Bibɔtiibi Gbɔnliliitiiku 4

Eeliisee jòó unimpukpiipu ubɔ

1 Unimbɔti bɔnaatiliibi kitil kansikin ubɔ nimpuu dɔ́miń ki ká Eeliisee ki bí-u yii: «Ukpil, sii a-ba nyí yii a-tɔntɔnliu m-cal nìn fàŋkí ti-Dindaan. Kɔŋkɔnnee u kpíì ní ti-pɔnliu dɔ́miń yii u làá yòon̄ m-jipɔmbi liitil kí ŋá u-yumbui kí téeǹ dipɔndi din ti cáá-uee.» 2 Ní Eeliisee bí-u yii: «Ba ní a là ḿ ŋá kí tīī-si ní? Tùkù-mi kun ní a cáá an bí a-dumpuee?» Ní u kíí yii: «Man a-tɔntɔnliu kaa pée cáá tiba m-dumpu, an yaa kaa sá ŋkpam min m cáa ŋmìtēe fiiiyee.» 3 Ní Eeliisee bí-u yii: «Nín̄ cá a-kɔŋkɔnnaatɔb cee kí càà tilɔn tin poon tiba kpée, á càà an nīn náaǹ. 4 A yaa ŋá míǹ ki dóòyee sii nì a-jipɔmbi ní kɔ́ kudiin kí dūú pìin̄, ní kí bàtī ŋkpam kí ŋá tilɔnee poon. Kulɔŋŋu kun yaa gbée, á dū-ku kí síiń ku-ba.»

5 Niinee unimpuee yíkì ki nín kùǹ. U bàn̄ mmɔŋkee ní ki dū dikampiil ki pīiǹ u nì u-jipɔmbi pu. U-jipɔmbee nìn cáá tilɔnee ki nàatī-u ní úǹ bàtī ŋkpam ki sìtī ki gbēentí. 6 U bíi ŋáań míǹ an bàn̄ ŋyunti ŋubɔee ní u bí u-jipɔmbi kansikin ubɔ yii: «Dū kulɔŋŋu kubɔ mun kí nàatīń-mi!» Ní úǹ kíí-u yii: «Tilɔn kaa ti bí.» Niinee ŋkpamee gúń kaa tí bíi còol̀. 7 Ní unimpuee cūtìi máafì Unimbɔti bɔnaatiliu tin jítèe ní úǹ bí-u yii: «Nín̄ cá kí dū ŋkpamee kí nyāfì kí lēē kí pà a-pɔndi. A-nimbil ŋin yaa kíǹee, á dūú kpíiǹ sii nì a-jipɔmbi.»

Eeliisee bí Suneem timbiliikin

8 Dalba muee, Eeliisee yíkì ki cūtì Suneem^a. Upíja ubɔ nìn bí niin ki páb́-u yii ú dāan̄ u-dumpu kí jī tijin. Kí yòon̄ ŋwiin gbantee, Eeliisee yaa ti pée jītí kitimbilii gbantinee, u nìn pàatī u-cee ní ki jīǹ tijin.

9 An bée ní unimpuee dāa tùkū u-cal yii: «M dáań ki béè yii kijapaai kin pée dòoń ti-cee doo nee sá Unimbɔti circir niliu ní. 10 Míǹ puee yàntī tí mā kidibiki kí tɔ́kɔń bi nín bɔ̀b̄ kudii puee yilpu^b, ní kí nyàab̀ kilambaŋ nì teebil nì dijal nì fitila kí síiń ki-poon. U yaa ti dɔ́miń ti-ceeyee, ú dòon̄ niin.»

11 Dalbee Eeliisee tí dɔ́miń binibee cee ní ki nín kóò kidibikee ni kí dòon̄. 12 Niinee ní u bí u-tɔntɔnliu Geeyaasii yii: «Yíiń-mi usuneennimpu nee yaa!» U yíiń-uee ní úǹ dɔ́miń ki síl̀ u-nimbiin. 13 Ní Eeliisee bí u-tɔntɔnliu yii: «Tùkù-u yii: <A tīī a-ba digìńdi ki ŋá tin bí nee kɔkɔ ki tīī-ti. Ba ní ti ŋūǹ kí ŋá kí tīī-si ní? A là tí sòoǹ a-pu ubɔti nì ujanjakpil ceeee?» Ní unimpuee kíí yii: «Aayee! Man nì m-yab pée bí nì ŋgbansɔŋfi ní.» 14 Ní Eeliisee bí Geeyaasii yii: «Ba ní ti ŋūǹ kí ŋá kí tīī-u ní?» Ní Geeyaasii kíí yii: «Toooo! Waa cáá kibiki ní u-cal mun púĺ.» 15 Ní Eeliisee bí yii: «Fàtīí yíiń-u.»

