Bibɔtiibi Gbɔnliliitiiku 2

Unimbɔti yōoǹ Eelii. Eeliisee fōō u-yil

1 Ti-Dindaan nín nìn làá yòon̄ Eelii ki cáá jɔ̄m̀ yilpu kunaakpaabuŋŋunee, tin nìn jítèe sɔ̀. Eelii nì Eeliisee nìn yíkì Giilgaal ki còom̄ dicilpu ki cá. 2 Bi còom̄ ki cée ní Eelii bí Eeliisee yii: «M gbàam̄-si, gbíntí doo, di sá yii ti-Dindaan tú-mi Beeteel.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi táá dicilpu ki nín cá Beeteel.

3 Unimbɔti bɔnaatiliibi kitil din bí Beeteelee nyánní ki bālifì Eeliisee yii: «A nyí yii ti-Dindaan làá yòon̄ a-kpiliu díǹ kí cáá jɔ̄m̀ yilpuɔɔɔ?» Ní u kíí-bi yii: «Ma mun nyí, ama ní taa ti sòoǹ nì man an bɔti!»

4 Ní Eelii fātìi bí Eeliisee yii: «Eeliisee, m gbàam̄-si, gbíntí doo, di sá yii ti-Dindaan tú-mi Jeeriikoo.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi táá dicilpu ki nín cá Jeeriikoo.

5 Unimbɔti bɔnaatiliibi kitil din bí Jeeriikooyee sútì ki pìl̄ Eeliisee ní ki bālifì-u yii: «A nyí yii ti-Dindaan làá yòon̄ a-kpiliu díǹ kí cáá jɔ̄m̀ yilpuɔɔɔ?» Ní u kíí-bi yii: «Ma mun nyí, ama ní taa ti sòoǹ nì man an bɔti!»

6 Eelii tí bí Eeliisee yii: «Eeliisee, m gbàam̄-si, gbíntí doo, di sá yii ti-Dindaan tú-mi Jɔɔdan.» Ama ní Eeliisee kíí-u yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Ní bi-liitil táá dicilpu ki nín cá Jɔɔdan. 7 Eelii nì Eeliisee nìn bàn̄ ki sí Jɔɔdan buŋgbandi. Unimbɔti bɔnaatiliibi imuŋku ili nì saalaa nìn táá-bi kudandaŋu. 8 Niinee Eelii cúú u-bɔkutikpaandi ki pēetì, ní ki kúntì ki dūu fáá mbunee nyim, ní nnyim cúu yākatì mili ní nsan dōoǹ ní bi-liitil cōom̀ ki dūtì.

9 Bi dūtì ki dóòyee ní Eelii bí Eeliisee yii: «Bàlifì-mi kun a là ḿ ŋá kí tīī-see kí wàatī ḿ yīkì a-cee kí nīn jɔ́ḿ!» Ní Eeliisee kíí yii: «M là kí fōō ŋfam min a cááyee mili pu ní!» 10 Ní Eelii bí yii: «Tin a bālifèe pɔ̄ɔ̄ á ká. Ama a yaa bí ki ká-mi ŋyunti ŋun ní ti-Dindaan làá yòon̄-mi a-cee kí cáá jɔ̄m̀ee, a làá ká kun a bālifèe. Ama a yaa kaa ká-mi, mimmee aa làá ká dee.»

11 Ŋyunti ŋun bi pée bíi còom̄ ki cá ki gbáà faawiiyee, ní tɔrɔkub bin sá ŋŋmee nì itaamu in sá ŋŋmee dɔ́miń ki cúú-bi ki yākatì. Dicilpu niinee ní an yōoǹ Eelii ki dūu dī kunaakpaabuŋŋun ki cáa jɔ́m̀ yilpu. 12 Eeliisee nín ká mimmee ní u kíĺ ki bíi kūuntí yii: «M-baa! M-baa! A nìn jítiǹ Isirayeel janjatɔrɔkub nì u-tanjakaliibi kɔkɔ!» Ŋyunti ŋun waa ti wāĺ Eeliiyee ní u cúú u-wampeeŋkaati ki dáaĺ ki cátì mili pu. 13 Míǹ boonee ní u yōoǹ dibɔkutikpaandi din Eelii nìn cúu páatì u-gbigbipati pu ki lúkúee^a ki nín gítiń Jɔɔdan buŋgbandi ki sí. 14 U yōoǹ dibɔkutikpaandee ní ki dūu fáá mbunee nyim ki lī yii: «Ti-Dindaan Eelii Nimbɔtiuee bí la ní?» U fáá nnyim mimmee ní mi cúu yākatì mili ní nsan dōoǹ ní u jítì.

