Samiyeel Liliiti 17

Usayii kpákáǹ Ayiitoofeel

1 Ayiitoofeel bí Abisaloom yii: «Yàntī ḿ lēē bininjab kutukub saalaa nì bili. M làá jà Daafiidi boon kunyeeu nee. 2 M làá cùú túuǹ-u ŋyunti ŋun u gīī mpɔn kaa ti bí-uee, ní ḿ fàaǹ-u ní u-yab bin nóó-uee ń sāǹ kí wàatī-u. Niinee ubɔti yaa kíǹ u-babee ní ḿ kpɔ̀-u. 3 M yaa ŋá mimmee ní ḿ gíiǹní samaa kɔkɔ a-jandi pú. Di sá yii unil un a nyàab̀ kí kpɔ̀ee yaa kpíìyee, binib kɔkɔ làá fàtīí gítiń a-jandi pú ní kí nīn bí ŋgbansɔŋfin.»

4 Abisaloom nì Isirayeel yab kpilib kɔkɔ nìn ká yii nlandɔkɔee sá mmɔnti. 5 Ní Abisaloom bí yii: «Yíiḿmaan uarkitiija Usaayii tí pīlifì u mun nín cáá tin ki làá tùkù-tee.» 6 Ní Usaayii nín cá Abisaloom cee, ní Abisaloom bí-u yii: «Kpèè Ayiitoofeel nín lī puee sèé. Tí ŋá u nín lī pueeyaaa, tí taa ŋá? Sii dàkafī yii ba?» 7 Ní Usaayii kíí Abisaloom yii: «Min bí nee, Ayiitoofeel saŋkii kaa làá tɔ̄ ditundi. 8 Sii a-ba nyí a-baa nì u-naacimbi pu. Bi sá bibaatandambi ní. Bi fōō mbum kii digbiŋgbil din biki an cúú kupɔɔunee ní. A-baa sá ujanjal ní. Waa làá kíí kí dòon̄ u-yab cee kunyeeu nee. 9 Kɔnampu nee, u kɔ́ ki bál̀ mbòó ŋubɔn, àá laaba. Kujaau yaa kíĺ ní bi bíi kù ti-yabee, samaa làá gbìl̄ ní kí lì yii: <Bi jáń ki pɔ́ɔkiǹ Abisaloom janjaliibi.> 10 Niinee, báà ujanjal yaa cáá dipɔbil kii gbikintee, see u-wunti ń yɔ̀tī. Kun puee Isirayeel yab kɔkɔ nyí a-baa nín sá ujanjakpaanee, ní u-janjaliibi mun sá bibaatandambi. 11 Kpèè tin m cáá ki làá sāŋkì-see. Kpāfì Isirayeel yab kɔkɔ a-cee kí yòon̄ Daani tiŋki ŋgan pú kí cáá sāā Beerseeba tiŋki ŋgiil pú. Bi máaǹ kí nīn wīikí kii tiŋku gbandi bulee, ní sii a-ba ń lìntī nyɔkɔpu ní cù kujaau. 12 Báà laakin ní u yaa bée, see tí bà-u ní kí kpátí kí bìin̄ u-pu kii dimalindi nín bìintí kitiŋ pu puee. Taa làá yàntī úǹ Daafiidi nì u-nib ubɔbɔ ń ŋmátí. 13 U yaa sáǹ ki kɔ́ kitiŋ kibanee, Isirayeel yab kɔkɔ làá cáań iŋmii ní tí dáaĺ kitiŋee kí cáá tɔ̄ mbunni. Niinee baa dāa gíti kāntí kitaŋkpalii kitiŋ gbantin.»

14 Abisaloom nì Isirayeel yab kɔkɔ lī yii: «Usaayii saŋkii ŋān̄ ki jítiǹ Ayiitoofeel yai.» Di sá yii ti-Dindaan nìn lēē ki yóoǹ yii Ayiitoofeel saŋkii ń ŋá fám, i mun di bàà ŋān̄. U nìn ŋá míǹ kí cáań mbusu kí tɔ̄ Abisaloom pu ní.

Daafiidi dūtì Jɔɔdan buŋŋu

15 Ní Usaayii tùkū bisaraaŋakpilib Saadooki nì Abiyataar yii: «Kpèè Ayiitoofeel nín sáŋkì Abisaloom nì Isirayeel kpilib puee, nì ma mun nín sáŋkì-bi puee. 16 Kɔŋkɔnnee, tɔ̄maan bí tùkù Daafiidi malaa yii ú taa dòon̄ Jɔɔdan tantakalin. U máaǹ kí dùtī Jɔɔdan buŋŋu, an yaa kaa sá míǹ, Abisaloom làá kpɔ̀ kí céetí u nì u-yab.»