U yíiń unimpuee ní u dɔ́miń ki síl̀ kipunyɔkɔpu. 16 Ní Eeliisee bí-u yii: «Jiil naŋkɔnampuee, a làá dāá nīn ŋúb́ kibiki.» Ní unimpuee téeń yii: «Aayee, m-dindaan, Unimbɔti niliu, taa mɔ̄ntì man a-tɔntɔnliu.» 17 Ama unimpuee dūu cáá dipool ní dibindi tú deedeeyee, u dūu màl̄ kibininjabiki, kii Eeliisee nín nìn tùkū-u puee.

Eeliisee fīkitì un fōō-u kunicaŋuee jipɔɔn

18 Kibikee nìn cíkitì. Dalbee, u-baa bí bijincaliibi cee ki tūǹ ditundi ní kibikee nín cá u-cee. 19 Dicilpuee ní u kíĺ ki bíi kūuntí ki lì yii: «M-baa! M-yil! M-yil!» Ní ubaati bí u-tɔntɔnliu ubɔ yii: «Yòon̄-kì kí lìb̄ kí cáá tīī ki-na!» 20 Ní utɔntɔnlee yōoǹ kibikee ki lìb̄ ki cáa tīī ki-na. Unimpuee yōoǹ u-biki ki làl̄, ama kuwiŋkuluu nyɔkɔmee ní kì sīntì.

21 Niinee ní unimpuee yōoǹ kibikee ki jɔ́m̀ Unimbɔti tɔntɔnliu Eeliisee diikun ní ki dū-kì ki bíl̀ u-lambaŋki pu. U ŋá mimmee ní ki nyáń ki dū kudii ki pīiǹ. 22 Míǹ boonee ní u yíiń u-cal ní ki bí-u yii: «Cáań-mi utɔntɔnli ubɔ nì kimansalii kiba. M làá sāǹ kí cù Unimbɔti bɔnaatiliu cee kí gítiń.» 23 Ní u-cal bālifì-u yii: «Ba ŋá ní a là kí cùú ká-u díǹ? Díǹ kaa sá uŋmapɔɔn kaa tí sá ŋwiŋŋuŋfikaa mun.» Ní u kíí u-cal yii: «Taa fàŋkì, tiba kpá!» 24 U lī mimmee ní ki kpàl̄ kimansaliiyee ní ki bí u-tɔntɔnliuee yii: «Tí nīn cá, nín̄ dàtī kimansalii kí taa sīĺ nsanni, see m yaa bí-si yii á sīĺ baba.»

25 U yíkèe ní ki nín cá Eeliisee cee Kaarmeel jool pu. Ŋyunti ŋun Eeliisee ká-u ndanee ní u bí u-tɔntɔnliu Geeyaasii yii: «Kpèè usuneennimpuee! 26 Sāǹ kí tūŋkì-u kí bàlifì-u yii: <A pɔ̄ɔ̄ mana? A-cal ní? A-biki pɔ̄ɔ̄ tiŋanaaa?» Geeyaasii bālifì-u mimmee ní u kíí-u yii: «Tikɔkɔ pée còom̄ tiŋan ní!» 27 Ama ŋyunti ŋun u bàn̄ Eeliisee cee dijool puee ní u tātìi gbāaǹ u-nimbiin ki cúú u-taal. Geeyaasii bàà sútì ki pìl̄-u kí téé-u, ama ní Eeliisee bí-u yii: «Yàntī-u, di sá yii u bí kunimbaaun ní maa nyí kun yì-tèe. Unimbɔti kaa lēē-tì ki dàkā-mi.»

28 Ní unimpuee bí yii: «Man nìn bālifì sii m-dindaan yii á tīī-mi kibikaaa? Maa nìn tùkū-si yii: <Á taa tīī-mi dimákakulindaaa?>» 29 Ní Eeliisee bí Geeyaasii yii: «Bɔ́ntí a-ba kí yòon̄ m-kpandɔŋu kí tàb̄ kí nīn cá! A yaa tú ubɔ nsanni, á taa jāam̀-u. A yaa bàn̄ee, á dū m-kpandɔŋu kí páań kibikee nimbiin.» 30 Ama ní kibikee na bí Eeliisee yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Niinee ní Eeliisee yíkì ki páaǹ u-boon.

