Bibɔtiibi Gbɔnliliitiiku 5

Eeliisee cáaǹ Naama unyaŋgbanti

1 Siirii tiŋki bɔtiu janjakpiliu ní bi yíì Naama. U-kpiliu nìn pàkà-u ki dàkà-u kulaŋŋaŋfitiiu. Di sá yii u-pu ní ti-Dindaan nìn dī ki tīī Aram yab dijajil. Ama ubaatandaan nì ujanjakpaan gbantee nìn sá unyaŋgbanti. 2 Siirii yab janjaliibi biba nìn nyáń ki kɔ́ Isirayeel tiŋkin ki fúkúl̀ bi-wanti ní ki kpáàa cúuń kisapɔmbiki kiba uyumbu. Kì nìn bí Naama nimpuu cee ní ki tūǹ-u ditundi. 3 Dalbee ní kì bí ki-kpiliu yii: «Áà, m-kpiliu cal yaa bàà ŋūǹ kí cù kí ká Unimbɔti bɔnaatiliu un bí Samaarii tiŋkinee! Úǹ bàà làá cáaǹ-u u-nyaŋgbandi nee.»

4 Niinee ní Naama cūtì u-kpiliu ubɔti cee ki dū tin kisirayeelsapɔmbikee tùkū-uee ki máafì-u. 5 Ní ubɔti bí yii: «Bɔ́ntí a-ba kí nīn cá, m làá tīī-si kugbɔŋu á cáá tīī Isirayeel bɔtiu.» Niinee Naama yōoǹ animbil kiiloobi alaataa ata nì sindaariya kiiloobi imuŋku ita nì jiŋaal bɔkutiŋ saalaa ki kíĺ nsan ki nín cá. 6 U bàn̄ee ní ki dū kugbɔŋuee ki tīī Isirayeel bɔtiu. Kugbɔŋuee poonee, bi nìn ŋmàn̄ yii: «Man di túnní m-janjakpiliu Naama un ŋúb́ kugbɔŋu nee yii á cáaǹ-u u-nyaŋgbandi.» 7 Ubɔti nín pée kàan̄ kugbɔŋu ki dóòyee ní ki cúú tiwan tin u pēēyee ki cátì ní ki bí yii: «M sá Unimbɔtaaa? M cáá mpɔn kí kpɔ̀ unil àá kí yàntī unil ń nīn bí dimaŋfalinaaa? Kin ba pu ní Siirii bɔtiu dū ubɔ ki túnní m-cee ḿ cáaǹ-u dinyaŋgbandi? Ni káa, u bíi tákà-mi tibɔti ní!»

8 Unimbɔti bɔnaatiliu Eeliisee nín gbìl̄ yii Isirayeel bɔtiu dáaĺ tiwan tin u pēēyee ki cátèe, ní u tú bí tùkù-u yii: «Ba pu ní a dáaĺ ki cátì tiwan tin a pēēyee? Yàntī Naama ń dāan̄ m-cee, u làá béé yii Unimbɔti bɔnaatiliu ubɔ bí Isirayeel tiŋkin.»

9 Niinee Naama jɔ́m̀ ki kāl̀ u-tɔrɔkuu un u-taamui dátée poon, ki nín cá ki cūtìi síl̀ Eeliisee diiku nyɔkɔpu. 10 Eeliisee nìn tú ubɔ ú tùkù-u yii: «Cù Jɔɔdan buŋŋun kí múĺ ŋfunyɔm miluli pu. A yaa ŋá míǹ, a làá pɔ̄ɔkì ní a-wunti ń ŋāŋkì.» 11 Naama gbìl̄ mimmee ní ki gíí diŋuul ki nín cá ki lī yii: «Man bàà dàkafī yii u làá nyānní kí sīĺ m-nimbiin kí mèè ti-Dindaan u-Nimbɔtiu, ní kí dū u-ŋal kí càab̀ m-wunti laakin dinyaŋgbandi tɔ́ee ní kí cáaǹ-mi. 12 Damaasi buŋyi Albana nì Paarpaar kaa jítiǹ ibun in kɔkɔ bí Isirayeel tiŋkineeee? Maa bàà ŋūǹ kí múĺ íǹ poon m-wunti ń ŋāŋkàaa?»

