Bibɔtiibi Gbɔnliliitiiku 7

1 Eeliisee kíí yii: «Ní pīlifìmaan ti-Dindaan nyɔɔbundi. Ti-Dindaan sòon̄ yii: <Fool naŋkɔnampuee, bi làá fu dā ŋyim kiiloobi saalaa nì bili àá ɔɔji yim kiiloobi mmuŋku nì binaa animbil kúti jitɔn ubɔ ní Samaarii nyɔŋkin.>»

2 Niinee ní ubɔti kpambal un nìn cēentí-u laakin kamaa ní u yaa nìn cée bí yii: «Báà ti-Dindaan yaa cúú kutagbɔŋu tɔkɔlab ki pīitì, tin a sòon̄ nee ŋūǹ kí bàń mimmaaa?» Ní Eeliisee bí yii: «Too! A-nimbil làá ká tin m sòon̄ nee, ama a kpá kí dáká tijin gbanti.»

Siirii yab sáǹ ki fá bi-janjanaapaal

3 Binyaŋgbantiibi binaa biba nìn bí kitiŋ kpaanceetiŋu kaa dátiǹ kipunyɔkɔ. Ní bi bí tɔb yii: «Ba pu ní tí nīn kā doo ki cí ŋkúm? 4 Ti yaa bí yii ti làá kɔ́ kitiŋin, ti làá kpú kun puee tijin kaa ti bí niin. Ti yaa tí kā dooyaaa, ti làá kpú. Mimmee taa pùtì cá Siirii yab janjanaapaal puɔɔɔ? Bi yaa kaa kūū-ti ki yāntì ti bí dimaŋfalinaaa, ti-yimɔɔl dee. Bi yaa ti kūū-taaa, tí kpú.»

5 Kujoou jóotèe ní bi yíkì ki nín cá Siirii yab janjanaapaal pu. Bi bàn̄ Siirii yab janjanaapaal puee, báà ubɔ kpá niin.

6 Tin jítì Siirii yab janjanaapaal puee di sá yii ti-Dindaan nìn yāntì bi gbìl̄ janjatɔrɔkub nì itaamu nì dijanjakitikpaandi wooku pu. Niinee ní Siirii yab lī tɔb cee yii: «Isirayeel bɔtiu tīī Eeti yab nì Eejipiti yab bɔtiibi animbil ní bi cáań bi-janjaliibi kí tɔ̄ ti-pu.» 7 Kunyeeu gbantee ní bi yíkìi sáǹ ki fá bi-tantib nì bi-taamui nì bi-mammu nì bi-naapaal nín pée bí puee kɔkɔ, di sá yii bi nìn sáń kí fīī bi-ba ní.

8 Binyaŋgbantiibee yìin̄ dinaapaal pu míǹ ki dóòyee ní bi jítìi kɔ́ tanti ubɔ poon ní ki jíń ki nyùn̄. Bi ŋá míǹ ki dóòyee ní ki kóoǹ animbil nì sindaariya nì tiwampeeŋkaal tin bí niinee ki cáa cūnnì ki bál̀ laaba. Bi gítìńee ní ki kɔ́ tanti ubɔ mun poon ki tí kóoǹ tin kɔkɔ bí u-poonee ki cáa cūnnì ki bál̀.

Bijanjaliibi bin māntìi tú kitiŋee yíkì ŋkùm mun kúntì

9 Niinee ní bi kíĺ ki bíi lì tɔb cee yii: «Kun ti bíi ŋáańee kaa kítì. Díǹ wiiŋŋu sá tibɔmɔntiil wiiŋŋu ní. Ti yaa kaa lī tiba ní ki cíitì kutaa wúntèe, taa làá lóó ditafadaaldi. Tí nīn cámaan. Tí kɔ́maan kitiŋin kí dū tibɔti nee kí māafì ubɔti cindin yab.» 10 Bi lī mimmee ní ki nín gítiń kitiŋin ní ki yíiń bin cí kitiŋ punyɔkɔkee ki dū tibɔtee ki máafì-bi. Bi bí-bi yii: «Ti cūtì Siirii yab janjanaapaal pu kaa ká báà uniseen, kaa gbìl̄ báà unil neen pu. Kun ti pée kée di sá itaamu nì mmamu gbìn̄ ní tantib sí fám.» 11 Niinee bipunyɔɔciitiliibee yíiń ubɔ ú dū tibɔtee kí māafì ubɔti cindin yab.

