Bibɔtiibi Gbɔmpeepeekaaku 21

Ubɔti Akaab yāntì bi kūū Nabooti

1 Tibɔti nee boonee tin jítèe sɔ̀. Ujiseeraayeelja Nabooti nìn cáá bufiinyikpaa bubɔ, bu nìn dɔ̄ ki pìlīǹ Samaarii bɔtiu Akaab dumpu. 2 Dalbee ní Akaab cūtìi ká Nabooti ní ki bí-u yii: «Dū a-fiinyikpaabu kí tīī-mi ḿ dūú ŋá tikuŋfaal kpaabu, di sá yii bu dɔ̄ ki pìlīǹ m-dumpu, ní ḿ tīī-si bufiinyikpaa bun ŋān̄ ki jítiǹ bu neeyee. A yaa tí là ḿ pà-si bu-daaku nimbiliŋ nín sá pueeyaaa, m làá pà.» 3 Ama ní Nabooti kíí-u yii: «Maa cáá nsan ti-Dindaan nimbiin kí dū bufiinyikpaa bun m fōō difakal m-naanjab ceeyee kí tīī-si.»

4 Ní Akaab nín kùǹ nì kunimbaau nì diŋuul, kun puee ujiseeraayeelja Nabooti bí-u yii: «Maa làá dū m-naanjab fakal kí tīī-si.» U dōoǹ u-lambaŋki pu, ní ki fātì u-nimbiin ki túĺ digundi kaa là tijin kí jī. 5 U-nimpuu Jeesabeel dɔ́miń ki ká-uee ní ki bālifì-u yii: «Ba pu ní a-nimbiin wíiḿ míǹ aa là tijin kí jī na?» 6 Ní ubɔti kíí-u yii: «Kun bée di sá yii m cūtìi ká ujiseeraayeelja Nabooti ki bí-u yii: <Dū a-fiinyikpaabu kí nyāfiǹ-mi, a yaa tí làa, ḿ dū m-fiinyi kpaabu bubɔ kí kpántí-si.> Ní u kíí-mi yii: <Maa làá tīī-si m-fiinyikpaabu.>» 7 Niinee ní Jeesabeel bí-u yii: «Sii di kaa sá Isirayeel bɔtiuaa? Yīkìm̄! Jī tijin kí nīn fàal̀. Man di làá dū ujiseeraayeelja Nabooti kpaabu kí tīī-si.»

8 Niinee ní u ŋmàn̄ kugbɔŋu ubɔti Akaab yindi pu, ní ki dū ubɔti jaliiki ki nyīī, ní ki tú bí cùnnì tigbɔn gbanti kí tīī kitiŋ kin poon Nabooti kóòyee tindaŋkpilib nì ki-kpambaliŋ. 9 Tigbɔn gbanti poonee, tin u ŋmàn̄ee sɔ̀: «Ní bóob́ kinyɔkɔ kí kóoǹ samaa kɔkɔ kí kpāfì kí yàntī Nabooti ń kpòotī dinyɔɔboobil gbanti. 10 Ní nyàab̀maan bininjab bili bin kaa bí tibanee kí kàan̄ u-nimbiin, ní bíǹ ń lēē nnyimɔn seerau kí túń u-pu. Bí lì yii: <A sòon̄ ki bíil̀ Unimbɔti nì ubɔti.> Míǹ boonee, ní nyāntí-u kitiŋ kpaanceetiŋu, kí yāŋkì-u ataŋkpee ú kpú^a.»

11 Nabooti nín kóò kitiŋ kin poonee kpilib nì ki-kpambaliŋ ŋá kii Jeesabeel nín ŋmàn̄ kugbɔŋu poon ki bí yii bí ŋá puee. 12 Bi bóob́ kinyɔkɔ ní ki kóoǹ samaa kɔkɔ ki kpáfì ní ki yāntì Nabooti kpōotì. 13 Bininjab bili bin kaa bí tibanee dɔ́miń ki kāl̀ Nabooti nimbiin ní ki kíĺ ki bíi sòoǹ nnyimɔn seerau ki tūntí Nabooti pu, samaa kɔkɔ nimbiin ki lì yii: «Nabooti sòon̄ ki bíil̀ Unimbɔti nì ubɔti.»

