Samiyeel Peepeekaa 17

Daafiidi nì Gooliyaati bɔti

1 Fiiliistii yab kpáfì bi-janjaliibi kí cù dikɔ̀ndi. Bi nìn kóoǹ ki kpáfì Sookoo, Juuda tiŋki kiban, ní ki gāā bi-janjanaapaal Eefeesi-Damiim, Sookoo nì Aseeka kansikin. 2 Ní Saayuul mun nì Isirayeel yab janjaliibi kpáfì ki gāā bi-janjanaapaal isufi in bi yíì Teereebintee^a tantakalin, ki bɔ́ntì dikɔ̀ndi ki cí Fiiliistii yab. 3 Fiiliistii yab nìn tɔ́kɔ́ dijool diba pu, ní Isirayeel yab mun tɔ́kɔ́ dijool din kíǹee pu ní ditantakal dɔ̄ bi-kansikin.

4 Unaaciin ubɔ nìn nyánní Fiiliistii yab janjanaapaalin. Bi nìn yíì-u yii Gooliyaati ní u sá Gaati tiŋkin. U-fɔkɔŋŋu nìn kíǹ fiii kí bà meetab bita. 5 U nìn cíkí tasa kúti fuuliiki, ki pēē digbampɔɔl din cáá apɔkɔ apɔkɔ ki nyìm̀ kii kiiloobi imuŋku ita nyɔkɔmee. 6 U nìn dū tasa kúti ki fúuń u-taaŋi, ki bàl̄ tasa kúti kpaŋki. 7 U-kpaŋki dɔŋu gbìfì kii bisataluliibi dɔyee, ní kikpaŋ biim nyìm̀ ki jítì kiiloobi biluli pu. Un tú u-gbampɔɔlee līī u-nyɔkɔpu. 8 U nìn nyēē ŋkɔnjaloon pu kí túĺ Isirayeel yab janjanaapaal ki tátí yii: «Ba pu ní ni bɔ́ntìń dikɔ̀ndi ní? Man sá ufiiliistiija, ní nimbi sá Saayuul yumbui. Lēēmaan unil ubɔ ú nyānní m-cee doo. 9 U yaa ŋúń ki pɔ́ɔkiǹ-mi ki kūū-mee, timbi làá kpántí ni-yumbui. Ama man di yaa pɔ́ɔkiǹ udaan ní ki kūū-uee, nimbi di làá kpántí ti-yumbui.» 10 Ní unaaciinee gíti bí yii: «M nyáń ki fáá pɔ́ĺee díǹ, ní nyāntiń unil ubɔ man nì u ń já.» 11 Saayuul nì u-naacimbi nín gbìl̄ ufiiliistiijee sòon̄ puee ní dinyoondi kɔ́-bi bi nyùn̄ ŋkpatim.

12 Daafiidi baa nìn sá Eefiraata naakookun ní ki bí Beetileem, Juuda tiŋkin. Bi nìn yíì-u yii Jeesee, ní u nìn cáá jipɔmbi binii. Saayuul yuntiŋuee, u nìn púĺ ní binib nìn tɔ́-u. 13 U-jipɔmbi bikpilib bita nìn nóó Saayuul ki cūtì kujaau. Bi nìn yíì ujipɔŋkpil Eeliyaab, ní ki yíì un pá u-puee Abinadaab, ní ki yíì utataati Sama. 14 Daafiidi úǹ nìn sá ujoolkaa, ní u-mambi bitee bíǹ nìn nóó Saayuul ki cūtì kujaau. 15 Daafiidi nìn cáà Saayuul cee ní ki nìn fàtīi gítiń Beetileem ki kpèé u-baa piii.

