Samiyeel Peepeekaa 13

Saayuul nì Fiiliistii yab jaaku nì u-yìntitam

1 Saayuul nìn cáá kii abin (mmuŋku nì saalaa) ní bi kāaǹ-u dibeel, ní u kāl̀ dibeel (abin imuŋku ili nì abin ali). 2 Saayuul nìn lēē Isirayeel yab kansikin bijanjaliibi kutukub bita. Kutukub bili nìn bí u-cee Miikimaasi nì ntimu mun bí Beeteel jooŋŋi puee, ní kutuku ubɔ un kíǹee bí u-jipɔɔn Joonatan cee Giibeeya, Beenjameen tiŋkin. U nìn yāntì Isirayeel yab bin kíǹee nín kùǹ.

3 Joonatan nìn kūū Fiiliistii yab kɔmandaŋwu un bí Giibeeyayee^a ní Fiiliistii yab gbìl̄. Ní Saayuul yāntì bi búń ŋyin kitiŋ kɔkɔn. Di sá yii u nìn lī yii: «See Eebru yab kɔkɔ ń béé-tì.» 4 Isirayeel yab kɔkɔ gbìl̄ yii Saayuul kūū Fiiliistii yab kɔmandaŋwu, ní Fiiliistii yab kaa ti là bi-nimbil ń ká Isirayeel yab. Niinee bijanjaliibi kɔkɔ cūtìi kpáfì Saayuul cee Giilgaal. 5 Ní Fiiliistii yab mun kóoǹ ki kpáfì kí já nì Isirayeel yab. Bi nìn cáá janjatɔrɔkub kutukub mmuŋku nì saalaa, bitanjakaliibi kutukub biluu, ní bi-janjaliibi wīikí tikpil kii tiŋku gbandi bulee. Ní bi cūtìi ŋātì bi-janjanaapaal Miikimaasi, Beeti-Afeen ŋwìiń nyalaŋki pú. 6 Isirayeel yab nín ká yii bi wúkutìń bi-pu an pɔ́ɔkèe ní bi sáǹ ki kɔ́ itaŋkpalɔkɔn nì ibòó ni nì ntaŋkpafaŋfakamin nì adiin ŋin bi gbìn̄ taapu ki máńee nì afaginni nì anyimbɔbilin. 7 Biba nìn sáǹ ki dūtì Jɔɔdan buŋŋu ki cūtìi bál̀ Gaadi nì Galaadi timmun.

Ŋyunti gbantee, Saayuul úǹ nìn dáá bíń Giilgaal ní u-janjaliibi bin nìn bí u-ceeyee wunti gbáà kpàkpakpa. 8 Saayuul kāl̀ niin iwiin iluli ki cíitì Samiyeel. Di sá yii Samiyeel nìn bí-u yii ú kíntí-u Giilgaal, ama ní kaa cūtì ŋyunti ŋun u síiǹee. Niinee bijanjaliibi sáǹ ki yàl̄ ki wāatì Saayuul. 9 Ní Saayuul bí yii bí cáań-u tiwaŋkuti tin bi làá dūú ŋá saraawɔkaa nì mpèé saraauee. Ní úǹ u-ba ŋá saraawɔkaa. 10 U tin pée lì yii u ŋáań saraawɔkaa ki dóotée, Samiyeel mun dūu bāań. Ní u nyáń ki túŋkì-u ki jáam̀-u. 11 Ní Samiyeel bālifì-u yii: «Ba ní a ŋée?» Ní Saayuul kíí-u yii: «M ká yii bijanjaliibi bíi sáń ki yàl̀, ní ŋyunti ŋun ti yóoǹee, aa bíi bàń ní Fiiliistii yab mun kpáfì Miikimaasi ki bɔ́ntì. 12 Niinee m lī m-ban yii: <Fiiliistii yab làá dāan̄ kí túuǹ-mi Giilgaal ŋyunti ŋun maa láá ŋá saraabi ki sɔ̄ŋkì ti-Dindaan pɔbilee, an pu ní m fōō ditundi gbanti ki ŋá m-ba saraawɔkaa.>» 13 Ní Samiyeel bí Saayuul yii: «A ŋá kii unil un yil lábitèe! Aa ŋúb́ mara un ti-Dindaan a-Nimbɔtiu tīī-see. A yaa bàà ŋúb́ mara gbantee, ti-Dindaan bàà làá yàntī a-dicaŋkun niliu ubɔ ń nīn pée kā dibeel Isirayeel tiŋkin kí nīn cá jaanjaan. 14 A nín kaa ŋúb́ mara un ti-Dindaan tīī-see puee, a-beel kaa làá ti yúntí. Ti-Dindaan lēē unil ubɔ un kā u-pɔbil puee ki dūu kāaǹ dibeel ú nīn sá u-nibul bɔtiu.»

15 Samiyeel yíkì Giilgaal ki túĺ u-saŋŋu. Bijanjaliibi bin kíǹee táá Saayuul ki yíkì Giilgaal ki cūtì. Saayuul kàan̄ bijanjaliibi bin kíǹ u-ceeyee, bi nìn sá binib alaataa aluu nyɔkɔm. 16 Saayuul nì u-jipɔɔn Joonatan nì bijanjaliibi bin kíǹ u-ceeyee nìn gbíntì Giibeeya, Beenjameen tiŋkin. Fiiliistii yab bíǹ nìn ŋātì bi-janjanaapaal Miikimaasi. 17 Dalbee Fiiliistii yab janjaliibi bin bi bífì bí nīn ŋàfēe nyáń dijanjanaapaal pu ki cúu yākatì akiti ata. Dikitipeekaalee nìn túĺ Oofiraa, Suwaal tiŋki watil pú, 18 ní dikitililiitiilee túĺ Beeti-Oorɔn pú, ní dikititataatiilee túĺ kitiŋ kpaanyɔkɔ watil pú, laakin a yaa tɔ́kɔ́ a wāĺ Isaakpan Tantakal, an bí kuteeu watilee.

19 Ŋyunti gbantee baa nìn gíti kāntí ucaa báà ubɔ Isirayeel tiŋki kɔkɔn. Di sá yii Fiiliistii yab kaa nìn là Eebru yab ń mɔ́ɔ́ ntàataajimu nì ŋkpamu. 20 Isirayeel yab kɔkɔ nìn cá Fiiliistii yab cee ní ki lòontí akoo ŋin inaa cáa kùee nì bi-kooŋi nì bi-cɔkɔmmu nì bi-gaamu. 21 Bi yaa làá nìn lòoǹ akoo ŋin inaa cáa kùee nì akoo nì ŋgaamu, àá bi yaa làá nìn tā inyanyee, bi nìn fòol̄ bi yaa yākatì jitɔn mitee, mili pu ní. 22 An puee kujaau dalee, Saayuul nì Joonatan janjaliibi kaa nìn cáá ntàataajimu nì ŋkpamu. See Saayuul nì u-jipɔɔn baba di nìn cáá.

23 Fiiliistii yab janjakitil nìn cūtìi yúl̀ Miikimaasi saŋŋu pu ntaŋkpafaŋfakamin.