Bibɔsoonliibi Gbɔŋku 15

Samsɔn sēē Fiiliistii yab sati ŋŋmi

1 Iwiŋkaaŋkaa boonee, an nìn ŋmāntì ŋyunti ŋun bi cēē bilee jintee, ní Samsɔn nìn nín gítí kí cùú màntì u-nimpuu pu. U nìn ŋúb́ diŋɔbil diba ní ki bí yii: «M là kí kɔ́ m-nimpuu didooŋkaaku poon.» Ama u-nimpuu baa nìn yíì kaa pú-u nsan u kɔ́. 2 U nìn bí Samsɔn yii: «Man dākafì yii aa ti pée là-u ní, an puee man dū-u ki tīī a-bɔɔ un nìn pée nóó-si a-nimpucaal jiŋaaliunee ticati. Ama u-naal bí, ki gíti ŋān̄ ki jítiǹ-u gba. A ŋūǹ kí yòon̄ úǹ kí téeǹ u-maan yil!» 3 Ní Samsɔn bí-bi yii: «Min bí nee m yaa ŋá Fiiliistii yab inikpiti, ubɔ kaa làá kɔ̄kɔl̀-mi.»

4 Niinee ní Samsɔn cūtìi cúú ŋŋɔkɔmu alaataa ata ní ki bɔ́ntì iŋminaapool mun míǹ. U ŋée ní ki kpáfì ŋŋɔkɔmu muli muli, mu-juuŋi túĺ tɔb. Ní u cúú ajuuyee ki gbìn̄ gbìn̄ tɔb, ní ki dū ŋŋminaapool ŋubɔ ki nēeǹ ajuu ali gbindi kamaa kansikin. 5 U ŋá mimmee ní ki dū ŋŋmi ki sēē iŋminaapool, ki gíiǹ ŋŋɔkɔmu ki líì ní mu nín kóò Fiiliistii yab satin. Ŋŋmi nìn wùn̄ bilee un bi nìn cáń ki bíl̀ee nì un dáá gbíntìi yú baa láá cáńee, ki wùn̄ ki kpáaǹ fiinyi sufii nì ɔliifi sufii. 6 Fiiliistii yab bālifì yii: «Ŋma ŋá mimmee?» Ní binib kíí-bi yii: «An sá utiiminaja coo Samsɔn di ŋá míǹ, kun puee u-coo gbanti fōō u-nimpuu ní ki dūu tīī u-bɔɔ un nìn nóó-u u-nimpucaal jiŋaaliunee ticati.» Ní Fiiliistii yab nín jɔ́ḿ Tiimina tiŋkin ki cūtìi wùn̄ unimpu gbanti ŋŋmi, ki kpáaǹ u-baa. 7 Samsɔn tùkū-bi yii: «Too, ní béé yii ni nín ŋá min nee puee, m yaa kaa tɔ̀n̄-ni ipɔntoon maa làá dūú cà.» 8 U nìn cūtìi jáń nì Fiiliistii yab ki pɔ́ɔkiǹ-bi. Míǹ boon ní u nín sìntī Eetaam tiŋkin ki cūtìi kɔ́ ntaŋkpalɔkɔ ŋubɔn.

Samsɔn dū kimaŋ nyɔɔkpaweeŋŋu ki pɔ̄fì Fiiliistii yab

9 Fiiliistii yab nìn jɔ́m̀ Juuda tiŋkin ki ŋātì dijanjanaapaal, ki kāaǹ bi-janjaliibi ki tin sāā mpaan ŋun bi yíì yii Leeyiiyee. 10 Ní Juuda naakookun yab bālifì-bi yii: «Ba pu ní ni jɔ́mìń kí jáǹ-ti ní?» Ní Fiiliistii yab kíí Juuda naakookun yab yii: «Ti jɔ́mìń kí cúú Samsɔn kí ŋá-u kii u nín ŋá-ti puee kí téeǹ ní.» 11 Niinee ní Juuda naakookun yab bininjab kutukub bita yíkì ki nín sìntī Eetaam tiŋkin, ntaŋkpalɔkɔ ŋun poon Samsɔn nìn bée ki bí-u yii: «Saa nyí ti nín bí Fiiliistii yab taapueeee? Ba bɔti ní a ŋá-ti mimmee?» Ní Samsɔn kíí-bi yii: «Bi nín ŋá-mi puee, míǹ ní ma mun ŋá-bi ki téeǹ!» 12 Ní bi bí-u yii: «Too, timbi sīntìń kí bóob́-si iŋmii kí cáá-si kí ŋúbiǹ Fiiliistii yab ní!» Ní Samsɔn bí-bi yii: «Ní pùtīmaan yii nimbi ni-ba kaa làá kpɔ̀-mi.» 13 Ní bi kíí-u yii: «Aayee, ti pée là kí bóob́-si iŋmii kí cáá-si ki cùnnì kí tīī-bi ní, taa làá kpɔ̀-si.» Ní u kíí bi dū iŋmipɔɔn ili ki bóob́-u ki cáá-u ki nyántì ntaŋkpalɔkɔn. 14 Ŋyunti ŋun u tóob́ kí bà mpaan ŋun bi yíì Leeyiiyee ní Fiiliistii yab túŋkì-u nsanni ki kūuntí mpɔn. Ama ti-Dindaan Fam nìn kɔ́-u ní iŋmii in nìn bóob́ u-ŋaliiyee dūu kpántì kii gulfa ní ŋŋmi wùn̄ee, ní ki gbátì u-ŋaliiyin ki lítì. 15 Samsɔn kpēēyee kimaŋ kin bi kūū an kaa láá yúntèe nyɔɔkpaweeŋŋu di dɔ̄ee. Ní u yōoǹ-ŋu ki dūu fátì ki kūū binib kutuku ubɔ. 16 Ní Samsɔn bí yii:

«Kimaŋ nyɔɔkpaweeŋŋu

ní m dūu pɔ̄fì-bi.

M dū kimaŋ nyɔɔkpaweeŋŋu

ki kūū binib kutuku ubɔ.»

17 U lī míǹ ki ŋmíl̀ee, ní ki dū nnyɔɔkpaweenee ki tɔ́ ki fá ndan, ní bi yíiń laakin ŋu tin lítèe yii Ramati Leeyii, taapu di sá yii <nnyɔɔkpaween gbantaŋki>. 18 Ŋyunti gbantee nnyinnyoo nìn bàn̄-u tikpil, ní u tíminsì ki yíiń ti-Dindaan ki lī yii: «Sii di yāntì ní man a-tɔntɔnliu ká dijajikpaandi din bí nee. Mimmee kɔŋkɔnnee nnyinnyoo làá kpɔ̀-mi, ḿ kɔ́ bin kaa gífí nee ŋaanaaa?» 19 Unimbɔti nìn yāntì ditaŋkpakpaandi din nìn bí Leeyii paaŋŋu pu ki cáá mbùńee cúu látì, ní nnyim nyánní. Samsɔn nìn nyùn̄ u-nimbiliŋ cúu ŋāatì ní u fātìi ká mpɔn. An pu ní bi nìn pú nnyimbul gbantee diyindi yii Eeni-Kooree, taapu di sá yii <un yíińee nyimbuliŋu>. Nnyimbul gbanti dáá gbíntìi bí Leeyii paaŋŋu pu ki dāa sāā díǹ.

20 Fiiliistii yab yuntiŋu gbantee, Samsɔn nìn kpōotì Isirayeel yab abin mmuŋku ní.