Bibɔtiibi Gbɔnliliitiiku 1

Bibɔtiibi

gbɔnliliitiiku

Unimbɔti sòon̄ ki kūū Akasiyasi bimbikpitim

1 Ubɔti Akaab kúm boonee, Moowaab yab nìn yíkì kaa kíí bi-ba pu ki tīī Isirayeel yab.

2 Dalbee ubɔti Akasiyasi nyáń u-diiku kun bí aditɔntɔkɔ yilpuee ki lítì ní an kūū-u tikpil. Niinee ní u lēē binib ki tú ki bí-bi yii: «Cùú bàlifìmaan Eekrɔn yab waal Baal-Seebuul^a kí kpèè yii m làá pɔ̄ɔkàaa, maa làá pɔ̄ɔkì!» 3 Ama ní ti-Dindaan tuuŋŋu dɔ́miń ki sòon̄ nì utiiseebeeja Eelii yii: «Kíntí Samaarii bɔtiu nín tú binib biŋyee kí bàlifì-bi yii: <Mimmee Unimbɔti kaa bí Isirayeel beelin naaa? Kin ba pu ní ni cá Eekrɔn yab waal Baal-Seebuul cee kí bàlifì?> 4 Kpèè ti-Dindaan nín sòon̄ Isirayeel bɔtiu pu miŋyee sèé: <Aa ti làá kpákatí kilambaŋ kin pu a dɔ̄ nee, di sá yii a làá kpú ní!>»

Ní Eelii cūtì ki ŋá kii ti-Dindaan nín bí yii ú ŋá puee. 5 Dicilpu niinee ní ituunee nín gítí ubɔti cee, ní úǹ bālifì-i yii: «Ba pu ní ni fātìi gítìń?» 6 Ní bi kíí-u yii: «Kijapaai kiba kíntì-ti nsanni ní ki bí-ti yii: <Nín̄ gítímaan ubɔti un di túnní-nee cee kí tùkù-u yii: Ti-Dindaan nín sòon̄ puee sɔ̀. Mimmee Unimbɔti kaa bí Isirayeel beelin naaa? Kin ba pu ní ni cá Eekrɔn yab waal Baal-Seebuul cee kí bàlifì? A nín ŋá mimmee puee, aa ti làá kpákatí kilambaŋ kin pu a dɔ̄ nee, a làá kpú ní!>» 7 Ní ubɔti bālifì-bi yii: «Kijapaai kin kíntì-ni nsanni ki sòon̄ nì nee bí mana ní?» 8 Ní bi kíí-u yii: «U pēē ugutaamu kuti wanti ní ki gbìn̄ ŋgban dambalau u-caŋ^b.» Niinee ubɔti téeń yii: «Utiiseebeeja Eelii dee!»

Akasiyasi tú binib bí cúú Eelii

9 Ubɔti dū ujanjakpil un kpòotī bijanjaliibi imuŋku ili nì saalaayee nì u-janjaliibi ki tú bí cúuń Eelii. Eelii nìn jɔ́m̀ ki kā dijool diba yilpu ní bíǹ nín jɔ́ḿ u-cee. Bi bàn̄ u-ceeyee ní ujanjakpilee bí-u yii: «Unimbɔti bɔnaatiliu, ubɔti tīī mara yii á kpákatiń!» 10 Ama ní Eelii kíí-u yii: «M yaa lafun sá Unimbɔti bɔnaatiliu, ŋŋmi ń nyānní yilpu kí dāá wà kí céetí sii nì a-janjaliibi imuŋku ili nì saalaa nee^c!» Dicilpu niin ní ŋŋmi nyánní yilpu ki wùn̄ ujanjakpilee nì u-janjaliibi imuŋku ili nì saalaayee.

11 Ní ubɔti tí dū ujanjakpil ubɔ mun, u mun kpòotī bijanjaliibi imuŋku ili nì saalaa nì u-janjaliibi ki tú Eelii cee. Bi bàn̄ee ní ujanjakpilee bí Eelii yii: «Unimbɔti bɔnaatiliu, ubɔti bí yii á ŋá malaa kí kpákatiń!» 12 Ama ní Eelii kíí-u yii: «M yaa lafun sá Unimbɔti bɔnaatiliu, ŋŋmi ń nyānní yilpu kí dāá wà kí céetí sii nì a-janjaliibi imuŋku ili nì saalaa nee!» Dicilpu niin ní Unimbɔti yāntì ŋŋmi nyánní yilpu ki wùn̄ ujanjakpilee nì u-janjaliibi imuŋku ili nì saalaayee.

13 Ní ubɔti gíti tí dū ujanjakpil utataati ubɔ mun, u mun kpòotī bijanjaliibi imuŋku ili nì saalaa nì u-janjaliibi ki tú. Bi nín jɔ́ḿ ki bàn̄ Eelii ceeyee ní ujanjakpilee tātìi gbāaǹ Eelii nimbiin ní ki gbāam̀-u ki lī yii: «Unimbɔti bɔnaatiliu, taa lēē man nì m-janjaliibi imuŋku ili nì saalaa nee maŋfal! 14 M nyí ŋŋmi nín nyánní yilpu ki wùn̄ ki céetì bijanjakpilib bili bin péé péé ki dɔ́miń dooyee nì bi-janjaliibee. Ama m gbàam̄-si ní, taa lēē m-maŋfal!» 15 Niinee ní ti-Dindaan tuuŋŋu ŋubɔ bí Eelii yii: «Taa fàŋkì, yīkì kí táá-u ní kpákatí.»

Niinee ní Eelii yíkì u nì ujanjakpilee kpákatì dijoolee pu ki nín cá ubɔti cee 16 ki bí-u yii: «Kpèè ti-Dindaan nín sòon̄ puee sèé: <A nín ŋá pu ki tú binib bí cùú bàlifì Eekrɔn yab waal Baal-Seebuul, a lì kii Unimbɔti kaa bí Isirayeel beelin bí bàlifèe puee, aa làá kpákatí kilambaŋ kin pu a dɔ̄ nee, a làá pée kpú ní!>» 17 Akasiyasi nìn lafun kpíì ki nóó nì Unimbɔti nín dī Eelii pu ki sòon̄ tiŋyee. Waa nìn cáá jipɔɔn, míǹ puee u-naal Jooram di nìn fōō u-yil ki kpántì ubɔti, Juuda bɔtiu Joosafaati jipɔɔn Jooram nín jíń dibeelee binliliitiil poon.

18 Akasiyasi tuuŋŋi ŋin kíǹ u túńee kɔkɔ ŋmàn̄ ki kā Isirayeel yab bɔtiibi tuuŋŋi gbɔŋkun.