Bibɔsoonliibi Gbɔŋku 13

Samsɔn màaltam

1 Isirayeel yab nìn fātìi kíĺ ki bíi ŋáań tin kaa kítì ti-Dindaan ceeyee ní ti-Dindaan dū-bi ki ŋá Fiiliistii yab ŋaan abin imuŋku ili.

2 Uninja ubɔ nìn bí ki nìn sá Sooreeya tiŋkin, Daani naakookun maaliŋu ŋubɔ poon, ní bi nìn yíì-u yii Manoowa. U-nimpuu nìn sá uŋmaŋŋmanti ní, waa nìn cáá kibiki. 3 Ti-Dindaan tuuŋŋu nìn lēē ŋu-ba ki dàkā unimpu gbanti ki bí-u yii: «M nyí a nín sá uŋmaŋŋmanti kaa cáá kibikee, ama a làá cáá dipool kí màal̀ kibininjabiki. 4 Kí yòon̄ díǹ kí nīn cée, á taa ti nyɔ̀ ndamam àá ndaam min kamaa pɔ̄ɔ̄yee, kí taa jī tijin tin kamaa kaa bí circiree, 5 kibininjabiki kin a làá cáá dipool kí màal̀ee pu. Bɔlfi ń taa pée gbēē kibikee yil, di sá kí yòon̄ ŋwiin ŋun ní a làá díkí u-poolee, u làá nīn sá un bi dūu sú Unimbɔtee ní. Úǹ di làá kíĺ kí fīī Isirayeel yab Fiiliistii yab ŋaan.» 6 Ní unimpuee nín kùǹ ki cūtìi máafì u-cal yii: «Unimbɔti niliu ubɔ dɔ́miń m-cee. U náań nì Unimbɔti tuuŋŋu ní a yaa kpēē-uee, an cáá tifaandi. Maa bālifì laakin ní u sée, ní u mun kaa tùkū-mi u-yindi. 7 U bí-mi yii: <Á nīn nyí yii a làá cáá dipool kí màal̀ kibininjabiki. Kí yòon̄ díǹ kí nīn cée, á taa ti nyɔ̀ ndamamaaa, kí taa ti nyɔ̀ ndaam min pɔ̄ɔ̄yee. Á taa jī tijin tin kaa bí circiree mun, kun puee kibininjabiki kin a làá màal̀ee, bi làá dū-kì kí sú Unimbɔti ní kí dāá sāā ki-kúm dal.>»

8 Niinee ní Manoowa mēē ti-Dindaan ki lī yii: «M-Dindaan, m gbāam̀-si, yàntī Unimbɔti niliu un a túnní ti-ceeyee ń fàtīí gítiń kí dàkà-ti min ti máaǹ kí ŋá kí tīī kibikee bi yaa láa màl̄-kèe.» 9 Unimbɔti nìn fōō Manoowa wimmeem ní ki nìn yāntì u-tuuŋŋuee fātìi gítìń unimpuee cee. U nìn kā bukpaan ní, ama u-cal Manoowa kaa nìn bí u-cee. 10 Niin niin ní unimpuee yíkìi sáǹ ki cūtìi tùkū u-cal yii: «Kpèè, kijapaai kin nìn dɔ́miń m-cee yaadalee fātìi tí lēē u-ba ki dàkā-mi!» 11 Ní Manoowa yíkì ki páaǹ u-nimpuu boon ki nín cá kijapaayee cee ki bàn̄ ki bālifì-u yii: «Sii di sá kijapaai kin nìn sòon̄ nì unimpu neeyeeee?» Ní kijapaayee kíí yii: «Iiin, an sá man!» 12 Ní Manoowa bālifì-u yii: «Kɔŋkɔnnee, a nín lī puee yaa láa ŋá mimmee, akoobil ŋilaŋ ní tí kòò kibikee maŋfal wiiŋyi nì ditundi din kì làá tɔ̄ee pu?» 13 Ní ti-Dindaan tuuŋŋuee kíí Manoowa yii: «Tin kɔkɔ ní m kōoǹ a-nimpuuee, ú kòò-tì. 14 Ú taa pée dáká tin kamaa ní bi yaa dū fiinyi subil ki ŋée. Ú taa nyɔ̀ ndamam àá ndaam min pɔ̄ɔ̄yee. Ú taa jī tijin tin kamaa kaa bí circiree, ní kí ŋá tin kɔkɔ ní m tùkū-u yii ú ŋée.» 15 Niinee ní Manoowa bí ti-Dindaan tuuŋŋuee yii: «Yàntī tí tàan̄-si fiii. Ti làá kpɔ̀ diŋɔbil kí tɔ́kɔń kí cáań-si.» 16 Ní ti-Dindaan tuuŋŋuee kíí-u yii: «Báà a yaa tāaǹ-maaa, maa làá jī tijin tin a làá ŋá kí tīī-mee. Ama a yaa là kí ŋá saraawɔkaa, a ŋūǹ kí ŋá kí tīī ti-Dindaan.» Di sá yii Manoowa kaa nìn nyí yii u nì ti-Dindaan tuuŋŋu di nìn bíi sòoǹ. 17 Ní Manoowa bí ti-Dindaan tuuŋŋuee yii: «Bi yíì-si yii ba? Tùkù-ti án nín làá ŋá pu ní tibɔti tin a sòon̄ee yaa láa ŋée tí dāá nyɔ̄ŋkì-see.» 18 Ní ti-Dindaan tuuŋŋuee bí-u yii: «Ba pu ní a baasii là kí béé m-yindi ní? Dì sá maamaaci yindi ní.» 19 Manoowa nìn bɔ́ntì diŋɔbil nì saraa wanti ki dūu páaǹ ditaŋkpal pu ki ŋá saraa ki tīī ti-Dindaan un ŋáań maamaaci tuuŋŋee. Manoowa nì u-nimpuu nìn kíǹ ki yú ki kpèé. 20 Bi dāa kpēēyee, ti-Dindaan tuuŋŋuee bí aŋmilimbil ŋin nìn nyēē nsaraafan pu ki jɔ́ḿee poon ki nín jɔ́ḿ yilpu. Manoowa nì u-nimpuu nín ká mimmee ní bi tātìi dōoǹ dicincibil. 21 Ti-Dindaan tuuŋŋuee kaa nìn gíti lēē ŋu-ba ki dàkā Manoowa nì u-nimpuu. Niin ní Manoowa nìn dūu béè yii kijapaayee nìn lafun sá ti-Dindaan tuuŋŋu. 22 Ní Manoowa bí u-nimpuu yii: «Ti nín pée ká Unimbɔti nì ti-nimbiliŋ nee, ti làá pée kpú ní^a.» 23 Ama ní u-nimpuu kíí-u yii: «Ti-Dindaan yaa bàà là kí kpɔ̀-tee, waa bàà fòol̄ ti-saraawɔkaau nì ti-saraau. Waa bàà làá dàkà-ti tin kɔkɔ ti ká nee, kaa bàà làá tùkù-ti tibɔti tin u tùkū-ti kɔŋkɔnnee.»

24 Unimpuee nìn màl̄ kibininjabiki ní ki pú-kì diyindi yii Samsɔn. Kibiki gbanti nìn wíiǹ, ní ti-Dindaan nìn bīiǹ ki-boon. 25 Maanee-Daani tiŋki kin bí Sooreeya nì Eesitawool timmu kansikinee poon ní ti-Dindaan Fam nìn yāntì Samsɔn péé péé ki nyántì u-pɔŋŋu ki dàkā.