Samiyeel Peepeekaa 20

Joonatan yú Daafiidi boon

1 Daafiidi yíkì Nayooti Raama caŋin ki sáǹ ki cūtìi ká Joonatan ki bí-u yii: «M baasii ŋá a-baa ba ní? Ba kpitii ní m ŋá-u àá tilati poon ní m yīntiǹ-u ní u nyàab̀ kí kpɔ̀-mi ní?» 2 Ní Joonatan kíí-u yii: «Mbusu ń cù ndan, aa làá kpú. M-baa kaa ŋáań tiba kaa tùkū-mi. Ba pu ní u bál̀-mi tibɔti nee? An kaa ŋūǹ kí ŋá míǹ.» 3 Ama ní Daafiidi pée cɔ́ yii: «M pūtì yii an sá míǹ ní. A-baa nyí man nì sii nín bɔ́ɔtée. An pu ní u máaǹ ki tin lī u-neen yii: <Joonatan ń taa béé tibɔti nee án nín làá ŋá pu án taa páb́-uee.> Ama nì ti-Dindaan un bí nee, nì sii un mun bí nee, m làá tùkù-si yii maa ti dátì nì ŋkúm.» 4 Niinee ní Joonatan bí Daafiidi yii: «Tin a yaa pée lèe, m làá ŋá míǹ kí tīī-si.» 5 Daafiidi bí Joonatan yii: «Fool di fu sá uŋmapɔɔn^a. An bàà sá yii ḿ kàl̄ kí kɔ́ĺ ubɔti ní tí jī tijin. Ama a yaa kíí, m làá cùú báĺ kusaaun áli kujoou. 6 A-baa yaa fu dáań ki ká yii m kpá ní u bíi bàlifī m-puee, á tùkù-u yii: <Daafiidi mēē-mi nsan kí sāǹ kí cù Beetileem u-dumpu, u nì u-dicaŋkun yab ń ŋá dibindi kamaa saraau.> 7 A-baa yaa fu kíí yii: <Too an ŋān̄.> Mimmee man a-tɔntɔnliu pɔbil làá nīn sɔ̀m̀, ama u yaa fu fōō diŋuulee, á béé yii u baasii là kí kpɔ̀-mi ní. 8 Míǹ puee á dàkà-mi dineembaamɔndi, kun puee a pūtì ki pōoǹ ti-Dindaan nimbiin yii man nì si làá nīn sá bibɔɔtiibi. Báà kun ní m yaa pée ŋá ki yīntèe, kpɔ̀-mi a-ba. Taa cáá-mi kí tīī a-baa.» 9 Niinee Joonatan fáá mbiil yii: «M kpá kí ŋá míǹ jaanjaan! M yaa béè yii m-baa baasii nyàab̀ kí kpɔ̀-see, m pūtì yii m làá tùkù-si.» 10 Daafiidi bí Joonatan yii: «A-baa yaa kpātì a-pu mpɔnee, ŋma di làá dāá tùkù-mi?» 11 Joonatan bí Daafiidi yii: «Dāan̄ tí nyā kí cù kusaaun!» Ní bi-liitil nyáń ki búntì.

12 Joonatan bí yii: «M pūtì ti-Dindaan Isirayeel yab Nimbɔtiu yii fool àá daapudal naŋkɔnampuee, m bālifì m-baa ki béè nlandɔkɔ ŋun u cáá a-puee dee. U yaa cáá a-pu nlandɔkɔmɔntee, maa làá tɔ̄ń ubɔ ń tùkù-si. 13 Ama m-baa yaa bíi nyàab̀ kí kpɔ̀-si ní m ŋmí kaa tùkū-see, ti-Dindaan ń dáaĺ m-tafal ŋkpitim pu. M làá yàntī á búntí nì ŋgbansɔŋfi. Unimbɔti ń nīn bí a-cee kii u nín nìn bí m-baa cee puee. 14 M yaa làá nīn bí dimaŋfalin kí nīn cée, á dāá dàkà-mi ti-Dindaan laŋŋaŋfitiiku. Báà m yaa kpíì, 15 á dāá dàkà m-dicaŋkun yab kulaŋŋaŋfitiiu, ki kpáaǹ ŋyunti ŋun ní ti-Dindaan làá dāá kúntí a-nannanliibi kɔkɔ ubɔ ubɔ kitiŋ puee^b.» 16 Niinee ní Joonatan pūtì ki pōoǹ Daafiidi nì u-dicaŋkun yab ki lī yii: «Ti-Dindaan ń dāá tɔ̀ Daafiidi nannanliibi ipɔntoon.» 17 Joonatan bí Daafiidi yii ú pùtī kí pòon̄ kubɔɔtiiu kun bi cáá tɔb puee pu. Di sá yii Joonatan nìn néeń Daafiidi kii u nín néeń u-ba puee ní.

18 Ní Joonatan fātìi bí yii: «Fool di fu sá uŋmapɔɔn jiŋaaliu. Bi làá fu béé yii a kpá, kun puee a-jal làá fu nīn yú fám. 19 Daapudalee, á dāá cù laakin tibɔti nee nín kíĺ a nìn cūtì ki bál̀ee. Á yūĺ Eeseel taŋkpal caŋin. 20 Man làá dāan̄ kí bíití mpaan ŋubɔ pu kí tɔ̄ ipiin ita. 21 Míǹ boonee, m làá tɔ̄ m-naacimpɔmbiki ú cùú nyàabìń-i. M yaa bí-u yii: <Ipiin bí a-nyɔkɔpu fiii, cùú cóotiń-iee!>, an dàkà yii an sá á gítiń mmɔŋki ní tiba kaa làá ŋá-si. Nì ti-Dindaan puee, á taa fàŋkì. 22 Ama m yaa téeń ki tùkū m-naacimpɔmbikee yii: <Ipiin bí ndan a-nyɔkɔpuee!>, mimmee á nīn cá, di sá yii ti-Dindaan di là á búntí. 23 Ama an yaa kíǹ man nì si nín pūtì ki pōoǹ tiŋyee, ti-Dindaan di làá tūtuǹ-ti tí nīn yú deedee kí nīn cá jaanjaan.» 24 Niinee Daafiidi cūtìi bál̀ kusaaun.

