Samiyeel Peepeekaa 26

Daafiidi tí yíì kaa kūū Saayuul

1 Siifi tiŋki yab cūtì Saayuul cee Giibeeya ki tùkū-u yii: «Aa nyí yii Daafiidi cūtìi bál̀ Akiila gbantaŋki pu kuteeu caŋinaaa?» 2 Ní Saayuul yōoǹ Isirayeel janjamɔntiibi kutukub bita ki kíĺ nsan ki nín cá Siifi teekun kí nyàab̀ Daafiidi. 3 Saayuul nìn gāā u-janjanaapaal Akiila gbantaŋki pu, didandi caŋin. Daafiidi úǹ nìn bí kuteeun. U nìn gbìl̄ yii Saayuul dɔ́miń niin ki nyàab̀ kí kpɔ̀-u. 4 Ní Daafiidi tú binib biba cūtìi kpēē ní ki ká yii tiŋman Saayuul bāań ki bí niin. 5 Ní u yíkìi nín cá niin ki tin bàn̄ Saayuul janjanaapaal pu. U nìn dáań ki ká laakin Saayuul nì u-janjakpiliu Abineer, Neer jipɔɔn dɔ̄ee. Saayuul nìn dɔ̄ dijanjanaapaal kansikin ní bijanjaliibi dɔ̄ ki māntìi tú-u.

6 Niinee Daafiidi yíiń Ayiimeeleeki uitiija nì Abisayi, Joowaab nabiki bin na bi yíì yii Seeruyee ki bí-bi yii: «Ŋma di làá nóó-mi tí cù Saayuul janjanaapaal pu?» Ní Abisayi kíí yii: «M làá nóó-si tí cù.»

7 Kunyeeuee, Daafiidi nì Abisayi ŋá soooo ki bàn̄ Saayuul janjaliibi cee. Saayuul nìn dɔ̄ dijanjanaapaal kansikin ki gèeǹ. U-kpaŋki nìn cɔ́ u-yil caŋin. Abineer nì bijanjaliibi nìn dɔ̄ ki māntìi tú-u ki gèeǹ. 8 Abisayi bí Daafiidi yii: «Unimbɔti baasii dū a-nannanliu ki ŋá a-ŋaan díǹ ní. Yàntī ḿ pée dū kikpaŋ kí sāā-u dibaja kí nákań kitiŋ, maa làá sāā mili.» 9 Ní Daafiidi bí-u yii: «Á taa kpɔ̀-u. Un di yaa dū u-ŋal ki gbēē un ti-Dindaan lēē ú nīn sá ubɔtee kaa lóotí ditafadaaldi. 10 M pūtì ti-Dindaan un bí dimaŋfalin nee yii ti-Dindaan u-ba di làá dāá kpɔ̀-u. An dāa ŋūǹ kí nīn sá yii u-wiiŋŋu di bàn̄ ní u kpíì, àá u cūtì kujaau ní bi kūuń-u. 11 Ti-Dindaan ń cúú-mi ḿ taa dū m-ŋal kí gbēē ubɔti un u lēēyee maŋfal. Tí pée yòon̄ u-kpaŋki kin cɔ́ u-yil caŋinee nì u-túuŋŋu ŋun poon nnyim kēe kí nīn cá.»