31 Geeyaasii nìn péeǹ-bi ki bàn̄. U dū ŋkpandɔee ki páaǹ kibikee nimbiin, ama waa nìn gbìl̄ kibikee neen puɔɔɔ, kaa ká yii kì cīŋkì ki-ba mun. Niinee ní Geeyaasii fātìi nín gítí Eeliisee cee ki bí-u yii: «Kibikee kaa fīntì.» 32 Eeliisee dūu bàn̄ dicindee, kibikee di kpíì ki dɔ̄ u-lambaŋki puee. 33 Eeliisee kɔ́ kudiinee ní ki dūu pīiǹ ní ki kíĺ ki bíi mèé ti-Dindaan. 34 U mēē ki dóòyee ní ki dōoǹ kibikee pu ní ki dū u-nyɔkɔ ki tūū ki-nyɔkɔ, ní ki dū u-nimbiliŋ ki tūū ki-nimbiliŋ ní ki dū u-ŋalii ki páaǹ ki-ŋalii pu. U dɔ̄ kibikee pu mimmee ní ki-wunti píĺ. 35 Eeliisee yíkì kibikee pu ní ki bíi còom̄ ki pùntī kudiin, ní ki fātìi gítìń ki dōoǹ ki-pu. Niinee kibikee cíiǹ ŋfunyɔm miluli pu ní ki cúú ki-nimbiliŋ ki ŋúbitì. 36 Eeliisee yíiń Geeyaasii ní ki bí-u yii: «Yíiń-mi usuneennimpuee yaa!» Geeyaasii cūtìi yíiń-u u bāańee ní Eeliisee bí-u yii: «Yòon̄ a-jipɔɔn!» 37 Ní unimpuee gbāaǹ Eeliisee taaŋi taapu u-yigbeel tūū kitiŋ. U ŋá míǹ ki dóòyee ní ki yíkìi yōoǹ u-biki ki nín nyēē.

Tikun tin tū kaa bí dijilee bɔti

38 Tíǹ jítì boonee ní Eeliisee nín gítiń Giilgaal. Ŋkùm nìn bí kitiŋee pu. Unimbɔti bɔnaatiliibi kitil nìn kóoǹ ki kpáfì u-cee ní u bí u-tɔntɔnliu yii: «Dū daanseekpaan kí tɔ́kɔń kí ŋàan̄-ti tikun.»

39 Niinee ní bibɔnaatiliibee kansikin ubɔ nín cá kusaaun kí nyàabìń tikuŋfaal. U bàn̄ee ki ká kumooun fiinyi subu lòon̄ abil ní u kītì ki gbéeǹ u-wampeeŋkaatin. U fātìi bāańee ní ki càkā ki ŋá daanseeyee poon, di sá yii baa nìn nyí kun ní an sée. 40 Bi tɔ́kɔǹ an bīńee ní bi lēē ki ŋá binib bin bí niinee. Ama ŋyunti ŋun ní bi dákée ní bi kíĺ ki bíi gbáà ibiil ki lì yii: «Unimbɔti bɔnaatiliu, ŋkúm bí daansee poon!» Baa nìn ŋúń ki jíń tijinee. 41 Niinee ní Eeliisee bí yii: «Cáaḿmaan ŋyim!» Bi cáańee ní u dūu ŋá daanseeyee poon ní ki bí yii: «Lēē kí ŋá binib bí jī!» Tijin tin nìn kā daanseeyee poonee nìn ŋáŋkì bi kíǹ ki ŋūǹ kí jī-tì.

Eeliisee kpíiǹ binib dilaataal

42 Uninja ubɔ nìn nyánní Baal-Saliisa ki cáań u-jincɔ̀fikaati kpɔnɔb ki tīī Unimbɔti bɔnaatiliu. U nìn dū ɔɔji nì bileepɔɔn yim ní ki ŋá kpɔnɔb mmuŋku nì tijimpin tin u dáá cáńee kutuku ubɔ. Ní Eeliisee bí u-tɔntɔnliu yii: «Dū tijinee kí yàkatī kí tīī binib bí jī!» 43 Ama ní u-tɔntɔnliu kíí-u yii: «Mana ní m ŋūǹ kí dū tijinee kí yàkatī kí tīī binib dilaataal?» Ní Eeliisee bí-u yii: «Sii dee, dūú yàkatī kí tīī-bi bí jī, di sá yii ti-Dindaan nín sòon̄ puee sɔ̀: <Báà ŋma làá jī kí díkí an kíń gba.>» 44 Niinee ní utɔntɔnlee dū kpɔnɔbee ki yākatì ki tīī binibee. Bi nìn ŋmɔ́ an kíǹ kii ti-Dindaan nín nìn sòon̄ puee.