Samiyeel Peepeekaa 28

1 Ŋyunti gbantee, Fiiliistii yab kpáfì bi-janjaliibi kí cùú já nì Isirayeel yab. Ní Akiisi bí Daafiidi yii: «Á nīn nyí yii si nì a-naacimbi làá cùú tíkiń-mi kujaau nee poon.» 2 Ní Daafiidi bí-u yii: «An ŋān̄, sii a-ba làá ká ditundi din man a-tɔntɔnliu làá tɔ̄ee.» Ní Akiisi bí-u yii: «Sii di làá nīn sá man janjaliu un làá nīn cí-mee kí nīn cá jaanjaan.»

Saayuul cūtìi búń tibɔɔl

3 Samiyeel nìn kpíì, Isirayeel yab kɔkɔ súń u-kpool ní bi síb́-u Raama, u-tiŋkin. Saayuul nìn kúntì dibɔɔbɔl Isirayeel tiŋki kɔkɔn.

4 Dalbee Fiiliistii yab kpáfì bi-janjaliibi ki gāā bi-janjanaapaal Suneem tiŋkin. Ní Saayuul mun kpáfì Isirayeel yab janjaliibi, ní ki gāā bi-janjanaapaal Giilboowa. 5 Saayuul nín ká Fiiliistii yab janjanaapaalee ní dinyoondi kɔ́-u ní u-wunti kíĺ ki bíi gbáà kpàkpakpa. 6 Ní Saayuul bālifì ti-Dindaan ní waa kíí-u tiba. Waa kíí-u tidamintiil poonaaa, kaa dī Uriim pu àá ubɔnaatil ubɔ pu ki kíí-u^a. 7 Ní Saayuul bí u-tɔntɔnliibi yii: «Nyàab̀maan-mi unimpu ubɔ un sá ubɔɔyee ḿ cù u-cee kí bɔ̄ tibɔɔl.» Ní u-tɔntɔnliibi bí-u yii: «Unimpu ubɔ sá ubɔɔ ki bí Eeni-Dɔɔr.» 8 Saayuul kpántì u-wampeeŋkaati ní bininjab bili céeǹ-u, ní bi bàn̄ unimpuee cee kunyeeu. Ní Saayuul bí-u yii: «M làá dàkà-si utaŋkpiil ubɔ, m là á yíiń-u ḿ sòoǹ nì u.» 9 Ní unimpuee kíí-u yii: «Kéè sii a-ba nyí yii Saayuul kúntì dibɔɔbɔl tundi kitiŋ nee poonaa! Ba pu ní a pīil̀-mi ŋkúm taliŋku míǹ?» 10 Ní Saayuul bí yii: «M pūtì ti-Dindaan un bí dimaŋfalin nee yii tiba kaa làá ŋá-si tibɔti nee poon.» 11 Unimpuee bí-u yii: «Ŋma ní a là ḿ yíiń kí tīī-si ní?» Ní Saayuul bí-u yii: «Yíiń-mi Samiyeel.»

12 Unimpuee nín ká Samiyeelee ní u fáá mbiil, ní ki bí Saayuul yii: «Sii di sá Saayuul, ba pu ní a kíil̀-mi míǹ?» 13 Ní ubɔti bí-u yii: «Taa fàŋkì, ama tùkù-mi un ní a kée?» Ní unimpuee bí-u yii: «M ká ŋfam miba nyánní kitiŋ taapu taapu ki jɔ́miń.» 14 Ní u bālifì yii: «U bí mana?» Ní u bí yii: «An sá ujaŋkpil ubɔ di jɔ́miń ki pēē dibɔkutikpaandi.»

Niinee Saayuul béè yii an sá Samiyeel ní u tātìi gbāaǹ u-yil tūū kitiŋ. 15 Ní Samiyeel bí Saayuul yii: «Ba pu ní a páb́-mi ki yíiń-mi?» Ní Saayuul kíí-u yii: «M bí dinimbinaamandi poon ní. Fiiliistii yab dɔ́miń ki bíi jáà nì mi, ní Unimbɔti fātì u-boon ki tīī-mi. Waa ti dì ubɔnaatil ubɔ pu àá kudamintiiu kubɔ pu ki sòoǹ nì mi. An pu ní m yíiń-si á dàkà-mi min sá ḿ ŋée.» 16 Ní Samiyeel bí yii: «Ba pu ní a gíti bíi bàlifī-mi? Sii a-ba ká yii Unimbɔti fātì u-boon ki tīī-si ní ki kpántì a-nannanliu. 17 Ti-Dindaan ŋá kii u nín nìn dī m-pu ki sòon̄ a-pu miŋyee ní. U fōō a-cee dibeel ki dūu tīī ubɔ, an dàkà yii Daafiidi. 18 A yíì kaa pílifì ti-Dindaan bɔkpaaŋi kí bàà kpɔ̀ kí céetí Amaleeki yab. An pu ní ti-Dindaan bíi dàkà-si míǹ díǹ^b. 19 Ti-Dindaan làá dū si nì a-nibul Isirayeel yab kí ŋá Fiiliistii yab ŋaan. Fool, sii nì a-jipɔmbi làá fu nīn bí m-cee doo ditaŋkpiilin, ní ti-Dindaan ń fu dū a-janjaliibi kí ŋá Fiiliistii yab ŋaan.»

20 Saayuul nín gbìl̄ an bɔtee, tifaandi nìn kɔ́-u ní u lítì ki dōoǹ kitiŋ mɔ̀rrr. Kun nìn gíti púntì-uee di sá waa nìn jíń tiba ŋwiimpu nì kunyeeu, an puee mpɔn kaa nìn gíti bí-u. 21 Unimpuee sútìi pìl̄ Saayuul ki ká u-pɔbil nín bíil̀ puee ní u bí-u yii: «Sii a-ba ká man a-yumbuu nín pílifiǹ-see. Maa mɔ́tì m-maŋfal pu, ama m ŋá min a bí yii ḿ ŋée. 22 Kɔŋkɔnnee, si mun pīlifì tin man a-yumbuu là kí sòoǹ nì see. Yàntī ḿ cáań-si tijin fiii á jī kí ká mpɔn kí wàatī kí nín kíĺ nsan kí nīn kùǹ.» 23 Ní u yíì yii waa làá jī. Ní u-tɔntɔnliibi nì unimpuee páb́-u ní u dāa kíí ki jíń tijin. Niinee ní u yíkì kitiŋ ki kāl̀ kilambaŋ pu. 24 Unimpuee nìn cáá dinajapɔmbil din bí màlmalee. U nìn ŋá malaa ki kūū-dì. Míǹ boonee ní u búuń ŋyim ki púĺ kpɔnɔ un baa ŋá ŋkpɔnɔnyɔkɔee. 25 U nìn cáań ki tīī Saayuul nì u-tɔntɔnliibi ní bi jíń. Bi jíń ki dóòyee ní ki fātìi kíĺ nsan ki nín gítí kunyeeu gbanti.