Samiyeel Peepeekaa 19

Joonatan bíi mɔ́tí Daafiidi pu

1 Saayuul nìn tùkū u-jipɔɔn Joonatan nì u-kàliŋkpilib kɔkɔ yii u là bí kpɔ̀ Daafiidi. Ama Saayuul jipɔɔn Joonatan nì Daafiidi nìn kɔ́ tɔbin tiŋan. 2 Ní Joonatan tùkū Daafiidi yii: «M-baa Saayuul nyàab̀ kí kpɔ̀-si. An puee fool kutaafaauee, á fu nín̄ nyíǹ a-ba. Á fu báĺ kí taa nyā. 3 M làá fu céeǹ m-baa tí cù kusaau laakin a làá cùú báĺee. M làá fu sòoǹ nì m-baa a-pu. U yaa fu sòon̄ puee, m làá tùkù-si.»

4 Joonatan sòon̄ Daafiidi ŋanti pu u-baa Saayuul cee. U bí-u yii: «Ti-baa ubɔti, á taa ŋá a-tɔntɔnliu Daafiidi ikpiti, kun puee waa pée ŋá-si ikpiti iba. Ama atummɔnti ŋin u túnnée cáań-si ipaati ní. 5 U nìn dū u-maŋfal ki sú ní ki kūū ufiiliistiija. Ŋwiin gbantee, ti-Dindaan nìn tīī Isirayeel yab kɔkɔ dijajikpaandi. Sii a-ba nìn ká ki fāal̀. Kin ba pu ní a làá ŋá ikpiti kí kpɔ̀ Daafiidi un kaa ŋá tibee fám.» 6 Niinee Saayuul gbìl̄ ki tīiǹ Joonatan ní ki pūtì yii: «M pūtì ti-Dindaan yii baa làá kpɔ̀ Daafiidi.» 7 Niinee Joonatan yíiń Daafiidi ní ki tùkū-u tin jítèe kɔkɔ. U nìn cáań Daafiidi Saayuul cee, ní Daafiidi fātìi kíĺ ki bíi tūǹ u-tundi kii u nín nìn pée bí ki tūǹ pu dooooyee.

Miikaal fīī Daafiidi

8 Fiiliistii yab nì Isirayeel yab jaaku fātìi tí kíĺ. Daafiidi cūtì ki jáń ki pɔ́ɔkiǹ-bi sɔ́kɔ sɔkɔ, ní bi sáǹ-u.

9 Dalbee, ti-Dindaan tí túnní ŋfaŋkpitim miba mi dɔ́miń ki kɔ́ Saayuul. U nìn kā u-dumpu ki ŋúb́ kikpaŋ. Daafiidi nìn kā u-cee ki bɔ̀ɔ́ kubeeu. 10 Saayuul tɔ́ u-kpaŋki kí bàà yā Daafiidi kí nákań digundi. Ama Daafiidi nìn lóotì ní kikpaŋ cūtìi yá digundi ki báaǹ. Kunyeeuee ní Daafiidi sáǹ ki ŋmátì. 11 Saayuul dū binib ki tú Daafiidi dumpu bí cɔ̄ŋkì-u kutaa yaa wúntì kutaafaauee bí kpɔ̀-u. U-nimpuu gbìl̄ ní ki tùkū-u yii: «A yaa kaa sáǹ kunyeeu nee, fool bi làá fu kpɔ̀-si^a!» 12 Ní u-nimpuu yōoǹ-u ki dī tɔkɔla pu ki nāatì boon ní u sáǹ ki ŋmátì. 13 Miikaal yōoǹ diwaal ki bíl̀ Daafiidi dooŋu pu, ní ki dū ŋŋɔgban ki bíl̀ diyil pú, ní ki dū dibɔkutikpaandi ki bīiǹ di-pu múlmul. 14 Bininjab bin Saayuul túnní bí dāá cúú Daafiidee bāańee ní u-nimpuu bí-bi yii: «U būǹ.» 15 Ní Saayuul fātìi gíiǹ-bi ki tú bí cùú ká Daafiidi. U bí-bi yii: «Yòon̄nímaan-u kí kpáaǹ u-dooŋu ḿ kpɔ̀-u!»

16 Binibee fātìi bàn̄ Daafiidi dumpu ki kpēēyee diwaal di pá ndoo pu, ŋŋɔgban dɔ̄ diyil púee. 17 Ní Saayuul bí Miikaal yii: «Ba pu ní a kíil̀-mi ki yāntì m-nannanliu sáǹ ki ŋmátì.» Ní Miikaal kíí-u yii: «Úǹ di bí-mi yii: <A yaa kaa yāntì m sáǹ ki ŋmátì, m làá kpɔ̀-si.>»

Saayuul nì Daafiidi bí Raama

18 Daafiidi sáǹ mimmee ní ki búntì Samiyeel cee Raama, ki máafì-u Saayuul nín ŋá-u tiŋyee kɔkɔ. Ní u nì Samiyeel cūtìi kóò Nayooti. 19 Bi cūtìi tùkū Saayuul yii: «Kpèè Daafiidi cūtìi bí Nayooti tiŋkin, Raama caŋin.» 20 Ní Saayuul tú binib bí cùú cúuń-u. Bi bàn̄ee ki ká Unimbɔti bɔnaatiliibi dikitil, bi-kpiliu Samiyeel līī bi-nyɔkɔpu bi fītì ki bí ki nàatī Unimbɔti bɔti. Ní Unimbɔti Fam kɔ́ binib bin Saayuul túnnée ni ní bi mun fītì. 21 Bi dɔ́miń ki tùkū Saayuul ní u dū biba mun ki tú, bi mun bàn̄ee ki fītì. Ní u dū bitataatiibi ki tú, bi mun tí bàn̄ee ní ki fītì. 22 Niinee ní Saayuul yíkìi nín cá u-ba Raama. U bàn̄ Seeku nyimbɔbikpaandee ní ki bālifì yii: «Samiyeel nì Daafiidi bí la pú ní?» Ní bi bí-u yii: «Bi bí Nayooti, Raama caŋin.» 23 U cá ki bàn̄ nsannee ní Unimbɔti Fam kɔ́ u mun ní u fītì ní u nìkī u-saŋŋu ki tin bàn̄ Nayooti, Raama caŋin. 24 Niin ní u mun pēetì u-bɔkutiŋ ní ki fītì Samiyeel nimbiin. U nìn lítì ki dɔ̄ dicancaŋgbeel ŋwiin gbanti nì kunyeeu kɔkɔ. An pu ní bi lì yii: «Saayuul mun kpántì Unimbɔti bɔnaatiliu níii?^b»