12 Ubɔti yíkì kunyeeuee ní ki bí u-kàliŋkpilib yii: «M làá tùkù-ni kun ní Siirii yab bíi bɔ́ntí ti-puee. Bi nyí ŋkùm nín cáá-tee, an pu ní bi yíkì bi-janjanaapaal pu ki cūtìi bál̀ tisatin ki lī tɔb cee yii: <Bin bí kitiŋinee làá nyānní ní tí cúú-bi binifoobi ní kí kɔ́ bi-tiŋkin.>» 13 Ubɔti kàliŋkpilibee kansikin ubɔ fōō dinyɔɔbundi ki lī yii: «Tí yòon̄ itaamu in kíǹ kitiŋinee poon iŋmoo, di sá yii báà i yaa pée báaa, i làá pée kpú kii kitiŋ nee nib kɔkɔee ní. Ti yaa lēē-i mimmee ní tí dū binikaaŋkaabi kí tɔ̄ bí cùú kpèè tin di bíi jītí niinee.» 14 Niinee ní bi yōoǹ tɔrɔkub bili ki dūu kpàl̄ bi-taamui ní ubɔti lēē bijanjaliibi ki dū-bi ki tú bí cùú nyàab̀ Siirii yab janjaliibi nín bí laakiŋyee kí kpáàa kpèè tin di bíi jītée. 15 Bi páaǹ bi-boon ki tin bàn̄ Jɔɔdan buŋŋu. Bi nín cée bi ká tiwampeeŋkaal nì tiwan tin Siirii yab dūu fá fá kí ŋmā kí sāǹ malaa malaayee. Ituunee gítìńee ní ki dū tin bi kée ki dūu máafì ubɔti.

16 Niinee Samaarii yab nyáń ki cūtìi fúkúl̀ Siirii yab janjanaapaal. Kii ti-Dindaan nín nìn lī puee, bi nìn dá ŋyim kiiloobi saalaa nì bili àá ɔɔji yim kiiloobi mmuŋku nì binaa animbil jitɔn ubɔ ní. 17 Ubɔti nìn dū kitiŋ punyɔkɔki ki ŋá u-janjakpiliu un nìn cēentí-u laakin kamaa u yaa nìn cée ŋaan yii ú nīn kpèé. Ama binib nìn tàn̄ tàn̄-u ki nákáǹ kipunyɔkɔ ní u kpíì kii Unimbɔti bɔnaatiliu Eeliisee nín nìn lī puee. Ubɔti nín nìn dɔ́miń u-ceeyee, tin ní u nìn lēe dee.

18 Tiŋman, Eeliisee nìn sòon̄ nì ubɔti ki bí-u yii: «Fool naŋkɔnampu, bi làá fu dā ŋyim kiiloobi saalaa nì bili àá ɔɔji yim kiiloobi mmuŋku nì binaa animbil kúti jitɔn ubɔ ní Samaarii nyɔŋkin.» 19 Ubɔti janjakpiliuee nìn kíí Eeliisee yii: «Báà ti-Dindaan yaa cúú kutagbɔŋu tɔkɔlab ki pīitì, tin a sòon̄ nee ŋūǹ kí bàń mimmaaa?» Ní Eeliisee nìn kíí yii: «Too! A-nimbil làá ká tin m sòon̄ nee, ama a kpá kí dáká tijin gbanti.» 20 Eeliisee nín nìn lī puee, míǹ deedee di jítì: binib nìn tàn̄ tàn̄ ubɔti janjakpiliuee ki nákáǹ kipunyɔkɔpu ní u kpíì.