12 Ní Daafiidi yōoǹ kikpaŋ nì ntúun ŋun poon nnyim kā ŋu yú u-yil caŋinee ki búntì. Báà ubɔ kaa fīntì, kaa ká tin jítèe, kaa béè tin ŋée mun. Bi-kɔkɔ nìn dɔ̄ ki gèeǹ, kun puee ti-Dindaan nìn yāntì ŋgeembiim miba cúú-bi. 13 Ní Daafiidi nín cá lapu pu jandi ki cūtìi tɔ́kɔǹ dijool diba pu. U nìn dátiǹ Saayuul janjanaapaal. 14 Daafiidi nìn téeń bijanjaliibi watil pú ki yíiń Neer jipɔɔn Abineer yii: «Abineer, á pīlifì!» Ní Abineer bí-u yii: «Ŋma di bí niin ki kūuntí ki kpáàa ubɔti tafal ní?» 15 Ní Daafiidi bí-u yii: «A sá uninja ní, kaa sá mimmaaa? A-juti kaa bí Isirayeel tiŋkin. Kin ba pu ní aa cíitì ubɔti un sá a-kpiliuee tiŋan? Ubɔ dɔ́miń kí kpɔ̀ ubɔti un sá a-kpiliuee. 16 Min a ŋá nee kaa ŋān̄. Aa cíitì a-kpiliu ubɔti un ti-Dindaan lēēyee tiŋan. Nì ti-Dindaan un bí dimaŋfalin nee, a máaǹ ŋkúm. Ubɔti kpaŋki nì u-túuŋŋu ŋun poon nnyim kā ki yú u-yil caŋinee bí la?»

17 Niinee Saayuul béè Daafiidi neen, ní ki bālifì-u yii: «Sii m-jipɔɔn Daafiidi neen pu ní m gbìl̄ naaa?» Ní Daafiidi kíí-u yii: «Ti-baa ubɔti, an sá man Daafiidi.» 18 Ní Daafiidi kútì ki lī yii: «Ba pu ní m-dindaan jì man a-tɔntɔnliu míǹ? Ba ní m ŋá-si ní? Tikpitil tilati ní m baasii ŋá ní? 19 Kɔŋkɔnnee, ti-baa ubɔti, pīlifì tin man a-tɔntɔnliu làá sòoǹee. An yaa sá ti-Dindaan di yaa lùkutī-si ní a kā m-pu mimmee, ú yàntī m-saraau ń sɔ̀ŋkì u-pɔbil. Ama an yaa nyánní binib ceeyee, ti-Dindaan ń yàntī mbusu ń jēetí bi-pu. Di sá yii bi jìn̄-mi díǹ pu nee m-naanjab tiŋki kin ti-Dindaan tīī-tee pu kaa là ḿ kàl̄. An bí kii bi bíi tùkù-mi yii: <Cùú nīn jáaḿ awaayee> ní. 20 Ama man kaa làá kpú kinicantiŋin kí nīn dátiǹ m-Dindaan. Di sá yii sii Isirayeel bɔtiu bíi jì man un kaa bí tiban kii dikambabilee. A bíi jì-mi kii bi nín jì ujikpal ajoon pu puee ní.»

21 Niinee ní Saayuul téeń yii: «M yīntì! M-jipɔɔn Daafiidi, fàtīí gítiń. Maa ti làá ŋá-si tikpitil tiba, kun puee a dàkā díǹ yii m-maŋfal cáá kunyampoou a-cee. M ŋá ŋwaatiyaamin ní, m kíil̀ m-ba tikpil.» 22 Ní Daafiidi bí yii: «Ti-baa ubɔti, kpèè a-kpaŋki sèé, a-janjaliibi kansikin ubɔ ń dāan̄ kí fōō. 23 Ti-Dindaan di làá pà báà ŋma deedee tuuŋŋi nì u-baamɔŋyi paati. Díǹ nee, ti-Dindaan bàà dū-si ki ŋá m-ŋaan, ama m yíì yii maa làá dū m-ŋal kí gbēē-si, kun puee a sá ubɔti un ti-Dindaan lēēyee ní. 24 A-maŋfal yaa cáá kunyampoou m-ceeyee, ma mun maŋfal ń nīn cáá kunyampoou ti-Dindaan cee, ú nyāntí-mi agìń kɔkɔ poon.» 25 Niinee ní Saayuul bí Daafiidi yii: «Unimbɔti ń bìin̄ a-boon m-jipɔɔn Daafiidi. Tiŋman, án làá bútí-si ní á tɔ̄ atuŋkpaan.» Míǹ boonee ní Daafiidi búntì u-laŋki, ní Saayuul mun fātìi nín gítí u-dumpu.