16 Gooliyaati ufiiliistiija nìn pée dòoń ki yūlifí Isirayeel yab janjaliibi nimbiin, taafaau nì joou áli iwiin imuŋku ili. 17 Dalbee ní Jeesee bí Daafiidi yii: «Yòon̄ bilee biliŋ ŋin bi kìn̄ee nì kpɔnɔb saalaa nee. Sāǹ malaa kí cùnnì kí tīī a-mambi dijanjanaapaalin. 18 Á kpáaǹ waagaasiibi saalaa nee kí tīī un kpèé bijanjaliibi kutuku kitilee kpiliu. Á kpáàá kpèè yii a-mambi bí laafiyaa, ní kí fōoń ti-ba bi-cee ḿ béé yii bi lafun pɔ̄ɔ̄ tiŋan. 19 A làá ká bi nì Saayuul nì Isirayeel yab janjakitil. Bi bí Teereebinti sufii tantakalin ki bíi jáà nì Fiiliistii yab.»

20 Ku wúntì kutaafaau pɔ̀lpɔlee ní Daafiidi dū u-piii ki kpāaǹ ubɔ, ní ki yōoǹ tijinee kii u-baa nín bí yii ú ŋá puee ki búntì. U bàn̄ dijanjanaapaal puee bijanjaliibi bíi fátí ukaabu kí bòon̄ dikɔmbool pu. 21 Isirayeel yab nì Fiiliistii yab tí nyáń ki yúl̀ ŋkɔnjaloon pu ki túĺ tɔb. 22 Daafiidi bàn̄ee ní ki túutì u-waŋgul ki kpāaǹ un kā ki cí awaŋgulee ní ki sáǹ ki nín cá kujaaun ki cūtìi jáam̀ u-mambi. 23 Ŋyunti ŋun u dáá bíi sòoǹ nì u-mambee ní ufiiliistiija Gooliyaati, ujanjakpil un sá Gaati tiŋkinee tí nyánní u-yab kansikin ki fáá pɔ́ĺee. Daafiidi nìn gbìl̄ tin kɔkɔ u sòon̄ee. 24 Isirayeel yab yaa ká unaaciinee nín bí miŋyee ní bi fàŋkí yɔ́kɔ́ yɔkɔ ki túlifí boon. 25 Isirayeel yab nìn bí ki sòoǹ nì tɔb yii: «Kéè ni ká unaaciin neeyaa, u là kí táká Isirayeel yabee pu ní u tí nyánní nee. Ama ubɔ yaa ŋúń ki kūū-u, ubɔti làá tīī-u tigaajati tikpil. U làá dū u-bisal kí pɔ̄-u ticati, ní kí pɔ̄ u-dicaŋkun yab diyimɔɔl bí taa ti pà lampoo Isirayeel tiŋkin.»

26 Daafiidi bālifì binib bin yú u-caŋinee yii: «Ba ní bi làá tīī unil un yaa ŋúń ki kūū ufiiliistiija nee ki nyántì Isirayeel yab icoo poon ní? Ní ŋma di baasii sá ufiiliistiija un kaa gíí dikpancandi ní ki yú ki sìí Unimbɔti un bí dimaŋfalinee janjaliibi míǹ ní?» 27 Ní bi tùkū Daafiidi kun bi pōoǹ kí tīī un di yaa ŋúń ki kūū unaaciin gbantee. 28 U-maan Eeliyaab nín gbìl̄ u bíi sòoǹ nì bijanjaliibee, ní u fōō u-pu diŋuul, ní ki bí yii: «A nyàab̀ ba doo? Ŋma ní a dū a-pikitiiki ki kpāaǹ kuteeun niin? M nyí a-lambil nì a-pɔɔgbifiŋŋu pu! A pée là kí kpèè kujaauee pu ní a dɔ́miń.» 29 Ní Daafiidi kíí-u yii: «Ba ní m ŋá? Ḿ taa bàlifì tibɔtaaa?» 30 Ní u yāntì u-maan ki cūtìi bālifì ujanjal ubɔ tibɔbaantiil, ní u mun gíiǹ ki téeǹ unipeekaa nín bàà lī puee.