Niinee ní bi nyántì-u kitiŋ kpaanceetiŋu ki yáŋkì-u ataŋkpee ki kūū. 14 Ní bi tú bí cùú tùkù Jeesabeel yii: «Bi yáŋkì Nabooti ataŋkpee ki kūū-u.» 15 Jeesabeel nín gbìl̄ yii bi yáŋkì Nabooti ataŋkpee ki kūū-uee ní u bí Akaab yii: «Cùú fōō ujiseeraayeelja Nabooti fiinyikpaabu bun u nìn yíì yii waa làá dūú nyāfiǹ-see kí nīn kíǹ ki yì, di sá yii Nabooti kaa ti bí, u kpíì.» 16 Akaab nín gbìl̄ yii Nabooti kpíìyee, ní u nín sìntī u-kpaabun, kí fōō-bu kí nīn kíǹ ki yì.

Unimbɔti sòon̄ ki kūū Akaab nì Jeesabeel bɔti

17 Niinee ní ti-Dindaan bí ubɔnaatil Eelii utiiseebeeja yii: 18 «Yīkì kí cù Isirayeel bɔtiu Akaab un kóò Samaarii tiŋkinee cee. U bí Nabooti fiinyi kpaabun. U cūtì kí fōō bukpaayee kí nīn kíǹ ki yì. 19 Á tùkù-u yii: <Ti-Dindaan nín sòon̄ puee sɔ̀. A kūū unil ki dóòyee ki dɔ́miń kí fōō u-wantaa!> Á gíti kūtì-u yii: <Ti-Dindaan nín gíti sòon̄ puee sɔ̀. Laakin ní iboo líntì Nabooti fatikuee, niin ní i làá líntí si mun yɔu.>»

20 Ní Eelii dū tibɔtee ki tùkū Akaab ní Akaab bí-u yii: «M-nannanliu, a tí nyàab̄-mi ki ká-maa!» Ní Eelii kíí-u yii: «M tí nyàab̄ ki ká-si, kun puee an pée mɔ̄ǹ-si á nīn ŋáań tin kaa fáatiǹ ti-Dindaanee dee. 21 Kpèè ti-Dindaan nín lī puee sèé: <M làá yàntī dinimbinaamandi ń kɔ́-si. M làá kúntí a-dicaŋkun yab. M làá kpɔ̀ kí céetí a-dicaŋkun bininjab kɔkɔ, uyumbuee, un tɔ́ u-beeee, báà ubɔ kaa làá kíń. 22 M làá ŋá a-dicaŋku kii m nín nìn ŋá Neebaati jipɔɔn Jeerooboowaam nì Ayiiya jipɔɔn Bayeesa dicaŋŋi puee ní. Di sá yii a gbítì m-ŋuul ki yāntì Isirayeel yab kɔ́ ikpitin.> 23 Ti-Dindaan nìn sòon̄ Jeesabeel bɔti ki lī yii: <Iboo di làá ŋmɔ́ Jeesabeel nanti Jisirayeel gundi taapu^b. 24 A-dicaŋkun un yaa kpíì kitiŋinee, iboo di làá ŋmɔ́ udaan nanti. Un di yaa kpíì tisatinee, inoon di làá jī u-nanti.>»

25 Ubɔ kaa ti pée bí ki dū u-ba ki líiǹ atuun ŋin kaa fáatiǹ ti-Dindaanee diŋál kii Akaabee. U-nimpuu Jeesabeel di nìn téekí-u ní u ŋáań míǹ. 26 U nìn túń ntimbiil tuuŋŋi ki jáam̀ awaa kii Amɔɔr yab bin ti-Dindaan nìn jìn̄ ki fōō bi-tiŋki ki tīī Isirayeel yabee nín nìn ŋá puee.

Akaab sīntì u-ba taapu

27 Akaab nín gbìl̄ tibɔti gbantee ní u cúú tiwan tin u pēēyee ki cátì, ní ki dū kutuku ki pēeǹ ní ki bóob́ kinyɔkɔ. U nìn pèentí kutuku míǹ ní ki dɔ̀, ní ki còom̄ soooo soooo. 28 Niinee ní ti-Dindaan bí Eelii utiiseebeeja yii: 29 «Kéè a ká Akaab nín sīntì u-ba m-nimbiin pueeyaa! U nín sīntì u-ba m-nimbiin puee, maa làá ti cáań dinimbinaamandi kí tɔ̄ u-dicaŋku pu u-maŋfal wiiŋyi poon, asee u-jipɔɔn yaa láa kāl̀ dibeelee ní m làá cáań.»