Bibɔsoonliibi Gbɔŋku 12

Kujaau kɔ́ Jeefita nì Eefiraayiim yab kansikin

1 Eefiraayiim yab kóoǹ ki kpáfì ní ki dūtì Jɔɔdan buŋŋu ki cūtì Saafɔn tiŋkin ki bālifì Jeefita yii: «Ba pu ní a kɔ́ Amɔn yab tiŋkin a-baba ki cūtìi jáń nì bi kaa yíiń-ti ti nì si ń nóó kí cù? Ti làá wà a-dicaŋku ŋŋmi kí kpáaǹ sisi a-ba!» 2 Ní Jeefita kíí-bi yii: «Man nì m-nib nìn bí kujaau pu an pɔ̄ɔ̄, ti nì Amɔn yab. M nín nìn yíiń-nee, naa nìn dɔ́miń ki fīī-mi bi-ŋaan. 3 M nín nìn ká yii naa bíi dòoń kí fīī-mee, maa mɔ́tì m-maŋfal pu ní ki kɔ́ Amɔn yab tiŋkin ki jáń nì bi, ní ti-Dindaan dū-bi ki ŋá m-ŋaan. Too, ba gíti ŋá ní ni yíkìń díǹ nee kí dāá já nì mi?» 4 Niinee ní Jeefita kpáfì Galaadi janjaliibi kɔkɔ ní bi jáń nì Eefiraayiim naakookun yab ki pɔ́ɔkiǹ-bi. Kun pu bi nìn jáń kujaau gbantee di sá yii Eefiraayiim yab nìn lī-bi yii: «Nimbi Galaadi yab, ni sá Eefiraayiim naakookun nib ní ki yíkì Eefiraayiim yab kansikin ki sáǹní ki dɔ́miń ki kā Manasee naakookun yab kansikin!» 5 Galaadi yab nìn pīiǹ Eefiraayiim naakookun yab isan in bi nìn dìŋfī ki dùtī Jɔɔdan buŋŋuee. Ŋyunti ŋun ní Eefiraayiim naakookun yab bin nìn sáǹ ki ŋmátèe kansikin ubɔ yaa nìn bāań ki là kí dùtēe, ní Galaadi yab ń bàlifì-u yii: «A sá Eefiraayiim niliu níii?» Udaan yaa kíí yii: «Aayeeyee», 6 ní Galaadi yab ń bí-u yii: «Lì yii: <Ciibooleeti>.» Ní udaan ń bí yii: <Siibooleeti>, kun puee Eefirayiim yab kaa nìn ŋūǹ kí lì an nín bàà sá bí lì puee. Niinee ní bí cúú udaan kí làntì kí bíĺ laakin ní bi dìŋfī ki dùtī Jɔɔdan buŋŋuee caŋin niin. An yuntiŋuee, bi nìn kūū Eefiraayiim janjaliibi binib kutukub imuŋku ili nì bili ní.

7 Ugalaadija Jeefita nìn kpōotì Isirayeel yab abin aluu ní ki dāa nín kpíì, ní bi síb́-u Galaadi timmu kiba poon.

Yibisan nì Eelɔn nì Abidɔn

8 Jeefita kúm boonee, Yibisan un sá Beetileem tiŋkinee^a di nìn kpōotì Isirayeel yab. 9 U nìn cáá jipɔmbi mmuŋku nì saalaa ní ki nìn cáá bisalib mun mmuŋku nì saalaa. U nìn dū u-bisalib ki tīī biniyaŋyambi ticati ní ki nìn cáá bisapɔnnyanyambi mmuŋku nì saalaa ki tīī u-jipɔmbi. U nìn kpōotì Isirayeel yab abin aluli ní. 10 Yibisan nìn kpíì ní bi síb́-u Beetileem tiŋkin.

11 Yibisan kúm boonee, Eelɔn un nìn sá Sabulɔn naakookunee di nìn kpōotì Isirayeel yab. U nìn kpōotì Isirayeel yab abin saalaa ní. 12 Eelɔn nìn kpíì ní bi síb́-u Eelɔn, Sabulɔn tiŋki poon.

13 Eelɔn kúm boonee, Yileel un nìn sá Pireeyatɔn tiŋkinee jipɔɔn Abidɔn di nìn kpōotì Isirayeel yab. 14 Abidɔn nìn cáá jipɔmbi imuŋku ili nì naantiibi mmuŋku nì saalaa ní, ní bi nìn kàal̀ mmanjamu imuŋku ita nì saalaa. U nìn kpōotì Isirayeel yab abin anii ní. 15 Yileel un nìn sá Pireeyatɔn tiŋkinee jipɔɔn Abidɔn nìn kpíì ní bi síb́-u Pireeyatɔn tiŋki kin sá Eefiraayiim naakookun timmu kibee poon, Amaleeki yab jool pu.