Uŋmapɔɔn jiŋaaliu dalee, ní ubɔti kāl̀ bí jī tijin. 25 U nìn kāl̀ u-jal din pu u pée kpààa kàal̀ee. Di nìn yú ki nákáǹ digundi. Joonatan nìn kā ki túĺ-u, ní Abineer kā ki kɔ́ĺ-u. Ama Daafiidi jal nìn yú fám. 26 Yaadalee Saayuul kaa nìn lī tiba, di sá u nìn lī u-neen yii: «An yaa yíì, waa nyí ní ki kɔ́ tijɔkɔndi tiban. Báà an ŋá pu, u kɔ́ tijɔkɔndin ní.» 27 Ama uŋmapɔɔn jiŋaaliu ŋwinliliiti dalee, Daafiidi jal tí dɔ̄ fám waa bí. Ní Saayuul bālifì u-jipɔɔn Joonatan yii: «Ba pu ní Jeesee jipɔɔn kaa dɔ́miń fool nì díǹ ki jíń tijin ní?» 28 Ní Joonatan kíí-u yii: «Daafiidi mēē-mi nsan yii u làá cù Beetileem. 29 U bí-mi yii: <M gbāam̀-si, pɔ̄-mi nsan ḿ cù m-dumpu, di sá yii ti cáá kudicaŋu saraa ubɔ ki làá ŋá ti-tiŋkin, ní m-maan bí yii an pée sá ḿ dāan̄ ní. An puee, pɔ̄-mi diyimɔɔl ḿ cùú ká m-mambi.> An pu ní waa dɔ́miń ki kāl̀ ubɔti cee bí jī tijin.» 30 Niinee ní Saayuul fōō u-jipɔɔn Joonatan pu diŋuul ní ki téeń yii: «Kibɔpimpiŋ kin bí nee! M nyí a nín yú Jeesee jipɔɔn boonee. Si nì a-na cooi dee. 31 Ŋyunti ŋun Jeesee jipɔɔn bí dimaŋfalinee, a pée kpá kí kpántí ubɔti ní a-beel kpá kí kàl̄ kí báań. Kɔŋkɔnnee, yàntī bí cùú cúuń-u kí cáań-mi doo, di sá yii u máaǹ bí kpɔ̀-u ní.» 32 Ní Joonatan kíí u-baa yii: «Ba pu ní u máaǹ kí kpú ní? Ba ní u baasii ŋá ní?» 33 Ní Saayuul dúkutì kikpaŋ kí bàà fáá-u. Niinee Joonatan béè yii u-baa baasii lēē kí pée kpɔ̀ Daafiidi ní. 34 Joonatan yíkì tijin pu nì diŋuul ki yíì kaa ti jíń tiba jiŋaal gbanti winliliitiŋu dal, kun puee u-baa nín nìn sīī Daafiidi miŋyee nìn kɔ́ǹ-u kunimbaau.

35 Kutaa wúntèe ní Joonatan nín cá kusaaun laakin u nì Daafiidi nìn sòon̄ ki yóoǹ yii bi làá ká tɔbee. Kinaacimpɔmbiki kiba nìn céeǹ-u. 36 Joonatan bí kinaacimpɔmbikee yii: «Á sāǹ kí cùú cóotiń-mi ipiin in m làá tɔ̄ nee.» Ní kinaacimpɔmbikee sáǹ ki búntì, ní Joonatan tɔ́ mpiin an cāatì ki-pu. 37 Kinaacimpɔmbikee nín bàn̄ laakin mpiinee cɔ́ee ní Joonatan téeń yii: «Mpiinee kaa cɔ́ ndan a-nyɔkɔpuɔɔɔ? 38 Nín̄ cá malaa, taa yūĺ!» Ní kinaacimpɔmbikee cūtìi cóotìń mpiin ki nín gítiń u-kpiliu cee. 39 Kinaacimpɔmbikee kaa nìn nyí tin nìn bíi jītée. See Joonatan nì Daafiidi baba di nìn nyí. 40 Joonatan nìn dū u-tɔbu nì ipiin ki tīī kinaacimpɔmbikee, ní ki bí-kì yii: «Cáá kpìnnì.» 41 Kinaacimpɔmbikee nín kùǹee ní Daafiidi nyánní ditaŋkpakpukul boon laakin u nìn bál̀ee. U nìn gbāaǹ Joonatan nimbiin u-yigbeel tūū kitiŋ ŋfunyɔm mita. Boonee ní bi kpàl̄ tɔb ní bi-liitil súń tikpil ki yúntì. 42 Ní Joonatan bí Daafiidi yii: «Nín̄ cá nì ŋgbansɔŋfi. Di sá yii ti-liitil pūtì ki pōoǹ tɔb ti-Dindaan yindi pu. Ti-Dindaan ń nīn sá man nì sii nì ti-maaliŋun yab seeradaaŋwu kí nīn cá jaanjaan.>»