Samiyeel Liliiti 15

Abisaloom mākaǹ kí fōō dibeel

1 Míǹ boonee ní Abisaloom nyàab̄ janjatɔrɔku nì itaamu, ní bijanjaliibi imuŋku ili nì saalaa sáń ki līī u-nyɔkɔpu. 2 Abisaloom nìn péetí kutaafaau ní kí cùú kàl̄ kitiŋ punyɔkɔ nsan caŋin. Ŋyunti ŋun kamaa ubɔ yaa nìn cáá tiba ki cá ubɔti dumpu ki là ubɔti ń sòoǹ kí ŋāŋkì kí tīī-uee ní ú yíiń udaan kí bàlifì-u yii : «A nyánní kitiŋ kilakan ní?» Ní úǹ ń kíí-u yii : «Man a-tɔntɔnliu nyánní Isirayeel yab naakooku kubɔ poon ní.» 3 Ní Abisaloom ń bí-u yii: «A-bɔti ŋān̄ ki túĺ nsan, ama ubɔ kaa bí ubɔti cee ki làá gbìl̄ kí tīiǹ-si.» 4 Ní ú kūtì kí lì yii: «Man di yaa bàà sá kitiŋ nee bɔsoonliuee, bin kɔkɔ cáá tibɔti ki là bí sòoǹ kí ŋāŋkì kí tīī-bee bàà dòoń m-cee ní ḿ sòoǹ kí ŋāŋkì kí tīī-bi!» 5 Ubɔ yaa nìn bāań ki gbāaǹ kí jāam̀-uee, ní ú cúú u-ŋal kí yáatí-u kí yóoń ní kí kpàl̄-u.

6 Míǹ ní Abisaloom nìn ŋáań bin kɔkɔ nìn cá ubɔti cee ú sòoǹ kí ŋāŋkì bi-bɔtee. U nìn ŋá míǹ ní ki ŋmātiǹ Isirayeel yab.

7 Abin anaa boonee, ní Abisaloom bí ubɔti yii: «Pɔ̄-mi nsan ḿ cù Eebrɔn kí pà ipoon in m nìn pōoǹ ti-Dindaanee. 8 Di sá yii ŋyunti ŋun m nìn bí Geesuur, Siirii yab tiŋkinee, man a-tɔntɔnliu nìn pōoǹ yii: <M-Dindaan, a yaa yāntì m fātìi gítì Jeerusaleemee, m làá cù Eebrɔn kí ŋá saraabi kí tīī-si.>» 9 Ní ubɔti bí-u yii: «Nín̄ cá nì ŋgbansɔŋfi.» Ní u yíkìi kíĺ nsan ki búntì Eebrɔn. 10 U bàn̄ niinee ní ki tú binib Isirayeel yab timmu kɔkɔ poon bí tùkù-bi yii: «Ni yaa láa pée gbìl̄ bi búń ŋyinee, ní dāá lì yii: <Abisaloom kpántì ubɔti Eebrɔn tiŋkin.>» 11 Abisaloom nìn mēē Jeerusaleem binib alaataa ali bi pá u-boon kaa nyí tiba poon. Bíǹ kaa nìn pée nyí tin Abisaloom nìn bɔ́ntì kí ŋée poon tiba.

12 Ŋyunti ŋun Abisaloom bíi ŋáań saraayee ní u tú bí yíiń Ayiitoofeel, u-baa Daafiidi saŋkiliu. U nìn kóò u-tiŋkin Giiloo. Niinee bin nìn pá Abisaloom boonee dūu wíiǹ ní bi nín nìn bóob́ kí ŋá tiŋyee mun ká mpɔn.

Daafiidi sáǹ Jeerusaleem

13 Unil ubɔ nìn dɔ́miń ki tùkū Daafiidi yii: «Isirayeel yab gítì Abisaloom jandi pú.» 14 Ní Daafiidi bí u-kàliŋkpilib bin nìn bí u-cee Jeerusaleemee yii: «Tí yīkì kí sām̀maan malaa, an yaa sá fám, Abisaloom kaa làá tàan̄ ti-kansikin báà ubɔ. Yáb́maan, an yaa kaa sá míǹ, u làá cúú-ti malaa, kí kpɔ̀ binib kɔkɔ kí cáań nnaabu kí tɔ̄ kitiŋ nee pu.» 15 Ní u-kàliŋkpilib kíí-u yii: «Ti-baa ubɔti, a yaa pée lēē puee, míǹ ní ti làá ŋá.» 16 Niinee ní ubɔti còom̄ ataa pu u nì u-dicaŋku kɔkɔ nyáń ki búntì. Ubɔti nìn dū u-nimpoobi ŋwaamu saalaa ki kāaǹ bí nīn kpèé dibeecindi.

