Samiyeel Peepeekaa 21

1 Míǹ boonee ní Daafiidi^a kíĺ nsan ki nín cá, ní Joonatan mun nín gítiń mmɔŋki.

Daafiidi bí Noob tiŋki usaraaŋakpil Ayiimeeleeki cee

2 Daafiidi búntì Noob tiŋkin usaraaŋakpil Ayiimeeleeki cee. Ní úǹ sáǹní u-wunti jìkì ki dɔ́miń ki túŋkì-u, ki bālifì-u yii: «Ba ŋá ní a nóoń a-baba ubɔ kaa céeǹní-si?» 3 Ní Daafiidi kíí usaraaŋakpil yii: «Ubɔti tú-mi ní ki tīī-mi mara ki lī yii: <Ubɔ ń taa béé tibɔti tin pu m tú-see.> An puee m dàkā m-naacimbi laakin bi làá kíntí-mee. 4 Too, ba jinti di bí a-cee á tīī-mi? Tīī-mi kpɔnɔb biŋmoo àá tin a yaa pée kée.» 5 Ní usaraaŋakpil kíí-u yii: «Maa cáá kpɔnɔfantanti, see kpɔnɔb bin bi cáań ki ŋá saraayee^b. M ŋūǹ kí dū-bi kí tīī-si a-naacimbi yaa kaa gbēē binimpoobi.» 6 Ní Daafiidi kíí-u yii: «Taa gbēē binimpoobi, kii ti nín yaa cá kujaau, taa cáá nsan kí gbēē binimpoobi puee ní. Kí kūtèe, m-naacimbi janjawanti bí circir. Báà ti yaa kaa bíi jáà kujaau nee nì Unimbɔti yindi puɔɔɔ, tijanjawan nín pée gíti dáá bí circiree, ku mun kpántì circir dee.» 7 Niinee usaraaŋakpil dū kpɔnɔb bin bi cáań ki ŋá saraayee ki tīī-u, kun puee kpɔnɔb biba mun kaa nìn gíti bí. An nìn sá kpɔnɔb bin bi nìn páatì ti-Dindaan nimbiin kí fàtīí dū bipɔmbi bin bi dáá púĺee kí páańee ní^c.

8 Yaadal wiiŋŋuee, Saayuul tɔntɔnliu ubɔ nìn bí usaraaŋakpil Ayiimeeleeki cee kí ŋá saraa. Bi nìn yíì-u yii Dooweegi, u sá ueedoomja ní ki nìn sá Saayuul naakpaakpiliu^d.

9 Daafiidi gíti bālifì usaraaŋakpil yii: «Aa cáá kikpaŋ àá kitàataajiki kiba a-cee doo kí tīī-maaa? Ubɔti bɔti tin pu u tú-mee nín páb́ puee, maa ti ká mpaan kí yòon̄ m-tàataajiki àá tijanjawan.» 10 Ní usaraaŋakpil bí-u yii: «Gooliyaati ufiiliistiija un a nìn kūū Teereebinti tantakalinee jiki di bí. Ti dū dibɔkutil ki fìn̄-kì ki dūu dīntì Eefoodi boon. Tijanjawan tin baba pée bée dee. A yaa là kí yòon̄aaa, a ŋūǹ kí yòon̄.» Ní Daafiidi bí yii: «M là, dūú tīī-mi, kitàataajiki gbanti kaa cáá juti.»

Daafiidi bí Fiiliistii yab bin bí Gaatee cee

11 Yaadal wiiŋŋu ní Daafiidi yíkì niin ki sáǹ kaa ti pìlīǹ Saayuul. U nìn dūu bàn̄ Gaati yab bɔtiu Akiisi cee. 12 Ní ubɔti Akiisi kàliŋkpilib bí-u yii: «An kaa sá Daafiidi, Isirayeel tiŋki bɔtiuaaa? Un bi gà ilan ki ŋōō yii:

Saayuul kūū binib kutuku

ní Daafiidi kūū binib cutimaanyeeee^e!»

13 Daafiidi gbìl̄ mimmee ní ki fāŋkì Gaati yab bɔtiu Akiisi tikpil^f. 14 Ní Daafiidi gíiǹ u-ba kii uwaatee, ki sòoǹ fám fam, ní ki yú ki lùtī mpunyɔmu pu, ki yàntī timɔtan kɔ̀tifī u-nyimpul pu^g. 15 Akiisi bí u-kàliŋkpilib yii: «Ni ká yii unil nee sá uwaati ní. Kin ba pu ní ni cáań-u m-cee? 16 Maa cáá biwaatiibi doooo? Kin ba pu ní ni cáań-mi unee ú nīn bí ki ŋáań u-waatitundi m-nimbiin? U-taal kpá kí tāā m-dumpu!»