Samiyeel Peepeekaa 25

Daafiidi nì Abiigayiil bɔti

1 Ŋyunti gbantee ní Samiyeel kpíì. Isirayeel yab kɔkɔ nìn kpáfì ki súń u-kpool. Bi nìn síb́-u u-dumpu Raama tiŋkin. Míǹ boonee ní Daafiidi yíkì ki nín cá Paaran teekun. 2 Uninja ubɔ nìn bí Maawɔn ní u-sati bíń Kaarmeel. U nìn cáá tigaajati tikpil. U nìn cáá ipii kutukub bita nì iŋoobu kutuku. U nìn cūtì Kaarmeel kí cā u-piii kuti^a. 3 Bi nìn yíì-u yii Nabaal ní ki yíì u-nimpuu yii Abiigayiil. Abiigayiil nìn cáá iciin tikpil ki ŋān̄ unimpu, ama ní u-cal nìn cáá ntoom ní u-bɔti pɔ̄ɔ̄. U nìn sá Kaleeb maaliŋun ní.

4 Daafiidi bí kuteeunee ní ki gbìl̄ yii Nabaal bíi cēē u-piii kuti. 5 Daafiidi nìn lēē u-naacimbi binib saalaa ki tú. U bí-bi yii: «Cùmaan Kaarmeel Nabaal cee, kí tùkù-u yii man di túnní-ni ní dāá jāam̀-u. 6 Ní tùkù-u yii: <Ti nì dibàl! Án bútí si nì a-dicaŋku nì tin kɔkɔ a cááyee! 7 Daafiidi gbìl̄ yii a bíi cēē a-piii kuti. Ŋyunti ŋun a-pikpaaliibi nìn bí ti-cee Kaarmeelee, taa nìn pée ŋá-bi digìńdi diba, ní bi-wanti báà kubɔbɔ kaa wáŋkì. 8 Bàlifì a-tɔntɔnliibi bi làá tùkù-si. Daafiidi gbàam̄-si yii á dàkà-ti kulaŋŋaŋfitiiu díǹ jiŋaal wiiŋŋu nee. Ti pée gbàam̄-si ní, tīī timbi nì a-tɔntɔnliu Daafiidi kun a yaa pée ŋūǹee.>»

9 Binib bin Daafiidi túee bàn̄ ki dū u nín tùkū-bi puee ki lī Nabaal cee, ki kíǹ ki yú ki cí. 10 Ní Nabaal bí yii: «Ŋma di sá Daafiidi ní? Ŋma di sá Jeesee jipɔɔn gbanti ní? Ti-yuntii nee bitɔntɔnliibi tikpil yíkí bi-kpilib cee ki sáń. 11 Ní man ḿ yòon̄ m-jinti nì m-nyim nì m-nanti tin m ŋāaǹ kí fōō bin m mēē dikpaameelee kí dūú tīī nimbi bin maa nyí laakin pú ni nyánnéeee?» 12 Daafiidi naacimpɔmbee fātìi nín gítí, ki tin dū Nabaal nín sòon̄ puee kɔkɔ ki máafì-u. 13 Ní Daafiidi bí u-naacimbi yii: «Báà ŋma ń yòon̄ u-tàataajiki kí gbìn̄!» Ní báà ŋma yōoǹ u-tàataajiki ki gbìn̄. Ní úǹ u-ba mun dū u-yaka ki gbìn̄, ní u nì binib kii alaataa anaa nín cá, ní binib alaataa ali gbíntì ki kā ki kpèé bi-wanti.