17 Ubɔti còom̄ ataa pu u nì samaa kɔkɔ nyáń ki cée ní ki cūtìi yúl̀ kudiluŋkikaau boon. 18 Ní u-yab còom̄ ki jītí. Bíǹ di sá Keereeti yab kɔkɔ nì Peeleeti yab kɔkɔ bin cí ubɔtee, nì Gaati^a yab binib alaataa aluu bin nìn nóoń-u doooo Gaati tiŋkinee. Bíǹ gbanti kɔkɔ nìn cōom̀ ki jítì ubɔti nimbiin. 19 Ubɔti bí Gaati yab janjakpiliu Itaayii yii: «Ba pu ní a nóoń-ti? Gítí kí cùú nīn bí ubɔtipɔɔn cee, di sá yii a sá unicaan ní, ní bi jìn̄-si gba a-tiŋkin. 20 A dáá pée bàń dee ní ḿ kpáaǹ-si tí nīn tú ki yìiǹaaa? Maa kpáàa nyí laakin m cée. Míǹ puee kpáaǹ a-nabiyaamu kí gítí. Ti-Dindaan ń dàkà-si u-poommɔŋŋu nì u-laŋŋaŋfitiiku.» 21 Ama ní Itaayii kíí ubɔti yii: «M pūtì ti-Dindaan nì sii ubɔti yii, laakin ti-baa ubɔti làá nīn bée, án yaa sá kí kpúɔɔɔ, án yaa tí sá kí ŋmátáaa, niin ní man a-tɔntɔnliu mun làá nīn bí.» 22 Ní Daafiidi kíí-u yii: «An ŋān̄, dāá lìntī nyɔkɔpu.»

Niinee ní Itaayii nì u-janjaliibi nì bi-dicaŋŋi jítìi līntì nyɔkɔpu. 23 Ŋyunti ŋun bijanjaliibi nìn còom̄ ki jītí Daafiidi nimbiinee, samaa nìn gà dituweel ní. Ní ubɔti dūtì Seedrɔn bùmbiki nì u-yab kɔkɔ, ní ki dūu túĺ kuteeu saŋŋu. 24 Usaraaŋakpil Saadooki nì Leefii yab bin tūntí Mpèé dakaauee mun nìn bí bi-kansikin. Leefii yab nìn túutì dakaayee ki yóoǹ ní Abiyataar kíĺ ki bíi ŋáań saraabi áli binib kɔkɔ dāa sáǹ ki nyáń kitiŋin ki dóò. 25 Ubɔti bí Saadooki yii: «Gíiǹ Unimbɔti dakaau kitiŋin. Ti-Dindaan yaa súń m-saai, u làá fàtīí gíiǹní-mi. U làá yàntī ḿ fàtīí ká Unimbɔti dakaau nì u-kɔŋkooŋŋu. 26 Ama u yaa tí bí yii maa ti fáatiǹ-u, ú ŋá-mi min ní u lèe.» 27 Ní ubɔti gíti bí usaraaŋakpil Sadooki yii: «Aa káaa? Nín̄ gítí mmɔŋki nì ŋgbansɔŋfi sii nì a-jipɔɔn Ayiimaasi nì usaraaŋakpil Abiyataar nì u-jipɔɔn Yoonatan. 28 Man làá nīn bí kuteeun laakin Jɔɔdan buŋŋu kaa nyóò binib còom̄ ki dùtēe ki cí ni-kansikin ubɔ ń dāan̄ kí tùkù-mi tin bíi jītée.» 29 Niinee ní Saadooki nì Abiyataar fātìi gíiǹ Unimbɔti dakaau Jeerusaleem ní ki gbíntì niin.

Daafiidi tú Ayiimaasi ú cùú cɔ̄ŋkì Abisaloom

30 Daafiidi nìn dàb̀ ɔliifi sufii jool pu ki sūǹ. U nìn dū ŋŋaabu ki bīiǹ u-nimbiin kí dàkà u-nimbaaku, ní ki còom̄ fám kaa táká anaataka. U nì bin nìn nóóyee mun nìn dū iŋaabu ki bīiǹ bi-nimbiiŋyi ki dàb̀ dijool ki sūǹ. 31 Bi dɔ́miń ki tùkū Daafiidi yii: «Ayiitoofeel kútì Abisaloom nì u-yab bin fōō dibeelee pu.» Ní Daafiidi mēē yii: «M gbāam̀-si m-Dindaan, yàntī Ayiitoofeel saŋkii kɔkɔ ń taa tɔ̄ ditundi.» 32 Ŋyunti ŋun Daafiidi dàb̄ ki bàn̄ dijool yilpu kúnti kunti laakin bi jáaḿ Unimbɔtee, ní u ká uarkitiija Usayii, u-saŋkiliu còom̄ ki túŋkí-u. Tiwan tin u nìn pēēyee nìn cátì ní u-yil táká ntam. 33 Ní Daafiidi bí-u yii: «A yaa dɔ́miń m-cee, a làá kpántí-mi digìńdi ní. 34 Ama nín̄ gítí kitiŋin Abisaloom cee kí tùkù-u yii: <Ti-baa ubɔti, m dɔ́miń kí nīn kíǹ ki bí a-cee ní. Dooooyee m nìn tūǹ ditundi ki tìì a-baa ní, ama kɔŋkɔnnee sii ní m làá tɔ̄ ditundi kí tīī.>» Niinee a ŋūǹ kí pìin̄ Ayiitoofeel saŋkii kí tūtuǹ-mi. 35 Bisaraaŋakpilib Saadooki nì Abiyataar bí niin kí tūtuǹ-si. Tin kɔkɔ yaa bíi jítì dibeecindinee, á māafì-bi. 36 Saadooki jipɔɔn Ayiimaasi nì Abiyataar jipɔɔn Yoonatan bí bi-cee niin. Tin yaa pée bíi jītée, ní tɔ̄ń-bi bí dāá tùkù-mi. 37 Ŋyunti ŋun Daafiidi saŋkiliu Usayii cá kí kɔ́ Jeerusaleem tiŋkinee, Abisaloom mun dòoń kí kɔ́ dee.