Samiyeel Peepeekaa 18

Joonatan nì Daafiidi bɔɔtiiku

1 Daafiidi nín sòon̄ nì Saayuul míǹ ki dóòyee ní u-bɔti kɔ́ Joonatan, ní u dū u-ba ki nákáǹ-u ní ki néeń-u kii u nín néeń u-ba puee. 2 Saayuul kaa nìn yāntì Daafiidi fātì u-baa dumpu yaadal, ní u fōō-u u bí u-cee. 3 Joonatan nìn yāntì u nì Daafiidi pōoǹ ki pūtì kí nīn sá bibɔɔtiibi, kun puee u nìn néeń-u kii úǹ u-bee ní. 4 Joonatan nìn pēetì u-bɔkutikpaandi ki dūu tīī Daafiidi. U nìn tīī-u u-bɔkutiŋ mun, áli ki dū u-tàataajiki nì u-tɔbu nì u-gbajau ki tīī-u.

5 Ŋyunti kamaa Saayuul yaa nìn tú Daafiidi kujaauee, u nìn jáà ki jīǹ ní. An pu ní Saayuul nìn dū-u ki ŋá u-janjakpiliu. Samaa kɔkɔ nìn néeń u-bɔti, ki kpáaǹ Saayuul kàliŋkpilib.

Saayuul bíi nyàab̀ kí kpɔ̀ Daafiidi

6 Daafiidi nín kūū ufiiliistiija Gooliyaati ki fātìi kùnnée, binimpoobi nìn nyánní Isirayeel yab timmu kɔkɔn ki túŋkì ubɔti Saayuul ki gà ilan ki ŋōō ki kūuntí nì dipɔɔpindi ki bɔ̀ɔ́ ŋgaŋgamu nì cancakantib. 7 Bi nìn gà ilan ki kíikí tɔb yii:

«Saayuul kūū binib kutuku,

ní Daafiidi kūū binib cutimaanyi^a.»

8 Saayuul nín gbìl̄ mimmee ní u fōō diŋuul ŋkpitim pu, di sá nlanee kaa nìn mɔ́ɔkiǹ-u. U nìn bí yii: «Bi bí yii Daafiidi kūū binib cutimaanyi ní man kūū binib kutuku jaa! Mimmee tin pée kíǹ ú fōōyee di sá dibeelaa!» 9 Kí yòon̄ yaadalee, Saayuul nìn kíǹ ki nyí nì u-ba nì Daafiidi ní.

10 Kutaa wúntèe Unimbɔti túnní ŋfaŋkpitim miba, mi dɔ́miń ki kɔ́ u-ni ní u fītì u-diikun. Daafiidi nìn bíi bɔ̀ɔ́ kubeeu kii u nín pée kpààa bɔ̀ɔ́ puee. Saayuul nìn ŋúb́ u-kpaŋki u-ŋaan. 11 Dicilpuee Saayuul dū kikpaŋ ki tɔ́ Daafiidi ki lī yii: «M làá pée yā Daafiidi kí nákań digundi ní.» U ŋá míǹ mba mbee mili, ní Daafiidi lóotì. 12 Saayuul nìn fāŋkì Daafiidi, kun puee u nìn béè yii ti-Dindaan bí Daafiidi cee ní ki dū úǹ ki fá. 13 An pu ní Saayuul kākatì-u u-cee ní ki lēē-u ú nīn sá bijanjaliibi kutuku kpiliu. Kí yòon̄ ŋyunti gbantee, bi yaa ti cá kujaauee, Daafiidi di nìn līī u-janjakitil nyɔkɔpu. 14 Tin kɔkɔ Daafiidi yaa nìn ŋáańee, an nìn bútí-u ní, kun puee ti-Dindaan nìn bí u-cee. 15 Saayuul nín ká an bútì-u miŋyee ní u fāŋkì-u. 16 Ama nì míǹ kɔkɔee Isirayeel yab nì Juuda yab nìn néeń Daafiidi, kun puee úǹ di nìn lìntī bi-nyɔkɔpu ní bi jáà ki jīǹ.

