Bibɔsoonliibi Gbɔŋku 14

Samsɔn cáá Fiiliistii yab sapɔɔŋwu ubɔ

1 Dalbee Samsɔn sīntì Tiimina tiŋkin ní ki tin dūu ká Fiiliistii yab sapɔmbi kansikin usapɔnnyaan ubɔ. 2 U nín nìn fātìi jɔ́m̀ u-tiŋkinee ní ki sòon̄ unimpuee bɔti u-baa nì u-na cee ki bí yii: «M nín cūtì Tiimina tiŋkinee, m ká usapɔɔn ubɔ Fiiliistii yab sapɔmbi kansikin. Kɔŋkɔnnee m là yii ní cáá úǹ ní kí tīī-mi.» 3 Ní u-baa nì u-na bí-u yii: «Mimmee usapɔɔn kaa bí a-maaliŋu nì a-nibul kɔkɔ sapɔmbi poon á cááaaa? Ba di ŋá ní a là kí cáá Fiiliistii yab bin kaa gíí akpancan nee sapɔmbi ubɔ ní?» Ní Samsɔn bí u-baa yii: «Usapɔɔn gbanti ní m pée là yii á cáá kí tīī-mi, kun puee úǹ di kɔ́-mi!» 4 Samsɔn baa nì u-na kaa nìn nyí yii ti-Dindaan di nìn bíi téekí bi-jipɔɔn ú lēē yii u là an nimpuuee. Ti-Dindaan nìn bíi nyàab̀ nsan ŋun ní u làá dī kí táká Fiiliistii yab tibɔtee ní, kun puee ŋyunti gbantee, u-nibul Isirayeel yab nìn bí Fiiliistii yab taapu ní.

5 Samsɔn nìn nín sìntī Tiimina tiŋkin, u nì u-baa nì u-na. Ŋyunti ŋun bi bàn̄ fiinyi sufii in yú Tiimina tiŋki caŋinee, kpalaayee digbikintipɔmbil diba nyánní kumooun, ki mùuǹ ki túŋkí Samsɔn. 6 Niin ní ti-Dindaan Fam kɔ́ Samsɔn ní u cúú digbikintipɔmbilee ŋŋancal, ki dáaĺ ki tɔ̄ntì-dì kii bi nín dátí kí tɔ̀ntī kiŋɔbiki puee. Ama waa nìn tùkū u-baa nì u-na tin ní u nìn ŋée. 7 Míǹ boonee u nìn nín sìntī Tiimina tiŋkin ki cūtìi sòon̄ nì usapɔɔnee. Usapɔɔnee nìn kɔ́-u tikpil. 8 Iwiŋkaaŋkaa boonee, Samsɔn nìn fātìi yíkì u-dumpu ki nín gítí Tiimina tiŋkin kí cùú cáá unimpuee. U bàn̄ laakin u nìn kūū gbikinti ki bíl̀ee ní ki pāatì kí kpèè digbikintikpilee. U nìn ká dinaŋgbansikitil kā gbikintee wunti poon nì tisiil. 9 Ní Samsɔn lēē tisiil ki ŋá u-ŋaan ki còom̄ ki ŋmóò ki cá. U cōom̀ ki fātìi cúú u-baa nì u-nee, ní ki lēē tisiil ki tīī-bi ní bi mun ŋmɔ́, ama waa nìn tùkū-bi yii digbikintikpil poon ní u lēeń tisiil.

