Bibɔtiibi Gbɔnliliitiiku 3

Isirayeel bɔtiu Jooram bɔti

1 Juuda bɔtiu Joosafaati nín kāl̀ dibeel abin saalku nì ata poonee ní Akaab jipɔɔn Jooram kpántì Isirayeel bɔtiu. U nìn kóò Samaarii tiŋkin ní ki jíń dibeel abin saalaa nì ali. 2 U nìn ŋá tin kaa kítì ti-Dindaan nimbiinee, ama waa nìn bàn̄ u-baa nì u-na, di sá yii u nìn kpéelikì diwaal Baal taŋkpeeŋi ŋin u-baa nìn cóoǹ bi tòotēe. 3 Ama u nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. Waa nìn fātì u-boon ki tīī-i.

Isirayeel yab cūtì ki jáń nì Moowaab yab

4 Moowaab bɔtiu Meesaa nìn kpàá tiwaŋkuti ní. Dibintil kamaayee, u nìn pà Isirayeel bɔtiu lampoo apibil kutukub dilaataal nì ipii in cáá tikuti tin bi cáa lù satabee kutukub dilaataal. 5 Ama ŋyunti ŋun ubɔti Akaab kpíìyee ní Moowaab bɔtiu Meesaa yíkì kaa kíí u-ba pu un fōō Akaab yil ki kpántì Isirayeel bɔtiuee cee. 6 Niinee ní Jooram yíkì Samaarii tiŋkin ki kàan̄ Isirayeel janjaliibi kɔkɔ. 7 Míǹ boonee ní u tú binib bí tùkù Juuda bɔtiu Joosafaati yii: «Moowaab yab bɔtiu kaa kíí u-ba pu ki bíi jáà nì mi. Mimmee a kíí kí dāá kūtì m-pu tí já nì u-tiŋkaaa?» Ní Juuda bɔtiu kíí-u yii: «M kíí kí cù, di sá yii man nì si sá unibaanti ní, ní man nib sá a-nib ní man taamui sá a-yai.» 8 Ama ní Joosafaati gíti kútì ki lī yii: «Nsan ŋulɔŋu pu ní ti làá dī kí cù ní?» Ní Jooram kíiń-u yii: «Ti làá dī Eedoom teeku pu ní kí cù.»

9 Isirayeel bɔtiu nì Juuda bɔtiu nì Eedoom bɔtiu kíĺ nsan ki nín cá. Bi cōom̀ iwiin ilulee, bijanjaliibi nì tiwaŋkuti tin bí bi-ceeyee kaa ti cáá nnyim kí nyɔ̀. 10 Niinee Isirayeel bɔtiu téeń yii: «Ti kpíì ní! Ti-Dindaan di cáań timbi bibɔtiibi bita nee doo kí dū-ti kí ŋá Moowaab yab ŋaan!» 11 Ama ní Joosafaati bālifì yii: «Ti-Dindaan bɔnaatiliu ubɔ kaa bí doo tí dī u-pu kí bàlifì ti-Dindaanaaa?» Ní Isirayeel bɔtiu janjaliu ubɔ bí yii: «Safaati jipɔɔn Eeliisee bí doo, úǹ di nìn tútúǹ Unimbɔti bɔnaatiliu Eelii.» 12 Ní Joosafaati bí yii: «An yaa sée u làá ŋmā kí tùkù-ti tin ti-Dindaan cáá kí tùkù-tee.»

Dicilpu niinee ní Isirayeel bɔtiu nì Juuda bɔtiu nì Eedoom bɔtiu nín cá Eeliisee cee. 13 Bi bàn̄ee ní Eeliisee bí Isirayeel bɔtiu yii: «Ba di bí man nì sii kansikin ní? Nín̄ cá a-baa nì a-na bɔnaatiliibi cee kí bàlifì-bi.» Ní ubɔti kíí-u yii: «Aayee! Ti-Dindaan di cáań timbi bibɔtiibi bita nee doo kí dū-ti kí ŋá Moowaab yab ŋaan.» 14 Ní Eeliisee bí yii: «Nì ti-Dindaan Mpɔŋkɔdaan un bí dimaŋfalin m nóó-u nee puee, m pūtì yii an yaa kaa bàà sá Juuda bɔtiu Joosafaati pu, maa bàà làá pée fàtīí kpèè-si gba ní kaa nín pílifiǹ-si. 15 Too kɔŋkɔnnee, cáaḿmaan-mi ubeebɔɔl.»