U lī mimmee ní ki fātì kí nīn kùǹ nì diŋuul. 13 Ama ní u-tɔntɔnliibi sútì ki pìl̄-u ní ki bí-u yii: «Ukpil! Unimbɔti bɔnaatiliu nee yaa bàà bí-si yii á ŋá tiba tin pɔ̄ɔ̄yee, aa bàà làá ŋáaa? Kin ŋma nín kàlaasì u nín bí-si yii: <Cùú dū a-ba kí múĺ nnyimin a-wunti ń ŋāŋkì na!>» 14 Niinee Naama nín sìntī Jɔɔdan buŋŋun ki múĺ nnyimin ŋfunyɔm miluli pu kii Eeliisee nín bí yii ú ŋá puee, ní u-wunti ŋáŋkì kii kibiki wunti nín bí puee^a. 15 Dicilpu niinee ní u nì u-naacimbi nín gítí Unimbɔti bɔnaatiliu cee. U bàn̄ee ní ki kɔ́ ki síl̀ u-nimbiin ní ki bí-u yii: «Kɔŋkɔnnee ní m nín béè yii Unimbɔti ubɔ kaa ti bí kitiŋ pu laaba an yaa kaa sá Isirayeel tiŋkin. M gbàam̄-si, fōō tiwampɔkaal tin man a-tɔntɔnliu cáań-si nee.» 16 Ama ní Eeliisee kíí yii: «Nì ti-Dindaan un bí dimaŋfalin m sá u-tɔntɔnliu nee yindi puee, m pūtì yii m kpá kí fōō tiba.» Naama pée páb́-u yii ú fōō, ama ní Eeliisee yíì.

17 Naama bí yii: «Kii a nín yíì kaa fōō m-wampɔkaatee, pɔ̄-mi nsan ḿ yáfí a-tiŋki pu tam kí túń imamboon ili. Di sá yii man a-tɔntɔnliu kaa ti làá ŋá saraawɔkaa àá saraa ubɔ fám kí tīī awaa, see ti-Dindaan baba. 18 Ama m mèé yii ti-Dindaan ń dū tin bí nee kí pɔ̄-mi. Di sá yii m-kpiliu Siirii bɔtiu yaa kɔ́ u-waal Riimɔn diikun ki gbāaǹ kí jāam̀-dì ní ma mun gbāaǹee, an sá yii m-ŋaliŋu pu ní u nyìitī. M yaa gbāā diwaal Riimɔn diikun mimmee, ti-Dindaan ń dūú pɔ̄ man a-tɔntɔnliu an pu.» 19 Ní Eeliisee kíí-u yii: «Nín̄ cá nì ŋgbansɔŋfi.» Ní Naama nín cá.

Geeyaasii yìntitam

Naama búntì kaa láá kɔ́ ndan 20 ní Eeliisee tɔntɔnliu Geeyaasii lī u-neen yii: «M-kpiliu ŋá u-ba kaa fōō tin usiiriija Naama cáań kí pɔ̄-uee tiba. Nì ti-Dindaan un bí dimaŋfalin nee yindi puee, m làá sāǹ kí páań u-boon kí fōoń tiba u-cee!» 21 Ní Geeyaasii kùl̄ ki bīiǹ Naama boon. Naama nín ká-u u sáń ki dòoń u-ceeyee ní u kpákatì u-tɔrɔkuu pu malaa ki túŋkì-u ní ki bālifì-u yii: «Ba ŋá?» 22 Ní Geeyaasii kíí-u yii: «Tiba kaa ŋá. M-kpiliu di túnní-mi ḿ tùkù-si yii: <A nín pée búntì kpalaayee ní Unimbɔti bɔnaatiliibi kitil poon binib bili nyánní Eefiraayiim jooŋŋi pu ki bāań m-cee. An puee m gbàam̄-si, tīī-mi animbil kúti kiiloobi mmuŋku nì saalaa nì jiŋaal bɔkutiŋ ali.>» 23 Ní Naama bí-u yii: «Yòon̄ animbil kúti kiiloobi imuŋku ita.» U pée páb́-u míǹ ní ki dū animbil kúti kiiloobi imuŋku ita nì tiwampeeŋkaal tili ki ŋá kutukub bili poon ki kúĺ ki dūu túǹ u-tɔntɔnliibi bili bí túń kí cáá céeǹ Geeyaasii. 24 Bi bàn̄ Oofeelee ní Geeyaasii fōō kutukubee ki dūu bíl̀ u-cee ní ki bí Naama tɔntɔnliibee yii bí nīn gítí, ní bíǹ nín cá.

25 Míǹ boonee ní Geeyaasii nín kóò u-kpiliu Eeliisee cee ní úǹ bālifì-u yii: «Geeyaasii, a nyánní la ní?» Ní u kíí yii: «Man a-tɔntɔnliu kaa pée cūtì laabaa!» 26 Ama ní Eeliisee bí-u yii: «A nyí yii maa bí a-cee ŋfamin ŋyunti ŋun uninja ubɔ kpákatì malaa u-tɔrɔkuu pu ki túŋkìń-see niin? Mimmee ŋyunti ŋun an sá á fōō animbil kúti nì tiwampeeŋkaal nì ɔliifi nì fiinyi nì ipii nì iŋoobu nì inaa nì bitɔntɔnliibi bininjab nì binimpoobee deeee? 27 Too Naama nyaŋgbandi làá gítí sii nì a-naantiibi pu ní kí nīn cá jaanjaan!» Geeyaasii nyáń Eeliisee ceeyee, dinyaŋgbandi píń u-wunti pu ki pīiǹ kii ntaayimee.