Samiyeel Peepeekaa 14

Joonatan jáń ki pɔ́ɔkiǹ Fiiliistii yab kitil diba

1 Dalbee, Saayuul jipɔɔn Joonatan bí un ŋúb̀ u-janjawantee yii: «Dāan̄ tí cù Fiiliistii yab janjakitil din bí lapu jandi púee cee.» Ama Joonatan kaa nìn tùkū u-baa báà tiba. 2 Saayuul nìn kā Giibeeya kpaanyɔkɔ busubu bubɔ taapu Miigirɔn tiŋkin, bijanjaliibi kii alaataa aluu nìn bí u-cee. 3 Usaraaŋal ubɔ nìn bí u-cee ki ŋúb́ eefoodi. Úǹ di sá Akituub jipɔɔn Abiiya, Ikaboodi nabiki. Ikaboodi sá Fineeyaasi jipɔɔn ní ki sá Eelii un nìn sá ti-Dindaan saraaŋakpiliu Siiloo tiŋkinee naantiiu. Samaa kansikinee báà ubɔ kaa nìn nyí yii Joonatan búntì.

4 Kí wàatī Joonatan ń bà Fiiliistii yab janjakitil ceeyee, u nìn jítì ataŋkpee ali ŋin nyɔmmu cɔ́m̀ee kansikin. Bi nìn yíì diba Booseesi ní ki yíì din kíǹee Seenee. 5 Ditaŋkpapeekaalee nìn bí ŋgan pú ki túĺ Miikimaasi, ní din kíǹee bí ŋgiil pú ki túĺ Giibeeya. 6 Ní Joonatan bí u-tɔntɔnliu yii: «Dāan̄ tí cù Fiiliistii yab bin kaa gífì akpancanee janjakitil nee cee. An yaa yíì ti-Dindaan làá yūĺ ti-boon, di sá yii ti yaa wīikáaa, ti yaa kaa wīikáaa, tiba kaa lìkintí ti-Dindaan nsan ú tīī-ti dijajil.» 7 Ní u-tɔntɔnliu kíí-u yii: «Tin yaa pée fáatiǹ-see, ŋá míǹ. Tí nīn cá, m pá a-boon.» 8 Ní Joonatan bí yii: «Tí nīn cá binib gbanti cee kí cáá ti-ba kí dàkà-bi. 9 Bi yaa bí-ti yii: <Yūĺmaan niin, timbi làá dāan̄ ni-ceeyee>, ti làá yūĺ dibɔɔbaantiil, taa làá jɔ̄m̀ bi-cee. 10 Ama bi yaa bí-ti yii: <Jɔ̄mìḿmaan ti-ceeyee>, ti làá jɔ̄m̀, di sá yii án di làá dàkà yii ti-Dindaan dū-bi ki ŋá ti-ŋaan.»

11 Bi-liitil nín cá ki dū bi-ba ki dàkā Fiiliistii yab. Ní bíǹ bí yii: «Kpèèmaan, Eebru yab bin nìn sáǹ ki bál̀ ibòónee di nyēennée.» 12 Binibee bí Joonatan nì u-tɔntɔnliu yii: «Jɔ̄mìḿmaan ti-cee, ti làá dàkà-ni tiba.» Ní Joonatan bí u-tɔntɔnliu yii: «Á páanní m-boon, ti-Dindaan dū-bi ki ŋá Isirayeel yab ŋaan.» 13 Ní Joonatan nín dàb̀ ki nyìitī u-ŋalii pu ki bàlim̄ ki cá u-tɔntɔnliu pá u-boon. Joonatan nìn fátí Fiiliistii yab ki bīil̀ ní u-tɔntɔnliu pá u-boon ki púntí-bi. 14 Ŋwiin gbantee, Joonatan nì u-tɔntɔnliu nìn kūū binib kii mmuŋku ní. Mpaan ŋun pu bi nìn bí bi kūū-bee kaa nìn wāā. Dijajil dipeepeekaal dee. 15 Niinee dinyoondi kɔ́ Fiiliistii yab janjaliibi bin nìn gbíntì dijanjanaapaal puee nì bin nìn bí tisatinee nì samaa kɔkɔ. Bijanjaliibi bin yūlifí sintilee nì bin bi bífì bí nīn ŋàfēe mun nìn kɔ́ dinyoondin. Kí kūtèe kitiŋ nìn cīŋkì. Unimbɔti u-ba di nìn kɔ́ǹ-bi dinyoondi gbantin.

