Samiyeel Peepeekaa 27

Daafiidi cūtìi bí Fiiliistii yab cee

1 Boonee ní Daafiidi lī u-neen yii: «Ŋwiin bí Saayuul làá dāá ŋmā kí lēē m-maŋfal. Kun m pée ŋūǹ kí ŋée di sá ḿ sāǹ kí cùú báĺ Fiiliistii yab tiŋkin. Mimmee, Saayuul làá gbèen̄ kí taa ti nín̄ nyàab̀-mi Isirayeel tiŋki kɔkɔn, ní ḿ ŋmátí u-ŋaan.» 2 Niinee ní Daafiidi nì u-naacimbi binib alaataa aluuyee yíkìi búntì Mawooki jipɔɔn Akiisi, Gaati yab bɔtiu cee. 3 Bi nìn cūtìi kāl̀ Akiisi cee Gaati tiŋkin bi nì bi-dicaŋŋi. Daafiidi nimpoobi liitil nìn bí u-cee: Akiinoowam un sá Jisirayeel tiŋkinee, nì Abiigayiil, Nabaal nimpuu un sá Kaarmeel tiŋkinee. 4 Saayuul nín gbìl̄ yii Daafiidi sáǹ ki cūtìi bál̀ Gaatee ní u gbēeǹ kaa ti bíi jì-u.

5 Dalbee ní Daafiidi bí Akiisi yii: «A yaa kíikí kí bàà pɔ̄-mi diyimɔɔl ḿ nīn kóò kitimbilii kiban. Kun puee an kaa máaǹ yii man a-tɔntɔnliu ń nīn kóò kitiŋ kin poon sii ubɔti kóòyee.» 6 Yaadal gbanti ní Akiisi dū Siikilaagi tiŋki ki tīī-u. An pu ní áli nì díǹ, Juuda yab bɔtiibi gbíntìi yì Siikilaagi tiŋki.

7 Daafiidi kāl̀ Fiiliistii yab tiŋkin dibindi diba nì iŋmal inaa ní. 8 Daafiidi bí niinee ní u nì u-naacimbi jɔ́m̀ ki jáń nì Geesuur yab nì Giirsi yab nì Amaleeki yab. Di sá yii bíǹ di nìn pée kóò kitiŋ gbantin doooodooooyee kí pée yòon̄ Suur tiŋki kí tin cáá sāā Eejipiti tiŋki. 9 Bi nìn kūū kitiŋ gbanti nib kɔkɔ, bininjab nì binimpoobi, ní ki cúuń inaa nì ipii nì iŋoobu nì mmamu nì igutaamu, ki kóoǹní tiwampeeŋkaal. U fātìi gítìńee ní ki cūtì Akiisi cee. 10 Akiisi yaa nìn bālifì Daafiidi yii: «Bilab ní a cūtìi jáń kujaau díǹ ní?» Ní Daafiidi ń kíí-u yii: «M cūtìi jáń nì Juuda tiŋki ŋgiil pú yab», àá «Yeerameel yab tiŋki ŋgiil pú», àá «Keeni yab tiŋki ŋgiil pú ní.» 11 Daafiidi kaa nìn cútiń uninja àá unimpu nì u-nimbiliŋ kí cáań Gaati tiŋkin. U nìn lī u-neen yii: «Binib làá nīn sòoǹ ki kɔ́kɔĺ-mi yii: <Kpèè Daafiidi nín ŋáań puee sèé.>» Ŋyunti ŋun kɔkɔ Daafiidi dūu kāl̀ Fiiliistii yab tiŋkinee, u nín nìn ŋáań puee dee. 12 An pu ní Akiisi nìn cáá Daafiidi pu dimákal tikpil. U nìn lī u-ban yii: «Daafiidi dàkā kináŋ Isirayeel yab bin sá u-nibulee pu tikpil. An puee u làá nīn pée bí m-cee ki tūǹ m-tundi kí nīn cáa cá jaanjaan.»