Samiyeel Liliiti 16

Daafiidi nì Siiba bɔti

1 Daafiidi cōom̀ ki jítì dijool yilpu kpalaayee ní ki tú Meefiibooseeti tɔntɔnliu Siiba nsanni u dòoń u-cee. U nìn kpàl̄ mmamu muli mu túń kpɔnɔb alaataa ali nì fiinyi subiliŋ akulim asaka dilaataal, nì fiigi subiliŋ dilaataal, nì ndamam kuloou. 2 Ubɔti bālifì Siiba yii: «Tin kɔkɔ ní a tú nee, a làá ŋá nì ba?» Ní Siiba kíí-u yii: «Ti-baa ubɔti, mmamu nee sá ki tīī a-dicaŋkun yab ń nīn cáa kàal̀, ní kpɔnɔb nì asubilee sá a-naacimpɔmbi jikaati, ní bin cōom̀ kuteeun ki gīīyee ń nīn cáá ndaamee ki sɔ̀ŋkī bi-neen.» 3 Ní ubɔti bālifì-u yii: «Kin a-kpiliu Saayuul naantiiu Meefiibooseeti bí la?» Ní Siiba kíí-u yii: «U bí Jeerusaleem niin. Di sá u lī yii: <Kɔŋkɔnnee, Isirayeel yab làá gíiǹ m-naanja beel kí tīī-mi.>» 4 Ní ubɔti bí yii: «Too, an ŋān̄. Kí yòon̄ díǹ kí nīn cée, m fōō Meefiibooseeti fakal kɔkɔ ki tīī-si.» Niinee ní Siiba tātìi dōoǹ dicincibil ní ki bí yii: «Ti-baa, m jáam̀-si diyimɔɔl din a pú-mee pu.»

Simeeyii nì Daafiidi bɔti

5 Ubɔti Daafiidi bàn̄ Bawuriim timbiliikinee, uninja ubɔ nìn nyēeń ki-ni bi yíì-u Simeeyii, Geera jipɔɔn. U nì Saayuul nìn pēē mmaal ní u kíĺ ki bíi tòó Daafiidi mbusu. 6 U nìn bí ki tòó Daafiidi nì u-kàliŋkpilib kɔkɔ ataŋkpee, min kamaa samaa nì bijanjaliibi nìn bí u-ŋaŋgiil pú nì u-ŋaŋgan pú bi còom̄ ki cée. 7 U nín nìn tòó-u mbusu ki lì puee di sá yii: «Nyā doo, nyā doo, unikpɔl un bí nee, aa pée bí tiban! 8 Ti-Dindaan yāntì binib bin kɔkɔ a kūū Saayuul dicaŋkunee fatikuu fātìi lítì a-pu nín̄ nee. A fōō Saayuul ŋaan dibeel, an pu ní ti-Dindaan fōō-dì a-ŋaan ki dūu tīī a-jipɔɔn Abisaloom. Kɔŋkɔnnee, a kɔ́ nnaabun, kun puee a sá unikpɔl ní.» 9 Abisayi un na bi yíì Seeruyee bí ubɔti yii: «Ba pu ní dibɔkpil nee tòó ti-baa ubɔti mbusu míǹ? Yàntī ḿ cùú lēē u-yil.» 10 Ní ubɔti bí yii: «Seeruya jipɔmbi Abisayi nì Joowaab, tíǹ ká-ni la? Kijapaai nee yaa bíi tòó-mi mbusuee, an yaa yíì ti-Dindaan di bí yii ú ŋá míǹ. Ŋma di ŋūǹ kí kpákáǹ-u?» 11 Ní Daafiidi bí Abisayi nì u-kàliŋkpilib kɔkɔ yii: «Un sá m-jipɔɔn, man m-ba poon naŋuee nyàab̀ kí kpɔ̀-mi. Ŋma nín kàlaasì un sá Beenjameen naakookun nee. Ti-Dindaan di yaa pú-u nsan ú tɔ̄-mi mbusuee, yàntīmaan-u. 12 An yaa yíì ti-Dindaan làá kpèè m-falaau kí cúú mbusu un u tòó-mi díǹ nee kí kpántí dibiindi.»

13 Daafiidi nì u-yab nìn bí ki còom̄ ki cá. Simeeyii nìn bí ki kpàkaǹ dijool ki nóó-bi kaa dátiǹ Daafiidi. U nìn gbíntìi tòó mbusub, ki tòó ataŋkpee, ní ki kàfī ntam ki yàantí. 14 Boonee ubɔti nì u-yab dūu bàn̄ Jɔɔdan buŋgbandi. Bi nìn gīī ní ki kāl̀ niin ki ŋūŋfì.

Abisaloom bāań ki kɔ́ Jeerusaleem tiŋkin

15 Abisaloom nì Isirayeel yab dinikitikpaandi bāań ki kɔ́ Jeerusaleem. Ayiitoofeel nìn bí u-cee. 16 Ŋyunti ŋun uarkitiija Usayii un nìn bí Daafiidi cee ki sá u-saŋkiliuee bāań Abisaloom ceeyee ní u téeń yii: «Ubɔti ń nīn cáá mmaŋfafɔkɔn! Ubɔti ń nīn cáá mmaŋfafɔkɔn!» 17 Ní Abisaloom bālifì-u yii: «A nín yú nì a-bɔɔ Daafiidi deedee puee deeee? Ba pu ní aa nóó-u?» 18 Ní Usayii kíí-u yii: «Un ní ti-Dindaan nì Isirayeel nibul kɔkɔ lēē ú nīn sá ubɔtee, úǹ ní man làá nóó kí nīn bí u-cee. 19 Nliliitiimee, ŋma ní m làá tɔ̄ ditundi kí tīī, an yaa kaa sá m-bɔɔ jipɔɔn? Kii m nín túń ditundi pu ki tīī a-baayee, míǹ mbaantiim ní m làá tɔ̄ kí tīī si mun.»

Abisaloom nì u-baa Daafiidi nimpoobi bɔti

20 Abisaloom bí Ayiitoofeel yii: «Kàl̄maan ni-ŋmaniŋma kí kpèèmaan min sá tí ŋée.» 21 Niinee Ayiitoofeel bí Abisaloom yii: «Cùú dòon̄ nì a-baa nimpoobi bin u kāaǹ bí nīn kpèé dibeecindee. Niinee, Isirayeel yab kɔkɔ làá béé yii a kɔ́ a-baa poon ki lēē baadakam, ní bin bí a-jandi púee ń ká kunyannyaau.» 22 Niinee ní bi gāā tanti bi nín bɔ̀b̄ dibeecindi puee yilpu ki tīī Abisaloom. Ní Abisaloom dōoǹ nì u-baa nimpoobi mpaampiin pu Isirayeel yab kɔkɔ nimbilin.

23 Ŋyunti gbantee, Ayiitoofeel yaa nìn pée tīī isaŋkee, an nìn bí kii Unimbɔti di sòon̄ee ní. An puee, an yaa sá Daafiidaaa, Abisaloomaaa, Ayiitoofeel yaa nìn pée lī puee, míǹ ní bi nìn ŋáań.