16 Giibeeya, Beenjameen tiŋkinee, Saayuul janjaliibi bin nìn yú sintilee nìn bí ki kpèé. Bi nìn ká Fiiliistii yab nín sáń ki pùntī an kɔkɔ puee. 17 Ní Saayuul bí bin bí u-ceeyee yii: «Yíiḿmaan ayin tí kpèè ŋma di nyáń ti-kansikin ki cūtì bi-cee?» Bi yíińee ní ki ká yii Joonatan nì u-tɔntɔnliu kpá. 18 Saayuul bí usaraaŋal Ayiiya yii: «Cáań Unimbɔti dakaau doo.» Di sá yaadal wiiŋŋuee, Unimbɔti dakaau nìn bí Isirayeel yab janjanaapaalin bi-cee. 19 Ŋyunti ŋun Saayuul bíi sòoǹ nì usaraaŋalee ní kuwoou mɔ̀tīi bíi pɔ́ɔkí Fiiliistii yab janjanaapaal pu. Ní Saayuul bí usaraaŋal yii: «Gbèen̄ dibalifil!»

20 Ní Saayuul kpáfì u-janjakitil ní bi nín cá dikɔmbool pu. Bi bàn̄ee ki ká Fiiliistii yab bí ki kù tɔb. An nìn sá fìkilfikilkpaan di kɔ́-bi. 21 Eebru yab bin nìn bí Fiiliistii yab cee ki tūǹ-bi atuunee nìn céeǹ-bi kujaau. Bíǹ nìn fātìi gítì Isirayeel yab nì Saayuul nì Joonatan jandi pú. 22 Isirayeel yab bin nìn sáǹ ki bál̀ Eefiraayiim jooŋŋi puee gbìl̄ yii Fiiliistii yab sáǹ. Niinee ní bi mun kùl̄ ki bīiǹ bi-boon ki jáà nì bi. 23 Ti-Dindaan nìn tīī Isirayeel yab dijajil ŋwiin gbanti.

Isirayeel janjaliibi fīī Joonatan

Bi nìn jáń ki tin jítì áli Beeti-Afeen tiŋki pu. 24 Yaadal wiiŋŋuee, samaa nìn jíń falaa, kun puee Saayuul nìn pūtìi tɔ́ báà ŋma pu ki lī yii: «Un ní ŋwìiń yaa kaa láá jéetì man tɔ̀n̄ m-nannanliibi ipɔntoon ní udaan jíń tijinee, mbusu ń lítí udaan pu.» Samaa poonee, báà ubɔ kaa nìn jíń tijin. 25 Bi-kɔkɔ nìn kɔ́ kubambaŋŋun. Tisiil nìn còol̀ kitiŋ. 26 Bi nín kɔ́ kubambaŋŋunee, bi nìn ká tisiil dɔ̄ ki pùub̀ kitiŋ, ama bi-kansikin báà ubɔ kaa nìn sēē ki dáká, kun puee bi nìn fàŋkí mbusu. 27 Ama Joonatan kaa nìn gbìl̄ u-baa nín yāntì samaa pūtèe. U nìn tāntì ŋkpandɔ ŋun u ŋúb́ee ki sēē tisiil ki dáká ní u-nimbiliŋ ŋāatì. 28 Ní bijanjaliibi kansikin ubɔ bí-u yii: «A-baa bàà pūtì ki tɔ́ samaa pu yii: <Un yaa jíń tijin díǹee, mbusu ń lítí udaan pu.» An pu ní báà ŋma gīī. 29 Joonatan bí yii: «M-baa cáań nnaabu ki tɔ́ kitiŋ pu. Kpèè m nín sēē tisiil ki ŋmɔ́ ki ká mpɔn puee! 30 Samaa kɔkɔ yaa bàà lēē tin ti jáń ki fōō ti-nannanliibi ceeyee ki jíńee, ti nín bàà làá já kí pɔ̄ɔkiǹ Fiiliistii yab puee bàà làá nīn sá ŋkpaamin ní.»

31 Ŋwiin gbantee, Isirayeel yab nìn kūū Fiiliistii yab kí yòon̄ Miikimaasi kí cáá sāā Ayalɔn. Bi nìn gīī púb. 32 Niinee samaa páatìi jéetì tiwan tin bi jáń ki fōōyee pu. Bi nìn cúú ipii nì inaa nì anabil ki lāntì ní ki kāl̀ laakin fatiku dɔ̄ee ki ŋmɔ́. 33 Ní bi tùkū Saayuul yii u-samaau yīntiǹ ti-Dindaan. Bi ŋmɔ́ tinan laakin bi lāntì tiwaŋkuti fatiku dɔ̄ee^a. Ní Saayuul téeń yii: «Ni yīntiǹ mara! Bíntiḿmaan ditaŋkpakpaandi kí cáań doo.» 34 Ní Saayuul bí yii: «Ní yìiǹ samaa kansikin kí tùkù-bi yii: <Báà ŋma ń cáań u-naau àá u-piiiu man cee. Doo ní ni làá kpɔ̀ tiwaŋkuti gbanti kí ŋmɔ́-tì. Mimmee naa làá ti ŋmɔ́-tì fatiku caŋin kí yìntīǹ ti-Dindaan.>» Kujoou gbantee, báà ŋma nìn cáań u-waŋkuluku niin ní ki kūū-kù. 35 Míǹ ní Saayuul máń ti-Dindaan nsaraafan. Ŋúǹ di sá mpeekaa ŋun u máń ti-Dindaanee.

