Bibɔtiibi Gbɔmpeepeekaaku 20

Siirii bɔtiu janjaliibi māntìi tú Samaarii kí já nì kì

1 Siirii bɔtiu Been-Adaadi kóoǹ u-janjaliibi kɔkɔ ki kpáfì. Bibɔtiibi mmuŋku nì saalaa nì bili di nìn kútì u-pu u nì bi ŋá mpèé. U nìn cáań itaamu nì janjatɔrɔkub ki dɔ́miń u nì u-janjakitil māntìi tú Samaarii tiŋki kí já nì kì. 2 U nìn tú binib bí tùkù Isirayeel bɔtiu Akaab yii: 3 «Man ubɔti Been-Adaadi nín sòon̄ puee sèé: <Man di yì a-nimbiliŋ nì a-sindaariyau. A-nimpoobi nì a-jipɔmbi bin ŋān̄ee, man di tí yì bi mun.>» 4 Ní Isirayeel bɔtiu kíí-u yii: «Ti-baa ubɔti, a nín lī puee míǹ dee. Man nì tin kɔkɔ m cááyee, sii di yì.» 5 Ama ní ituunee fātìi gítìń nliliitiim ki bí-u yii: «Man Been-Adaadi di bíi sòoǹ. M tú bí tùkù-si yii: <Á dū a-nimbiliŋ nì a-sindaariyau nì a-nimpoobi nì a-jipɔmbi kí tīiń-mi.> 6 Di sá yii fool naŋkɔnampuee, m làá fu tɔ̄ m-kàlimbi bí fūkul̀ a-naakookun nì a-kàliŋkpilib diiŋŋin. Kun bi yaa fu ká an cáá a-cee kunyampoou aa mɔ̄ ti-puee, bi làá fu yòon̄.»

7 Niinee ní Isirayeel bɔtiu yíiń bitindaŋkpilib ki bí-bi yii: «Ní kpèèmaan, kijapaai nee baasii bíi tákà-mi tibɔti ní. U nín túnní yii ḿ dū m-nimpoobi nì m-biyaamu nì m-nimbiliŋ nì m-sindaariyau kí tīī-uee, maa yíì.» 8 Niinee ní bitindaŋkpilibee nì samaa kɔkɔ bí-u yii: «Á taa pīlifiǹ-uaaa, kí taa kíí u nín bālifì-si tiŋyee.» 9 Ní u bí Been-Adaadi tuuŋyee yii: «Ní tùkù ti-baa ubɔti yii: <Tin a bàà bí yii man a-tɔntɔnliu ń ŋá kí tīī-si mpeepeekaamee, m làá ŋá míǹ kí tīī-si, ama tin a bālifì kɔŋkɔnneeyee, maa làá ŋmā kí ŋá míǹ.>»

Ituunee nìn búntì ki cūtìi tùkū Been-Adaadi Isirayeel bɔtiu nín kíí puee. 10 Niinee ní Been-Adaadi fātìi dū u-tɔntɔnliibee kí tú ntataatiim bí tùkù-u yii: «Awaa ń dáaĺ m-tafal kí gíti kūtì m yaa kaa yāntì Samaarii tiŋki kpántì ntam min kaa làá gbí bin kɔkɔ cēentí-mi nee ŋaantiliŋinee!» 11 Ní Isirayeel bɔtiu kíí yii: «Ní tùkù Been-Adaadi yii: <Un cá kujaauee kaa máaǹ kí nīn pùlifī kii u nyánní kujaauee.>» 12 Been-Adaadi nì bibɔtiibi bin kíǹee nìn bí tantibin ki nyù idafi ní bi dɔ́miń ki tùkū-u tibɔti gbanti. U nín gbìl̄ mimmee ní u bí u-janjakpilib yii: «Dikɔ̀ndi ń kíĺ!» Ní bi bɔ́ntì kí kíĺ dikɔ̀ndi.

Ubɔti Akaab jáń ki jíń

13 Niinee ní Unimbɔti bɔnaatiliu ubɔ dɔ́miń ki ká Isirayeel bɔtiu Akaab ní ki bí-u yii: «Ti-Dindaan bí yii: <Kéè a ká bijanjaliibi cutimaanyi nee yaa! M làá dū-bi kí ŋá a-ŋaan díǹ ní á béé yii man di sá ni-Dindaan.>» 14 Ní Akaab bí yii: «Kí dūú dī ŋma pu ní a làá dū-bi kí ŋá m-ŋaan ní?» Ní ubɔnaatilee kíí-u yii: «Kpèè ti-Dindaan nín sòon̄ puee sèé: <Ntiŋgbamu kpilib janjaliibi bin sá binipɔmbee pu ní m làá dūú dī.>» Ní Akaab gíti bālifì yii: «Ŋma di làá kíĺ dikɔ̀ndi ní?» Ní u kíí yii: «An sá sii.»