Abiigayiil sɔ̄ŋkì Daafiidi pɔbil

14 Ní Nabaal tɔntɔnliu ubɔ cūtìi tùkū Abiigayiil tin jítèe yii: «Kpèè Daafiidi túnní binib doooo kuteeun bí dāá jāam̀ ti-kpiliu ní waa fōō-bi. 15 Ama binib gbanti nìn ŋúb́-ti tiŋan. Baa nìn ŋá-ti tikpitil tiba, ní iyunti in kɔkɔ ti dūu kāl̀ bi-cee tisatinee, ti-waŋkuti báà kubɔ kaa wáŋkì. 16 Iyunti in kɔkɔ ti kpāā ti-piii nì ti-ŋoobui laakin bi nìn bée, bi nìn sá-ti kii digundee ní kunyeeu nì ŋwiimpu ki cí-ti. 17 Kɔŋkɔnnee, dàkafì kí kpèè min ní a máaǹ kí ŋée, di sá bi bɔ́ntì kí cáań mbusu kí tɔ̄ ti-kpiliu nì u-dicaŋku pu. An yaa kíǹ úǹ ti-kpiliuee, u-bimbim kaa ŋān̄, an puee ubɔ kaa ŋūǹ kí sòoǹ nì u.» 18 Ní Abiigayiil ŋá malaa ki yōoǹ kpɔnɔb alaataa ali nì ndaam itúun ili nì ipii in bi kūū ki tɔ́kɔǹee iŋmoo, nì bilee biliŋ ŋin bi kìn̄ee ncamsibiyaamu muŋmoo, nì fiinyi biliŋ ŋin kūńee asaka dilaataal, nì fiigi biliŋ kalaau alaataa ali. U nìn dū kɔkɔ ki túǹ mmamu, 19 ní ki bí u-tɔntɔnliibi yii: «Lìntīmaan, ḿ páań ni-boon.»

Ama waa pée tùkū u-cal Nabaal tiba. 20 U jɔ́m̀ ki kāl̀ kimaŋ pu ki bíi pɔ́tí kigbantaŋee, Daafiidi mun nì u-yab sìntīń ki túliń-u, ní bi dāa dūu tú tɔb. 21 Daafiidi nìn bí ki lì u-ban yii: «Mimmee, m pée wúń kijapaai nee wanti kuteeu nee pu tiba kaa wáŋkì fám deeyaa! M ŋá-u tiŋan ní u dū tikpitil ki pàn̄-mi! 22 Unimbɔti ń tīī m-nannanliibi mpɔn kí bìin̄ bi-pu gba, m yaa fu yāntì uninja bambaanti u-dicaŋkun kaa kūū-u fool kutaafaau.»

23 Abiigayiil nín ká Daafiidi páaǹee, ní u kpákatì kimaŋ pu malaa ki tātìi gbāaǹ Daafiidi nimbiin u-yil tūū kitiŋ. 24 U nìn cúú u-taal ní ki bí-u yii: «M-kpiliu, man di yì dibɔkpil. Ama, pée yàntī man a-yumbuu ń sòoǹ nì si á pīlifì. 25 M-kpiliu, taa fàtīí tɔ̄ Nabaal un kaa bí tiban nee. Di sá yii u fōō u-yindi didandi ní. Nabaal taapu di sá yii: <Kinaatuui>, ní inaatuu lafun bí u-ni. Ama man a-yumbuu kaa nìn ká binaacimpɔmbi bin a nìn túnnée. 26 Ama m pūtì ti-Dindaan un bí dimaŋfalin nee nì sii a-ba yii ti-Dindaan di pīiǹ-si nsan á taa kpɔ̀ unil, kí tɔ̀ ipɔntoon a-ba. Bin kɔkɔ sá sii m-kpiliu nannanliibee, nì bin nyàab̀-si tikpitilee ń dāá kpántí kii Nabaalee! 27 M-kpiliu, man a-yumbuu cáań-si tiwampɔkaal á fōō kí dūú yàkatī binaacimpɔmbi bin nóoń-see. 28 M gbāam̀-si, dū man a-yumbuu yìntitam kí pɔ̄-u. Di sá yii m cáá dimákal yii ti-Dindaan làá dū dibeel kí tīī a-dicaŋkun yab kí nīn cáa cá jaanjaan, kun puee m-dindaan jáń ti-Dindaan jaaku. A-maŋfal wiiŋyi kɔkɔ poonee, bí taa pée ká tikpitil tiba a-ni. 29 Unil ubɔ yíkì ki bíi jì m-kpiliu ki là kí lēē u-maŋfal. Ama ti-Dindaan a-Nimbɔtiu làá wúń a-maŋfal pu kí dū-dì kí kpāafì u-cee. U làá dū a-nannanliibi maŋfal kí tɔ̄ kí fá ndandati kii bi nín dù ditaŋkpal kí ŋá kujaataafuŋ poon kí tɔ̄ puee ní. 30 Ŋyunti ŋun ti-Dindaan yaa láa ŋá tiŋan tin u pōoǹ yii u làá ŋá kí tīī-see, u làá dāá dū-si kí kàan̄ dibeel Isirayeel tiŋki pu. 31 Taa kpɔ̀ unil fám kí tɔ̀ a-ba ipɔntoon. Mimmee a-pɔbil kaa dāa máfí. M-kpiliu, ti-Dindaan yaa láa bīiǹ a-boonee, á dāá téetí man a-yumbuu pu.» 32 Ní Daafiidi kíí Abiigayiil yii: «M jáaḿ ti-Dindaan, Isirayeel yab Nimbɔtiu un túnní-si díǹ á dāá tūŋkìń-mi nsannee. 33 M jáam̀ si mun, a-landɔkɔmɔntiŋu di nyántì-mi nnikpaakoon nì man m-ba nín bàà làá tɔ̀ ipɔntoon iŋyee poon. 34 Ibaamɔn an sá ti-Dindaan Isirayeel Nimbɔtiu di pīiǹ-mi nsan ḿ taa ŋá-si tikpitil. Ama m pūtì ti-Dindaan un bí dimaŋfalin nee yii a yaa kaa bàà túŋkìń-mi malaa, báà uninja kaa bàà fu kīntí fool kutaafaau Nabaal dicaŋkun.»