Ŋyunti ŋun ní ubeebɔɔlee bíi bɔ̀ɔ́yee ní ti-Dindaan pɔŋŋu kpákatì Eeliisee pu, 16 ní u bí yii: «Ti-Dindaan nín sòon̄ puee sɔ̀ yii: <Ní gbàmaan kibùmbiki kin nyim fóotì nee poon abɔbil án nīn náaǹ. 17 Di sá yii man ni-Dindaan, man di lī yii naa làá wāl̀ kubuŋu, kaa làá wāl̀ utaa mun, ama nnyim làá gbí kibùmbiki nee, ní ni nì ni-janjaliibi nì ni-waŋkuti ń ká kí nyɔ̀.>» 18 Ní Eeliisee nìkī ki lī yii: «Tíǹ kaa sá tiba ti-Dindaan cee. U làá dū Moowaab yab mun kí ŋá ni-ŋaan. 19 Ni làá nàan̄ bi-timmu mun bi máń agun ki túee nì mun sá ŋkpaamuee. Ní gàatì isufi in lòoǹ abilee kɔkɔ, kí gbīŋkì bi-nyimbɔbiliŋ kɔkɔ ní kí tòò ataŋkpee kí gbéeǹ bi-kpaaŋŋi ŋin bi kùn̄ee kɔkɔn kí bīil̀-ŋi.» 20 Kutaa wúntì ŋyunti ŋun bi ŋáań kutaafaau saraauee, bi kpēēyee nnyim di pùub̀ ki nyánní Eedoom tiŋkin ki bīiǹ kitiŋ puee.

21 Ŋyunti ŋun Moowaab yab gbìl̄ yii bibɔtiibee dòoń kí já nì bee ní bi yíiń bin kɔkɔ ŋūǹ kí gbìn̄ gbajabee ní ki cáá-bi ki síiǹ bi-tiŋki kpaanyɔkɔ. 22 Kutaa wúntì kutaafaau Moowaab yab fīntèe, ŋwìiń nyáń nnyim pu. Bi nín ká nnyim gbanti ndanee, mi máǹ kii fatikuee 23 ní bi téeń yii: «Fatiku dee! Báà an ŋá pu, bibɔtiibee nì bi-janjaliibi di gbáń ki kūū tɔb. Kɔŋkɔnnee, Moowaab yab, yīkìmaan tí cùú fūkul̀-bi!»

24 Ama ŋyunti ŋun bi sútì ki pìl̄ Isirayeel yab janjanaapaalee ní bíǹ nyáń ki kpìlìń-bi. Niinee Moowaab yab dū itaaci ní Isirayeel yab kùl̄ ki bīiǹ bi-boon áli ki tin kɔ́ bi-tiŋkin ki kūū-bi. 25 Bi nìn kpéelikì ntimuee ní báà ŋma tɔ́ tisati tin bi kùn̄ee poon ditaŋkpal ní ataŋkpee dūu gbí tisatee. Bi nìn gbíŋkì anyimbɔbil kɔkɔ ní ki gāatì isufi in lòoǹ abilee kɔkɔ ki fá.

An dāa kúntèe, digundi din bi máń ki tú Kiiri-Eereesee baba ní baa gbēē, ama bijanjaliibi bin tòó tijaataafunee nìn māntìi tú-kì kí já nì kì. 26 Moowaab bɔtiu nín ká yii kujaau nyīŋfì u-puee ní u yōoǹ bijanjaliibi alaataa aluli, bi-kɔkɔ ŋúb́ bi-tàataajimmu, ki dū bi-ba ki wúliń Eedoom bɔtiu watil pú kí bàà ká nsan kí jītí, ama ní kaa ŋúń. 27 Niinee ní u cúú u-jipɔŋkpiliu un bàà làá fōō u-yil kí kpántí ubɔtee ki kūū ki ŋá saraawɔkaa digundi pu. An ŋá mimmee ní Isirayeel yab fāŋkì tikpil ní ki yíkì niin ki nín gítí bi-tiŋkin.