17 Joonatan nì Ayiimaasi nìn yú Eeni-Roogeel ki cí. Usapɔɔn ubɔ nìn cāabìń tibɔti tin bi làá dūú nàatī ubɔti Daafiidee. Di sá yii bíǹ kaa nìn ŋūǹ kí kɔ́ kitiŋin bí ká-bi. 18 Ama kinaacimpɔmbiki kiba nìn ká-bi ní ki cūtìi tùkū Abisaloom. Ní binib bilee búntì malaa malaa ki bàn̄ Bawuriim tiŋkin ki kɔ́ uninja ubɔ pu. U nìn cáá lɔkɔ u-cindi, ní bi kɔ́ lɔkɔee poon. 19 Kudiidaan nimpuu nìn dū tanti ki bīiǹ lɔkɔee pu ki dū asubil ki díntì, bí taa béé yii tiba bí niin. 20 Ní bin Abisaloom túnnée bāań ki kɔ́ unimpuee dumpu ki bālifì-u yii: «Ayiimaasi nì Joonatan bí la?» Ní u kíí-bi yii: «Bi dūtì kibùmbiki ki búntì.»

Ní bi cūtìi nyàab̄-bi kaa ká-bi, ní ki fātìi nín gítí Jeerusaleem. 21 Bi búntèe ní Yoonatan nì Ayiimaasi nyáń lɔkɔn ki cūtìi tùkū Daafiidi yii: «Yīkìmaan kí dùtī Jɔɔdan buŋŋu malaa, di sá yii Ayiitoofeel nín tīī isaŋkee, bi nín bí yii ní ŋá puee dee.» 22 Dicilpu niinee ní Daafiidi nì u-yab kíĺ ki bíi dùtī Jɔɔdan buŋŋu. Kutaa tin lì yii kù wúntée, bi-kɔkɔ dūtì ki dóò, báà uniseen kaa kíǹ.

23 Ayiitoofeel nín ká yii baa dū u-saŋkii ki túń ditundee, ní u dū dimaŋgakal ki páaǹ u-maŋki pu ki jɔ́m̀ ki kāl̀ ki nín kùǹ u-tiŋkin. U bàn̄ee ki tīī u-dicaŋkun yab marab, ní ki lúntì u-ba ŋŋmii ki kpíì. Bi nìn síb́-u u-baa kaakulin.

Daafiidi bí Maanayiim

24 Daafiidi nìn dūu bàn̄ Maanayiim^a. Ŋyunti gbantee, Abisaloom nì Isirayeel yab janjaliibi kɔkɔ nìn bíi dùtī Jɔɔdan buŋŋu. 25 Abisaloom nìn lēē Amasaa ki dū-u ki kpántì bijanjaliibi kpiliu ú fōō Joowaab yil. Amasaa gbanti baa nìn sá uisirayeelja ní bi yíì-u Yeeteer. U nìn cáá Naaki bisal Abiigal, Seeruya naal, Joowaab na. 26 Abisaloom nì Isirayeel yab nìn gāā bi-janjanaapaal Galaadi tiŋkin ní.

27 Daafiidi nín bāań Maanayiim tiŋkinee, Naasi jipɔɔn Soobii un nyánní Amɔn yab tiŋyil Raabee nìn dɔ́miń ki kútì u-pu. Bin nìn nóó-uee di sá Amiyeel jipɔɔn Makiir un nyánní Loo-Deebaar tiŋkinee nì ugalaadija Baarsilaayi un nyánní Roogeeliim tiŋkinee. 28 Binibee nìn cáań tiwandooŋkaal nì ndoo pu satab, asambil nì mbamu nì bilee nì ɔɔji nì ŋyim nì tijimpin tin bi púĺee nì atùun nì atùmman 29 nì tisiil nì nnaabiim nì inaa nì ipii waagaasiibi ki cáań ki tīī Daafiidi nì u-yab bin nìn nóó-uee bí jī. Di sá bi nìn lī bi-neen yii: «Kɔnampu, digìńdi nì ŋkùm nì nnyinnyoo bàn̄ binib nee kuteeun.»