36 Ní Saayuul bí yii: «Tí sìntī kunyeeu nee kí jà Fiiliistii yab boon kí fūkul̀-bi kí kpɔ̀ bi-kɔkɔ áli kutaa nì ku-wuntil.» Ní u-yab kíí-u yii: «A yaa pée ká min ŋān̄ee, ŋá míǹ.» Ní usaraaŋal bí yii: «Tí bàlifì ti-Dindaan kí wàatī.» 37 Ní Saayuul bālifì ti-Dindaan yii: «Ḿ sìntī kí jà Fiiliistii yab boonaaa? A làá dū-bi kí ŋá Isirayeel yab ŋaanaaa?» Ama ŋwiin gbantee Unimbɔti kaa pée kíí tiba.

38 Niinee ní Saayuul yíiń samaa kpilib kɔkɔ u-cee ki bí-bi yii: «Ní nyàab̀maan kí kpèè ikpiti in ní ti ŋá díǹee! 39 M pūtì ti-Dindaan un sá Isirayeel yab fiiliu ki bí dimaŋfalinee yii báà an yaa sá gba m-jipɔɔn Joonatan di ŋá ikpiti gbanti, see bí kpɔ̀-u.» Samaa kɔkɔ poon báà ubɔ kaa gātì-u. 40 Saayuul bí samaa yii: «Nimbi Isirayeel yab kɔkɔ, ní gítímaan dijandi diba, ma mun nì m-jipɔɔn ń yūĺ dijandi diba.» Ní samaa kíí-u yii: «A yaa pée ká min ŋān̄ee, ŋá míǹ.» 41 Saayuul mēē ti-Dindaan yii: «Isirayeel Nimbɔtiu, ba pu ní aa kíí-mi díǹ ní? Ti-Dindaan Isirayeel Nimbɔtiu, an yaa sá man àá m-jipɔɔn Joonatan di yīntèe, án tāā Uriim, an yaa tí sá Isirayeel nibul di yīntèe, án tāā Tumiim^b.» Ní an tāā Joonatan nì Saayuul, ní samaa nyáń tibɔtin.

42 Ní Saayuul bí yii: «Tɔ̄maan kasi kí kpèè man nì m-jipɔɔn Joonatan un ní an sée, ní an tāā Joonatan.» 43 Niinee ní Saayuul bí-u yii: «Tùkù-mi tin a ŋée.» Ní Joonatan bí-u yii: «M ká tisiil ní ki dū m-kpandɔŋu ki sēē ki dáká. M bɔ́ntì kí kpú.» 44 Ní Saayuul téeń yii: «Joonatan, a yaa kaa kpíì díǹ, Unimbɔti ń dáaĺ m-tafal ŋkpitim pu!» 45 Ama ní samaa bí Saayuul yii: «Joonatan yāntì Isirayeel yab ká dijajikpaandi. Waa máaǹ kí kpú. Án làá nīn sá ntimbiil bɔti ní. Ti pūtì ti-Dindaan yii u-yikpilku báà kubɔ kaa làá lítí kitiŋ. Di sá yii Unimbɔti di tútúǹ-u ní u ŋúń ki ŋá míǹ díǹ.» Samaa nín ŋá pu ki fīī Joonatan baa kūū-uee dee. 46 Niin ní Saayuul gbēeǹ kaa ti jìn̄ Fiiliistii yab boon, ní Fiiliistii yab nín kùǹ bi-tiŋkin.

Saayuul beel bɔti

47 Saayuul nín kāl̀ dibeel Isirayeel tiŋki puee, u nìn jáń nì u-nannanliibi bin kóò ki māntìi tú-uee. Bíǹ di sá Moowaab yab nì Amɔn yab nì Eedoom yab nì Sooba bɔtiibi nì Fiiliistii yab. Laakin pú ní u yaa nìn pée fātèe, u nìn jáà ki jīǹ ní. 48 Ŋwiin ŋubɔee, u dàkā tininjati ki jáń ki pɔ́ɔkiǹ Amaleeki yab^c. U nìn jáń ki fōō Isirayeel yab ki nyántì bin nìn dòoń ki fúkuĺ bi-tiŋkee ŋaan.

49 Saayuul jipɔmbi di nìn sá Joonatan nì Yisfii nì Malkisuwa. U nìn cáá bisalib mun bili. Meerab di sá ukpil ní Miikaal sá uwaal. 50 Bi nìn yíì u-nimpuu Akiinoowam, Ayiimaasi bisal. U-janjakpiliu di nìn sá Abineer, Saayuul baawaai Neer jipɔɔn. 51 Di sá yii Saayuul baa Kiisi, nì Abineer baa Neer sá Abiyeel jipɔmbi ní.

52 Saayuul maŋfal wiiŋyi kɔkɔ poonee, u nìn jáń nì Fiiliistii yab nì dinimbinaamandi. An puee u yaa nìn ká ubɔ cáá dikpabil nì dibaatandee, u nìn cútí-u ú kpántí ujanjal ní.