15 Niinee ní Akaab kóoǹ ntiŋgbamu janjapɔmbee ki kpáfì. Bi nìn bí binib alaataa ali nì mmuŋku nì binib bili. Bíǹ boonee ní u kóoǹ Isirayeel kɔkɔ janjaliibi ki kpáfì, bíǹ nìn sá binib kutukub biluli. 16 Kuwiŋkuluu, ŋyunti ŋun ní Been-Adaadi nì bibɔtiibi mmuŋku nì saalaa nì bili bin u nì bi ŋá mpèéyee bí bi-tantibin ki nyù ki gbéèyee ní Akaab nì u-yab nyáń kí já nì bi. 17 Ntiŋgbamu janjapɔmbee di nìn péé péé ki nyáń. Been-Adaadi nìn tú binib bí kpèè kun bíi jītée ní bíǹ dɔ́miń ki tùkū-u yii: «Binib nyánní Samaarii ki dòoń.» 18 Ní Been-Adaadi bí yii: «Bi yaa dòoń nì ŋgbansɔŋfee, ní cúú-bi kí taa kpɔ̀-bi, bi yaa tí dòoń nì kujaauaa, ní tí cúú-bi kí taa kpɔ̀-bi!»

19 Ama bijanjapɔmbee nìn nyáń kitiŋin dijanjakitil pá bi-boon. 20 Báà ŋma nìn kūū u nì un bíi jáàyee. Siirii yab nìn sáǹ ní Isirayeel yab jìn̄-bi. Siirii bɔtiu Been-Adaadi nìn ŋúń ki kāl̀ utaamu pu kí sáǹ ki ŋmátì ki kpáaǹ bitanjakaliibi biba. 21 Isirayeel bɔtiu nìn jáń ki pɔ́ɔkiǹ Siirii yab kpataaa. U nìn kūū ki céetì itaamu ki nāaǹ janjatɔrɔkub. 22 Niinee ní Unimbɔti bɔnaatiliu dɔ́miń ki ká Isirayeel bɔtiu ní ki bí-u yii: «Ká kunyannyaau, ama á dàkafì tiŋan kí kpèè a nín máaǹ kí ŋá puee, di sá yii jiil naŋkɔnampuee, Siirii bɔtiu làá dāá fàtīí gítiń kí já nì si.»

Akaab fātìi jáń ki jíń

23 Siirii bɔtiu naacimbi bí-u yii: «Isirayeel Nimbɔtiu sá ajoon pu Nimbɔtiu ní, an pu ní bi jáń ki pɔ́ɔkiǹ-ti. Ama yàntī tí já nì bi laakin kitiŋ tèen̄ee, niinee ti làá pée pɔ̄ɔkiǹ-bi ní. 24 An nín máaǹ tí ŋá puee sɔ̀. Kpákatí bibɔtiibi kɔkɔ kí dū kɔmandambi kí téeǹ bi-yil pu 25 ní kí fàtīí fōō bijanjaliibi bin wīikí ki jítiǹ bin sáǹ-see, ní kí nyàab̀ itaamu nì tɔrɔkub ń nīn wīikí kii mpeepeekaamee. A yaa ŋá míǹ ki dóòyee, timbi làá cùú já nì Isirayeel yab laakin kitiŋ tèen̄ee, báà an ŋá pu ti làá pɔ̄ɔkiǹ-bi.» Been-Adaadi nìn pílifiǹ-bi ní ki ŋá kii bi nín bí yii ú ŋá puee.

26 Dibindi páaǹee ní Been-Adaadi kóoǹ Siirii janjaliibi ki kpáfì, ní ki cáá-bi ki cūnnì Afeeki tiŋkin bí já nì Isirayeel yab. 27 Ní Akaab mun kóoǹ Isirayeel janjaliibi ki kpáfì ní ki tīī-bi bi-janjawanti, ní bi nín cá kí já nì Siirii yab. Bi nìn cúu yākatì akiti ali ní ki gāā ajanjanaapaa ki túĺ Siirii yab. Isirayeel yab nìn bí kii tiŋɔcaŋkpun tin kaa náaǹee ní, ama ní Siirii yab nìn yàl̄ ki gbí an kɔkɔ pu. 28 Unimbɔti bɔnaatiliuee nìn tí dɔ́miń ki sòon̄ nì Isirayeel bɔtiu. U nìn bí-u yii: «Ti-Dindaan nín sòon̄ puee sèé: <Siirii yab nín bí yii man ni-Dindaan, m sá ajoon pu Nimbɔtiu kaa sá laakin kitiŋ tèen̄ee Nimbɔtiuee puee, m làá dū bi-janjakitikpaandi nee kí ŋá a-ŋaan, ní ní béé yii man di sá ni-Dindaan.>» 29 Bi nìn gāā bi-janjanaapaaŋi ki túĺ tɔb áli iwiin iluli. Ŋwinluluútee ní dikɔ̀ndi kíĺ. Isirayeel yab nìn jáń ki pɔ́ɔkiǹ Siirii yab ní ki kūū ŋwimbambaanti bi-janjaliibi bin còom̄ kitiŋ ki jáàyee kutukub dilaataal. 30 Bin nìn kíǹee nìn sá kii binib kutukub mmuŋku nì biluli ní ki sáǹ ki nín kóò Afeeki tiŋkin, ama ní digundi tàb̄ ki kūū-bi.

