Samiyeel Peepeekaa 15

Unimbɔti fá Saayuul

1 Dalbee ní Samiyeel bí Saayuul yii: «Man ní ti-Dindaan nìn tú ḿ kàan̄-si u-nibul Isirayeel yab pu dibeel. Kɔŋkɔnnee á pīlifì ti-Dindaan bɔti tin m làá sòoǹ nì si nee. 2 Ti-Dindaan Isirayeel Nimbɔtiu Mpɔŋkɔdaan nín lī puee sèé yii: <Isirayeel yab nín nìn nyánní Eejipiti tiŋkin ki dòońee, Amaleeki yab nìn pīiǹ-bi nsan. An puee m làá dáaĺ bi-tafal^a. 3 Kɔŋkɔnnee, cù kí já nì bi kí nàan̄ tin kɔkɔ bi cááyee pílpil, á taa sɔ̄ bi-saai. Á kpɔ̀ bininjab nì binimpoobi, mbiyaamu nì nnaŋgbammamu, inaa nì ipii, igutaamu nì mmamu.>»

4 Ní Saayuul kóoǹ u-janjaliibi ki kpáfì Teelayiim ki kàan̄-bi. Bijanjaliibi bin nìn còom̄ ataayee nìn nyáń kutukub alaataa ali, ní Juuda yab janjaliibi nyáń kutukub saalaa. 5 Saayuul nì u-janjaliibi nìn bàn̄ Amaleeki yab tiŋki caŋin ní ki kɔ́ mbunni ki nákáǹ. 6 Ní Saayuul bí Keeni yab yii: «Nyāmaan Amaleeki yab kansikin kí cù ndan. Maa là yii tin m làá ŋá-bee ń kpáaǹ-ni. Di sá yii Isirayeel yab nín nìn nyánní Eejipiti tiŋkinee, ni nìn ŋá-bi tiŋan.» Niinee ní Keeni yab nyáń Amaleeki yab kansikin. 7 Saayuul kūū Amaleeki yab kí yòon̄ Awiila kí tin cáa sāā Suur, Eejipiti tiŋkin ŋwìiń nyalaŋki pú. 8 U nìn kūū Amaleeki yab kɔkɔ. See bi-bɔtiu Agaagi ní waa nìn kūū. 9 Saayuul nì u-janjaliibi kaa nìn kūū Agaagi nì tiwaŋkuti tin ŋān̄ee, an dàkà yii ipii nì inaa nì tiwaŋkuti tin cáá laafiyee nì apibil. U nìn dū tin ŋān̄ee ki kpáafì kaa kūū-tì. U nìn kūū tin kaa bí tiban kaa ŋūǹ kí kèetēe ní. 10 Niinee ti-Dindaan sòon̄ nì Samiyeel yii: 11 «An wùn̄-mi m nín lēē Saayuul ki kāaǹ dibeelee. Di sá u fātì u-boon ki tīī-mi, kaa dū m-marab bin m tīī-uee ki túń ditundi.» Samiyeel nìn gíí diŋuul ní ki dū kunyamɔŋu ki mēē ti-Dindaan.

12 Kutaafaau pɔ̀lpɔlee, Samiyeel péé kí cùú ká Saayuul. U bàn̄ee ní binib tùkū-u yii: «Saayuul cūtì Kaarmeel ki máń dikumpool. Míǹ boonee ní u kíĺ nsan ki nín sìntī Giilgaal.» 13 Samiyeel bàn̄ ki ká Saayuul ní úǹ bí-u yii: «Ti-Dindaan ń bìin̄ a-boon! M ŋá tin kɔkɔ ti-Dindaan tīī-mi mara yii ḿ ŋée.» 14 Ní Samiyeel bí yii: «Ipii nì inaa di kaa sūǹ ki kpáà m-tafaliŋ naaa?» 15 Ní Saayuul kíí-u yii: «An sá bijanjaliibi di cáań tiwaŋkuti gbanti Amaleeki yab cee. Samaa lēē ipii in ŋān̄ee nì inaa in bí màlmalee ki cáań kí dūú ŋá ti-Dindaan a-Nimbɔtiu saraa. Ama ti kūū ki céetì tin kíǹee kɔkɔ.» 16 Niinee ní Samiyeel bí Saayuul yii: «An ŋmāntì. M làá tùkù-si ti-Dindaan nín sòon̄ nì mi kunyeeu nee puee.» Ní Saayuul bí-u yii: «Nín̄ sòoǹ.»