31 Ama binib gbìl̄ tin Daafiidi sòon̄ee ní ki cūtìi dūu máafì ubɔti Saayuul ní úǹ yíiń-u. 32 Daafiidi bí ubɔti yii: «Ubɔ pɔbil ń taa yīkì ufiiliistiija nee pu. Man a-tɔntɔnliu làá cùú já nì u.» 33 Saayuul bí Daafiidi yii: «Saa ŋūǹ kí já nì ufiiliistiija nee. Sii dáá sá kibiki ní, ama doooo úǹ naacimpɔntin ní u pée sá ujanjal.» 34 Ní Daafiidi bí Saayuul yii: «Man a-tɔntɔnliu yaa nìn bíi kpàá m-baa piii ní gbikinti àá digbiŋgbil yaa nìn dɔ́miń kí cúú dipibil dibee, 35 m nìn jì di-boon ní kí fōō dipibil di-nyɔkɔn. Di yaa nìn fātìń kí cúú-mee ní ḿ cúú di-neen ní kí gbá kí kpɔ̀-dì. 36 Man a-tɔntɔnliu kūū gbikinti ki kūū digbiŋgbil. Míǹ ní m làá tí kpɔ̀ ufiiliistiija un kaa gíí dikpancandi nee, kii ipeel gbanti kansikin ubɔee, kun puee u sīī Unimbɔti un bí dimaŋfalinee.» 37 Daafiidi gíti bí yii: «Ti-Dindaan un fōō-mi gbikinti nì digbiŋgbil ŋaŋŋatin ki líìyee làá tí fōō-mi ufiiliistiija nee ŋaan kí líí.» Niinee ní Saayuul bí Daafiidi yii: «Too nín̄ cá ti-Dindaan ń nīn bí a-cee.»

38 Ní Saayuul dū úǹ u-ba janjawanti ki pēeǹ-u. U nìn dū tasa kúti fuuliiki ki cíkiǹ-u ní ki dū digbampɔɔl ki pēeǹ-u. 39 Daafiidi pēeǹ míǹ ki dóòyee ní ki dū Saayuul tàataajiki ki gbìn̄. U nìn mākaǹ kí còom̀, ama ní an kaa cá. Di sá yii waa nìn mántiǹ tiwan gbanti. Niinee ní u bí Saayuul yii: «Maa ŋūǹ kí dū tiwanee kí còom̀, di sá yii an kaa mántiǹ-mi.» Niinee ní Daafiidi lēē Saayuul janjawanti ki bíl̀. 40 Ní u yōoǹ u-kpandɔŋu ní ki lútì ataŋkpee ŋin jɔ̀m̀ee aŋmoo mbunni ki dūu ŋá u-naakpaagbeelkuun. U nìn yōoǹ u-jaataafuŋku ki ŋúb́, ní ki nín cá ufiiliistiijee cee. 41 Niinee Gooliyaati bíi sútí ki mɔ̀tīi pìl̀ Daafiidi. Un nìn tú u-janjawantee nìn līī u-nyɔkɔpu. 42 Ufiiliistiija kpēē ki sīŋkiǹ Daafiidi, di sá u nìn ká yii u sá kinaacimpɔmbiki ki máǹ púlpul ní u-nimbiin ŋān̄ an kaa cáá bí lì. 43 Ní ufiiliistiija bí Daafiidi yii: «M sá kibɔkɔ a dòoń kí já nì mi ki ŋúb́ ŋkpandɔɔɔ?» Niinee ní u yíiń Daafiidi Fiiliistii yab waaŋi. 44 Ní ufiiliistiijee bí Daafiidi yii: «Dāan̄ doo, m làá dū a-wunnanti kí tīī inoon nì ipeel í jī.» 45 Daafiidi bí-u yii: «Sii ŋúbiń kitàataajiki nì kikpaŋ nì dicɔbil ní kí dāá jáǹ man. Ama ti-Dindaan Mpɔŋkɔdaan, Isirayeel yab janjaliibi Nimbɔtiu un a sìíyee yindi ní m làá dūú jáǹ-si. 46 Díǹ nee gba, ti-Dindaan làá dū-si kí ŋá m-ŋaan. M làá kpɔ̀-si kí lēē a-yil. Díǹ gba ní m làá dū Fiiliistii yab janjaliibi nikpiliŋ kí tīī inoon nì ipeel í jī. Niin ní kitiŋ pu nib kɔkɔ làá béé yii Isirayeel yab cáá Unimbɔti. 47 Ní Isirayeel yab bin kɔkɔ kpáfì ki yú doo nee ń béé yii an kaa sá kitàataajiki, kaa ti sá kikpaŋ ní ti-Dindaan cáa fìil̄. Di sá yii ti-Dindaan di yì dikɔ̀ndi nee, ní ki dū-ni ki ŋá ti-ŋaan.» 48 Ŋyunti ŋun ufiiliistiijee bíi sútí ki pìl̀ Daafiidee ní Daafiidi sáǹ malaa ki cūtìi yúl̀ ki túĺ u-nimbiin. 49 Daafiidi dū u-ŋal ki bɔ́ u-gbeelikuun ki lēeń ditaŋkpal diba ki ŋá u-jaataafuŋkun ki tɔ́, ní ditaŋkpal cūtìi cúú Gooliyaati yigbeel. Ditaŋkpalee nìn kɔ́ poon poon ní u lítì dicincibil.

