puee ní u cúú u-wanti tin u pēēyee ki dáaĺ ki cátì. Ubɔti còom̄ digundi pu ki jītée ní binib ká yii u dū kutuku ki ŋá poon bɔkutil ki pēeǹ^b. 31 Ní ubɔti bí yii: «Díǹ nee, m yaa kaa lēē Safaati jipɔɔn Eeliisee yil, Unimbɔti ń dáaĺ m-tafal kí gíti kūtì!»

Eeliisee sòon̄ yii ŋkùm làá kúntí

32 Eeliisee nìn kā u-dumpu ní bitindaŋkpilib kā ki kɔ́ĺ-u. Ubɔti nìn dū ubɔ ki tú u-cee. Ama udaan kaa láá bāań u-cee ní Eeliisee bí bikpilibee yii: «Ni káa! Unikpɔl nee túnní ubɔ ú dāá lēē m-yil. Udaan yaa láa bāańee, ní dū kudii kí kpàl̄ kí taa pɔ̄-u nsan. Pīlifìmaan, m gbìl̀ u-kpiliu pu u pánní u-boon ki dòoń.» 33 Eeliisee nìn dáá bíi sòoǹ u-nyɔkɔ kaa láá ŋmíl̀ ní ubɔti tuuŋŋuee dūu bāań u-cee ki bí-u yii: «Ti-Dindaan di yāntì digìńdi nee bāań-ti! Ba ní m gíti ŋūǹ kí nīn kā ki cí ú ŋá kí tīī-mi?»