17 Ní Samiyeel bí-u yii: «Ŋyunti ŋun a nìn dàkafī yii aa bí tibanee, ŋyunti gbanti ní a kpántì Isirayeel naakɔti kɔkɔ yidaaŋwu. Ti-Dindaan u-ba di nìn kāaǹ-si á nīn sá Isirayeel yab bɔtiu. 18 Ti-Dindaan di tú-si ki bí-si yii: <Nín̄ cá! Á kpɔ̀ Amaleeki yab binikpitib gbanti. Á kpɔ̀ kí céetí-bi báà ubɔ ń taa kíń.> 19 Ba pu ní aa pílifì ti-Dindaan nyɔkɔ? Ba pu ní a yōoǹ tin ni jáń ki fōōyee, ki ŋá tin kaa kítèe ti-Dindaan nimbiin míǹ?» 20 Ní Saayuul bí-u yii: «Ti-Dindaan nín bí yii ḿ ŋá puee míǹ deedee ní m ŋá. M cūtì laakin u tú-mee. M kūū ki céetì Amaleeki yab kɔkɔ, see bi-bɔtiu Agaagi baba ní m cúú ki cáań doo. 21 Ama m-janjaliibi di lēē tin ti jáń ki fōōyee poon ipimɔnti nì inamɔnti in bàà sá tí kpɔ̀ kí céetée ki yóoǹ kí dūú ŋá ti-Dindaan a-Nimbɔtiu saraa Giilgaal.» 22 Ní Samiyeel kíí-u yii: «Ti-Dindaan néeń bisaraawɔkaabi nì saraabi bin kíǹee kii unil ń nīn tɔ́ u-nyɔɔbundaaa? Aayee kpataaa! Unil ń nīn tɔ́ ti-Dindaanee jítiǹ saraabi, ní kí sìntī a-ba kí tīī-uee jítiǹ upìja kpam min bi cáa wù ŋŋmi ki ŋáań saraayee. 23 Di sá yii a yaa yíì kaa tɔ́ Unimbɔtee kpitii jítiǹ dibɔɔbɔl kpitii, ní a yaa jáà nì ti-Dindaanee kpitii jítiǹ iwaatooti kpitii. A nín dū ti-Dindaan bɔti ki fée, u mun dū-si ki fá, aa làá nīn gíti sá ubɔti.» 24 Ní Saayuul bí Samiyeel yii: «M ŋá ikpiti, m yīntì ti-Dindaan marab nì a-bɔkpaaŋi. Di sá yii m fāŋkì bijanjaliibi ní ki ŋá bi nín là puee. 25 Kɔŋkɔnnee m gbāam̀-si dū m-kpitii kí pɔ̄-mi, kí céeǹ-mi ḿ cùú jāam̀ ti-Dindaan.» 26 Ama ní Samiyeel bí-u yii: «Kpataaa maa làá cù, kun puee a dū ti-Dindaan marab ki fá, ní ti-Dindaan mun dū-si ki fá, aa ti sá Isirayeel yab bɔtiu.»

27 Samiyeel lī míǹ ki fātì kí nīn cée ní Saayuul cúú u-bɔkutil gbeeŋgbeeŋyi ní an cúu tīl̀ ki gbíntì u-ŋaan. 28 Ní Samiyeel bí-u yii: «Míǹ ní ti-Dindaan fōō Isirayeel beel a-ŋaan díǹ. U dū-dì ki tīī un jítiǹ-see. 29 Á nīn nyí yii ti-Dindaan un sá Isirayeel yab nyootee kaa mɔ́ntáaa, kaa kpántí nlandɔkɔ kii unilee.» 30 Ní Saayuul tí bí yii: «M ŋá ikpiti. Ama m gbāam̀-si, tīī-mi disíndi m-nibul kpilib nì Isirayeel yab nimbiin kí céeǹ-mi tí cù ḿ jāam̀ ti-Dindaan a-Nimbɔtiu.» 31 Ní Samiyeel kíí ki céeǹ-u u cūtì ki jáam̀ ti-Dindaan.

32 Samiyeel bí yii: «Cáaḿmaan-mi Amaleeki yab bɔtiu Agaagi.» Agaagi bāań ki yúl̀ an mɔ́ɔkiǹ-u, ní u lī u-neen yii: «Báà an ŋá pu, baa ti làá kpɔ̀-mi.» 33 Ama ní Samiyeel bí-u yii:

«A-tàataajiki yāntì bibinaatiibi lóò mbiyaamu,

an puee si mun na làá lóó u-biki binimpoobi kansikin.»

Ní Samiyeel kūū-u ti-Dindaan nimbiin Giilgaal.

34 Míǹ boonee ní Samiyeel nín fàtī Raama, ní Saayuul mun nín kùǹ u-dumpu Giibeeya. 35 Samiyeel kaa ti ká Saayuul ní ki dāa kpáàa kpíì. U nìn sūǹ Saayuul pu, di sá yii ti-Dindaan nìn yáliŋkì u nín lēē-u ú nīn sá Isirayeel yab bɔtiuee.