35 Ní Daafiidi fōō tiwampɔkaal tin u cáań-uee ní ki bí-u yii: «Nín̄ kùǹ nì ŋgbansɔŋfi. Kpèè, m gbìl̄ tin a lēe, ki fōō-tì nì kulaŋŋaŋfitiiu.»

Nabaal kpíì, Daafiidi cáá Abiigayiil

36 Abiigayiil fātìń mmɔŋkee, Nabaal bí ki jīǹ jiŋaal mmɔntiimin kii ubɔtee, ki bí dipɔɔpindi poon ki gbí púb. An puee waa pée tùkū-u tiba áli kutaa dāa wúntì. 37 Kutaa wúntì ndaam cēetì-uee, ní u máafì-u tin jítèe. Niinee ní u-pɔbil bíil̀ ní u dūu fàl̄. 38 Iwiin saalaa boonee ní ti-Dindaan fáá-u ní u kpíì.

39 Daafiidi nín gbìl̄ yii Nabaal kpíìyee, ní u fáá mbiil yii: «M jáam̀ ti-Dindaan! Nabaal nín nìn kpēē-mi fámee, ti-Dindaan mɔ́tì m-pu, ki pīiǹ-mi nsan maa ŋá ikpiti. U yāntì Nabaal toom fātìi gítì u-pu.» Boonee ní Daafiidi tú binib Abiigayiil cee u yaa kíikí kí kpántí u-nimpuu. 40 Bin Daafiidi túee nín cá Abiigayiil cee Kaarmeel, ki bàn̄ ki bí-u yii: «Daafiidi di túnní-ti a-cee yii u là á kpántí u-nimpuu.» 41 Ní u yíkì malaa ki tātìi gbāaǹ u-yil tūū kitiŋ, ní ki bí yii: «M bɔ́ntì kí nīn sá u-yumbuu, kí nīn fíntí m-dindaan tɔntɔnliibi taaŋi.» 42 Ní u yíkì kpalaa ki kāl̀ kimaŋ pu ki nóó Daafiidi tɔntɔnliibee. Bitɔntɔnliibi biŋmoo nìn táá-u. An nín dī pu u kpántì Daafiidi nimpuuee dee.

43 Daafiidi nìn cáá unimpu ubɔ mun bi yíì-u yii Akiinoowam, u sá Jisirayeel tiŋkin, ki dūu kútì Abiigayiil pu bi ŋá binimpoobi bili. 44 Saayuul nìn dū u-bisal Miikaal, Daafiidi nimpuu, ki pú Layiisi jipɔɔn Paltii un sá Galiim tiŋkinee ticati.