50 Míǹ ní Daafiidi nìn dū kujaataafuŋ nì ditaŋkpal ki jáń ki pɔ́ɔkiǹ ufiiliistiija. U nìn yá-u ki lúkú ní ki kūū-u, kitàataajiki kaa kútì poon. 51 Niinee Daafiidi sáǹ ki cūtìi tɔ́kɔǹ Gooliyaati pu, ní ki cúú u-tàataajiki ki fúutì kujitooun ki púntì-u ní ki lēē u-yil. Fiiliistii yab nín ká yii bi-janjakpiliu kpíìyee ní bi sáǹ. 52 Ní Isirayeel yab nì Juuda yab fáá ijanjakuŋkuunti ní ki fāā ki bīiǹ Fiiliistii yab boon áli ki tin bàn̄ Gaati nì Eekrɔn timmun. Fiiliistii yab nikpiliŋ nìn dɔ̄ Saarayiim dandi pu míǹ ní áli ki tin sāā Gaati nì Eekrɔn timmun.

53 Isirayeel yab jìn̄ Fiiliistii yab boon míǹ ki fātìńee ní ki kɔ́ bi-janjanaapaalin ki fúkúl̀ bi-wanti. 54 Daafiidi nìn yōoǹ ufiiliistiija yil ki cáa cùnnì Jeerusaleem ní ki dū ufiiliistiijee janjawanti ki kɔ́ǹ ki yóoǹ úǹ u-ba bìŋ́ku poon.

Bi cáá Daafiidi ki dàkā Saayuul

55 Ŋyunti ŋun Saayuul nìn ká Daafiidi cá kí já nì ufiiliistiijee ní u bālifì ujanjakpil Abineer yii: «Abineer, ŋma jipɔɔn di sá kinaacimpɔmbiki nee ní?» Ní Abineer kíí-u yii: «Ti-baa ubɔti, maa nyí.» 56 Ní ubɔti bí-u yii: «Bàlifì kí béé un jipɔɔn ní u sée.» 57 Daafiidi nín kūū ufiiliistiija ki fātìi bāańee, ní Abineer yōoǹ-u ki cūnnì Saayuul nimbiin. U nìn ŋúb́ ufiiliistiija yil u-ŋaan. 58 Saayuul bālifì-u yii: «Unaacimpɔɔn, ŋma jipɔɔn di sá-si ní?» Ní Daafiidi kíí-u yii: «A-tɔntɔnliu Jeesee u sá Beetileemee jipɔɔn di sá-mi.»