Daafiidi kpántì ubɔti coo

17 Saayuul bí Daafiidi yii: «M-biseekpiliu Meerab sɔ̀. M làá dū-u kí tīī-si á cáá. Ama a máaǹ kí dàkà difaŋgiil m-tundi poon ní kí já ti-Dindaan jaaku.» Di sá u nìn lī u-neen yii: «Maa làá kpɔ̀ Daafiidi m-ba, m làá yàntī Fiiliistii yab ní ń kpɔ̀-u.» 18 Ní Daafiidi kíí Saayuul yii: «Man di sá ŋma, ní tilati poon ní m-baa dicaŋku nì u-maaliŋu bí Isirayeel yab kansikin, ní man un bí nee ń nīn sá ubɔti coo?» 19 Ama an ŋmāntì ubɔti Saayuul ń dū u-bisal Meerab kí tīī Daafiidi ticatee ní u dū-u ki tīī Adriyeel umeeyoolaaja.

20 Ama Saayuul bisal Miikaal nìn là Daafiidi. Saayuul nín gbìl̄ mimmee ní an mɔ́ɔkiǹ-u. 21 Ní Saayuul lī u-neen yii: «M làá dū-u kí tīī Daafiidi ń cáá án nín làá ŋá pu ú nīn sá-u kutaliŋŋu Fiiliistii yab ń ŋmā kí kpɔ̀-uee.» Niinee ní Saayuul bí Daafiidi nliliitiim yii: «Díǹ nee, a làá kpántí m-coo.» 22 Saayuul tīī u-kàliŋkpilib mara nee bí sòoǹ nì Daafiidi dibalin yii: «Ubɔti néeń a-bɔti ní timbi u-kàliŋkpilib mun néeń-si. An puee kíí kí kpántí ubɔti coo.» 23 Ní Saayuul kàliŋkpilibee cáá an bɔtee ki lī Daafiidi cee, ní úǹ bí-bi yii: «Ni dàkafī yii á nīn sá ubɔti cooyee, an sá gbaŋgbam níii? Man sá usoodaan ní kaa bí tiban.»

24 Ubɔti kàliŋkpilib gíiǹní Daafiidi nín kíí puee ki tùkū ubɔti. 25 Ní Saayuul bí yii: «Ni nín làá sòoǹ nì Daafiidi puee sèé: <Ubɔti kaa là á ŋá kucootiiu. Kun u bàlifī-see di sá á cáań-u Fiiliistii yab kuncooti dilaataal ú tɔ̀ u-nannanliibi ipɔntoon.» Saayuul nìn dàkafī yii u yaa ŋá mimmee, Daafiidi làá kɔ́ Fiiliistii yab ŋaan bí kpɔ̀-u. 26 Saayuul kàliŋkpilib cáań tibɔti tin u lēe ki tùkū Daafiidi. Daafiidi ká yii án nín sá ú ŋá pu kí kpántí ubɔti cooyee ŋān̄. Kí wàatī ŋyunti ŋun ubɔti yóoǹee ń bàńee, 27 ní Daafiidi nì u-naacimbi búntì kujaau ki kūū Fiiliistii yab bininjab alaataa ali. Daafiidi nìn lēeń bi-kuncooti ki cáań bi kàan̄ ubɔti nimbiin ú kpántí ubɔti coo. Míǹ ní ubɔti Saayuul dū u-bisal Miikaal ki tīī Daafiidi cáá.

28 Saayuul ká ki béè yii ti-Dindaan bí Daafiidi cee ní u-bisal Miikaal néeń-u. 29 Niinee Saayuul mɔ̄tìi fāŋkì Daafiidi, ní ki kíǹ ki ná-u an kaa cáá digbèendi.

30 Fiiliistii yab bɔtiibi nìn dòoń ki jáà nì Isirayeel yab. Kujaau kamaa poonee, Daafiidi nìn jáà ki pɔ́ɔkiǹ binannanliibi ki jítiǹ Saayuul janjaliibi bin kíǹee. An nìn yāntì u nyáń diyindi tikpil.