Samsɔn pɔ́ɔǹ Fiiliistii yab mpɔ́ɔn

10 Samsɔn baa nìn sīntì unimpuee dumpu ní Samsɔn cūtìi bɔ́ntì dinimpucaal jiŋaaliu niin, kii binaacimpɔmbi nín nìn pée ŋáań puee. 11 Fiiliistii yab nín nìn pée ká-uee, ní bi lēē binaacimpɔmbi mmuŋku nì saalaa bí nīn bí u-cee. 12 Ní Samsɔn bí-bi yii: «M làá pɔ́ɔǹ-ni mpɔ́ɔn ŋubɔ. Ni yaa ŋúń ki béè-ŋu ní ki lēē ŋu-taapu ki tùkū-mi iwiin iluli in ti làá dūú jī jiŋaal nee poonee, m làá tīī-ni abɔkutifɔkɔ mmuŋku nì saalaa, kí tīī-ni abɔkutikpántikaa mun mmuŋku nì saalaa. 13 Ama ni yaa kaa ŋúń ki lēē ŋu-taapu ki tùkū-mee, nimbi di làá tīī man abɔkutifɔkɔ mmuŋku nì saalaa nì abɔkutikpántikaa mun mmuŋku nì saalaa.» Ní bi bí-u yii: «Pɔ́ɔǹ a-pɔɔŋŋu gbanti tí pīlifì!» 14 Ní Samsɔn bí-bi yii:

«Un ŋmóò poon

ní tiŋmɔkaal nyánní.

Un pɔ̄ɔ̄yee poon

ní mmɔn nyánní.

An sá ba?»

Iwiin ita dāa dūu jítì, binaacimpɔmbee kaa ŋúń ki lēē mpɔɔnee taapu ki tùkū Samsɔn. 15 Ŋwinluluúti dalee ní bi bí Samsɔn nimpuu yii: «Ŋmàtiǹ a-cal ú tùkù-ti mpɔɔnee taapu, an yaa sá fám ti làá wà-si ŋŋmi kí kpáaǹ a-baa dicaŋku kɔkɔ. Ni yíiń-ti kí fūkul̀-ti níii?» 16 Niinee ní Samsɔn nimpuu bíi sūǹ lɔ̀lɔ ní ki bí-u yii: «A pée ná-mi ní, aa néeń-mi. A pɔ́ɔǹ m-dumpu yab mpɔ́ɔn, ama ní kaa lēē ŋu-taapu ki tùkū-mi.» Ní Samsɔn kíí-u yii: «Maa lēē mpɔ́ɔn gbanti taapu ki tùkū m-baa nì m-na gba, ní ki dāa cáa tùkū siii?» 17 Samsɔn nimpuu nìn súń míǹ ní kinyɔmmɔŋ kin bi dūu jíń jiŋaalee kɔkɔ. Ŋwinluluúti dalee, Samsɔn nimpuu nìn páb́-u an gíti lákáǹee, ní Samsɔn lēē mpɔɔnee taapu ki tùkū-u. Ní unimpu yíkìi nín cá ki cūtìi lēē mpɔɔnee taapu ki tùkū u-yab. 18 Ŋwinluluúti gbanti dal kí wàatī ŋwìiń ń jēetée ní kitiŋee nib bí Samsɔn yii:

«Ba gíti mɔ̄ ki jítiǹ tisiil?

Ba gíti pɔ̄ɔ̄ ki jítiǹ gbikinti?»

Ní Samsɔn kíí-bi yii: «Ni yaa kaa bàà dū m-nasaliu ki kùn̄ tikpaal, naa bàà làá ŋmā kí béé man pɔɔŋŋu nee taapu!»

19 Niinee ní ti-Dindaan Fam gbí Samsɔn ní u yíkì ki nín sìntī Asikeelɔn tiŋkin. U bàn̄ ní ki cúú niin yab binib mmuŋku nì saalaa ki kūū, ki fúkúl̀ bi-wanti kɔkɔ ní ki cáań bi-bɔkutiŋ ki tīī binib bin nìn ŋúń ki lēē u-pɔɔŋŋuee taapu ki tùkū-uee. Míǹ boonee ní u fātìi nín kùǹ u-baa dumpu, ki díkí diŋuul an kaa cáá bí lì. 20 Bi nìn dū unimpuee úǹ ki tīī Samsɔn bɔɔ u nì un nìn pée nóó u-nimpucaal jiŋaaliu yuntiŋuee ticati.