15 Unimbɔti bɔnaatiliibi kitil din bí Jeeriikoo ki nìn yúní kudandaŋu ki túĺ-bee nín ká Eeliisee ŋá kuŋyee, ní bi bí yii: «Ŋfam min nìn bí Eelii puee kíǹ ki bí Eeliisee mun pu.» Bi lī mimmee ní ki dɔ́miń ki túŋkì-u ní ki tātìi gbāaǹ u-nimbiin bi-yigbeeŋi tūū kitiŋ 16 ní ki bí-u yii: «Ti cáá doo binib imuŋku ili nì saalaa bi sá bibaatandambi. Yàntī bí cùú nyàab̀ a-kpiliu. An yaa yíì ti-Dindaan Fam nín yōoǹ-uee, mi cáá-u ki tɔ́ ki fá dijool diba pu àá ditantakal diban.» Ama ní Eeliisee bí-bi yii: «Taa tɔ̄maan báà ubɔ.» 17 Ama bi nìn pée gbíntìi cɔ́ ki páb́ Eeliisee ní úǹ dāa gīī kí bí-bi yii: «An yaa sée, tɔ̄maan-bi!» Bi nìn dū binib imuŋku ili nì saalaayee ki tú ní bíǹ dū iwimmɔn ita ki nyàab̄ Eelii kaa ká-u. 18 Ŋyunti ŋun bi gítìńee, Eeliisee nìn dáá bí Jeeriikoo ní úǹ bí-bi yii: «Kéè m nìn pée tùkū-ni yii ní taa cùeeee!»

Eeliisee ŋáŋkì Jeeriikoo nyimbuliŋu nyim

19 Ní Jeeriikoo yab bí Eeliisee yii: «Ti-dindaan, kii sii a-ba nín wāĺ puee, ti-tiŋki bàà mɔ̄ ŋkaa, ama nnyim kaa ŋān̄ ní kitiŋ mun kaa lòoǹ tikpaajin.» 20 Ní Eeliisee bí yii: «Dūmaan ŋyaam kí ŋá disambipɔndin kí cáań-mi!» Ní bi cáań-u. 21 Ní Eeliisee nín cá dinyimbunimbilin ní ki dū ŋyaamee ki ŋá nnyimin ki lī yii: «Ti-Dindaan nín sòon̄ puee sèé: <M yāntì nnyim nee ŋáŋkì, màa ti làá yàntī binib ń kpúɔɔɔ, kaa ti làá bīil̀ ntiŋkpam mun.>» 22 Tiŋman nnyimee nìn ŋáŋkì, ní ki gbíntìi ŋān̄ ki dāa sāā díǹ kii Eeliisee nín nìn sòon̄ puee.

Eeliisee dáaĺ mbiyaamu mun bēel̀-uee tafal

23 Eeliisee nyáń Jeeriikooyee ní ki nín cá Beeteel. Nsannee ní mbiyaamu nyánní kitiŋin ki bíi bèel̄-u ki lì yii: «Nín̄ cá-mi, uyiŋatifu! Nín̄ cá-mi, uyiŋatifu!» 24 Ní u fātì ki kpēē-mu ní ki tɔ́-mu mbusu nì ti-Dindaan yindi pu. Niinee agbiŋgbil ali nyánní kupɔɔun ní ki cúú mbiyaamuee kansikin imuŋku ili nì muli ki tɔ̄ntì. 25 Míǹ boonee ní Eeliisee nín cá Kaarmeel jool pu. U nyánní niinee ní ki nín gítiń Samaarii tiŋkin.