Akaab yāntì Siirii bɔtiu kaa kūū-u

Been-Adaadi mun nìn sáǹ ki kɔ́ kitiŋee poon ní ki nìn kóò ki póotí adiin ki bāal̀. 31 U-tɔntɔnliibi nìn bí-u yii: «Pīlifì doo, ti gbìl̄ yii Isirayeel bɔtiibi cáá kulaŋŋaŋfitiiu tikpil. Míǹ puee yàntī tí dū kutukub kí pèen̄, kí dū iŋmii kí kúĺ kí léeń ti-silii, ní kí nyā kí tūŋkì Isirayeel bɔtiu. An yaa yíì u làá yàntī-si kí taa kpɔ̀-si.» 32 Niinee ní bi nyàab̄ kutukub ki pēeǹ, ní ki dū iŋmii ki kúĺ ki léeǹ bi-silii ní ki nín cá Isirayeel bɔtiu cee. Bi bàn̄ee ní ki bí-u yii: «A-tɔntɔnliu Been-Adaadi gbàam̄-si yii á fīī u-maŋfal.» Ní Akaab bí yii: «U dáá gbíntìi bí dimaŋfalinaaa? U sá m-nabiki naa!»

33 Bin Been-Adaadi nìn túnnée nìn ká yii an sá kudaaŋŋu kun ŋān̄ee ní bi kpáàa fātìi lī malaa yii: «Tiŋman, Been-Adaadi lafun sá a-nabiki!» Ní Akaab bí yii: «Cùú cáaḿmaan-u.» Niinee ní Been-Adaadi nyánní laakin u bál̀ee ní ki nín dòoń Akaab cee, úǹ dū-u ki kāaǹ u-tɔrɔkuu pu. 34 Been-Adaadi bí-u yii: «M làá fàtīí gíiǹ ntimu mun m-baa nìn jáń ki fōō a-baa ŋaanee kí tīī-si. A ŋūǹ kí nīn kíǹ ki nyáfí a-wanti Damaasi tiŋkin kii m-baa nín nìn ŋūǹ kí nyāfì ti-wanti Samaarii tiŋkin puee.» Ní Akaab kíí-u yii: «See tí pòon̄ tɔb kí ŋá mpèé ní ḿ nín yàntī á nīn cá.» Niinee ní bi pōoǹ tɔb ki ŋá mpèé ní Akaab yāntì u búntì.

Akaab nín ŋá puee kaa mɔ́ɔkiǹ ti-Dindaan

35 Ti-Dindaan nìn sòon̄ nì u-bɔnaatiliibi kitil poon ubɔ ní úǹ bí u-juti yii: «M gbàam̄-si, fáá-mi!» Ama ní u-jutee yíì kaa fáá-u. 36 Niinee ní un bàà bí yii ú fáá-uee bí-u yii: «A nín ŋá pu kaa pílifiǹ ti-Dindaan nyɔkɔee, a yaa pée nyáń dooyee, gbikinti di làá kpɔ̀-si.» Ŋyunti ŋun kijapaayee lafun nyánnée ní gbikinti kíntì-u ki kūū-u.

37 Unimbɔti bɔnaatiliuee ti ká unil ubɔ mun ní ki bí-u yii: «M gbàam̄-si fáá-mi!» Ní úǹ fáá-u ki ŋá-u tiweendi. 38 Niinee ní Unimbɔti bɔnaatiliuee cūtìi kāl̀ nsan caŋin ki cí ubɔti. U nìn dū ŋŋaabu ki fìn̄ u-nimbiin bí taa ŋmā kí béé-u. 39 Ŋyunti ŋun ubɔti bíi jītée ní u téeń yii: «Ti-baa ubɔti, man a-tɔntɔnliu bí dikɔ̀ndin ki bíi jáàyee ní ujanjal ubɔ cáań-mi unil ubɔ ní ki bí-mi yii: <Nín̄ kpèé-mi unil nee yaa! U yaa sáǹ ki ŋmátì, sii ní bi làá dūú téeǹ u-yil pu, àá a làá pà animbil jitɔmbi kutukub bita>. 40 Ama m nín là doo ki là dooyee, maa ti ká mpaan kí kpèè-u ní u sáǹ ki ŋmátì!» Ní Isirayeel bɔtiu kíí-u yii: «Too sii a-ba di sòon̄ ki kūū a-bɔti.» 41 Niinee ní ubɔnaatilee cúú ŋŋaabu ŋun u dūu fìn̄ u-nimbiinee ki lēē malaa, ní Isirayeel bɔtiu béè yii an sá Unimbɔti bɔnaatiliibi kansikin ubɔ. 42 Unimbɔti bɔnaatiliuee bí-u yii: «Ti-Dindaan nín bí puee sèé: <A nín yāntì unil un m kūū u-bɔti yii bí kpɔ̀-uee ŋmátèe, sii ní bi làá kpɔ̀ kí téeǹ u-yil pu, ní kí kpɔ̀ a-nibul kí téeǹ u-nibul yil pu.>» 43 Ní Isirayeel bɔtiu nín gítí u-dumpu Samaarii nì kunimbaau nì diŋuul.